NKÔLAN 39 - Bible en langue Bulu

Nloon biyé betuni

¹ Be nga loé mingum biyé asu mboon ésaé ya vôm a ne étyi, a bindélé bi too nyôle blum, mfô, a évele, be nga loé biôm bi ne étyi asu Aron, aval ane Nti a nga bendé Môze.

² Be nga bo éfôd a mvot, minsinga mi too blum, mfô, évele a éfumulu.

³ Ane be nga ndamé bibaʼa bi mvot a tyiʼi bie minsinga, éyoñ te be nga ke ba kotan mie e bindélé bi ne blum, mfô, évele a éfumulu été; a mbe mboon jôm atyeñ.

⁴ Ane be nga bo je mebaʼa ya bitu a tiñeti me mekuʼu mebaé mfaʼa ya yemete je.

⁵ Kandé é mbe ébômaʼane je é mbe mboon avale da: Mvot, minsinga mi ne blum, mfô, évele a éfumulu, nlatan jôme jia a éfôd ébien, avale Nti a nga bendé Môze.

⁶ Be nga ba mekoʼo me ôniks a futi me biôm bi mvot be nga kôm. Ane be nga kpwelé biyôlé bi bôt ya Israél été yôp, ane ba futi sitam .

⁷ E nde be nga futi me biwoʼo ya éfôd aval ane mekoʼo ya bo te vuan bôt ya Israél, avale Nti a nga bendé Môze.

⁸ Be nga kôm ébutaʼa tôé, mboon jôm atyeñ fe, bebé ane éfôd, be belaʼan mvot, minsinga mi too blum, mfô, évele a éfumulu.

⁹ Nté a ndam abime da; be nga bo je mimbaʼa mibaé, nté ô too centiméta mewôm mebaé a étan. Ebutaʼa tôé te é too mimbaʼa mibaé.

¹⁰ Ane be nga bé mekoʼo minnoñ minyin été; nôfét wua, sardôan wua, tôpaze wua, émerôd wua:

¹¹ nnoñ baa ô too, nôfét wua, safir wua, diamañ wua.

¹² Nnoñ lale, ôpale wua, agat wua a amétiste wua;

¹³ Nnoñ nyini, krizôlit wua, yaspe wua. Mekoʼo mete me mbe nsoman biôm bi mvot été.

¹⁴ Mekoʼo me nga luʼan a môé me bone be Israél; me mbe awôm a mebaé, avale ane môé mab me né; me mbe nkpwelan ane besitam, akoʼo ese e beʼe jôé da ya meyoñ awôm a mebaé ya Israél.

¹⁵ Be nga kôme bone bengôkop be mvot ébutaʼa tôé yôp, be too ntiñan ane minko.

¹⁶ Be nga bo fe mimbekaʼa mi mvot mibaé a bilondo bi mvot bibaé; ane be nga futi bilondo bibaé e mekuʼu mebaé ya ébutaʼa tôé.

¹⁷ Nde be nga some minkole mi mvot mibaé e bilondo bibaé bi mbe mekuʼu mebaé ya ébutaʼa tôé;

¹⁸ Ane be nga some mesu mevoʼo mebaé ya minkole mibaé e mimbekaʼa mibaé mi mbe e mebaʼa bitul ya éfôd mfaʼa ya ôsu.

¹⁹ Ane be nga beta bo bilondo bife bibaé e mekuʼu mebaé ya ébutaʼa tôé, éfase ya été é nga latane éfôd.

²⁰ Be nga beta bo bilondo bi mvot bife bibaé a futi bie mebaʼa bitul ya éfôd si, éfase ya ôsu bebé éboñaʼa, e kandé éfôd yôp.

²¹ Bilondo ya ébutaʼa tôé bi nga volô na be yemete je e bilondo ya éfôd a nkol ô too blum, nalé ébutaʼa tôé é bo e kandé éfôd yôp, a na é bo te kandan a éfôd. E nga boban avale Nti a nga bendé Môze.

²² Ane be loé ézingi éfôd a éyé é too blum ése.

²³ Tyiñ ézingi é mbe ézezañ, é funaʼan ane nyô mbot ékôb é ne ntiñan; be nga bo fe nlokoʼo mbômaʼane ane ézingi ja ye bo te nyabé.

²⁴ Be nga bo bibuma bi too blum, mfô a évele, ntiñan a mvosan minsinga, mfaʼa ézingi ja ke ja jombô.

²⁵ Be nga kôm fe bone mebenge me nya mvotô a futi me zañe bibuma mbômaʼane a ézingi ése e zañe bibuma.

²⁶ Abeñge da ébuma jia, abeñge da a ébuma jia, mbômaʼan a ézingi ése, avale Nti a nga bendé Môze.

²⁷ Be nga loé melôʼô me nya ndomboo, mbamba ntiñan, asu Aron a bone bé;

²⁸ A ôzomezome ntôm ô too fe nya ndomboo, a mintôm mife mia liti éjijine jap, mie fe mi too nya ndomboo; bikuba bi ndombo é ne ntiñan.

²⁹ Be nga bo fe ases a nya ndomboo a ne mvosan, ntiñan blum, mfô a évele avale Nti a nga bendé Môze.

³⁰ Be nga bo ékat kuron é ne étyi a ébaʼa mvot, e nde be nga kpwelé été yôb ane ba kpwele sitam na: Etyi be Nti!

³¹ Ane be nga futi nkole été yôb ô too blum mfaʼa ya tiñeti ékate te ôzomezome ntôm yôp, avale Nti a nga bendé Môze.

Tabernakel a teléban

³² Ane ésaé ése ya tabernakel é nga man; nda éndélé bisulan, bôte ya Israél be nga bo ane Nti a nga bendé Môze.

³³ E nde be nga zuu tabernakel be Môze; nda éndélé a biôm bié bise: Akobe dé, mebame mé, betyengane bé, mekône mé a metine mé.

³⁴ Ebutaʼa bikôb beyôm mintômba nduban évele, ébutaʼa bikôb bi tit bia dañe ngu a éyé ja kandé (vôme a ne étyi a vôme a dañe dañe étyi).

³⁵ Ewolo élat a mimbone mié, nalé fe ébutaʼa ya éwolo.

³⁶ Tebele a biôm mebelan bié bise, nalé fe belet awôm a ébaé é mbe é bômbôʼô vôm a ne étyi éyoñ ése.

³⁷ Ebi bifufub mboon a mvot, belambe bé, belambe be ne nkôman a biôm bise yʼété a mbon asu ébi bifufup.

³⁸ Otéla mvot, mbon ba woʼo bôt éyoñ ba telé be bito, a ôlobinda asu étyitaʼa, nalé fe éyé ja tyebe mbé ya anyiine nda éndéle;

³⁹ ataʼa mvot, étañe mvote jé, mimbôñ a biôm bié bise; fandé a tine jé a tebe été;

⁴⁰ bindélé ya nseñ, mekône mé, metine mé a éyé ya mbé ya nseñ, minkole mié, mekône mé a biôm mebelan bise ya tabernakel , biôm bi ésaé bise nda mfaʼa éndélé ya bisulan.

⁴¹ Mimbot mi ne nloon asu ésaé ya vôm a ne étyi, mimbot mi ne étyi asu Aron, a mimbot mi bone bé asu ésaé betuni.

⁴² Ane bôt ya Israél be nga bo ésaé te ése, avale ebien Nti a nga bendé Môze.

⁴³ E nde Môze a nga fombô ésaé a yene na be nga bo je avale ebien Nti a nga bendé. Ane Môze a nga botane be.