NKÔLAN 26 - Bible en langue Bulu

Avale Tabernakel a yiane boban

¹ Wo ye kôme tabernakel a ndam bindelé awôm; bindelé bite bi too nya ndombo a too ntiñan a mvosane nsinga, bindelé bite bi too menyôl mevale mela: blum, mfô a évele. Wo ye tiñ Bekerubim e bindelé bite yôp, ntiñane te ô too wu ntyetyeñ mbo ésaé.

² Nté éndelé ôse wo ye bo menyiʼi me mo mewôm mebaé a mesaman a ndam menyiʼi me mo menyin. Bindelé bite bise bia ye bo abime da.

³ Wo ye tiñeti bindelé bitan jôme jia a bi bivoʼo bitan jôme jia.

⁴ Wo ye loé nkoñ ya éndelé ja suʼulan ntiñetane bindelé bitan ya ôsu a éyé é too nyôle blum;

⁵ avale te fe wo ye bo éndelé ja suʼulan ntiñetan bindelé bitan bi baa. Metiñ mete ma ye bo zôsôôô, mana a ma mevok.

⁶ Wo ye bo bibandan bi mvot mewôm metan a late bindelé jia a ji évok a bibandane bite, nalé tabernakel a ye bo nlatane jôme jia.

⁷ Wo ye bo andile ya tabernakel a bifuse biyé awôm a jia bi too mboon a mimvot bikela.

⁸ Nté éyé ôse wo ye bo menyiʼi me mo mewôm mela a ndam menyiʼi me mo menyin. Bifuse biyé awôm a jia fe bia ye bo nté a ndam avale da.

⁹ Wo ye late bifuse biyé bitan mfaʼa wua a bisaman mfaʼa mbok; éfuse éyé saman ja ye bo mimbaʼa éfas ja jombô mfine tabernakel ya nseñ.

¹⁰ Wo ye bo metiñ me nlokoʼo mewôm metan nkoñ ya éfus éyé ja suʼulan nlatan bifus biyé wua, a metiñ me nlokoʼo mewôm metan nkoñ éfus éyé ya nlatan bifuse biyé bi baa.

¹¹ Wo ye bo bibandan bi mvot a futi bie metiñ me nlokoʼo été: nalé wo ye bo tabernakel a bo jôme jia (mfaʼa ya andil).

¹² Bindelé ya nda éndelé bia ye bi éfas éndelé é jombôʼô e mvuse tabernakel .

¹³ Bitun biyé bia ye bebe e bindelé ya nda éndelé tañe ényiʼa wo e li a li mfaʼa ya nté; bia ye jombô e mekuʼu mebaé ya tabernakel mfaʼa ya buti nye.

¹⁴ Wo ye buti nda éndelé a bikôbe beyôm mintômba nduban évele: Bikôbe mebañ bia ye bebe bikôbe beyôm mintômba yôp.

¹⁵ Wo ye bo mebam asu tabernakel; wo ye bo me a asé a telé me tetele.

¹⁶ Nté ya abam ese wo ye bo menyiʼi me mo awôm.

¹⁷ Abam ese da ye bi ayemaʼa abaé wua nlatan a wu ôvok; wo ye bo avale da mfaʼa mebam mese ya tabernakel .

¹⁸ E mebam mete, asu tabernakel , mewôm mebaé ma ye fombô mfaʼa ya Négéb, e nké.

¹⁹ Wo ye bo mekôn me silba mewôm menyin, me tele mebam mewôm mebaé si; mekôn mebaé me tele abam da si mfaʼa ya ayemaʼa abaé ya été; a mekôn mebaé mevok me tele abam avoʼo si mfaʼa ya ayemaʼa ya été.

²⁰ Mfaʼa éfase baa ya tabernakel , nalé a ne na akôé, mebam mewôm mebaé fe,

²¹ a mekôn me silba mewôm menyine map, mekôn mebaé abam ese si.

²² Wo ye bo mebam mesaman éfase tabernakel ya mfaʼa jôb da dim.

²³ Wo ye bo mebam mebaé mekuʼu me tabernakel mfaʼa ya mvus;

²⁴ Ma ye bo nlatan ataté si a nlatane vôme wua a élondo mfaʼa ya yôp: Nalé ate a ye boban mfaʼa mebam mebaé me tele mekuʼu mebaé.

²⁵ Mebam ma ye bo muam a mekôn me silba map: nalé a ne na mekôn awôm a mesaman, mebaé abam ese si.

²⁶ Wo ye bo betyengane bibaʼa a élé asé, betan asu mebam me tele akuʼu da ya tabernakel ,

²⁷ betyengane betan asu mebam me tele akuʼu avok ya tabernakel , a betyengane betan asu mebam me ne éfase tabernakel é ne mvus mfaʼa jôb da dim.

²⁸ Tyengane ya zañe mebam a ye téé akuʼu di a kui di avok.

²⁹ Wo ye yañe mebam a mvot; a bilondo ba ye somesane betyengane été, wo ye bo bie a mvot a yañe fe betyeñgane bebien a mvot.

³⁰ Eyoñ wo ye telé tabernakel , wo ye tôñe éveʼela be nga liti wo nkôle yôp.

³¹ Endelé é tyele e zañe nda ja ye bo menyôle mela: Blum. Mfô a évele; éndelé te ja yiane fe bo ndomboo, ntiñan a mvosane minsinga, Bekerubim ba ye kômban a atyeñ, bese be too été.

³² Wo ye futi je e mekoñ me asé menyine yôb me too ñyañan a mvot; mekôn mete ma ye bi akob mvot a ma ye bebe mekôn me silba yôp.

³³ Wo ye futi éndelé ya zañe nda akobe si a mvuse éndelé te, nne ba ye bôôé éwolo é bili biôm ya élat valé. Endelé te nje ja ye kandé vôm a ne étyi a vôm a dañe étyi.

³⁴ Ba ye buti éwolo é ne étyi e vôm a dañe dañ étyi.

³⁵ Ba ye telé tebele vôm a ne étyi e nda akôé a ébeʼe bifufub ja ye tebe é veʼane tebele, mfaʼa ya nké, a kooé na ô teléya tebele mfaʼa yʼakôé.

³⁶ Mfaʼa anyiin nda éndelé é ne étyi, betiñe bindelé ba ye loé éndelé éfe a éfumulu kilisi é ne ngu, mbundan a nsinga ô ne blum, mfô a évele.

³⁷ Ba ye bo mekôn metan a asé, be mane yañe me a mvot; nne ba ye yemete éndelé été a mesen me mvot; wo ye lui metiñ me mvot metan asu mekôn mete.