LEVITIK 27 - Bible en langue Bulu

Mintiñetan a mimvean mevale meva

¹ Ane Nti a nga kobô Môze a jô na:

² Kobôʼô bon bʼIsraél na, éyoñ môt éziñ a tôé atiñ ya mveane ngume môt a nga tiñeti Nti, ngôtô yʼété a ne ngul ya boban a mveane tañ moné ane fôʼô môt ate é né.

³ Metañe mete me ne avale di: E bôt be ne ataté mimbu mewôm mebaé, a kui mewôm mesaman, tañe jab é ne minsañ mi argent mewôm metan, avale fame jia ja kui e vôme wom a nʼétyi.

⁴ Nge môt ate a ne minga, tañ ja ye bo minsañ mi argent mewôm mela.

⁵ Ataté mimbu mitan a kui mewôm mebaé, monafam a ye kui minsañ mi argent mewôm mebaé, monaminga ki minsañ mi argent awôm.

⁶ Ataté ngone jia, a kui mimbu mitan, monafam a ye kui minsañ mi argent mitan, monaminga ki minsañ mi argent mila.

⁷ Ataté mimbu mewôm mesaman a ke ôsu, fam ja ye kui minsañ mi argent awôm a mitan, minga ki minsañ mi argent awôm.

⁸ Nge môt a nga tiñeti mvean a ne azoé ya yaʼane tañ ja yian, ba ye zu liti ntuni môt a yiane veban, a ntuni a ye fas e tañe môt ate a yiane kui. Ntuni a ye fase tañ éte a fombôʼô e fôʼô môt a nga tiñeti mvean a bili.

⁹ Nge ntiñetan ô ne betit be ne ngul ya veban e be Nti, tit ése ba ye ve Nti ja ye bo jôm é nʼétyi.

¹⁰ Be se ngul ya tyendé nge fole jôm é nʼabeñ a ji é nʼabé, nge na ji é nʼabé a ji é nʼabeñ; nge ba fole tit a nyô fok, ébaane é ntoo jôm é nʼétyi.

¹¹ Eyoñ a ne betit be ne te mfuban , ba be se ngul ya veban e be Nti, ba ye zuu tit e be ntuni ,

¹² ntuni a ye fas e tañe tit ja yiane kui, a fombôʼô aval é né, nge mbamba nge mbia tit. Tañe ntuni a ye tot nje ba ye saane je.

¹³ Nge môt a ne je a kômbô je kôté, a ye beté e ngabe tañe ya tañe ntuni a nga tube tit éte.

¹⁴ Nge môt a ve Nti e nda jé, ntuni a ye fase tañe nda éte ja yiane kui a fombôʼô nge é nʼabeñ nge ntuk, a e ntañe ntuni a ye tot nje ba ye belane je.

¹⁵ Nge môt a nga ve e nda jé a kômbô bulane nyoñe je, a ye ve e tañe ntuni a nga tube nda éte, a beté fe e ngabe tane yʼété yôp: éyoñe te ja ye bulane bo énjéé.

¹⁶ Nge môt a ve Nti afube da ya mefube mé, ba ye tube tañe yʼété be fombôʼô abime mvoñ be ne bé été: minsañ mi argent mewôm metan asu kili nlisi mintete mila.

¹⁷ Nge afub da veban metataʼa me mbu mefôn, ba ye belane tañ aval é ne ntelan.

¹⁸ Nge afub da veban e mvuse mbu mefôn, ntuni a ye séʼé tañ a fombôʼô tañe mimbu é liʼiya a kui mbu mefôn wo zu.

¹⁹ Nge môt a nga ve afub a kômbô bulane nyoñe de, a ye yaʼan e tañe ntuni a nga tub afube te, a beté fe e ngabe jé.

²⁰ Nge a bo te bulane kôté afube dé, a môte mfe a kuse de, môt a ne miene ya afube te a se ngul ya beta kôté de.

²¹ Eyoñe mbu mefôn ô kuiya, afube te da ye bulan e be Nti, a da ye bo ngabe betuni aval ane jôm be nga ve Nti avéavéé.

²² Nge môt a ve Nti afub a nga kus é too te jôme ya biôme bié,

²³ Ntuni a ye bo tañe yʼété a fombôʼô tañe mimbu é liʼiya a kui mbu mefône yʼôsu, a môt a ve de a ye yaʼane tañ yʼété e môs ôbien ba tyiʼi tañ éte, moné ate a ye veban e be Nti.

²⁴ E mbu mefôn, afub da ye bulan e mo me môt be nga kuse de.

²⁵ Moné ya vôme wom a nʼétyi e nye ba ye belane nye mfaʼa ya metañ mese: e nsañe argent ô ne tin yʼété ô too adit tañe gram awôm.

²⁶ E ne foʼo bebela naa môt a se ngul ya ve Nti éyem ja taté bialé ane jôm a tiñeti Nye; amu éyem ése é ne nye ntô é ne ne jôme Nti, ji ya beta mbam nge mone mbam.

²⁷ Nge é ne mon a taté bialé e be éyem é ne te mfuban , môt a ne nye a ye kôté nye, a yaʼane tañe ntuni a ye tote na a yaʼan, ô laté e ngabe tane yʼété. Nge a nji kôté nye, ntuni a ne kuane nye môte mfe, môt ate a ye ve tañ é ne ntelan.

²⁸ Jôm ése môt a ye ve Nti e biôme bié été, ba ye bo te kuane je nge kôté je, toʼo jôme te é ne môt nge tit nge afube da ya mesi mé. Jôm ése ja ye veban e be Nti, ése ja ye teléban étyi.

²⁹ Môt ase a telébaneya étyi e be Nti a ye bo te kôtéban: ve a ye wôéban.

³⁰ Ngab awômô ése ya si, nyô ya memvoñ be nga bé, nge nyô ya bibuma bilé, é ne nyôô Nti, é ne jôm é ne ntelan étyi mfaʼa Nti.

³¹ Nge môt a kômbô kôté jôm éziñ ya ngab awômô jé, a ye yaʼane betuni tañe ja yian, ô laté e ngabe tane yʼété.

³² Ngab awômô ése ya beta mbam nge mone mbame biyem, tit ése ja lôt e ntume si, nyô ése é ne nyô awômô ja ye teléban étyi mfaʼa Nti.

³³ Betite bese ba bili asu ngab awômô ba ye bo te faseban: toʼo be nʼabeñ ngʼabé, a ba ye bo te fole be. Nge ba fole tit a nyô fok, bese bebaane be ntoo ntelan étyi a be se ngule ya kôté be.

³⁴ Mebendé Nti a nga ve Môze e nkôle Sinayi, asu bone bʼIsraél, mme le.