NKÔLAN 35 - Bible en langue Bulu

¹ Ane Môze a nga sulan bôt bese ya Israél a jô be na: Avale di nde Nti a nga bendé na bi bo:

² Bia ye bo bisaé tañe melu mesaman; ve môse zamgbwale, wo ye bo mia wu ô ne étyi, môse Sabat, môse ya abôk asu Nti. Môt ase a ye bo ésaé éziñ môs ôte a ye wôéban.

³ Mia ye bo te kôban nduan e vôm éziñ ya bitabaʼa bienan e môse sabat .

⁴ Ane Môze a nga kobô ékôan bôt ése ya Israél a jô na: Avale di nde Nti a nga bendé na:

⁵ Nyoñan, asu Nti ngap éziñ ya biôm mi bili môt ase a ne nlem ésôs a ye zuu mvean a nga nyoñe te asu Nti: Mvot, silba, mvot;

⁶ bindélé bi ne blum, mfô a évele, nya ndomboo a mimvot bikela;

⁷ bikôb beyôme mintômba nduban bivele, bikôb bi tit bife bia dañe ngu; bilé bi asé;

⁸ mbon asu éfufup; meyemete bilé me ne mbamba menyum a mbon ba woʼo bôt éyoñ ba telé bôt bito a ôlobinda ba diʼi.

⁹ Mekoʼo me ôniks a mefe me ne édima asu éfôd a ébutaʼa tôé.

¹⁰ Bôte bese ya be mia be ne mintyetyeñ ba yiane zu bo biôm bise Nti a nga bendé:

¹¹ Tabernakel, nda éndelé jé a biôm bise bia buti je, akobe dé, mebame mé, a bibaʼa bié, a mekône mé, a metiñe mé;

¹² éwolo a mimbôñ ya été a bisua bise, vôm ya ndôbaʼan a éndélé ya zañ ja kandé vôm ane étyi a vôm a dañedañe étyi,

¹³ tebele, mimbôñ mié, biôm mebelan bié bise, a belet awôm a ébaé ja tabe tabernakel été a taté sabate nyô a kui nyô mbok.

¹⁴ Ebi bifufup a biôm mebelan bié: Belambe a mbon,

¹⁵ Ataʼa metunaʼa mimbon mi ne mbamba menyum, a mimbon ya été, mbon ba woʼo bôt éyoñ ya ntelan bito a ôlobinda asu étyitaʼa, éyé é tyele anyiine tabernakel;

¹⁶ Ataʼa metunaʼa asu mimvean mi ne ngumba, mbé mvote wé, mimbôñe mié a biôm mebelane bié; fandé a tine jé.

¹⁷ Bindélé asu nseñ, mekône mé, metine mé a éyé ya mbé ya nseñ;

¹⁸ mekôn ya tabernakel , mekôn ya nseñ a minkol miap mise;

¹⁹ mimbot asu mboone ésaé vôm a ne étyi; biôm ya jaé bi ne étyi asu Aron Ntuni nnen a biôm ya jaé asu bon ba bo ésaé betuni.

²⁰ Ane bôte bese ya Israél be nga kôlô vôm Môze a nga too.

²¹ Ba bese be nga bili minlem mi ne ésôs be nga zu ve Nti mimvean mi soʼo biôm be bili mfaʼa ya lôñe nda éndélé ya ndôbaʼane, a mfaʼa ésaé ése ya été a biôm ba jaé bi ne étyi.

²² Befam a binga bese be nga zu; nyô ase a nga bili nlem ésôs a nga soo émvongo, akom, élondo, nsañga, mevale me biôm mese me ne mboon a mvot. Avale te fe fam ése é nga bo jam éziñ ya ve Nti mvot.

²³ Ba bese be nga bili biyé bi too nyôle blum, mfô a évele, nya ndomboo a mimvote bikela, bikôb beyôm mintômba a betite befe bi ne afip be nga zuu bie.

²⁴ Ba bese be nga ve ngab éziñ ya silba a mvot asu Nti, be nga zuu mvean ôte. Ba bese be nga bili bilé bi asé be nga zuu bie asu ya kôm biôm bise ya nkañan.

²⁵ Binga bese be mbe atyeñ ôtiñ be nga tiñ a mo map, a zuu biyé be nga tiñ bi too nyôle blum, mfô a évele a nya ndomboo.

²⁶ Binga bese be nga bili mbamba minlem ya bo jam, be too fe atyeñ mo, be nga tiñ mimvot bikela.

²⁷ Mintômba ya ayoñ mi nga soo mekoʼo me ôniks me fe asu éfôd a ébutaʼa ya tôé.

²⁸ Nalé fe bityitaʼa a mbon, ébi bifufup, ñwoʼon bôt ba nyoñ bito a ôlobinda a ne mbamba menyum.

²⁹ Bôte bese ya Israél, befam a binga, ba bese be mbe minlem ésôs ya nyoñe ngab ésaé Nti a nga bendé a Môze na é boban, be nga zuu mimvean ane nlem wo kômbô be Nti.

³⁰ Ane Môze a nga jô bôt ya Israél na: Nti a maneya top Betsalél, mona Uri, ndaé Ur, nda bôte Yuda.

³¹ Zambe a jalé ya nye a nsisim ya fek, atyeñ a nyeman mboone mevale bisaé mese,

³² mfaʼa ya bôndé mbamba bisaé ya kôme biôm a mvot, silba a mvot,

³³ mfaʼa ya mekoʼo me ne édima be ne belane me, mfaʼa ya kpwelé bilé a bo mevale me biôm mese ma sili atyeñ.

³⁴ A veya fe nye Ohôliab mona Ayisamak ya mvoñ bôte Dañ ngume mvean ya yeʼele bôte befe atyeñe mboone dap.

³⁵ A jalé be a atyeñ ya yeme bo biôm bia sili nkpwelan a bi bia sili atyeñ ya mo mfaʼa ya ntiñan a nlatan biyé bi ne blum, mfô, évele a nya ndomboo, nalé fe mfaʼa ya mbôndan mefeʼe ya mevale mesu bisaé mese.