Oz 6 - Bible en langue Bulu

Ndi nleme bôt be bili mekua

¹ Zaʼan, mbulaʼane be Nti! Amu a maneya nyabe bia, a nye fe a ye saé bia. A bibiya bia, ve a ye tiñeti bia meveñ.

² Mvuse melu mebaé, a ye bulane ve bia ényiñ, e môse lale, a koé na a teléya bia betetele, a bia ye beta nyiñ asu dé.

³ Ajô te ñyemane nye na a ne Zambe, a bi jeñe na bi yeme Nti. Nzuane wé ô ne bebela ane melenda me tyé; a ye zu asu dangan ane mendim, ane mveñ ésep ja ve si mendim.

Ntyiʼan ajô

⁴ Ma ye bo wo aya a Efrayim? Ma ye bo wo aya a Yuda? Nyeʼane wôé ô ne ane nkute ya mametyé, avalʼane mfô ya mametyé a lôt.

⁵ Ajô te me nga bibi be a bekulu mejô, me nga wôé be a mejô yʼanyu dam; a ntyiʼane mejô wom wo so anʼéfufup.

⁶ Amu nyeʼan ñwô ma yene mvaé, saake metunaʼa; a ñyemane Zambe ñwô ma top, a dañe mimvean ba diʼi ngumba.

⁷ Ve be ba tyam élat ane bôt. Vôme nyô nye be nga kuane ma:

⁸ Galad a ne tisone bewôé bôt. Njalan a minlene metyi.

⁹ Nsamba betuni wo wôé bôt e zene ya Sikem, avalʼane nsamba wo yabe bôt asoé. Beangôndô be mam ba bo mbe le!

¹⁰ E nda bôt Israél, me yeneya beangôndô be mam; e li a ne ébamba Efrayim, Israél ki a wundiya mvine yʼété.

¹¹ Ma kômesane fe nkôane bidi asu dôé a Yuda, éyoñe ma ye tyendé asuʼulane ya bôte bam.