1 Timɔtɛɔ 1 - Mʉkpanganɨa nɔ Agɔmɛ ɔ Ɨtakɨtakɨ

Pɔlɔ ɔɓokuo Tɨmɔtɛɔ

¹ Ʉbalʉa ngʉwa, wɔngwɔ iyani andamɨ, ɨmɨ Pɔlɔ, titima ɔ Yeso Klisito. Ɨmɨ, na꞉natana aɓio titima ɨngbaa akɔ ʉpanʉ wɔ Asɔɓɨɨ, Muheiso ngʉweso, nɔ Yeso Klisito ngɨa ta꞉napɨana-ɔɔ mʉtɨma akʉʉ angɔ.

² Ɨmɨ akɛ, nɔnatɛndakɨɔ ʉbalʉa ngʉa, ʉwɛ, Tɨmɔtɛɔ ngɨa nanasɨka ndʉ mwana asɛmɨ ata mʉnɔtɛ ɓɔ kpɛ, dɔ ʉwɛ, wabaya Klisito, ngbanga kʉndʉ ɨmɨ. Asɔɓɨɨ Aba, nɔ Yeso Klisito Makweso, ɓɨnapananiso ɨjɨɔ, nɔ ɓɔnɛnɨa ikoko, nɔ ɓinutio majɨɔ-ɛ.

Pɛmanɨa nɔ mapanʉ kɔ mʉjɛɛ

³ Ngbinga ngɨa ɨmɨ, na꞉ɓio-ɔɔ anɨsa anɔ Makedonia, na꞉nasigio jɛnɛ ɓɔ tukoo ʉwɛ, ta anɔ Ɛfɛsɔ. Inani, ya nɔ ɓombi ngʉɓa ɓapanɨa mapanʉ kɔ mʉjɛɛ, ʉɓa, yɔkwananɔ naɓɔ agbɛma ɓɔ ɓɨsɨa ta sɨa.

⁴ Nɔ ɓʉɓɨa ɓata, kʉ ɓɔ ɓɨsɨa apanɨa nɨmbɨmbɨanaka ngɨyeɓo, yɔ maduɓa kɔ mʉjɛɛ, nɔ ɨyɛ, yɔ maduɓa kɔ nɔtanakɨa ngɨyɛ ɓaba, ɨyɛ yangɔmʉ nɔ mupipio. Yaka ngɨyɛnɛnɨ, yachwɛiso ta ɗuɗuono ɓʉtʉʉ, sɔkɔmʉ nɔ dada akʉʉ ɔ ɓʉhɛa ngʉka Asɔɓɨɨ a꞉tambanaka. Ɨnadɔ isu, takwana pemiso ɓʉhɛa ngʉɓɔnanɨ, ta ɨngbaa akɔ báya.

⁵ Ɨsɨ yɔ ʉpanʉ ngʉwa, ya ɓɔ ɓombi ngʉɓa ɓa꞉baya, ɓiɓio nɔ ɓʉkʉnda ɓʉja nɔ ɓangɛ. Ɓʉkʉnda ngʉɓa ɓɔchwɛɔ amati ɔ mʉtɨma wɔta uɗo, nɔ itungwio yɛta iɗo, nɔ báya ngɨyɛ ingono.

⁶ Ɓombi nga ɓɔmɔ, ɓa꞉sɨa ɨngbaa tɨa sɨanɨ, nɔ ɓa tɨa ɓayangaɛ, amati ɔ nɨchwa maduɓa kɔta ɓʉtʉɓʉtʉʉ.

⁷ Ɨɓɔ, ɓakʉnda ɓio ndʉ ɓabʉbʉma ɓɔ panɨa mapanʉ ngʉka Asɔɓɨɨ e꞉njo Musa. Ɨnadɔ, sɔkɔmʉ ɓiɓio apemiso ɨsɨ yɔ yaka ngɨyɛ ɓapanɨa, ga pɔ ɨyɛ, ɓanɨmbanaka ga ɓanɨmbɨa iɗo, kʉɓanɨ.

⁸ Tanɨmbɨa ɓɔ mapanʉ ngʉkɔ Musa, ka maɗo, yɔɓieni ɓɔ ɓanakɔ akpataka kʉndʉ aka yɔkwanana-ɔɔ.

⁹ Yɛtɔ anɨmbɨa iɗo ɓɔ, Asɔɓɨɨ ɛ꞉maisomʉ jɛnɛ mapanʉ akʉʉ ɔ ɓombi ɓɔta ngbingbii. Yakamɛngana, ya꞉ɓio ingainga akʉʉ ɔ ɓombi ngʉɓa ɓayaa anʉka ʉpanʉ, nɔ nawɔ, akyananakɨa: ʉɓa ɓɔta ɓʉkaɓʉkaɨ, nɔ ɓombi ɓɔta ɓɨɓɨ, ʉɓa, ɓangɔkumo Asɔɓɨɨ, pɔ ɓayaka ɓɔta tu ngʉɓangɔ, nɔ ʉɓa ɓadʉka ɓɛsɛ nɔ ɓinye ɓeɓo, tɨa kʉ nɔ ʉɓa, ɓakɔmaa ɓombi,

¹⁰ nɔ ʉɓa, ɓakɨa muso kʉ gbaɨ, nɔ ɓague ngʉɓa ɓakɔkwaana ati eɓo, nɔ ʉɓa, ɓagaba ɓombi akɔ ɓagyɛgyɛ, nɔ ɓombi ɓɔ mʉjɛɛ, nɔ ʉɓa ɓakio silika nɔ mʉjɛɛ, nɔ akʉʉ ɔ ɓombi ɓaɓomu ngʉɓa ɓakyananaka di nɔ mapanʉ kɔta ngbingbii.

¹¹ Mapanʉ kɔngɔ, ya Ɨsaʉ yɛta Iɗo ngɨyɛ Asɔɓɨɨ, ngɨyɔ ʉbɨba, nɔ ɨyɔ ɨgyagya, a꞉nenjo ɨmɨ, ɓɔ niɓio aɓɨakɨa.

Pɔlɔ atosio ʉbɨba akʉʉ ɔ ɨjɨɔ yɔ Asɔɓɨɨ

¹² Nakɔtosio Yeso Klisito Makweso ʉbɨba, akʉʉ ɔ angu ngɨa ɨyɔ, a꞉nenjo akɨa tɛa ngɨangɔ. Nɔ, nanayɔ atosio ʉbɨba, dɔ ɨyɔ, ɛ꞉na ɓɔ ɨmɨ, nɔsisekio akɨa tɛa ngɨangɔ.

¹³ Gʉtʉ ndʉ jɛnɛ pɛɨ, na꞉mʉsɛaka, nɔ, nɔ꞉mʉkyananaka, nɔ, nɔ꞉ɓio tɨa kʉ ɓʉkaɓʉkaɨ. Yakamɛngana, Asɔɓɨɨ a꞉nɛnɨa ikoko ta ɨnɨanɨ, dɔ, na꞉ɓio nangɔbayenimʉ Yeso, nɔ, sɔkɔmʉ apemiso yaka ngɨyɛ na꞉ɓio akɨa, kʉɓanɨ.

¹⁴ Makweso a꞉napananiso ɨjɨɔ yɛta ɨja ngɨangɔ, nɔ, ɔ꞉nenjo báya, ɨhɔ nɔ ɓʉkʉnda ɨngbaa akɔ Yeso Klisito.

¹⁵ Ɨsaʉ ngɨyɛ nanʉngaka aka, ya ta ingono, nɔ, yɔkwananɔ ɓombi ɓaɓomu ɓɨɨbaya, asugo ɓɔ: «Yeso Klisito ɛ꞉ka iyani adɔdɔ, aheiso ɓombi ɓɔta ɓɨɓɨ.» Ɨmɨ akɛ, na ndʉ nganya ati eɓo.

¹⁶ Yakamɛngana, Asɔɓɨɨ a꞉nɛnɨa ikoko, nɔ, ɔ꞉baya ɓɔ Yeso Klisito ɨpananiso mʉtɨma wɔta ʉta ngʉwangɔ, nɔgbɛ akʉʉ ɔ asɛmɨ, ɨmɨ, nganya ɔ ɓombi ɓɔta ɓɨɓɨ ɓaɓomu. Ɨyɛnɛnɨ, ya isisenio akɔ ɓombi ngʉɓa ɓa꞊mʉbaya, dɔ, ɓɨnɨanɨa nɔ uɓei wɔ mago nɔ mago.

¹⁷ Oi Asɔɓɨɨ, ngama ata mʉja, nɔ ɨya, a kʉ nangana amati ɔ mago nɔ mago, nɔ ɨyakɛ, angɔwo nɔ ɨya mombi angɔmɨna pɔ nɨna, ʉbɨba nɔ ɨbɨba yiɓio yɛsɔɔ amati ɔ mago nɔ mago-ɛ! Ya ɓanɨ.

¹⁸ Tɨmɔtɛɔ mwana asɛmɨ, ʉpanʉ ngʉwa nanɔwɛ aninjo awɛ, wakpatanakɨa ta nɔ yaka ngɨyɛ magbɛ ka꞉ngaka jɛnɛ akʉʉ asɔɔ kʉ pɛɨ. Mapanʉ ngʉkɔnanɨ akɛ, kɨnenjo iguegue, amati ɔ ʉwa wɔta uɗo ngʉwa waɓɛndaniso,

¹⁹ ɨhɔ nɔ báya nɔ itungwio yɛta iɗo. Ɓombi nganangana ɓa꞉sɨa itungwio yɛta iɗo ngɨyɛnɛnɨ tɨa sɨanɨ. Kʉdɔ, báya ngɨyeɓo yɔ꞉yanaka tɨa kʉ yanaka.

²⁰ Ati ɔ ɓombi ngʉɓɔnanɨ, ya Hɨmɛnɛɔ, nɔ Alɛkɨjandɛlɛ. Ɨmɨ, na꞉ɓʉsɨa alɨkɔndɔ lɔ Sɨtanɨ, dɔ, ɓɨmbɨa ɨmbɨanɨ ɓɔ yangɔmʉ iɗo asɛaka Asɔɓɨɨ.