YAKOB 5 - Bible en langue Bulu

Ngoʼo mia minkukum

¹ Eyoñe ji a mia minkukum, yônane beta ñyônan, amu bidim bia ye kui be mia.

² Akume denan e ne ébo, mengômesane menan me maneya diban a siʼ ibem.

³ E or wônan a argent wônan bi maneya bili mieñgele, a mieñgele ate a ye bo ngaa a wosane mia, a ye di minsône mienan aval ane nduan. Mi nga kôan akume mevis e melu ma suʼulan.

⁴ Fombaʼane maʼane bebo bisaé be nga kôane bidi e mefube menan, mi biya me a ma yôn, a miñyône bekôane bidi, mi kuiya e melo me Nti ya minsamba mewosan.

⁵ Mi nga bi ényiñ é ne ngu a édima e si nyô. Mi nga ve minleme mienane bidi e môse ba tyiʼi biyem.

⁶ Mi nga ve mekua, a wôé zôsôa môt, a nji kange mia.

Njiban a nsoone Nti

⁷ Ajô te jibaʼan, a bobejañ, akekui nsoone Nti. Fombaʼane mbé mefup. A yange mbamba bibuma te bo ôjejaʼa, nté ôse a ngenan te kolé mintôle bibuma a bi bia suʼulan.

⁸ Mia fe jibaʼan. Boʼone ngule minlem, amu nsoone Nti ô ntoo bebé.

⁹ A bobejañ, te somane ba bevok, nde mia ye saʼale ntyiʼane mejô. Mi lôô Ntyiʼi mejô a tele mimbé yôp.

¹⁰ Mfaʼa minjuk a njiban, éveʼela jenan é ne bekulu mejô be nga kobô a jôé Nti.

¹¹ Mi lôô ane bia seʼe ba be nga jibi na be bili ébotan. bôt ba jibi. Mi nga wôʼô nkañete njibane Yob, a yene nsôñane Nti mfaʼa wé. Nti a ne mvam abui, a nkoone bôt éngôngo.

Yaa ve yaa a momo ve momo

¹² Ve jam ôsu a bobejañ, te kalane yôp, nge si, nge avale nkal éziñ afe. Yaa wônan a boʼo ve yaa, a momo ve momo. Nde mia ye saʼale mo ya ntyiʼane mejô.

Ajô meyeʼelan

¹³ Ye môt éziñe ya be mia a wôʼô mintaé? A yeʼelaʼan. Yʼa wôʼô mevak? A yiʼa bia.

¹⁴ Ye môt wua ya be mia a kon? A loʼone bemvendé be keké, a be yeʼelan éyoñ be maneya woʼo nye mbon a jôé Nti.

¹⁵ Meyeʼelane ya mbunan ma ye nyii nyô a kon. Nti a ye bete nye si. A nge a nga bo mam me ne abé , ma ye jambane nye.

¹⁶ Memane mam abé menan, bana e be ba bevok, a yeʼelan ajô ba bevok, nde mia ye yet. Meyeʼelan me zôsôa môt ma bo beta be mam.

¹⁷ Elie a nga too môt ane bia, a nga yeʼelan a mban ôse na, mveñ é bo te nnoñ. A mveñ é nji nnoñe si nyô nté mimbu mila a ngon ésaman.

¹⁸ Ane a nga beta yeʼelan, mveñ ve nnoñ, a si ve beta ve bibuma bié.

Ndutane ba ba kop

¹⁹ A bobejañ, nge wua ya be mia a kobeya zen a liʼi benya mejôô, a ba beta dutu nye,

²⁰ yemane na, nyô a dutu mbo abé a liʼi mbia zene wé, a ye nyii nsisime wé, a a ye bo mam abé abui na, me jamban.