Yb 22 - Bible en langue Bulu

Elifaz a kobô Yob éyoñe lale

¹ Ane Elifaz môte ya Téman a nga nyoñe nkobô a jô na:

² Ye môta binam a ne volô Zambe a zen éziñ? Momo, môt a yeme wôʼô mam a ne mfi ve mfaʼa wé émien.

³ Ye Nyô a ne Ngul Ese a yene jame te mvaé na ô bo zôsôô ? Nge ô ne nya mvoʼé e mezene môé, a nyoñe jé été?

⁴ Ye A bôme wo amu nkabetan wo kabetane mame ya mbunan, a ye amu nalé nde mia Nye mi bili de ajô?

⁵ Ye mbia mboone wôé a nji bo anen, ye minkobane miôé mi nji bo te nné?

⁶ Amu ô mbe ô nyoñe bobenyoñe biban tekʼétom, ô mbe ô wôléʼé mengômesane me ba ô mbe ô liʼi soé;

⁷ ô nji bo ô vaʼa môt a wôʼô évé mendim, môt a wôʼô zaé ô mbe ô nyume nye bidi.

⁸ Si é mbe jôme ngungule môt, a e môt a nʼénguñ a mebun nye a nga bili je.

⁹ O mbe ô bulaʼane minkus mo zesé. Mo me bobenyui me mbe mbuʼan.

¹⁰ Ajô te nde melam ma bômane wo, a ajô te woñ ô biya wo atemetem.

¹¹ Ye ô ne te yene dibi te? E ndône mendim ja yandane wo nyô?

Ateʼe nleme Yob

¹² Ye Zambe a nji bo ôyabe yôp? Fombôʼô nté ateté e né: abim e ne mbetane yôp!

¹³ Eyoñe te wo bele jô na: Zambe a yeme jé? Yʼa ne tyiʼi mejô e dibi été?

¹⁴ Ke minkut mi nʼasolé jam asu dé, a a nji yene jôm. A bômaʼane njiñelete ya yôp.

¹⁵ Jé! Wo kômbô baʼale je nnôme zen , ñwô bikotekote bi bôt bi nga tôñ?

¹⁶ Be nga bili éyoñ é ngenane te kpwaan, mbôkaʼa wop ô nʼôtôñ wo lôt.

¹⁷ Be mbe be jôʼô Zambe na: Kele bia ôyap. Nde za jame Nyô A ne Ngul ése A ne bo mfaʼa wop?

¹⁸ E too ke na nye a nga jalé akum e menda map. Feʼe bebo abé é ne ma nya ôyap.

¹⁹ Bezôsôô be bôt ba ye yene de a vak, a nyô a ne te bijô a ye kpweʼele be.

²⁰ Ye nyô a ne bia ngame yat a ngenane te jañ? Ye nduan é ngenane te mine mfi wop?

²¹ Kui ñhe tyiñ a Zambe, éyoñe te wo ye bi mvoʼé . Ataté valé, jôme wo ye bi, ja ye bo mbamba jôm.

²² Nyoñe ñyeʼelan anyu dé, a baʼale mejô mé e nleme wôé été.

²³ Nge wo bulan e be Nyô A ne Ngul Ese, wo ye beta tebe, wo ye titan abé e nda éndelé jôé.

²⁴ Wuʼa or e mbuluʼu été, or yʼôfir e mekôʼô yʼatôñ été;

²⁵ A Nyô A ne Ngul Ese a ye bo or wôé, a ye bo mevise me argent mfaʼa wôé.

²⁶ Eyoñe te wo ye bo Nyô A ne Ngul Ese mevaʼa môé. Wo ye bete asu dôé yôp be Zambe.

²⁷ Wo ye loone nye, a Nye ki A ye yalane wo. A wo ye jalé mintiñetane miôé.

²⁸ Nge wo tyiʼi jam éziñ, da ye bobane wo nalé. Efufup ja ye faé e mezene môé.

²⁹ Amu Zambe a bo na minsôñan mi ne njalan a mebun mi ku ve mvolane wé wo yené e be nyô a suu émiene si.

³⁰ A ye kôté toʼo na nyô a bili mekua, ve a ye kôtéban amu mfubane ya mo mé.