2 Bb. 7 - Bible en langue Bulu

¹ Ane Elizé a nga jô na: Vôʼôlaʼan ajô Nti! Avale di nde Nti a jô na: A akiti, aval awolo di, mia ye kuse lita avute zamgbwa tañe sikel jia a lita orge awôm a ényin sikel jia e mbé Samari.

² Evete bezimbi, njô bôt a nga yeʼe je wo, é nga jô môta Zambe na: Toʼo na, Nti a dii bevundi ya yôp, ye jame te da ye boban ane wo jô? Elizé na: Yaa! Wo ye yene de a mise môé, ve wo ye bo te jôm.

³ Minzezame minyin mi nga too anyiine tison. Nde be nga jôan e zañe jabe na: Amu jé bia tabe va a yange awu?

⁴ Nge bia jô na: E nyiʼane tison été, mbôlô zaé é kômeya éto été, bia ye wu. Nge bia tabe va, bia ye wu avale da. Nkôlaʼane si bi ke minkane Besirieñ, nge ba ye jôʼé bia na bi nyiñ, bia ye nyiñ; nge ba wôé bia bia ye wu.

⁵ Be nga kôlô si éyoñe nlô jôp wo ke alumbu a ke minkane Besirieñ a wulu e minkane miabe mise. Ve môt éziñ a nji bo été.

⁶ Nti a nga bo na, éduñe bevagoñ, ji bikabela a ji éwôlô nsamba é wôʼé e minkane Besirieñ. Eyoñe te Besirieñ bana be nga jô ba bevoʼo na: Njô bôte ya Israél a nyoñeya bejô bôte Behétieñ a ba ya Ejipte e ngame jé na, be zu wosane bia.

⁷ Nde be nga kôlô si a tub éyoñe nlô jôp wo lumbu, be mane liʼi menda bindelé, bikabela, bijakas, be liʼi fe minkane nalé; be nga tube na be nyii ényiñe jap.

⁸ Eyoñe minzezam mi maneya bômane minkane mise, be nga nyiin e nda éndelé éziñe si. Be nga di a nyu, wôna be nga kôlô valé, be bili argent, or a mengômesan be nga ke solé. Be nga bulan, a nyiin e nda éndelé fe si, be mane toʼé biôm bi mbe été a ke solé bie.

⁹ Be nga jô e zañe jabe na: Bi nji ke bo ane da yian. E môse wu ô ne môse mbamba foé. Nge bia bo te jô jam a yange éfufube tyé, bia ye bo te tub ayaa. Nkean a nyiin e tison a kate nda njô bôte foé.

¹⁰ Ane be nga loone bebaʼale mimbé ya tison a kate be foé na: Bia te nyiin e minkane Besirieñ ve môt a nji bo été, teke tyiñe môt, foʼo ve bikabela a bijakas bi tii, a menda bindelé me too bifut.

¹¹ Nde bebaʼale mimbé be nga lôme tyiñ e tison été, a kate foé e nda njô bôt.

¹² Ane njô bôt a nga kôlô si a alu; a nga jô bebobisaé bé na: Ma zu kate mia mbia jam Besirieñ be maneya kômesane bia: ba yeme na bia wôʼô zaé, nde ba te ke minkan atan a sobô fé, be jôʼô na: E bôt bi maneya dilane bita, ba ye kui e tison atan, bia ye bi be bevevee, a bia ye nyiin e tisone jap.

¹³ Ane wua ya bebo bisaé bé a nga nyoñe nkobô a jô na: Be tame nyoñe bikabela bitan bi liʼiya e tison: da ye boban mfaʼa wob, ane mfaʼa ézuʼu bôte ya Israél é liʼiya tison, avalʼane jama bôte ya Israél a lumbu mfaʼa ya njañ. Nlômane bie a bia ye yen!

¹⁴ Nde be nga nyoñe bevagoñ bebaé a bikabela biab a njô bôt a nga lôme be e bibôʼa mebo nsamba mewosane Besirieñ a jôʼô na: Kela fomban!

¹⁵ Nde be nga tôñ bibôʼa mebo biap a kui Yordan, a yene na zen ése é mbe é bili mengômesan a biôme Besirieñ be nga wua fé éyoñe be nga tub atemetem. Ane minlôman mi nga bulane zu kate njô bôte foé.

¹⁶ Eyoñe te bôt be nga kui atan a ke sa minkane Besirieñ; be nga kuse lita avute zamgbwa sikel jia, a lita fôn awôm a ényin sikel jia, avale Nti a nga kobô.

¹⁷ Njô bôt a nga kee évete mewosan a nga yeʼe wo na, a baʼale mbé ya tison, ve bôt be nga tibi nye a mebo, a late nye e mbé , nde a nga wu, avale môta Zambe a nga jô. A nga jô de éyoñe njô bôt a nga ke be nye.

¹⁸ Eyoñe môta Zambe a nga kobô njô bôte na: Lita fôn awôm a ényin ja ye kuane sikel jia a lita avute zamgbwa ja ye kuane sikel jia, a akiti, e mbé ya Samari.

¹⁹ Evete mewosan é nga nyoñe nkobô a jô môta Zambe na: Toʼo Nti a dii bevundi e yôp, ye nkobô te wo ye tôéban? A Elizé a nga yalane na: Yaa! Wo ye yene de a mise môé womien, ve wo ye bo te di jôm.

²⁰ Avale te nde e nga kui be nye: bôt be nga tibi évete mewosan a late nye e mbé , ane a nga wu.