BERÔMEÑ 5 - Bible en langue Bulu

Mekabe, élat a ényiñ

¹ Amu bia lañeban ane bezôsôô be bôt amu mbunan, bia be Zambe bi ntoo mvoʼé amu Yésus Krist Nti wongan.

² E be nye, a zene ya mbunan, bi mbili anyiin e mvame Zambe a tabe je été. A bi bili mevak me ndi nleme ya étôtoʼo Zambe.

³ A fe na, jaʼan e mintaé miangan été, bi bili ndi nlem a mbunane na, mintaé mia kôʼôlane njiban,

⁴ a njiban wo ve ngul e meveʼele été; a njibane meveʼele wo biaé ndi nlem .

⁵ A ndi nlem é ne te soo mejôbaʼane, amu nyeʼane Zambe ô nga miaseban e minleme miangan, a Mfufube Nsisim a nga vebane be bia.

⁶ Yaa, éyoñe te bi ngenan atek, Krist a nga wu asu mbia be bôt éyoñ é mbe ntiñetan.

⁷ E ne ayaé na, môt a wu ajô zôsôa môt. Ndôʼôtô môt a ne jibi wu ajô mbamba môt.

⁸ Ve Zambe a liti abim avé a nyeʼe bia vôme nyôna na: éyoñe te bi ngenane bebo mam abé , Krist a nga taté wu amu ajô dangan.

⁹ Nge bi mbili mekabe éyoñe ji amu metyi mé, biyoñe tañeya bia ye bo ngule ya saʼale ayaa Zambe.

¹⁰ Bi nga too besiñ be Zambe, ve bi maneya bo élat a nye, a zene ya awu mone wé, biyoñe tañeya, éyoñ bi ntoo nlatan a nye, bia ye nyiiban amu ényiñe jé.

¹¹ A fe na, bi nto mebune be Zambe amu Nti wongan Yésus Krist, amu jôé dé, bi nga bo élat bia be Zambe.

Adam a Yésus Krist

¹² Ajô te, aval ane abé e nga nyiine si nyô amu môte wua, a amu abé te, awu e nga zu. Amu nalé, awu e nga kui e be bôt bese, amu bese be nga bo abé .

¹³ Valé Zambe a ngenane te ve Môze metiñ, abé e nga too si nyô. Ve mbôle metiñ me nji tabe, Zambe a nji leb abé .

¹⁴ Ve da, ataté Adam a kui Môze, awu e nga too, jaʼane be bôt be nji bo aval abé Adam a nga bo, nye a mbe éveʼelaʼa nyô a nga yiane zu e melu ôsu.

¹⁵ Ve akôsa bo nalé, mveane mvam ô voʼo veʼane wu nleban. Amu zene nyôna na, nge amu abé môte wua, awu e nga zu e be bizuʼu bi bôt, abim avé mvam Zambe, nyô é nga vebane be môte wua, Yésus Krist, ja ye veban abui abui e be bizuʼu bi bôt.

¹⁶ Nalé fe na mveane zesé Zambe wo selan abé môte wua a mam ma tôñ été. Ntyiʼan ajô wo suʼulane mekua, ve minkoban abui amu mveane mvame Zambe, môt a suʼulane kabe.

¹⁷ Amu nge amu nkobane môte wua, awu e nga zu jôô, abim avé ba ba nyoñ abui mvam a mveane zôsôô e be Krist étam étam, ba ye jôô ényiñ été.

¹⁸ Tyiʼibi na, amu nkobane môte wua, bôte bese be nga nyoñe mekua, avale te fe amu mboone zôsôô môte wua, mekabe ma ve ényiñ e be bôte bese.

¹⁹ Amu melo me môte wua, bizuʼu bi bôt bi nga bobane bebo abé , avale te fe amu mewôʼô me môte wua, bizuʼu bi bôt bia ye kabe.

²⁰ Metiñ me nga zu ane minkoban mia ye bo abui. Ve vôm abé e nga bo abui, vôm ate mvam é nga dañedañ.

²¹ Nalé ate, aval ane abé e nga jôô a kui awu, nde te amu zôsôô , mvam ja jôô asu ényiñe ya nnôm éto, amu Yésus Krist Nti wongan.