LEVITIK 22 - Bible en langue Bulu

Bôt be nji yiane di mimvean mi nʼétyi

¹ Ane Nti a nga kobô Môze a jô nye na:

² Kobôʼô Aron a bone bé na be bo te nambe mimvean mi nʼétyi ya jôé dam: ma me ne Nti.

³ Jôʼô be na: É miaé mia zu, nge môt éziñe ya nda bôte betuni a ye subu bebé a mimvean mi nʼétyi bone bʼIsraél ba ve Nti a too te mfuban , ba ye vaa nye te beta bo ésaé jam Ma me ne Nti.

⁴ Môt ase ya mvoñ Aron a kone zam nge menyôlôk, a ye bo te di mimvean mi nʼétyi akekui a ntoo mfuban . Avale te fe e né mfaʼa nyô a nambe môt a ne mbilane mvin amu nnambane mbim, a nyô meyôm me nga kui atan.

⁵ Môt a ye nambe jôm ja nyiʼitan a ntoo mvin, nge nambe môt a beʼe nsem wo selan, aval ese nsem ôte ô né

⁶ môt ate a ye tabe te mfuban a kui mamengôʼé; a ye bo te di mimvean mi nʼétyi, ve a ye wobane mendim.

⁷ Eyoñe jôb e dimiya, a ye bo mfuban , a éyoñe te a ye di mimvean mi nʼétyi, amu bidi bié le.

⁸ A ye bo te di tit ja te wu ntui, nge mbilize amu é za ve nye mvin: ma me ne Nti.

⁹ Betuni ba yiane bo e jam ma bendé be, toʼo ajô mam bidi. Nge ba ndaman étyi ya bidi, ba ye wu. Ma me ne Nti. A ma ma telé be étyi ésaé jam été.

¹⁰ Môt ase a nji bo ntuni a se nguleya di mvean ô nʼétyi. E môt a ne nneñ be ntuni , a nyô a saé asu maʼan be nye ba ye bo te di mvean ô nʼétyi.

¹¹ Ve mbo ésaé ntuni a nga kus a moné a ne ngul ya di, nalé fe nyô a nga bialé e nda jé été; bebaane ba ye di bidi bié.

¹² E ngone ntuni é nga luʼu môt a nji bo ntuni , a ye bo te di ngab be nga kandé e mimvean mi nʼétyi été.

¹³ Ve ngone ntuni é ne nliʼane nkus nge na be nga suu te mon, é bulane bʼésaa aval ane melu a nga too mongô, é ne ngul ya di bidi bi ésaa. Ve nyô a nji bo ntuni a se ngul ya di.

¹⁴ Nge môt a di mvean ô nʼétyi e fuʼan, a ye yaʼane ntuni e tañe mvean wo yiane kui a bete fe ngabe tane ya tañ éte.

¹⁵ Betuni ba ye bo te ndaman étyi ya mimvean mi nʼétyi e mie bone bʼIsraél be nga kandé asu Nti.

¹⁶ Nge ba di mie éyoñ be nji bo nkômesan, be betéya bone bʼIsraél étom bitul a nje ja sili nkôman. Ma me ne Nti, a ma ma telé betuni étyi ésaé jam été.

Ntobane bityiʼa asu metunaʼa

¹⁷ Ane Nti a nga kobô Môze a jô na:

¹⁸ Kobôʼô Aron, bone bé a bone bʼIsraél bese a jô be na: Môt ase ya nda Israél, nge mintabe yʼIsraél a ye ve Nti mimvean mia diʼibane ngumba, mi too jôm émien a nga tiñeti, nge jôm a ve ane nleme wé ôbien wo kômbô,

¹⁹ a ye nyoñe nnôm a ne teke ayeñ e benyak, e bitoñ mintômba a bitoñe bikela été, éyoñe te ma ye bo nye mvaé.

²⁰ Mia ye bo te ve étyiʼa é bili éyem éziñ amu ma ye bo te kañese je asu denan.

²¹ Nge môt a ve Nti éyeme ya beta mbam nge mone mbam ane mveane ya nlatane ngbwa, amu a tôé jam a nga tiñeti nge na a bo ane nleme wé ôbien wo kômbô, ja yiane bo mvoʼé ne selem, éyoñe te ja ye nyoñebane mvoʼé .

²² Mia ye bo te ve éyeme é too ndim, mbuʼane vôm éziñ, ébuʼa ntyiʼan, é beʼe étut, é kone zamengôla nge bikôbaʼa, mia ye bo te ve je ane mvean wo diʼibane nduan asu Nti ataʼa metunaʼa yôp.

²³ Nge tit éziñ: nyak, ntômba nge ékela é bili éyem éziñ, nge na bibuʼa bié biziñ bi nji yaé ane da yian, be ne ve je ane mvean nlem ôbien wo kômbô, ve saa ane mveane ya tôé ntiñetan.

²⁴ Mi nji yiane ve Nti tit mimbañ mi abin mi ne nkoʼon, ntyaʼan, ntéan nge ntyiʼan, a mia ye bo te tube betite miak avale te e si jenan.

²⁵ A te kusane avale betite te e mo bikuu a ve ma be, ma, e Zambe wônan, ane bityiʼa . Mvaan be nga vaa be bibuʼa ya nyôl wo futi be e ngabe betit be mbili ayeñ, ajô te me se fe nguleya kañese éyoñ mia ve ma be.

²⁶ Ane Nti a nga kobô Môze a jô nye na:

²⁷ Éyoñe mone nyak, ntômba nge ékela a ndôme bialé, a yiane nyiñe fefele nyia tañe ngume sondô. Ataté môse muame, ma kañese na be ve ma nye ane mvean wo diʼibane nduan.

²⁸ Ve mi nji yiane wôé ngale nyak, ngale ntômba nge ngale ékela baa mon môse wua.

²⁹ Eyoñe mia ve Nti étyiʼa ya mvean akéva, mia ye ve je avale da yiane na é nyoñebane mvoʼé .

³⁰ Ja ye diban e môs ôbien ja te veban; mia ye di je jôm te kui mametyé: ma me ne Nti.

³¹ Mia ye baʼale mebendé mam a bo me: ma me ne Nti.

³² Mia ye bo te ndaman étyi ya jôé dam é nʼétyi, nalé ma ye bo étyi e bone bʼIsraél été: ma me ne Nti a nga tobe mia mi bo ayoñ e nʼétyi.

³³ A me nga vaa mia si yʼEjipte na me bo e Zambe wônan: ma me ne Nti.