NLITAN 2 - Bible en langue Bulu

E be keké ya Eféze

¹ Tiliʼi éngele ya keké é ne Eféz na: Avale di nde nyô a bili ateté zamgbwa e wo wé ya mbo nnôm, e Nyô a wulu ézezañe bibii bifufup bi or zamgbwa a jô:

² ma yeme mimboone miôé, ésaé jôé, mbane wôé, a na, ô se ngule ya jibi mbia be bôt. O nga veʼele ba ba jô na be ne minlôman a be nji bo mie, a ô nga yene na be ne belaa minsos.

³ O ne mban: ô nga wu mintaé amu jôé dam, ve teke jañele ngul nlem .

⁴ Ve ma wôʼô wo abé na, ô liʼiya ayôñe dôé ya atataʼa.

⁵ Ajô te ñhe, simesaʼane vôm ô nga ku: kôñelaʼane nlem , a bo mimboone ya melu mvus. Nge nalé momo, me zuli e be wo a, nge ô nji kôñelane nlem , me vaa ébii éfufube jôé e vôm é né.

⁶ Ve ô bili jame di ane maʼa, e ne na: Wo vini mimboone be Nikôlayite avale fe ane mamien.

⁷ E nyô a beʼe melo, a wôʼô mam Nsisim a jô bekeké. E nyô a dañ, ma ye ve nye a di élé ya ényiñ, nje é ne Paradis Zambe été.

E be keké ya Smirne

⁸ Tiliʼi éngele a ne keké Smirne na: Avale di nde Nyô ya ôsu, a Nyô a suʼulan, a Nyô a nga wu a beta bulan ényiñ a jô:

⁹ ma yem meveʼele môé a azoé dôé; ve ô ne kum a bibôta bi ba ba veʼe feʼe na, be ne beyude; ve be nji bo be: be ne aba Zambe Satan.

¹⁰ Te ko e mam wo yiane jibi woñ. O lôô, Satan a ye futi bevoʼo ya be mia e nda mimbôk asu ya veʼele mia, a mia ye veʼelebane melu awôm. Jibiʼi akekui awu, a ma ye ve wo ékate duma ényiñ.

¹¹ Nyô a beʼe melo, a wôʼô mam Nsisim a jô bekeké. E môt a dañ, a ye bo te wôʼô mintaé ya awu baa.

E be keké Pergame

¹² Tiliʼi éngele ya keké é ne Pergame na: Avale di nde Nyô a bili nkpwaté mekôn ô ne akap meyo mebaé a jô:

¹³ ma yeme vôm ô too. E vôm éto njôane Satan é né. Ve ô bili jôé dame ngu ne zeñ, a ô nji kate mbunane wom, jaʼane melu me Antipas, e nya ngaa wom, nye a nga wôéban e be mia, e vôme Satan a too.

¹⁴ Ve me bili mam ma wôʼô wo abé : bôte bʼéziñ be ne ézezañe jôé, ba vôʼôlô nyeʼelane Baalam, nye a nga lebe Balak na a lame bone bʼIsraél ôlam, a tindi be be di betit be nga vebane e be bengunemelan a bo ébamba.

¹⁵ Ve be wo fe, bôte befe be ne ba ba vôʼôlô nyeʼelane be Nikôlayite.

¹⁶ Kôñelaʼane ñhe nlem . Nge nalé momo, me zuli e be wo avô, a ma ye wosane be a nkpwaté mekône ya anyu dam.

¹⁷ E môt a beʼe melo, a wôʼô mam Nsisim a jô bekeké. E nyô a dañ, ma ye ve nye maan a ne nsolan, ma ye ve nye éfumulu akok a, nkpwelan akoʼo yôp, mfefé jôé, nde teke môt a yem, vengevenge ve nyô émien a nyoñe de.

E be keké Tiatire

¹⁸ Tiliʼi éngele ya keké é ne Tiatire na: Avale di nde Mone Zambe a jô, e Nyô mis me né ane évele nkabaʼa nduan, a mebo me funaʼan édima mvot.

¹⁹ Ma yeme mimboone miôé, e nyeʼane wôé, e mbunane wôé, ésaé jôé a mbane wôé. Mimboone miôé mia suʼulan mia dañe mi ya ôsu abui.

²⁰ Ve ma wôʼô wo abé na, wo ve Zézabél fan, minga ate a jô na a ne nkulu mejô, a yale bebo bisaé bam e nkobane zen été, a yeʼele fe be na be bo ébamba a di fe betit be nga veban e bengunemelan.

²¹ Me nga ve nye éyoñe ya kôñelane nlem , ve a nji kômbô kôñelane nlem a jôʼé ébamba jé.

²² Tame yen ma wua nye énoñe mbia ôlune yôp, fufulu a bemvôé mejiane bé vengevenge ve a kôñelane nlem, a suu mbia mimboone mié.

²³ Ma ye bibi bone bé be wu, nalé bekeké bese ba ye yeme na, me ne nyô a yemelan asimesan e ne bôte minlem a e mebumesi. A ma ye yaʼane môt ase ya be mia ane mimboone mié mi né.

²⁴ Ve ma jô mia bôte ya Tiatire mi nji nyoñe ngap a nyeʼelane te, nge bindi jôme bôte bete ba loone bidoʼo minsolane mi mam mi Satan na: Ma ye bo te beté mia mbeʼe ôfe.

²⁵ Ve da, mi biane jôm mi bili nya mbiane, akekui ma ye so.

²⁶ Nyô a dañ, e nyô a baʼale mimboone miam akekui asuʼulan, ma ye ve nye ngule ya jôô meyoñ ,

²⁷ a ye kee me vôme ya di a nkasa étyé, aval ane ba bôé mevieʼe mʼétek,

²⁸ avale mamien me nga nyoñe ngul e be Esaa wom, a ma ye ve nye ôteté melendé me tyé.

²⁹ E môt a beʼe melo, a wôʼô mame Nsisim a jô bekeké.