ESTHE 2 - Bible en langue Bulu

Esthe a bo nga njô bôt

¹ Eyoñe mam mete me maneya, nleme njô bôt Asuérus ô nga voé. Nde a simesane Vasti, e jam a nga bo a ntyiʼan ô nga nyoñeban ajô dé.

² Ane bôt ba saane nye be nga jô nye na: Ke ba yiane jeñe wo bindune bengo be binga bia dañ abeñ.

³ Ajô te njô bôt a ntoo ve telé bôt e mebôta mesi mese yʼéjôé jé, be bo ésaé ya zuu bengo be binga bese ba dañ abeñ e nda jé é ne e Suz, Egué, mbaʼale binga ya nda njô bôt a ye baʼale be a ve be mimbone mi nyanga.

⁴ Ngone minga njô bôt a ye nyeʼe nje ja ye bo nga njô bôt, éjiane Vasti. Ane njô bôt a nga nyeʼe feʼ éte, a kañese je, ane e nga bo nalé.

⁵ Mone Beyude éziñ a nga too e nlô tison ba loone Suz jôé na Mardôsé, e mone Yahir, e mone Shimeyi, e mone Kis ya mvôʼô Bényamin,

⁶ a mbe wua ya nsamba bôte Nébukatnétzar, njô bôte ya Babilôn a nga bi Yérusalém a zuu wô minkôm ba be Yékônia, njô bôte ya Yuda.

⁷ Mardôsé a nga nyoñ a yale Adasa, a mbe jôé afe na Esthe, mona ndômenyañ, a nga baʼale nye ane mone wé mvus awu bebiaé bé. Esthe a mbe étua abeñ.

⁸ Eyoñ atiñe njô bôt e kuiya, be nga sulan abui bengo be binga e tisone Suz, Esthe a too wua yʼété, be nga kee nye nda njô bôt ane bengo be binga bevok, Egué, mbaʼale binga a baʼale nye.

⁹ Egué a nga yen Esthe mvaé a jiʼa ve nye biôme bise bia yian asu nyanga a nkôman émien. A nga ve nye bebo bisaé be binga zamgbwa ntoban e bebo bisaé ya nda njô été ba be be be tabe éfase nda ja dañ abeñ e nlame binga.

¹⁰ Esthe a nji kulane na a ne ngone Beyude, amu Mardôsé a nga ve nye de atiñ .

¹¹ Wôna môs ôse, Mardôsé ki a mbe a zaʼa wulu e nseñe nlame binga asu ya yemelan nge Esthe a ne mvoʼé a yemelane fe jam da ye kui be nye.

¹² Bengo be binga ya nlame binga be nga yiane tôñe mboone nyanga be nga tiñeti binga na be bo tañe ngume mbu: ngon ésaman yʼôsu be nga wobane mbone mir; ngon ésamane fok be nga wobane mebôndé me ne mbamba menyum a mimbone mi binga mife asu nyanga. Jam da tôñe valé e ne na ngone minga ése é mbe é bili éyoñ a yiane ke be njô bôt Asuérus.

¹³ Eyoñe ngon minga ja ke be njô bôt, be nga ve nye jôm ése a sili a kee je akôlô nlame binga a ke nda njô bôt;

¹⁴ a nga ke be njô bôt mamengôʼé, tyé kpwaa be nga kee nye nlame binga, a baʼaleban e be Shakgaz, mmiak ô ne mbaʼale bibon bi njô bôt. A mbe nguleya beta ke be njô bôt vengevenge ve njô bôt a kômbô nye nge loone nye a jôé dé.

¹⁵ Eyoñ éyoñe jé ya ke be njô bôt é nga kpwaan, Esthe, ngon Abikaé, a mbe ndômenyañe Mardôsé nje a nga nyoñ a yale ane mone wé, a nga nyoñ foʼo ve biôme Egué nkalan élaé njô bôt a mbaʼale binga a nga bendé nye na a nyoñ. Bôte bese be nga yen Esthe mvaé.

¹⁶ Nde be nga zu nyoñ Esthe naa ba kee nye be njô bôt Asuérus e nda njô bôt, e ngon awômô é ne jôé na Tébét, mbu zamgbwale ya njôane wé.

¹⁷ Ane njô bôt a nga nyeʼe Esthe a lôte binga bevoʼo bese a Esthe a nga yene mvaé a mvame be nye a dañe bengo be binga bevoʼo bese. Nde a nga jalé ékate njô bôt e nlô wé yôb a ve nye éto nga njô bôt éjiane Vasti.

¹⁸ Ane njô bôt a nga bo beta dina asu bivet a bebo bisaé bé, dina Esthe. A nga ve bôte ya bifase bi si yʼéjôé nguleya bo te yaʼane toya a ve bôte memvaka a ésôs ése ja yiane njô bôt.

¹⁹ Be nga sulane bengo be binga éyoñe baa, Mardôsé a nga bili éto e bisaé bi njô bôt.

²⁰ Esthe ki teke kulane tine jé ya Beyude amu a nga baʼale atiñe Mardôsé a nga ve nye; a nga ke ôsu a bo nye mewôk avalʼane éyoñe Mardôsé a mbe a baʼaleʼe nye.

²¹ Môs éziñ, valé Mardôsé a boʼo bisaé bié e nda njô bôt, nde Bigtan a Terék, bebo bisaé be mbe bebaʼale mimbé mia nyiine menda me njô bôt, be nga bôndé feʼe ya wôé njô bôt Asuérus amu a nga bo be na be wôʼôlun.

²² Ane Mardôsé a nga yeme jame te, ve kate de Esthe nga njô bôt, nde Esthe ki a nga kate njô bôt e mam Mardôsé a nga kulan.

²³ Eyoñ be maneya fas ajô, be nga yene na ajô ba boʼolô e nʼété. Nde be nga tyelé bebo bisaé bana bebaé yôp, a tili jame te e kalate ba tili mbaʼalane mame yʼéjôé, avale njô bôt émien a nga bendé.