NKÔLAN 37 - Bible en langue Bulu

Nkôman éwolo, tebele a ébi bifufup

¹ Ane Betsalél a nga kôme éwolo a asé, nté ô too menyiʼi me mo mebaé a étun, ndam ke anyiʼi wo da a étun.

² Ane a nga yañe je atan a été a mvot a ne mfuban; nde fe a nga bo nkôngô mvot mbômaʼane mekuʼu mese.

³ Nde a nga nyemé bilondo binyin ya futi mekuʼu menyin ya été, éfase ése bilondo bibaé.

⁴ Ane a nga bo mimbôñ mi asé a yañ mie mvot.

⁵ Ane a nga some mimbôñ mite e bilondo e mekuʼu ya éwolo mfaʼa ya beʼe je.

⁶ Ane a nga bo ébutaʼa éwolo a mvot a dañe mfuban; ébutaʼa te é too nté menyiʼi me mo mebaé a étun a ndam anyiʼi wo da a étun.

⁷ Ane a nga bo besérafeñ bebaé a mvot e mekuʼu mebaé ya ébutaʼa; a nga bo be a mvot ane mbiban;

⁸ Sérafeñ wua éfase ji a nyô mbok, éfase évok; a nga bo besérafeñ nlatan a mekuʼu mebaé ya ébutaʼa.

⁹ Besérafeñ be same mefabe mabe yôp, be butiʼi ébutaʼa a mefabe mete be lôane fe mesu. Mesu Besérafeñ me mbe me lôô ébutaʼa.

¹⁰ A nga kôme tebele a asé; nté ô too menyiʼi me mo mebaé, ndam anyiʼi wo da a nkôñe yôp anyiʼi wo da a étun.

¹¹ A nga yañe je a mvot a dañe mfuban a bo fe nkôngô mvot mbômaʼane.

¹² A nga bo filim mbômaʼane été a bo fe nkôngô été a mvot mbômaʼane filim.

¹³ Ane a nga nyemé bilondo bi mvot binyin asu tebele a futi bie mekuʼu menyin ma tôban a mebo menyin.

¹⁴ Bilondo bi mbe bebé filim, mimbôñ mi tulaʼan été mfaʼa mbeʼan tebele.

¹⁵ A nga kôme mimbôñ mite a asé a mane fe yañe mie mvot; mi nga volô mbeʼan tebele.

¹⁶ Ane a nga kôme biôm ya belan bie tebele: Bisua, bilaé mevale mebaé a mekob minlak asu nsôban mo a mebo: Biôm bite bi nga boban a mvot.

¹⁷ A nga bo ébi bifufub a mvot ane mfuban a too mbiban; abo, nkuk, bilaé, bibuma a mesam mé bi too mboon jôme jia.

¹⁸ Ebi bifufub te é bili mintyaé misaman, milal éfase ji milale mivok éfase ji.

¹⁹ Ntyaé ôse ô bili bilaé bilaa éyekaʼa ane ébuma mvin, bibuma a mesam me too été; mintyaé misaman mise mi nga tii ébi bifufup mi mbe avale te.

²⁰ Nkuʼu ébi bifufub ô nga bili bilaé binyin éyekaʼa ane ébuma mvin, bibuma a mesam me too été.

²¹ Mintyaé misaman mi nga beme nkuk ébi bifufub mi mbe mbaʼatan mibaé mibaé, ébuma é too mbaʼatan ôse si.

²² Bibuma a mintyaé mi ébi bifufub bi too jôme jia; ase mboon a mvot a ne mbiban a mfuban .

²³ Belambe bé zamgbwa, menjo mé a bikutan asup bié bi too mboon a mvot a ne mfuban .

²⁴ Be nga belan bekiligram be mvot a ne mfuban mewôm mela mfaʼa ya kôme ébi bifufub a biôm mebelan bié bise.

Nlôñan ataʼa metunaʼa bʼôlobinda

²⁵ Ane a nga lôñe ataʼa metunaʼa bʼôlobinda a asé; nté ô too anyiʼi wo da, ndam fe anyiʼi wo da; ataʼa metunaʼa ate a mbe abime da nté a ndam, ve ôyabe yôp ô mbe menyiʼi me mo mela. A nga futi minlak mekuʼu menyin; minlak a ataʼa metunaʼa bi too jôm jia.

²⁶ A nga yañe nye a mvot a ne mfuban mfaʼa ya yôp, e mefefel, mbômaʼane a minlak, ane fe a nga bo nkôngô mvot mbômaʼan.

²⁷ A nga bo bilondo bibaé e nkôngô mvot si éfase ya li a li, a futi fe bilondo mevôme mevok mfaʼa ya some mimbôñ ya beʼe ataʼa metunaʼa.

²⁸ Nde a nga kôme mimbôñ mite a asé a dube mie a mvot.

²⁹ Ane a nga kôme fe mbon ô ne étyi ba woʼo bôt éyoñ ba telé be bito, nalé fe ôlobinda a nyume mvaé, a too mfuban , nkôman avale ntyetyeñ nkôm be ôlobinda a ne kôm.