Oz 8 - Bible en langue Bulu

Ntyiʼan ajô baa

¹ Loñe toñ! Amu bidim bia ku si yʼIsraél yôp ane ndôé, amu bôte yʼété be tyameya élate jam, a bene metiñe mam.

² Ba yône be ma be jôʼô na: a Zambe wom, bia yeme wo, bia, ayoñ Israél!

³ Israél a nga bene mvaé: besiñe bé be ntoo ñhe ve tôñe nye!

⁴ Be maneya telé bejô bôt, ma momo été, a telé fe bivet ma momo été. Argent a or wop be maneya bo bie bengunemelan, asu ya jañele bebien.

⁵ Nti a beneya mone nyaʼa wôé a Samari! Ayaa dam da yôñe be nyô. Ba ye kate bo mfuban a kui éyoñ évé?

⁶ Amu mone nyaʼate a so Israél môte a mé biôm nye a nga mé nye, ve a nji bo zambe; ajô te nde mone nyaʼa ya Samari a ye bôébane bifus.

⁷ Mbôlô be nga mias évuñulu, ba ye kôan ôkôs; ba ye bo tekʼatine fôn; jôme ja faa, ja ye bo te ve avut, a nge avut e nga too, bikuu bia ye mine de.

⁸ Israél a minebaneya e meyoñ mevoʼo été ane jôme môt éziñ a nji kômbô!

⁹ Eyoñe be nga bet Asiri, anʼéjakas yʼafan ja wulu étam, éyoñe te Efrayim a nga kus émiene bibon.

¹⁰ Akôsa bo biôm bise ba ke ba ve meyoñ bikule mefe, éyoñ é kuiya na be kôane be. A liʼiya ve tyôtyoé, wôna ba ye tôbane njuk, amu adite mbeʼe njô bôte yʼAsiri a ye titi be bituu.

¹¹ Efrayim a nga lôñ abui metaʼa metunaʼa, ve metaʼa mete me nga saé ve na bone bʼIsraél be tuʼa bi mekua!

¹² Me kusa tili nye toyini memvinda ya metiñe mam, ba yene me ane jôme ja so bikuu.

¹³ Ba nyeʼe ba ve ma bityiʼa , amu ba kômbô di tit. Ve Nti a nji yene bie mvaé. Me nji vuane mewôé me bôte map, ma simesane bikobe biap. Ba ye bulan Ejipte.

¹⁴ Israél a maneya lôñ émien beta menda, a vuane Nté wé. Yuda fe a maneya lôñ abui bitison e bili alem, ve ma ye futi nduan e bitisone bite, a nduan ja ye mane diʼi mbamba menda map.