GALATI 1 - Bible en langue Bulu

Mebatan

¹ Ma, Paul nlôman , saa wu wo so e be bôt, nge wu môt, ve wu Yésus Krist a Zambe Esaa, nye a nga wômôlô nye ñwuan,

² a bobejañ bese bia be be bi too, ma tili bekeké bese be nee Galati.

³ Mvam a mvoʼé bi boʼo e be mia bese, bi soʼo e be Zambe Esaa wongan a e be Nti Yésus Krist;

⁴ nye a nga ve émien ajô mam abé mangan, ane a ye vaa bia e si ya abé nyô, aval ane nkômbane Zambe a ne ésaa wongan ô né.

⁵ Duma e boʼo e be nye nnôm éto. Amen.

Begalat be liʼiya Mbamba foé

⁶ Ma semé abim avôl mia lume nyô a nga loone mia mvus amu mvame Krist, a kañese Mbamba foé mfe.

⁷ Sa na Mbamba foé mfe a ne. E ne ve na, bôte bʼéziñ ba zametane zañe jenan a kômbô té Mbamba foé Krist e si.

⁸ Ve nge môt éziñ, jaʼane bia bebien, nge éngele a so yôb a kañete mia Mbamba foé a selaʼane nyô bi nga kate mia, a boʼo biyoʼé!

⁹ Bi maneya jô de, a ma beta jô éyoñe ji na: Nge môt éziñ a kate Mbamba foé mfe, saa nyô mi nga nyoñ, a nyoñe biyoʼé!

¹⁰ Amu éyoñe ji, ye ma jeñe na, bôte be seʼe ma? Momo, ve nseʼane Zambe! Ye ma jeñe na me yené mvaé e be bôt? Nge ma beta kômbô yené mvaé e be bôt, wôna me nji ke fe bo mbo ésaé Krist.

Nyoñan a nkañetane Mbamba foé Paul

¹¹ A bobejañ, ma kate mia na, Mbamba foé me nga kate mia a nji bo nyô môt. Nalé fe na,

¹² saa môt nye a nga kalane me nye, nge yeʼele me nye, ve nlitane Yésus Krist.

¹³ Mi nga yiane wôʼô be kobôʼô ajô ya mboone wom e ñyebe beyude été: a ngul ése, me nga kpweʼele keké Zambe a jeñe zene ya tyame je.

¹⁴ Me nga ke ôsu mbunane beyude été, a dañ abui bôte ya miaé wom, ayoñe dam été, amu abui évevé ya baʼale biyeme be ésaa bangan.

¹⁵ Ve éyoñe nyô a nga nyoñe ma mfaʼa wé aso abume nane a nga loone ma, amu mvame jé, a nga yene mvaé

¹⁶ ya liti mone wé e be ma na, me kañete nye ézezañe bikuu; été été, teke sili feʼe môt,

¹⁷ nge bet a ke Yérusalém, e be ba be nga taté bo minlôman, ve me nga ke Arabi, a beta bulane Damas.

¹⁸ Wôna, e mvuse mimbu mila, me nga bet a ke Yérusalém, na me yenane Séfas. Me nga tabe fefele jé melu awôm a metan,

¹⁹ teke yene nlôman ôfe, vengevenge ve Yakob étam, monyañe Nti.

²⁰ E jame ma tili mia, ma jô mia de asu Zambe, teke laa minsos.

²¹ Mvus éte, me nga ke mefôla ya Siri a Silisi.

²² Ve bebuni Krist ya bekeké be ne Yudé be nji yeme ma.

²³ Be nga wôʼô wôʼô be kobôʼô ajô dame na: Nyô a nga bo a kpweʼeleʼe bia, a nga kañete mbunan a nga bo a tyamek éyoñe ji.

²⁴ A be nga wumulu Zambe amu ma.