LEVITIK 23 - Bible en langue Bulu

Mebôʼô ya Israél

¹ Nti a nga kobô Môze a jô na:

² Kobôʼô bone bʼIsraél a jô be na: Mebôʼô me Nti mia ye kate foé na me ne mimfufub minloon, me too mebôʼô mam me ne ntelan mme ma:

³ Esaé ja ye bobane môse misaman, ve môse zamgbwale ô ne Sabat asu awoʼon, mfufube nloon, mia ye bo teke bo ésaé éziñ amu ô ne môse sabat asu Nti e mevôm mese mi too.

Pak, abôʼô fembé é ne te mvusan

⁴ Mana me ne mebôʼô me Nti, mimfufube minloon mia ye kalane foé éyoñ ja yian.

⁵ Eyoñe ngon ôsu ya mbu é ntoo melu awôm a menyin, Pak é ne ataté mamengôʼé.

⁶ Môs awômô a tane ya ngon éte wo ye bo atataʼa abôʼô ya belet é ne te mvusan.

⁷ Môs ôsu ya sondô ate wo ye bo mia môse mfufube nsulaʼane, mia ye bo te bo ésaé éziñ a mo.

⁸ Mia ye ve Nti mimvean mia diʼibane nduan tañe melu zamgbwal; môse zamgbwale wo ye bo môse mfufube nsulaʼane: mia ye bo te bo ésaé éziñ a mo.

Abôʼô bembômô

⁹ Ane Nti a nga kobô Môze a jô na:

¹⁰ Kobôʼô bone bʼIsraél a jô be na: Éyoñe mi kuiya e si ma ve mia a kôane bidi yʼété, mia ye zuu mbome wua ya bembômô bidi benan be ntuni .

¹¹ Ntuni a ye bo mbome te ndeñekolô asu Nti na ô nyoñeban mia, valé sabat a liʼiya alu da.

¹² Môs ôte ôbien ñwô mia ye ve Nti mimvean mia diʼibane ngumba: étoñe ntômba é ntoo mbu wua é too fe mvoʼé ne selem.

¹³ Mia ye fe ve mvean wo tôñe valé ñwô wo diʼibane nduan ô too mbamba menyum be Nti: kili avut ésaman mfuʼan a mbon, nalé fe lita woone jia a étun.

¹⁴ Mia ye bo te di toʼo belet, toʼo nkôt nge zôzô fes éziñ akekui môs ôte ôbien, wu mia ye zuu mvean e be Nti wônan: atiñe ya éyoñ ése asu miaé mienan e mevôm menan mese mia ye tabe nde le.

Abôʼô nkôane bidi a metiñ yʼété

¹⁵ Mia ye lañe mingum mi sondô zamgbwal ataté éyoñe sabat a lôteya alu da, e môse mi nga zuu mbome bidi bembômô .

¹⁶ Mia ye lañe môse mewôm metan a kui sabat zamgbwale éyoñ a lôteya alu da, môs ôte mia ye zu ve Nti mfefé mvean ô too avut.

¹⁷ Mia ye soo belet ébaé ya ve ma e menda menan. Ba ye yame belet ése yʼété a kili avut éla, jôm ja vusu é too fʼété: mvean ôte wo ye so e bembômô be ne asu Nti.

¹⁸ E belet ébaé nyôna yôp, mia ye fe ve Nti mimvean mia diʼibane ngumba avale di: Bitoñ mintômba bi ne mbu wua a mvoʼé ne selem zamgbwal, étoñe nnôme nyak a beyôm bikela bebaé nalé fe mvean avut a woon bi bo mimvean ba diʼi nduan mi too mbamba menyum e be Nti.

¹⁹ Mia ye fe ve nnôm ékela wua asu metunaʼa ya njaman abé, a bitoñ mintômba bibaé bi ne mbu wua asu metunaʼa ya nlatane ngbwa.

²⁰ Belet ébaé, nnôm ékela a bitoñ mintômba bibaé; ntuni a ye bo biôm bite bise ndeñkolô asu Nti. Bia ye teléban étyi mfaʼa Nti, a bia ye suʼulane bo biôme ya ngabe ntuni .

²¹ Môs ôte ôbien, mia ye miase foé ya mfufube nloon. Mia ye bo teke bo ésaé éziñ a mo: atiñe ya éyoñ ése e menda menan mese asu miaé mienan mise nde le.

²² Eyoñe mia kôane bidi ya si jenan, wo ye liʼi vôm éziñ ya afube dôé teke kôane bidi yʼété; wo ye bo fe teke kôane jôm ése ja liʼi e mvuse jôé éyoñ ya nkôane bidi: Wo ye liʼi je asu éngôngole môt a ntabe .

Beta môs awoʼon

²³ Ane Nti a nga kobô Môze a jô na:

²⁴ Kobôʼô bone bʼIsraél a jô be na: E ngone zamgbwale é too alu da, e môs ôsu ya ngone zamgbwale wo ye bo mia awoʼon, môse ya simesan, wu ya beta mevak, môse mfufube nloon.

²⁵ Mia ye bo te bo ésaé éziñ a mo, a mia ye ve Nti mimvean mia diʼibane nduan.

Beta môse mimvean

²⁶ Ane Nti a nga kobô Môze a jô na:

²⁷ E môse awômô ya ngone zamgbwale wo ye bo môse njaman minsem, mia ye sulan mfufube nsulaʼan, mia ye tyi bidi a ve Nti mimvean mia diʼibane nduan.

²⁸ Mia ye bo te bo ésaé éziñ a mo môs ôte, amu ô ne môse njaman minsem, e môse ba ye bulu mia minsem asu Nti, e Zambe wônan.

²⁹ E môt ase a ye bo te tyi bidi, ba ye vaa nye e zañe bôte bé.

³⁰ E môt ase a ye bo ésaé éziñ môs ôte, mamien ma ye wôé nye e zañe bôte bé.

³¹ Mia ye bo te bo ésaé éziñ: atiñe ya éyoñ ése asu miaé mienan mise e mevôm mese mi too nde le.

³² Mia ye bo môs ôte môs awoʼon ane sabat , mia ye tyi bidi. Mia ye baʼale awoʼone sabat te ataté mamengôʼé ya ngon melu ébul a kui mamengôʼé ya môs wo tôñe valé.

Abôʼô bibem

³³ Ane Nti a nga kobô Môze a jô nye na:

³⁴ Kobôʼô bone bʼIsraél a jô be na: Abôʼô bibem da ye taté ngone zamgbwale é too melu awôm a metan. Abôʼô te da ye jemban tañe melu zamgbwal asu dam.

³⁵ E môs ôsu mia ye sulan asu mfufube nloon; mia ye bo te bo ésaé éziñ a mo.

³⁶ Mia ye ve Nti mimvean mia diʼibane nduan tañe melu zamgbwal. E môse muame, mia ye sulan asu mfufube nloon a ve Nti mimvean mia diʼibane nduan; Abôʼô da ye bo anen: teke ésaé éziñ ya a mo mia ye bo.

³⁷ Eyoñe beta mebôʼô me Nti mete, mia ye sulane na mi kañe ma, mi ve ma mimvean mia diʼibane nduan mi too mi mia diʼibane ngumba, mi ve fe ma mimvean ya mefup, nge metunaʼa ya nlatane ngbwa a woon, aval ane mam ya môs ôsu me ne ntelan.

³⁸ Mia ye fe baʼale besabat be Nti, te lañe biôm mia ye kômbô ve ma, nge mintiñetane mienan, nalé fe mimvean ane nlem wo kômbô mia ye ve Nti.

³⁹ Môs awôm a tane ya ngone zamgbwale, éyoñ mi maneya kôan bibuma ya si, mia ye bo Nti abôk tañe melu zamgbwal. Môs ôsu wo ye bo awoʼon, môse muame fe wo ye bo awoʼon.

⁴⁰ Môs ôsu, mia ye nyoñe bibuma bilé bi ne abeñ, mintem melen, mebui bilé me bili abui mekaé, a bone bʼaziziʼi bilé ya mfôm asôé. Mia ye vak asu Nti, e Zambe wônan tañe melu zamgbwal.

⁴¹ Mbu ôse mia ye jem abôʼô te asu Nti tañe melu zamgbwal. Atiñe ya éyoñ ése asu miaé mienan nde le: mia ye jem abôʼô te e ngone zamgbwale,

⁴² mia ye tabe bibem tañe melu zamgbwal; bebialébialé bese yʼIsraél ba ye tabe bibem,

⁴³ éyoñe te mvoñe bôte jenan ja ye yeme na me nga toé bone bʼIsraél e bibem, a koé na me vaya be Ejipte: ma me ne Nti e Zambe wônan.

⁴⁴ Ane Môze a nga kate mam mese ma fombô mebôʼô me Nti e be bone bʼIsraél.