DANIEL 9 - Bible en langue Bulu

Daniel a yeʼelane Zambe

¹ Mbu ôsu Darius, e mone Zerzés a nga taté jôô Babilôn a too nda bôte bejôô ya Beméde,

² ma, Daniel, me nga lañe mimfufube mintilan; éyoñe te nje me nga wôʼô atinane ya jame Nti a nga liti nkulu mejô Yérémi, ajô mimbu mewôme zamgbwale Yérusalém a nga yiane tabe ntyaman.

³ Me nga taté na ma tyi bidi, me beʼe mengômesan nloon a éyé é nʼabé mis, asup e too nlô, nde me nga kôñelane be Zambe a yeʼelane nye, a liti nye minjaʼane miam.

⁴ Me nga liti Nti, e Zambe wom, meyeʼelane ya mmeman abé wu: A Nti, e Zambe a nʼanen a angôndô, wo baʼale élate jôé mia be bôt ba bo mebendé môé mewôk, a ô nʼavale da e be ba ba nyeʼe wo.

⁵ Bi maneya bo abé , bi bili mekua; bi beneya njôane wôé, a lume mebendé môé a metiñe môé mvus.

⁶ Bi nji wôʼô bebo bisaé bôé, bekulu mejô, mbe be nga kobô bejô bôte bangan ajô dôé, nalé fe bivete biangan, bimvame biangan a bôte bese.

⁷ Wo Nti, ô ne te kʼékop! Jam e liʼiya bia e ne ve na bi sili biabebiene si avalʼane môse wu; nne e ne nalé mfaʼa wongan, bôte be too Yérusalém, bôte ya Yuda, a bôte bevoʼo bese yʼIsraél, ba be ne bebé a ba be nʼôyap, mmialane mesi mesi, vôm ô nga titane be asu dôé amu beyeñeyeñ bap.

⁸ Yaa a Nti, bi ne njalan a ôson, biabebien, bejô bôte bangan, bivete biangan a bimvame biangan, amu bi nga bo wo melo.

⁹ Ve wo, Nti, e Zambe wongan, e mvame jôé été, wo jamé bia, akôsa bo bi nga bene njôane wôé.

¹⁰ Bi nji ke wôʼô wo, éyoñ ô nga sili bia na, bi ve metiñ ô nga kalane bia a bebo bisaé bôé bekulu mejô mewôk.

¹¹ Ayoñ Israél ese e nga tyam atiñe dôé, a yale feñ asu ya bo te vôʼôlô miñyeʼelane miôé. Ajô te, amu melo mangan, biyoʼé bi ne ntilan e metiñ me Môze, mbo ésaé wôé bi kubuya bia nyô.

¹² O tôéya e jam ô nga kat ajô dangane biabebien a bivete bia jôô bia: O kuliya be bia, e Yérusalém, minjuʼu be ngenane te yene vôme mfe émo ji.

¹³ Aval e ne ntilan e metiñ me Môze, minjuʼu mise mi, mi kuiya be bia; ve bia, a Nti, e Zambe wongan, bi nji yeʼelane wo na ô jeʼebe, bi nji liʼi abé dangan, nge bisi ntyiʼane wôé ô ne te kʼatyendé.

¹⁴ Ajô te nde ô nji jôʼé môs éziñ ya zuu minjuk e be bia. Yaa, a Nti, e Zambe wongan, ô ne zôsôô e jam ese wo bo été. Ve bi nji vôʼôlô miñyeʼelane miôé.

¹⁵ A Nti, e Zambe wongan, éyoñ ô nga vaa bôte bôé Ejipte, amu ngule jôé ja dañ, ô nga bi duma, nde e né a kui môse wu; ve bia, bi nga bo wo melo a bi bili mekua.

¹⁶ A Nti, betaʼa vumelan mbamba mimboone miôé, tame vaa ngul ayaa jôé e be Yérusalém tisone jôé nkôle wôé ô nʼétyi! Amu na abé dangan a bikobe bʼésaa bangan mbie Yérusalém be ntoo jôme meta e be bôt ba bômane bia.

¹⁷ Ajô te a Nti, e Zambe wongan, wôʼô ñhe meyeʼelan a minjaʼan ma liti wo. Amu ésemé wo semé womien, vôme wôé a nʼétyi a nto ndaman, tame yene nye a nleme mvam .

¹⁸ A Zambe wom, vôʼôlôʼô, tukaʼa fombô; yene tisone jangan ane é ntoo ntyaman, tison é ne énjôé. Eyoñ bia yeʼelane wo, bi nji buni na, bi ne jôm éziñ, ve bia buni nyeʼane wôé ô ne tekeʼe nné.

¹⁹ A Nti, vôʼôlôʼô bia! A Nti, jaméʼé bia! A Nti! A Nti keʼe melo môé! Amu ésemé ô bili mfaʼa wôé womien a Zambe wom, boʼo jam éziñ, te yange asu tisone nyô a ayoñe bôte di, mbie bi nʼémbiôé.

Biyoñ mewôme zamgbwa

²⁰ Me nga ke ôsu a yeʼelan, a meme minkobane miam a mi Israél ayoñe dam, a liti minjaʼane miam e be Nti, e Zambe wom, ajô nkôle wé ô nʼétyi.

²¹ Me yeʼelane nalé, nde Engele Gabriel me nga yene ñyenane wome yʼôsu, a nga yele avô a kui ma bebé awolo ebien ba ve mimveane ya mamengôʼé,

²² ve nyiin a jô me na: A Daniel, me zuya éyoñe ji asu ya faé feʼe jôé éfufup.

²³ Eyoñ ebien wo te taté na wo yeʼelane Zambe, foé éziñ ja te toteban é soʼo be nye, nje ma te zu kate wo, amu Zambe a nyeʼe wo. Ajô te, vaʼa nguleya wôʼô foé éte, a yemelan atinane ya ñyenane te.

²⁴ Mimbu mewôme zamgbwa biyoñe zamgbwa mi ne ntelan asu bôte bôé, a asu tison é nʼétyi; éyoñe te ja yiane na melo me man, bikop bi man, a abé e jamban, ndembene zôsôô ya nnôm éto a ye yené, ñyenan a nkulane mejô bia ye tôéban, a nda Zambe é nʼétyi ja ye beta teléban étyi.

²⁵ Jam wo yiane yem a wôk nde di: ataté éyoñe foé ya nsoone minkôm ja te toteban, a nyô mfefé nlôñane Yérusalém, a kui nsoone évet é ne ñwoʼone mbon, mimbu mewôm menyin mia ye lôt. Wôna tañe mimbu mewôm mesaman a mibaé biyoñe zamgbwa, tison a aleme dé bia ye beta lôñeban, ve biyoñ bia ye bo ayaé.

²⁶ Eyoñe mimbu mewôm mesaman a mibaé mite mi maneya nyô a ne ñwoʼone mbon a ye vaseban, ve sa ñhe amu émien. Ve mfaʼa tison a vôm a nʼétyi, bôte be évete ja zu ba ye tyame bie. Ve da ayaa Zambe da ye suʼulane wôé évete te. Vʼa kui awu dé, a ye bo bita bia tyame mam aval e ne ntilan.

²⁷ Eyoñe ya mimbu zamgbwale mia suʼulan, a ye titi élat e bitule bi bôt abui yôp. Mvuse mimbu mila a étun, a ye telé mboone metunaʼa a mimvean. Ntyame mam ate a ye bo bʼangôndô mimboone mié avôl avô, akekui asuʼulan e ne ntelan da ye ku nye yôp.