1 Pɛtɛlɔ 5 - Mʉkpanganɨa nɔ Agɔmɛ ɔ Ɨtakɨtakɨ

Akɔninjo ɓatataɓasie ɓɔ kanisa angu

¹ Ɨtakɨtakɨ ngɨyɛ, nakʉnda aninjo ɓatataɓasie ɓɔ Kanisa ngɨyeno iguegue. Ɨmɨ kʉndʉ mutatamusie, na dɛmʉ ɔ ɓʉkaɓʉkaɨ ngʉɓa Yeso a꞉dya, nɔ, nɛ́꞊nɨanɨa sina nɔ ʉbɨba nga wɔsɛmɨ, kʉ ɨnɨanɨaanɨ, nɔ ɓisi ngʉɓa ʉbɨba wa꞊chwɛanɨa sina-ɔɔ.

² Yaka yɔngɔ ya ɓɔ, pɛmakɨeni ndiba ɔ ɓakɔndɔlɔ ngʉɓa Asɔɓɨɨ a꞉napɨa alɨkɔndɔ leno, sɔkɔmʉ ndʉ ɓanenu akɔtitio nɔ ɓʉkaɓʉkaɨ. Yakamɛngana, kɨeni ta nɔ mʉtɨma ngʉweno ingainga, ndʉ aka Asɔɓɨɨ a-ɔɔ akʉnda. Nátɨkɨamʉ ɓanɨ akɔ yaka yɔ nɨanɨa nɔ ɓagyɛgyɛ, yakamɛngana, kɨeni ɓanɨ ta akɔpananiso ɓʉkʉnda.

³ Nátɨhatamʉ akyɛndakiso ɓakɔndɔlɔ ngʉɓa Asɔɓɨɨ aninjo tɨa nɔ ɓʉkaɓʉkaɨ. Yakamɛngana, ɓieni isisenio yɛta iɗo akɔ ndiba wɔ ɓakɔndɔlɔ ngʉɓɔnanɨ.

⁴ Kʉɓanɨ, ɓisi ngʉɓa Ngama ɔ ɓapɛmakɨa ɓɔ ɓakɔndɔlɔ, a꞊chwɛanɨa sina-ɔɔ, nɛ́꞊nɨanɨa nɔ ɨgaɨ yɔ ɓʉngama yɔ ʉbɨba ngʉwa wangɔmʉ nɔ mupipio.

Ɨmaeni ɓumu amati ɔ báya

⁵ Nɔ ʉgbaa nga weno, inu, ɓandambʉ nɔ ɓasaɓakyɛ, kwaɨeni ɓatataɓasie aɨsɨ. Nɔ tɨa akɔ inu ɓaɓomu, ɓieni nɔ mʉtɨma wɔ nudisoniso ati eno. Dɔ, Mabii kasugo ɓɔ: «Asɔɓɨɨ angɔkanamʉ nɔ ɓombi ɓɔ aɗia, yakamɛngana, apananiso ikoko ngɨangɔ akɔ ɓombi ngʉɓa, ɓanɔ mʉtɨma wɔ nudisoniso.»

⁶ Kʉɓanɨ, disoniseni aɨsɨ ɔ ɨkɔndɔ yɔ angu ngɨyɛ Asɔɓɨɨ, iɗo ambɔ ɨyɔ akɛ ɨnɨbɨba aɓisi ngʉɓa akʉnda-ɔɔ.

⁷ Nápɨeni ɓatumo ngʉɓeno ɓaɓomu apɛɨ Asɔɓɨɨ, dɔ ɨyɔ akɛ, anɨkɨa isingo.

⁸ Nátɨkwenimʉ ɨjɨma, nɔ kanganakɨeni kanganakɨanɨ. Dɔ, mʉkwa weno abɨɨ, anenu ayengio ndʉ kingbi ngɨa anyaka, ahata ɓɔ adya anɨ.

⁹ Ɓɛndaniseni nayɔ, nɔ nɛ́maa ɓʉmʉ amati ɔ báya! Dɔ, nánɨmbɨa iɗo ɓɔ, ɓanduku ɓeno ɓanɨdya ɓʉkaɓʉkaɨ ta ngbanga, aki dɔdɔ asakanaka-ɛɛ ta muɓomu.

¹⁰ Yakamɛngana, ɓʉkaɓʉkaɨ ngʉɓeno ɓa꞊ɓio ta akɔ mwana ngbinga bele. Asɔɓɨɨ ngɨa anɔ ɨjɨɔ nɔgbɛ, a꞉nisoko ɨngbaa akɔ Yeso Klisito, dɔ kumonieni amati ɔ ʉbɨba ngʉwangɔ wɔ mago nɔ mago. Ɨyɔ, a꞊nɨmaiso nɔ a꞊nɨtatanakiso, kʉdɔ, nɛ́maa tɨa ɓʉmʉ amati ɔ báya.

¹¹ Ɓʉngama ngʉɓangɔ ɓiɓio akɔ mago nɔ mago! Yaɓanɨ.

Yaka yɔ mupipio

¹² Sila, nduku ngɨa amati ɔ mʉtɨma ngʉwɔsɛmɨ, ɨyɔ akɛ, ɔnasalɨɔ ɨmɨ nenu atɛndakɨa mwana ɔ ʉbalʉa ngʉwa. Nɔnɨtɛndakɨɔ nenu aninjo iguegue, nɔ nenu atungwiso ɓɔ náɓaɓotone nɔ ɨjɨɔ yɔ ingono ngɨyɛ Asɔɓɨɨ.

¹³ Kanisa ɔ Asɔɓɨɨ ngɨa anɔ Babiloni, ɔnɨɓokuo. Asɔɓɨɨ a꞉mʉchwa ɨyɔ ngbanga kʉndʉ anɨchwa inu. Mwana asɛmɨ Malɨkɔ, ɔnɨɓokuo kʉ ɓokuoni.

¹⁴ Ɓieni kʉ akɔɓokwonoko nɔ, nɔ́naputono ati eno, nɔ ɓʉkʉnda. Inu ɓaɓomu, ngʉɓa ná amati ɔ Klisito, majɨɔ kiɓio nenu!