2 Pɛtɛlɔ 3 - Mʉkpanganɨa nɔ Agɔmɛ ɔ Ɨtakɨtakɨ

Tɔwa ngɨyɛ Yeso Makweso

¹ Inu ɓawai ɓɔ ɓʉkʉnda, ʉbalʉa ngʉwɔ ɓepini, ɨmɨ nɔnɨtɛndakɨa ʉwakɛ. Amati ɔ mabalʉa kapɨnɨ ngʉkɔnanɨ, nakʉnda nenu akɔjʉkaniso, dɔ, ɓieni kʉ nɔ nɨmbɨmbɨanaka yɛta ngbingbii.

² Iɗo ambɔ, ɓieni ta akɔtunguo yaka ngɨyɛ magbɛ kɔta tu ka꞉sugo jɛnɛ, nɔ mapanʉ ngʉka ɓatitima ɓa꞉nɨpanɨa akʉʉ ɔ Makwɔɓɨɨ nɔ Muheiso.

³ Ɨmbɨeni iɗo ɓɔ, akɔ ɓisi ɓɔ mupipio, ɓombi ɓa꞊chwɛanɨa sina, ʉɓa ɓaɓio akɔkpata ta mʉsasa ngʉweɓo wɔta ɓɨɓɨ. Ɓa꞊ɓio nenu akɔyɛnda,

⁴ asugo ɓɔ: «Sɨ Yeso a꞉sugo ga a sina akɔtɔwa.» A tɨa gbanɨ? Dɔ, ɓaba ɓa꞉dʉka tɨa kʉ dʉkanɨ. Yakamɛngana, anɨngwa aka ɓa꞉kɨa-ɔɔ ɨtaka, yaka iɓomu ya ta ngbanga.

⁵ Akɔyakanaka ɓanɨ, ɓakɔɓʉsaa yaka ngɨyɛ ta nɔ iɓu ɓɔ, jɛnɛ pɛɨ, Asɔɓɨɨ a꞉kɨa ɓisi nɔ dɔdɔ, anʉngaka yaka ta nɔ monu ɓʉtʉʉ. A꞉nagbonyoko ɨtaka nɔ mipo, ɔ꞉tɔɨmomaka ɓata kʉ ati ɔ mipo.

⁶ Nɔ, Asɔɓɨɨ a꞉wa dɔdɔ ngɨa ɔ pɛɨ kʉ nɔ mipo ngʉka ka꞉huoko maja nɔgbɛ.

⁷ Kʉɓanɨ, ta akɔ ʉpanʉ mʉngana ngʉwɔnanɨ, Asɔɓɨɨ a꞉ɓoso ɓisi nɔ dɔdɔ ngɨyɔ ɓʉɓʉnʉ, aɓɛtaka ɓisi ngʉɓa ɨyɔ makwɔngɔ, a꞊kio sina-ɔɔ mʉkɔmbʉ wɔ ɓombi ngʉɓa ɓa꞉mʉyaa. Ɓisi ngʉɓɔnanɨ, a꞊wa sina ɓisi nɔ dɔdɔ ta nɔ dyaa.

⁸ Inu ɓawai ɓɔ ɓʉkʉnda, nátɨɓʉsaenimʉ ɓɔ atɨ Makwɔɓɨɨ ɓisi mʉngana ɓa ngbanga ndʉ mago ɛlɔfʉ mɛngana, nɔ mago ɛlɔfʉ mɛngana ka ngbanga ndʉ ɓisi mʉngana.

⁹ Makwɔɓɨɨ a꞊ndaniso agɔmɛ ngɨangɔ kʉ ɨtakɨtakɨ. Yakamɛngana, ɓombi nga ɓɔmɔ ɓatunguo ɓɔ, agɔmɛ ngɨananɨ a꞊gbalɨa gbalɨnɨ. Ɨnadɔ, ɨyɔ Makwɔɓɨɨ a mʉtɨma ʉta akʉʉ eno, angɔbayamʉ ɓɔ mombi pɔ mʉngana ɨyangaa. Yakamɛngana, akʉnda ɓɔ, ɓombi ɓaɓomu ɓɨnecho-gɔ pɛngɛ mʉtɨma nɔ ingono.

¹⁰ Ɨnadɔ, ɓisi ngʉɓɔ Makwɔɓɨɨ, ɓɛ꞊ka sina ndʉ mombi ɔ ndiɓo. Nɔ ɓisi ɓɔngɔ, ɓisi ɓɛ꞊bonio sina nɔ mungito wɔta kisoɓa. Kʉdɔ, lɨkyɛmʉ ngɨlɛ lajɛa akʉʉ ɓisi, la꞊sioko nɔ dyaa. Asɔɓɨɨ a꞊kio sina mʉkɔmbʉ wɔ dɔdɔ, nɔ mʉkyananakɨa wɔ ɓombi ɓɔngɔ kʉ uɓomu.

¹¹ Dɔ, lɨkyɛmʉ liɓomu la꞊yanaka sina ɓanɨ, nɔ́kwananɔ tɨa akɔpemiso ɓɔ, mʉkyananakɨa ngʉweno wa꞊ɓio tanɨ! Nɔ́kwananɔ ɓio nɔ mʉkyananakɨa wɔta uɗo, ʉwa wapananiso ɓɔ náɓaɓotone nɔ Asɔɓɨɨ ta ingono.

¹² Náɓɛtaka ɓɔ ɓisi ngʉɓa Asɔɓɨɨ ɓɛka, nɔ nákʉnda ɓɔ ɓisi ɓɔngɔ ɓɨka gagaa. Nɔ ɓisi ngʉɓɔnanɨ, dyaa ya꞊yanakiso sina ɓisi ta yanakiso. Nɔ ɓʉnja ɓɔ dyaa ngɨyɛnɛnɨ, ɓɔ꞊dolokiso sina lɨkyɛmʉ ngɨlɛ lajɛa akʉʉ ɓisi ta dolokiso, nɔ, lɔnatana ta ndʉ mipo.

¹³ Asɔɓɨɨ a꞉sugo ga a꞊kɨa sina ɓisi ɓɔ ɨtakɨtakɨ nɔ dɔdɔ kʉ ɨtakɨtakɨ, ngɨa ɓungbingbii ɓaɓio-ɛɛ. Yaka ngɨyɛ taɓɛtakɨa, ɨyɛnɛnɨ.

Pɛtɛlɔ enjo mapanʉ akʉʉ ɔ kanganakɨa

¹⁴ Kʉɓanɨ, inu ɓawai ɓɔ ɓʉkʉnda, ngbinga ngɨa ná-ɔɔ aɓɛtaka yaka ngɨyɛnɛnɨ, kɨeni angu, iɗo ambɔ Asɔɓɨɨ ɨnɨgbʉka ta ɓasisekie nɔ majɨɔ, sɔkɔmʉ nɔ ɨɗa yɔ ɓʉɓɨɓɨ kʉɓanɨ.

¹⁵ Ɨmbɨeni iɗo ɓɔ, ɓʉhɛa ngʉɓeno ɓakɔchwɛania ta ingbaa akɔ mʉtɨma wɔta ʉta ngʉwɔ Makweso. Yaka ngɨyɛ Pɔlɔ nduku eso ɔ ɓʉkʉnda, a꞉nɨtɛndakɨa jɛnɛ nɔ nɨmbɨmbɨanaka ngɨyɛ Asɔɓɨɨ a꞉minjo, ɨyɛnɛnɨ.

¹⁶ Yaka ngɨyɛ a꞉ɨtɛndakɨa jɛnɛ amati ɔ mabii ngʉkangɔ maɓomu, ɨyɛnɛnɨ. Amati ɔ mabii ngʉkɔnanɨ, ya nɔ magbaa ngʉka ka ɓʉmʉ akɔpemiso. Kʉɓanɨ, ɓombi ngʉɓa ɓajanga nɨmbɨmbɨanaka, nɔ ʉɓa ɓɛnianiamʉ nɔ ʉpanʉ wɔ ingono, ɓanakɔ anacho kʉ di. Nɔ lɨda ngalɛmɔ amati ɔ Mabii, ɓakɨa kʉ ngbanga. Kʉɓanɨ, ɓahatanaka ta ingwo ngɨyeɓo ɓakwɔɓɔngɔ.

¹⁷ Inu ɓawai ɓɔ ɓʉkʉnda, nánɨɓɨa pɔngɔ dɔ ɨmɨ yaka ta pɛɨ. Kʉɓanɨ, pɛmanakɨeni pɛmanakɨnɨ. Nátɨsɨamʉ ɨngbaa, akɔkpata ɓombi ngʉɓa ɓa꞉yaa mapanʉ kɔ Asɔɓɨɨ. Nátɨyapakisomʉ báya yɛta ɓʉmʉ ngɨyɛ nánayɔ.

¹⁸ Yakamɛngana, ɨsɨnganakeni ta amati ɔ ɨjɨɔ, nɔ nɔ́pemiso Makweso nɔ Muheiso weso Yeso Klisito. Ʉbɨba wiɓio akʉʉ angɔ ɓʉɓʉnʉ, nɔ akɔ mago nɔ mago-ɛ. Ya ɓanɨ.