NKÔLAN 20 - Bible en langue Bulu

Metiñ awôm

¹ Ane Nti a nga kobô mam mana mese a jô na:

² Me ne Nti e Zambe wôé, nyô a nga bo wo ô kôlô Ejipte nda belo:

³ Te bi bezambe befe ôsu viam.

⁴ Wo ye bo te bi jôm é ne nkpwelan nge bi éveʼelaʼa ya jôm ése é ne yôp été nge si nyô si, nge mendim me ne e si nyôna si;

⁵ Te kute bie meboñe si nge kañe bie, amu me ne Nti e Zambe wôé, nyô a ne aban , nyô a ve bon melep amu abé bʼésaa bap, akekui miaé lale nge miaé nyini ya ba ba vini ma,

⁶ ma mvamane fe betoyini ya ba ba nyeʼe ma a baʼale metiñe mam.

⁷ Wo ye bo te tote jôé Nti étotetoté, amu Nti a nji yene môt te bijô, nye a tote jôé dé étotetoté.

⁸ Simesaʼane môse sabat a telé wô étyi.

⁹ Wo ye saé tañe môse minsaman a bo bisaé biôé bise.

¹⁰ Ve wu zamgbwale ô ne môse awoʼon mfaʼa Nti e Zambe wôé. Te bo avale ésaé éziñ môs ôte, toʼo womien toʼo monafame wôé, toʼo mona minga wôé, toʼo mbo ésaé wôé a ne minga, toʼo nyô a ne fam, toʼo biyeme biôé, toʼo beyeñe bôé be too nlame wôé.

¹¹ Amu Nti a nga té yôb a si a mañ a biôm bise bi ne été môse misaman; e môse zamgbwale a nga woʼon. Ajô te Nti, a nga botane môse sabat a telé wô étyi.

¹² Seméʼé ésoo ba nyua, nalé ate wo ye tabe melu abui e si Nti Zambe wôé a ve wo.

¹³ Te wôé môt.

¹⁴ Te bo mejian .

¹⁵ Te wup.

¹⁶ Te bôte môt ajô.

¹⁷ Te nyamete nda môt mia nye mi too, nge nyamete minga wé, nge mbo ésaé wé a ne fam, nge nyô a ne minga, nge éjakase jé nge jôme éziñ jé éfe ése.

¹⁸ Bôte bese be nga yene mindum mi mveñ, zoʼoyañ, tyiñe toñ a nkô ô nga kui ôtita. Eyoñ bôt be nga yene mam mete, ane be nga fôʼôban a tebe ôyap.

¹⁹ Ane be nga jô Môze na: Womien kobôʼô bia, ve te kañese na Zambe a kobô bia, bi za mane wu.

²⁰ Ane Môze a nga jô bôte na: Te koone woñ, amu Zambe a nga zu na a veʼele mia, nalé mia ye ko nye woñ a saʼale abé .

²¹ Bôt be mbe be tele ôyap, ve Môze a nga subu nkute bebé, e vôme Zambe a nga too.

Atiñ asu ataʼa metunaʼa

²² Ane Nti a nga jô Môze na: Wo ye kobô bôte ya Israél na, mi nga yen ane me nga kobô mia me too e yôb été.

²³ Mia ye bo te bi bezambe be ne mboon a silba nge mvot e fefele jam, mia ye bo teke veʼele bi be.

²⁴ Wo ye lôñe ma ataʼa metunaʼa a tyia e vôm wo ye ve ma mimvean mi ne ngumba, nalé fe mimvean ya ve Zambe akéva a late nye ngbwa: Beta mbam a mone mbame biyeme wôé; e vôm wo simesane jôé dam, ma ye zu e be wo a botane wo.

²⁵ Nge wo lôñe ataʼa metunaʼa a mekok , wo ye bo te lôñe a mekok me ne mbaan, amu éyoñ wo ba mekoʼo mete a bivôle biôé, wo ndaman étyi jap (nge na wo ve me mvin).

²⁶ Wo ye bo te bet ataʼa metunaʼa dam a étune zen , be za yene soé jôé.