NKÔLAN 29 - Bible en langue Bulu

Mebendé ma telé Aron a bone bé betuni

¹ Avale di nde wo ye bo mfaʼa ya telé Aron ba be bon be bo mʼésaé éto betuni: Nyoñe étoñ nnôme nyak a beyôm mintômba bebaé be too mvoʼé ne selem.

² Wo ye nyoñe avute fôn a yame belet é ne te mvusan a de, ô yame fe biwôlé bi ne te mvusan bi bili mbon, ô yame fe njiñelete biwôlé mbon ô too mmialan été.

³ Eyoñe te wo futi bie e mone nkoé été. Wo ye zuu mone nkoé ate éyoñe fe wo zuu étoñe nnôme nyak a beyôm mintômba bebaé ataʼa metunaʼa.

⁴ Wo ye soo Aron a bone bé anyiine nda éndelé vôm ba bo bisulan a wo ye woʼo be mendim.

⁵ Wo ye nyoñe biôm ya jaé; wo ye jalé Aron alôʼô, ézingi a éfôd; ébutaʼa tôé nje wo ye yemete nkuʼu wé a ases éfôd.

⁶ Wo ye jalé nye ôzomezome ntôm e nlô a tiñeti fe ékat é ne étyi e ntôme yôp.

⁷ Eyoñe te ñhe wo ye nyoñ mbon ba woban a sôé nye wô nlô a woʼo nye wô.

⁸ Wo ye fe zuu bone bé a jalé be melôʼô.

⁹ Wo ye tiñeti Aron a bone bé meses, a jalé fe be mintôme miap; ésaé betuni é ne énjab amu mvinda ya te nné: Wo ye telé Aron, bone bé a mvoñ bôte jab be bo ésaé betuni mfaʼa wom melu mese.

¹⁰ Wo ye zuu étoñe nyak ôsu nda éndelé bisulan; Aron a bone bé ba ye beté mo mab e nlô étoñ nnôme nyaʼa ji.

¹¹ Wo ye tyiʼi étoñe nnôme nyaʼa tyiñ asu Nti anyiine nda éndelé bisulan.

¹² Wo ye nyoñe ngab éziñ ya metyi mé a sôé me minlaʼa mi ataʼa metunaʼa a ônyu viôé a miame ma ma buk e tin ataʼa metunaʼa si.

¹³ Wo ye nyoñe biôm bise bi yale biôm ya abum été yôb a ndalebôbô é yale éseʼe yôp, ô nyoñe fe mimbañ mi ôtam mibaé a ndalebôbô é yale mie yôp, a wo ye diʼi bie ataʼa metunaʼa yôp.

¹⁴ Wuli ô ne mvean wo volô na abé betuni e jamban. Tit ja buk: Minsôn, ékôb a mebi me étoñe nnôme nyak, bia ye diʼiban atane ya minkan.

¹⁵ Wo ye nyoñe wua ya bone mintômba, Aron a bone bé ba ye beté mo mab nlô wé.

¹⁶ Wo ye tyiʼi nnôme ntômba tyiñ , ô nyoñe metyi mé a miame me ataʼa metunaʼa mbômaʼane.

¹⁷ Wo ye tyiʼi nnôme ntômba mefuse mefus a sôbe biôme ya abum été a mimbiaé, a beté bie vôm afus a nlô bi né.

¹⁸ Eyoñe te wo ye diʼi nnôme ntômba ase ataʼa metunaʼa yôp: Wuli ô ne mvean ô ne ngumba asu Nti, ndiʼan nduan a mbamba menyum asu Nti.

¹⁹ Wo ye nyoñe nnôme ntômba baa, Aron a bone bé ba ye beté mo mab nlô wé yôp.

²⁰ Wo ye tyiʼi nnôme ntômba tyiñ . Wo ye nyoñe ngab éziñ ya metyi mé a kañe je alo Aron ya mbo ngal été a alo bone bé, di ya mbo nnôm, nnôm ônyu ya akule wo dab ya mbo nnôm, a nnôm ônyu ya akul abo dab ya mbo nnôm, a wo ye miame metyi mbômaʼane a ataʼa metunaʼa

²¹ Wo ye nyoñe metyi me ne ataʼa metunaʼa yôb a mbon ba woban a miame bie Arone nyô a e biôm a beʼe yôp, e nyôle bone bé a e biôme biab be beʼe yôp.

²² Wo ye nyoñe avoñe nnôm ntômba, njem, avoñ e yale biôm ya abum été, ndalebôbô ja yalé ések, mimbañ mi ôtam mibaé a avoñ e yale mie yôp, a éname ya mbo nnôm, amu a ne nnôm ntômba ya mveane ngu mfaʼa betuni.

²³ Nkoé belet ô nga veban e be ma, wo ye nyoñe jôme jijia ya biôm bi ne été: belet é ne njiñelete jia, éwôlé é bili mbon jia, a njiñelete éwôlé jia.

²⁴ Wo ye kee biôm bite bise e mo me Aron a e mo me bone bé, a wo ye jô be na be ve ma bie ane ngume mvean.

²⁵ Eyoñe te ñhe wo ye beta nyoñe bie e mo map, a wo ye diʼi bie ataʼa metunaʼa yôp, bi bete mvean ô ne ngumba yôp. A ne mvean ñwô te ma ye seʼe mbamba ényum ôtita ya été.

²⁶ Wo ye nyoñe ôngône nnôm ntômba baa a liti wô asu be Nti a wo ye bo ngabe jôé.

²⁷ Wo ye yôtane na: Ongôn a énam be nga vaa e be nnôm ntômba baa, a mbie be nga liti asu Nti, bi ne bityila bi ne ntelan étyi.

²⁸ Ajô te bôte ya Israél ba ye vaa bie e be betite bese ba ve ma ane mvean ya nlatane ngbwa, ba ye kee bie Aron a bone bé.

²⁹ Biôm Aron a jaé bi ne étyi bia ye bo e bi bone bé éyoñ a wuya, ve ba ye jaé bie éyoñe be maneya woʼo be mbon a kalane be ngu.

³⁰ Ntuni wua ya bone bé a ye nyoñe éto jé éyoñ a wuya, a ye jaé bie tañe melu zamgbwa, éyoñe te a ye nyiin nda éndelé bisulan mfaʼa ya bo ésaé e vôm a ne étyi.

³¹ Wo ye nyoñe nnôm ntômba ya mvean betuni ngu ya taté ésaé jap, a bo na be yame minsôn e vôm éziñ a ne étyi.

³² Aron a bone bé ba ye di anyiine nda éndelé bisulan, ataté minsôn a kui belet é ne e mone nkoé été.

³³ Ajô te e mbe étam ba ye di biôm bi nga veban mfaʼa ya nyoñe njaman mam abé e be Zambe, éyoñ be nga telé be a ve be ngule ya bo ésaé. Môte mfe a nji bi ngule ya di bie, amu bi ne bidi bi ne étyi.

³⁴ Nge mebukaʼa ma yené mametyé, toʼo tit nge belet, ba ye diʼi bie nduan, ba ye bo te beta di bie amu bi ne bidi bi ne étyi.

³⁵ Wo ye bo avale me maneya bendé wo mfaʼa Aron a bone bé: abôʼô ya ve be ngule ya bo ésaé da ye tabe melu zamgbwa.

³⁶ Môs ôse wo ye ve étoñ nnôm nyak ya diʼi mfaʼa nyoñan njaman; wo ye fubu ataʼa metunaʼa a sôé mbon été yôb mfaʼa ya telé de étyi.

³⁷ Mfubane ya ataʼa metunaʼa fe wo ye tabe melu zamgbwa; mvuse ya valé ataʼa metunaʼa da ye dañ bo étyi a nalé ate môt ase nge jôm ése ja ye nambe de ja ye dutu bidim e be ébien.

Mimvean amôs ôse mi ne mingumba

³⁸ Môs ôse ba ye ve bone mintômba bebaé ataʼa metunaʼa yôp, be too mbu wua, nalé a ye boban melu mese.

³⁹ Wua a ye vebane mametyé a nyô mboʼo ke mamengôʼé.

⁴⁰ Eyoñ ba ve mone ntômba ôsu, ba ye fe ve kili mfuʼan avut éla, lita mbon ô ne ékekeb jia a étun, a lita wone jia a étun.

⁴¹ Eyoñe ya mone ntômba baa, mimvean mia ye bo avale da ane mi ya mametyé; wo ye ve mi mi ne mvean ba diʼi nduan mi too mbamba menyum mfaʼa Nti.

⁴² Ô ne mveane ngumba ya biyoñ bise mfaʼa miaé mienan mise, ñwô mia ye ve anyiine nda bisulan asu Nti: nne ma ye tôbane mia valé, a kobô wo valé.

⁴³ Ma ye tôbane bôte ya Israél valé a vôm ate a ye telébane étyi, amu étôtoʼo jam ja ye faé valé.

⁴⁴ Mamien ma ye telé nda éndelé bisulan a ataʼa metunaʼa étyi, avale fe ma ye telé Aron a bone bé étyi, mfaʼa ya na be bo ma ésaé ane betuni.

⁴⁵ Ma ye tabe éyoñ ése ézezañ bôte ya Israél, a ma ye bo e Zambe wop.

⁴⁶ A ba ye yeme na ma me ne Nti, e Zambe wob a nga bo na be kôlô Ejipte, nalé me ne ngule ya tabe ézezañe jap, me ne Nti e Zambe wop.