NKÔLAN 30 - Bible en langue Bulu

Ataʼa metunaʼa ya mimbon mi ne mbamba menyum

¹ Wo ye lôñe atak asu mimbon mi ne mbamba menyum, wo ye lôñe de a asé;

² nté wo ye bo anyiʼi wo da a ndame jé anyiʼi wo da: Nalé a ne na minté mise mia ye bo abime da; ve nkôñ ya yôb ñwô wo ye bo menyiʼi me mo mebaé. Ataʼa te a minlaʼa mié bia ye bo jôme jia.

³ Wo ye yañe de a mvot ja dañe mfuban , ataté mfaʼa ya yôp, e mefefele ya été mbômaʼane a kui minlaʼa ya été, wo ye fe bo nkôngô mvot mbômaʼane.

⁴ E nkôngô mvot si, wo ye bo bilondo bibaé e mekuʼu mebaé. Wo ye bo bie li a li mfaʼa ya some mimbôñ ya beʼe ataʼa metunaʼa.

⁵ Wo ye bo mimbôñ a asé a yañe mie a mvot.

⁶ Wo ye telé de ôsu ya éndelé ja solé éwolo élat: Vôm ate ma ye bo me tôbaʼane wo.

⁷ Tyé ése, Aron a ye diʼi mbon ô ne mbamba menyum été yôb éyoñ a kôme belambe.

⁸ Aron a ye fe diʼi mbon ô ne mbamba menyum e zañe ngôʼé ébaé éyoñ a ye kôme belambe. Mbon ô ne mbamba menyume te wo ye yôñ éyoñ ése asu Nti e miaé mienan mise.

⁹ Mia ye bo te ve mimbon mife mia nyum nge mvean ba diʼi ngumba ataʼa metunaʼa yôp, nge mvean ôfe, a mia ye bo te miame jôm éziñ ataʼa metunaʼa yôp.

¹⁰ Aron a ye tune ataʼa metunaʼa éyoñe jia mbu; a ye tune de a miame metyi me tit é nga veban amu njamane mam abé e minlaʼa yʼété yôp, nalé a ye boban mfefé mbu ôse ataté miaé wu a kui wu ôvok, amu ataʼa te e nga vebane be ma a ba ye semé de ane jôm ja dañe étyi asu Nti.

Abendé ya élañe bôt

¹¹ Ane Nti a nga kobô Môze a jô nye na:

¹² Eyoñ wo ye lañe bôte ya Israél, môt ase ya été a ye yaʼane ma toya mfaʼa ya kamane ényiñe jé ane ébubua éziñ ja ye bo te kui be mia éyoñ ya élañe bôt.

¹³ E fame ése ja yiane lañeban ja ye ve nsañ moné ô ne adit étune sikel, be tôñe e sikel ba belane je e nda é ne étyi été, nye a ne begéra mewôm mebaé; étune sikel ja ye nyoñeban mfaʼa Nti.

¹⁴ E môt ase a ye lañeban ataté mimbu mewôm mebaé a ke ôsu, a ye ve mvean wo nyoñeban asu Nti.

¹⁵ Nkukum wo ye bo te yaʼan a lôte abime da yian, a tañe nzôzoé ja ye bo te sise si ya abime da yian, e ne na étun sikel e mfaʼa tañ ja nyoñeban asu Nti: nalé ba ye kamane ényiñe jap.

¹⁶ Tañe moné ése bôte ya Israél ba ye ve mfaʼa ya kamane ényiñe jap, wo ye belane je asu nda éndelé bisulan. Da ye bo jam ya simesan e be bôte ya Israél mfaʼa ya kamane binyiñe biab asu Nti.

Fandé mewoban asu ntuneban

¹⁷ Ane Nti a nga kobô Môze a jô na:

¹⁸ Wo ye kôme fandé mvot asu mewobane ya ntunan; wo ye telé nye e zañe nda bisulan a ataʼa metunaʼa a wo ye futi mendim été.

¹⁹ Aron a bone bé ba ye belane mendim mete mfaʼa ya sôbe mo mab a mebo map.

²⁰ Eyoñe ba ye nyiin nda éndelé ya bisulan, ba ye woban mendim mete, nalé ba ye bo te wu; avale te fe éyoñ ba ye subu bebé ataʼa metunaʼa na be bo ésaé a diʼi mimvean mia diʼibane nduan asu Nti,

²¹ Ba ye sôbe mo a mebo map; nalé ba ye bo te wu. Mvinda nyô ja ye bo nyô ya nnôm éto mfaʼa Aron a mvoñe bôte jé a miaé mise.

Mbon ô ne étyi a ôlobinda

²² Ane Nti a nga kobô Môze a jô na:

²³ Nyoñe bityitaʼa bia dañe abeñ; nkone mir besikel mintet mitan, nkone sinamôm besikel mintet mibaé a mewôm metan, nkaé ô ne mbamba menyum besikel mintet mibaé a mewôm mebaé;

²⁴ mvut ya élé ba loone na kas, besikel mintet mitan, avale ane ôveʼe ba belan wô e nda ya étyi ô né, ô laté a lita mbon ôlive ésaman.

²⁵ Môt a yeme kôme beôlobinda a ye mane bundan biôm bite bise a kôme mbon ô ne étyi ba ye belane wô mfaʼa ya telé bôt e bito.

²⁶ Wo ye woʼo mbon ôte nda éndelé bisulan a éwolo élat,

²⁷ Tebele a biôm mebelan bié bise, ébi bifufub a biôm mebelan bié bise, ataʼa metunaʼa beôlobinda,

²⁸ ataʼa mimvean mi ne ngumba a biôm mebelane bié, fandé a jôm a tele été.

²⁹ Wo ye telé biôm bite étyi a bia ye dañ étyi; jôm ése ja ye bie nambe, ja ye teléban étyi.

³⁰ Wo ye woʼo Aron a bobefame bé mbon; wo ye telé be étyi be bo ma ésaé betuni.

³¹ Wo ye kobô bôt ya Israél na: Mbone wu ô ne wu ya étyi ba woʼo bôt e miaé mienan mise.

³² Ba ye bo te woʼo wô nyôl môt éziñ, a mia ye bo te kôme ôfe ô too avale te; ô ne étyi a mia ye baʼale wô étyi nalé.

³³ Môt ase a ye kôme ôfe avale te, nge woʼo wô nneñ, a ye tyiʼiban zañe ya bôte bé.

³⁴ Ane Nti a nga kobô Môze na: Nyoñe bityitaʼa bi: Nataf, ôniks, galbanum, bityitaʼa a ôtu ô ne ékekeb mengab abime da.

³⁵ Wo ye nyoñe biôm bite a kôme ôlobinda ya diʼi, nkôman avale nkôme beôlobinda a ne kôm; ôlobinda ate a ye bi nku a too fe mfuban a étyi.

³⁶ Ngabe jia ja ye kômban ndub é too ôkekep, ba ye belane je nda éndelé bisulan, ôsu ya éwolo é ne étyi, vôm ma ye telé na bia wo bi tôban. Mia ye semé étyi ya nkômane jôme wu.

³⁷ Ba ye bo te kôme avale ôlobinda te mfaʼa mebelane menan. Ve mia ye telé nye étyi asu dam.

³⁸ Môt a ye bo mfe a funaʼan nye ényum, a ye tyiʼiban e zañe bôte bé.