NKÔLAN 38 - Bible en langue Bulu

Ataʼa metunaʼa mimvean mi ne ngumba a fandé

¹ A nga kôme ataʼa metunaʼa mimvean mi ne ngumba a asé, nté ô too menyiʼi me mo metan a ndam fe menyiʼi me mo metan: A mbe nté a ndam abime da, ve nkôñ ô too menyiʼi me mo mela.

² A nga kôme minlak e mekuʼu menyin; minlak a ataʼa metunaʼa bi too jôme jia; ane a nga dube nye a mvot.

³ A nga bo biôm mebelan bise ya ataʼa metunaʼa: Bisobelé, bilaé, bilum, bikutan asup a meviek, a nga bo bise a mvot.

⁴ Ane a nga bo étañ jʼabeʼe nduan, a nga bo je a mvot, é too nkôñ wo bôman ataʼa metunaʼa si a kui ézezañe ya ataʼa metunaʼa.

⁵ Ane a nga nyemene bilondo binyin a futi bie mekuʼu menyin ya étañ mvote si mfaʼa ya some mimbôñ.

⁶ A nga kôme mimbôñ a asé a dube mie a mvot.

⁷ Ane nga some mimbôñ ya beʼe ataʼa metunaʼa e bilondo; a ataʼa metunaʼa e mbe nlôñan a mebam ve a too mfulemfu mfaʼa ya été.

⁸ A nga belane bengobé be binga be mbe be sulaʼan anyiine nda éndélé bisulan mfaʼa ya kôme fandé mvot a tine mvote jé.

Nlôñan nseñ

⁹ A nga bo fe nseñ. Mfaʼa ya nké a nga belan bifumulu biyé ntiñan nté tañe menyiʼi me mo ntet,

¹⁰ a mekône mab mewôm mebaé a metine me mvot mab mewôm mebaé; akop ya mekôn a ayemaʼa dab bi mbe mboon a silba.

¹¹ Mfaʼa ya akôé, biyé bi mbe nté tañe menyiʼi me mo ntet a mekôn mewôm mebaé map a metin mewôm mebaé map; akobe dab a ayemaʼa dab bi mbe mboon a silba.

¹² Mfaʼa jôp da dim, biyé nté menyiʼi me mo mewôm metan a mekôn awôm map, a metin awôme map; akobe ya mekôn a ayemaʼa dab bi mbe mboon a silba.

¹³ Mfaʼa jôb da tôô, biyé bi mbe nté tañe menyiʼi me mo, mewôm metan;

¹⁴ afebe da é nga nyoñe biyé tañe menyiʼi me mo awôm a di ôsu, e nga nyoñe éyé nté menyiʼi me mo awôm a metan a mekône melale mab a metine melale map.

¹⁵ Afebe baa, é too zôsôô a di ôsu, é nga nyoñe éyé nté menyiʼi me mo awôm a metan a mekône melale map a metine melale map.

¹⁶ Biyé bite bise bi mbe mintiñan mi ndombo.

¹⁷ Metine mekôn me mbe mvot, akob dab a ayemaʼa dab ke mboon a silba. Mekôn mese ya nseñ me mbe nlatan a ayemaʼa silba.

¹⁸ Eyé é nga tyele mbé ya nseñ é mbe mbamba ntiñan jôm minsinga mi too blum, mfô, évele a éfumulu; éyé te é too menyiʼi me mo mewôm mebaé; ôya yôb menyiʼi me mo metan avale fe ane ndam biyé ya nseñ;

¹⁹ mekôn menyin a metine menyin mab me mbe mvot, akob a ayemaʼa dab e mbe silba, soʼo jap é mbe nduban silba.

²⁰ Mekôn mese ya mbômaʼan ya tabernakel a ma ya nseñ me mbe mvot.

Mekoʼo be nga belane me

²¹ Tañ ése ya biôm ya tabernakel nje nyô: Tabernakel ya ba baʼale bifase mekoʼo metiñ, avale ane Môze a nga mane tak a kalane de mo betuni, Itamar mone Aron a too ntebe ôsu.

²² Betsalél mona Uri, ndaé Ur ya nda bôte Yuda. A nga bo mam mese Nti a nga bendé Môze;

²³ ba Ohôliab, mona Anisamak ya nda bôte Dañ, nkpwelé biôm, mbôndé mefek a ntiñe bindélé bi ne blum, mfô, évele a éfumulu.

²⁴ Abime mvot ese be nga belane de asu bisaé bise ya vôm a ne étyi e nga kui bekiligram toyini éla a mewôm mebaé, avale ane ôveʼe ya nda Zambe ô né.

²⁵ Moné ase a nga veban éyoñ ya élañ bôt a mbe bekiligram toyini éla a kili awôm a zamgbwa a begram mintet zamgbwa a mewôm metaan, aval ane ôveʼe adit biôm ya nda Zambe ô né.

²⁶ Fam ése é nga lañeban a taté mimbu mewôm mebaé a mitan a ke ôsu é nga ve bekiligram awôm a betan, aval ane ôveʼe ya nda Zambe ô né. Befam bese be mbe toyini mintet misaman a éla mintet mitan a mewôm metan.

²⁷ Kilôgram silba toyini éla é nga volô asu metin ya vôm a ne étyi a asu éyé ja kandé, metin ntet asu kiligram toyini éla, tin ése é nga nyoñ kiligram silba mewôm mela.

²⁸ Wôna kiligram silba mewôm mebaé nyô nje be nga bo je akop a ayemaʼa asu mekôn, ane fe be nga dube soʼo jap.

²⁹ Mvot be nga ve é nga kui kiligram toyini ébaé a ntet wua a mewôm mebaé a ésaman.

³⁰ Be nga belane je asu metin ya anyiin nda bisulan, asu ataʼa metunaʼa mvot, étañ mvot a biôm mebelan bise ya ataʼa metunaʼa;

³¹ asu metin ya nseñ, mekôn mese ya mbômaʼan tabernakel a asu mekôn mese ntôbaʼane ya nseñ.