2 Pɛtɛlɔ 2 - Mʉkpanganɨa nɔ Agɔmɛ ɔ Ɨtakɨtakɨ

Ɓapananakɨa ɓɔ mʉjɛɛ

¹ Akɔ makwaa ngʉka ka꞉chana, magbɛ kɔ mʉjɛɛ ka꞉ɓio jɛnɛ ati ɔ ɓombi. Ɓapananakɨa ɓɔ mʉjɛɛ ɓa꞊chwɛanɨa sina kʉɓanɨ ati eno. Ɓa꞊kumoniso sina mapanʉ kʉ mʉjɛɛ nɔ ɓaɗi, ʉka ka꞉tʉma ɓombi anɨpaa ɨngbaa, akɔɓɔya ta aka ɓayaa-ɔɔ Mʉpananakɨa ngɨa a꞉ɓʉheiso akɔ ɓʉɓɨɓɨ. Kʉɓanɨ, ɓahatanaka ingwo ngɨyeɓo, ɨyɛ yɛka ta gagaa.

² Ɓombi ɓaja ɓa꞊kpataka sina mʉkyananakɨa wɔta ɓɨɓɨ ngʉweɓo, nɔ akʉʉ eɓo, ɓombi nga ɓɔmɔ ɓa꞊pʉnga tɨa yapakiso ɨngbaa ngɨyɛ ingono.

³ Akɔkpatanakɨa nɔ mʉsasa wɔ ɓagyɛgyɛ, ɓapananakɨa ngʉɓɔnanɨ, ɓa꞊nɨdyɨa lɨkyɛmʉ, nenu achwɨa ɓatɔdʉ ɓɔ mʉjɛɛ. Yakamɛngana, anɨngwa ta ɨjɛnɛ, ɓa꞉kio mʉkɔmbʉ ngʉweɓo kioni, nɔ dʉka ngɨyeɓɔ ya tɨa tinene.

⁴ Dɔ, gʉtʉ ta ɓamalaika ngʉɓa ɓa꞉kɨa ɓʉɓɨɓɨ, Asɔɓɨɨ a꞉ɓʉsɨamʉ ɓʉtʉʉ. Yakamɛngana, a꞉ɓugiso, nɔ ɔ꞉ɓʉsangaka nɔ mangbenje amati ɔ umomo, aɓɛtɨa ɓisi ɓɔ mʉkɔmbʉ.

⁵ Asɔɓɨɨ a꞉sɨamʉ dɔdɔ ngɨa ɨjɛnɛ ɓʉtʉʉ. Yakamɛngana, ngbinga ngia adʉka-ɔɔ ɓakwa ɓɔ dɔdɔ nɔ mipo kɔta maja, a꞉heiso ta Nɔa ngɨa a꞉ɓio aɓɨakɨa ɨsaʉ yɔ ɓungbingbii ngʉɓangɔ, ɨyɔ, ɨhɔ nɔ ɓombi nga ɓɔmɔ mɛɗɨanɛka.

⁶ Asɔɓɨɨ a꞉wa gʉlʉ ɔ Sɔdɔmʉ nɔ ɨyɔ Gɔmɔla kʉtaa. Ɔ꞉ya ɓagʉlʉ ngʉɓɔnanɨ, nɔ, ɓɛ꞉ka ta isupu. Asɔɓɨɨ a꞉kɨa ɓanɨ, akɔpana isisenio yɔ yaka ngɨyɛ, ya꞊kɨa sina ɓombi ɓɔta ɓɨɓɨ kʉ ɓaɓomu.

⁷ Yakamɛngana, a꞉heiso Lɔtɨ ngɨa a꞉ɓio mombi ata ngbingbii, dɔ a꞉dya ikoko anɨna mʉkyananakɨa wɔta ɓɨɓɨ nɔgbɛ wɔ ɓombi ɓɔ ɓagʉlʉ ngʉɓɔnanɨ.

⁸ Dɔ, ɨyɔ mombi ata ngbingbii ngɨananɨ, a꞉wolo ɨkʉmbʉ ta ati eɓo, nɔ, ɔɓio anɨna nɔ, nʉka yaka yɛta ɓɨɓɨ ngɨyeɓo masi maɓomu. Kʉdɔ, yaka yɔngɔ yɔɓio nayɔ adyiso ikoko amʉtɨma nɔgbɛ.

⁹ Ɨyɛnɛnɨ yapananiso ɓɔ, ɓombi ngʉɓa ɓakpata mapanʉ kɔ Asɔɓɨɨ, ɨyɔ, a꞊ɓʉɓwanakiso amati ɔ ɓʉkaɓʉkaɨ ɓwanakisoni. Nɔ, ɓiga ngʉɓa ɓɔta ɓɨɓɨ, a꞉ɓʉnapɨa ndʉ akoti, akɔɓɛtakɨa ɓʉkaɓʉkaɨ akɔ ɓisi ɓɔ mʉkɔmbʉ.

¹⁰ Nɔ nɔgbɛ, a꞊pʉnga-sɨ kyananaka ta ɓombi ngʉɓa ɓakɨa ɨɓɔ akpataka ta mʉsasa wɔta ɓɨɓɨ wɔ ndʉtʉ ngɨyeɓo, nɔ yapakiso angu ngɨa ɔ Asɔɓɨɨ. Ɓapananakɨa ɓɔ mʉjɛɛ ngʉɓɔnanɨ, ɓanɔ ambɛlɛmbɛlɛ, nɔ ɓa kʉ nɔ aɗia, nɔ ɓangɔkumomʉ gʉtʉ pɔ asɛaka kʉ nɔ ɓombi ɓɔ ʉbɨba ngʉɓa akʉʉ ɔ ɓisi.

¹¹ Gʉtʉ kʉndʉ ɓamalaika ngʉɓa, ɓɔchanɔ ɓapananakɨa ɓɔ mʉjɛɛ ngʉɓɔnanɨ nɔ angu, ɓangɔɓʉsɛakamʉ, ga pɔ kio mʉkɔmbʉ ngʉweɓo apɛɨ ɔ Makwɔɓɨɨ.

¹² Ɨɓɔ ɓombi ngʉɓɔnanɨ, ɓa ndʉ ɓanama, dɔ, ɓangɛmbɨa ɨkyɛmʉ. Ɓa꞉nɔtanɨa dɔ ɓɨɓʉfaniso alipindi, nɔ ɓɔɓʉwa. Ɓasɛaka ɨkyɛmʉ ngɨyɛ ɓangɔmʉ anɨmbɨa, nɔ ɓa꞊dʉka sina ngbanga kʉndʉ ɓanama ngʉɓɔnanɨ.

¹³ Ya ɓʉkaɓʉkaɨ ngʉɓa, ɓa꞊dya sina akʉʉ ɔ mʉkyananakɨa wɔta ɓɨɓɨ ngʉweɓo ɓa꞉kɨa, ʉwɔʉnanɨ. Ɓakwa ɨɓɔ ɨgyagya akwananakiso mʉsasa wɔ ndʉtʉ ngʉweɓo ta aɓʉmba ɓɔ gbangamu. Ɨɓɔ ɓa ɓombi ɓɔ kwiso soni, dɔ ɓekeni nenu akɔgbʉka aʉmbɔ, ɓakwa ɨɓɔ ɨgyagya ta anʉngaka mʉjɛɛ.

¹⁴ Ɓakɨa mesu ta akʉʉ ɔ ɓoi, nɔ mʉsasa wɔ kɨa ɓʉɓɨɓɨ amati eɓo ta ɓɔ kyɛɛ. Mombi ɔɓienimʉ nɔ báya yɛta ɓʉmʉ, ɓamʉkwisiso ta kwisiso. Akɔ ɨɓɔ, mʉsasa wɔ lɨkyɛmʉ wa apɛɨ ɔ yaka iɓomu. Asɔɓɨɨ a꞉ɓʉgbanga tɨa ngbanganɨ.

¹⁵ Ɓa꞉sɨa ɨngbaa yɔ ingono sɨanɨ, nɔ ɓa tɨa ɓayangaɛ. Ɓakpataka tɨta ɨngbaa mɛngana ngɨyɔ Balamʉ ngɨa mwana ɔ Bɔsɔlɔ, ɨya ɓa꞉minjo ɓagyɛgyɛ akɔkɨa ɓʉɓɨɓɨ. Nɔ, ɨyɔ ɔ꞉ɓʉbaya ta baya.

¹⁶ Ɨnadɔ, akʉʉ ɔ ɓʉɓɨɓɨ ngʉɓɔnanɨ ɓangɔ, iso mɛngana yamʉgɔga ta gɔganɨ. Iso ngɨyɛnɛnɨ, ya꞉chwɛa ndʉ mombi amati ɔ punda ngɨa angɔyaka, agbɛma mʉkyananakɨa wɔ ɓujangijangi ngʉwɔ ɨgbɛ Balamʉ.

¹⁷ Ɓapananakɨa ɓɔ mʉjɛɛ ngʉɓɔnanɨ, ɓa ndʉ lɨkɔ ngɨlɛ lananganaka nanganakanɨ, ga pɔ lɨkʉɓa ngɨlɛ mahuo wɔta ɓʉmʉ watutuo. Asɔɓɨɨ a꞉ɓʉtambanakɨa ɨda mɛngana ngɨyɔ umomo ɓɔ nji.

¹⁸ Ɓakɔyaka yaka yɔ soni, sɔkɔmʉ nɔ ɨngbaa yɔngɔ pɔ kʉɓanɨ. Nɔ ɓakpata tita ɓʉkʉnda ngʉɓeɓo, nɔ kɨa muso akwisiso ɓombi ngʉɓa, ɓɔ꞉ɓwanakɨɔ ɓombi ngʉɓa ɓa꞉sɨa ɨngbaa sɨanɨ.

¹⁹ Ɓapananakɨa ngʉɓɔnanɨ, ɓasigio ɓombi ngʉɓa ɓɔ꞉ɓwanakɨɔ ɓiga ngʉɓa ɓa꞉sɨa ɨngbaa sɨanɨ, ga ɓa꞊ɓio suo tɨa ɓaɓoonokie. Ɨnadɔ, ɨɓɔ ɓa ɓabaya ɓɔ mʉsasa ngʉwa wanaɓɔ atʉma aingwo. Mombi nɔ mombi akɨa ta baya ɔ ɨkyɛmʉ ngɨyɛ yɔmʉchanɔ nɔ angu.

²⁰ Ɓombi nga ɓɔmɔ, ʉɓa ɓɛ꞉mbɨa Yeso Klisito Muheiso nɔ Makweso, ɓa꞉sɨana nɔ ɓʉtɨpɨ ɓɔ ɨtaka ngʉɓa ɓaɗuɗuoko ɓombi sɨananɨ. Yakamɛngana, ndʉ ɓatɔa ɓata kʉ abubaya ngʉɓɔnanɨ, uɓei ngʉweɓo wɛ꞊ka tɨa ɓɨɓɨ nɔgbɛ achana aka wa꞉ɓio-ɔɔ pɛɨ.

²¹ Dɔ ya꞉ɓio iɗo ɓɔ, ɓa꞉tɨpemisomʉ gɔ jɛnɛ ɨngbaa yɔ ingono, dɔ yangɔmʉ iɗo ɓɔ, mombi ɨtɔɨa ɓata ɓʉɓɨɓɨ, ɔpemiseni dɔ jɛnɛ mapanʉ kɔ ingono ngʉka ɓa꞉mʉpanɨa pemisoni.

²² Yaka ngɨyɛ ya꞉ɓʉgbʉka, ya꞉ɓio ngbanga nɔ yaka yɔ ingono ngɨyɛ amati ɔ mingbagu: «Ɨmva ɔtɔwɔ ɓata anɨdya kʉ liweyo ngɨlangɔ», «Nɛmbʉ ngɨa ɔjaɓana ndʉtʉ, a ɓata kʉ akpolonio amati ɔ ɨɓɔtɔ.»