2 Bb. 25 - Bible en langue Bulu

Nébukatnétzar a dili Yérusalém bita

¹ Mbu ébulu ya njôane wé, e ngon awômô é too melu awôm, Nébukatnétzar, njô bôte ya Babilôn, a nga zu wosane Yérusalém baa nsamba mewosane wé ôse; a nga vule minkan Yérusalém a too nye ôsu. Be nga lôñ alem ya wosane nye mbômaʼan.

² Be nga dili tisone bita a kui mbu awômô a wua ya Sédékias a nga jôô.

³ Ngon é too melu ébu, zaé fe é too ngul abui e tison été, bôt tee bidi ya di,

⁴ be nga tub afôla akaʼa ya tison. Ane njô bôt a nga tup a alu, a bôte mewosan bese, be nga lôt e zene ya mbé ô ne e zañe mimfine mibaé, bebé afube njô bôt, éyoñe te Bekaldééñ be bômaʼane tisone nkuk. A nga tyii e zene ya Araba.

⁵ Ve nkane bita Bekaldééñ ô nga tôñe njô bôt a koone nye e mbiʼili Yérikô, a nsamba mewosane wé ô nga mialan a ke nye ôyap.

⁶ Ane be nga bi njô bôt a kee nye e be njô bôte ya Babilôn e Ribla a be nga tyiʼi nye ajô a ve nye melep .

⁷ Be tyiʼi bobefame be Sédékias tyiñ émien a too; wôna njô bôte ya Babilôn a nga bo na be tube Sédékias mis, a nga bo fe na be kaʼa nye a minkole mi mvot a kee nye e Babilôn.

Nyôñane Yérusalém

⁸ E ngone muam é too melu zamgbwa, mbu awôm a ébulu Nébukadnétzar njô bôte ya Babilôn a nga jôô, ñwô Nébuzaradañ, évete bebaʼale, mbo ésaé njô bôte ya Babilôn, a nga zu e Yérusalém.

⁹ A nga diʼi nda Nti, e nyô njô bôt a ma mese ya Yérusalém; a nga diʼi avale nda ése, a avale éwôlô ese nda éte é mbe nguleya bo.

¹⁰ Minkane bita Bekaldééñ mise mia wulu évete bebaʼale, mi nga tyam mimfin mia bômane Yérusalém.

¹¹ Nébuzaradañ, évete bebaʼale, é nga kee mebukaʼa me bôt me nga too tison minkôm, nalé fe ba be nga kañese ke éjôé njô bôte ya Babilône si, a e jama bôte mbok.

¹² Ve évete bebaʼale é nga ve nkañesan e be bone be bôte na, be liʼi e Yuda ane bebé mefube mindik a ane besenane si.

¹³ Bekaldééñ be nga buʼu beta mekône me mvot me mbe e nda Nti, metin, mañ me mvot me mbe e nda Nti, a be nga kee mvot e Babilôn.

¹⁴ Be nga nyoñ beminkeñe, bisobelé, atyeñ, bilaé a biôme bi mvot bise be nga bo bie ésaé.

¹⁵ Evete bebaʼale é nga nyoñe fe bikanda bi nduan a bilaé, jôm ése é mbe or a jôm ése é mbe argent.

¹⁶ Beta mekône mebaé, mañ a metin, mbie Solômon a nga bo asu nda Nti teke môt a nga yem adite ya biôme bi mvot bite bise.

¹⁷ Beta akône wua a mbe ôyabe yôp menyiʼi me mo awôm a muam, andoʼo mvot e bete de yôp e too menyiʼi me mo mela nté ya yôp, e bili avot a bibuma bi grenad bi to andoʼo te été mbômaʼane, bise mboon a mvot; beta akône baa a mbe fe avale te, avot e too été.

¹⁸ Evete bebaʼale é nga nga nyoñe ntuni nnen Seraya, Sôfôni, baʼa ntuni , a bebaʼale mbé belaa.

¹⁹ E tison, a nga bi évete bezimbi é mbe é baʼaleʼe bezimbi a bôte betan be mbe be boʼo njô bôt ésaé a mbe be nga too e tison; a nga bi fe ñyeme bekalate, évete nsamba mewosan é nga bili ésaé ya nyoñe bôt, bôte ya été mewôm mesaman be too e tison.

²⁰ Nébuzaradañ, évete bebaʼale, a nga bi be mimbôk a kee be e be njô bôte ya Babilôn e Ribla.

²¹ Ane njô bôte ya Babilôn a nga bibi a wôé be e Ribla, e si ya Amat. Avale di nde Yuda a nga ke minkôm ôyab a si jé.

Gedalia, ngovina ya Yuda

²² Mfaʼa bôt be nga liʼi e si ya Yuda, e ba Nébukatnétzar, njô bôte ya Babilôn a nga kañese na be liʼi, a nga telé Gedalia a bo ngovina wob a too e mone Ahikam, e mone Safan.

²³ Eyoñe bivete bise ya minsamba, bebien a bôte bap be nga wôʼô na njô bôte ya Babilôn a teléya Gedalia ngovina, be nga ke be Gedalia e Mispa be too na: Israél e mone Netania, Yôhanañ e mone Karéa, Seraya e mone Tanhumét ya Netôfa a Yazaniahu e mone Makatieñ. Bebien a bôte bap.

²⁴ Gedalia a nga kane be ngana, be a bôte bab a jô be na: Te koone jam éziñe woñ e soʼo e be bebo bisaé ya be Bekaldééñ; tabaʼan e si jenan a bo njô bôte ya Babilône bisaé wôna mia ye nyiñe mvoʼé .

²⁵ Ve e ngone zamgbwale, Ismaél e mone Nétania, e mone Elisama ya nda bejô bôt, a nga zu a bôte awôm, ane be nga bibi Gedalia, nde a nga wu, a Beyude a Bekaldééñ baa be be be nga too e Mispa.

²⁶ Eyoñe te ñhe bôte bese be nga kôlô, ataté nyô a ne tyôtyoé a kui nyô a ne anen, nalé fe bivete ya minsamba, a ke Ejipte amu be nga ko Bekaldééñ woñ.

Evil-Mérôdak a liti Yehôyakin mvam

²⁷ Mbu mewôm mela a zamgbwale ya nkeane minkôme Yehôyakin, njô bôte ya Yuda, ngon awôm a baa é too melu mewôm mebaé a zamgbwa, ñwô Evil-Mérôdak, njô bôte ya Babilôn, mbu ôsu a nga taté jôô, a nga kuli Yehôyakin, njô bôte ya Yuda nda mimbôk a duma ese.

²⁸ A nga kobô nye mbamba nkobô a telé éto njôane jé ôsu ya éto njôane bejô bôt baa be be be nga too e Babilôn.

²⁹ A nga bo nye na a tyendé mengômesane mimbôʼô mé a nga beʼe, a Yehôyakin a nga di éyoñ ése e vôm a nga too, nté ôse a nga vee.

³⁰ Nté ôse a nga vee, baa njô bôt be nga laane minlañ.