DANIEL 7 - Bible en langue Bulu

Ñyenan ôsu Daniel a yen: Betite benyin

¹ Mbu ôsu Beltsazar a nga jôô e Babilôn, Daniel a nga yem biyeyem, nsisime wé ô nga jaé a miñyenan mi mam a bôô énoñe jé. A nga suʼulane tili biyeyeme bite. Mbie bi:

² aval a nga kañete bie: A alu, me nga yene évuñulu é soʼo mekuʼu menyine ya vôme mis ma suʼu e teme mañ.

³ Nde beta betite benyin be nga vame mañ; tit ése é selaʼane ba bevok.

⁴ Nyô ôsu, é mbe é funaʼane ngbwengbwem, ve é beʼe mefap ane ndôé; me ngenane me fombôʼô, nde be nga vaa nye mefap. E nga tebe tetele a mebo mebaé ya mvus ane môt, nde fe be nga ve je feʼe môt.

⁵ Tite baa é mbe é funaʼane Urs; é nga tebe éfase jia, mvaé éla é too nye anyu, e zañe mesôñ; be nga jô je na, é tebe a ke di abui minsôn.

⁶ Me ngenane me kele ôsu a fombô, nde ma yene tite fe é funaʼane ze, mefabe mʼônone menyin me too je mvus, a minlô minyin, é nga nyoñe ngule ya jôô.

⁷ Me ngenan me kele ôsu a yene mam me nga kui me a alu, nde ma yene tite nyini é too ékowoñ, a angôndô, njalan a avale ngul afe; é nga beʼe beta mesôñ mʼétyé asu ya di, a nyabe biôm a bi, a tibiʼi biôm a ne te di a mebo. E nga selane betite bevoʼo belale yʼôsu beta nselan; é nga beʼe minlaʼa awôm.

⁸ Me ngenane me fombôʼô minlaʼa mite, mfefé nlak ô kuik e mi mivoʼo zañ, ve ô dañe tyôtyoé, nde wo kpwé minlaʼa milale yʼété. Mfefé nlaʼa wu ô nga bili mis ane môt, a anyu e mbe e kobôʼô nkobô mebun.

Ntyiʼan Zambe a tyiʼi ajô

⁹ Me nga ke ôsu a fombô: be nga telé bito bejôô, nde nnôme môt ô nga zu tabe si. Nnôme môte te ô nga beʼe bifumulu mengômesan ane sut, a ésile jé ane nya mevule me ntômba. Eto njôane jé, ane nkabaʼa nduan é nga bili minka mi faék ane nduan ja yôñ.

¹⁰ Osôé nduan ô mbe ô vamek a sôé nye ôsu. Beakutu, mewôm bʼakutu be bôt, be nga tele nye ôsu be saane nye. Eyoñe te aba mejô e nga sulan a bekalate be nga kuiban.

¹¹ Me nga ke ôsu a fombô amu nkobô mebun a zôʼé mone nlak a mbe a boʼok. Me fombôʼô, nde ba wôé tite nyini; be nga jiane mbime wé a ñwuan be nga wua je e nduan été.

¹² Wôna be nga vaa betite bevoʼo éjôé jap, ve be nga ndamé ényiñe jap nté éziñ.

¹³ Me nga ke ôsu a fombô miñyenan mi nga kui be ma a alu: vevea jôm a funaʼane môt a nga so minkute yôp été. Nde a nga zu vôme nnôme môt ô mbe, amu be nga zuu nye ôsu vié.

¹⁴ Nde be nga ve nye ndañan, duma, éjôé. Asu ya na bôte ya mesi mese, meyoñ mese a minkobô mise mi saane nye. Ndañane wé wo ye tabe nnôm éto, teke man, a njôane wé wo ye bo te tyamban.

Nkôñelane ya nyenan ôsu

¹⁵ Woñ ô nga bi ma Daniel a kui foñ, amu miñyenane mite mi mbe ékowoñ.

¹⁶ Nde me nga subu wua ya bôte be mbe valé bebé, a sili nye atinane ya jam me nga yen. Nde a nga bo na me yem atinan.

¹⁷ Betite bete benyin be ne ndeme ya bijôé binyine ya si nyô.

¹⁸ Mvuse jap nje ayoñe Zambe da dañ ôyabe yôp e nʼétyi da ye nyoñ éjôé a baʼale je nnôm éto.

¹⁹ Wôna, me nga dañe kômbô yem ajô tite nyini, nyô é mbe é selaʼane ba bevoʼo belaa; é mbe ékowoñ a lôte nné, mesôñ mʼétyé mé a biaé bi mvote bié, é mbe é jaʼak a nyabe biôm a bi, a tibiʼi ki biôm a ne te di a bebo.

²⁰ Me nga sili fe minsili ajô minlaʼa awôm mi mbe tite nlô a ajô nlaʼa ô nga kui a kpwé minlaʼa milale yʼété; nlaʼa te ô nga bili mis a anyu e nga kobô mebun, ô dañ ayap a mi mivok.

²¹ Me fombôʼô, nde nlaʼa te ô nga taté na wo wosane ayoñ e nʼétyi a dañe de.

²² Ve nnôme môt ô nga zu a tyiʼi ayoñe Zambe da dañ ôyabe yôp e nʼétyi ajô. Eyoñ éyoñ é nga kui, nde ayoñ e nʼétyi e nga nyoñ éjôé.

²³ Nde me nga nyoñe nyeʼelane wu: Tite nyini é ne ndeme éjôé nyini ya si nyô é selaʼane bi bivoʼo bise. Ejôé te ja ye kui na é mane mine si nyô ése, a tibi je a mebo, a nyabe je bifus.

²⁴ Minlaʼa awôm mi ne ndeme bejô bôt awôm ba ye bo minlô ya éjôé te. Njô bôt awôm a wua, a selaʼane ba yʼôsu, a ye nyoñ éjôé éyoñ a tatéya vaa bejô bôte bevoʼo belaa.

²⁵ A ye kobô Zambe a dañ ôyabe yôb ébiasé, a tibili ayoñ e nʼétyi, ayoñe te da ye ke éjôé jé si tañe mimbu mila a étun.

²⁶ Mvuse valé nje aba mejô ya yôp da ye sulan a vaa nye ndañane wé; ndañane te wo ye bo zesé a tyambane nnôm éto.

²⁷ Ejôé, ndañan a anene ya bijôé ya si nyô bia ye veban e be ayoñe Zambe da dañ ôyabe yôp e nʼétyi. Ejôé ya ayoñe te ja ye tabe nnôm éto, a mingungule minjôane mise ya émo ji mia ye wôʼô nye a saane nye.

²⁸ Nkañete ñwô wo mane vana wu. Mfaʼa ma Daniel, asimesane dam e nga bo foʼo me na me ko woñ, ajô te me nga bo élumelum, a awolo ese me nga simesane mam mete.