2 Bb. 20 - Bible en langue Bulu

Okon a ñyetane njô bôt Ezékias

¹ Melu mete Ezékias a nga kon bebé ya wu. Ane nkulu mejô Ezayi, e mone Amos, a nga zu be nye a jô nye na: Avale di nde Nti a kobô na: Vaʼa nda jôé mebendé, amu wo zu wu, woo ye ke fe nyiñ.

² Nde Ezékias a nga kôñelan asu dé mfaʼa ya mfin a yeʼelane Nti na:

³ A Nti, ko ma éngôngo! Simesaʼane na, me nga wulu e mise môé e bebela été, nalé fe a nlem ôse, a me nga bo fe mam me ne mvaé e mise môé! Nde Ezékias a nga kuli miliʼi mis abui abui.

⁴ Valé Ezayi a kuiya atan, ve a ngenan te suane nseñ ô nʼanen, éyoñe te ajô Nti e nga kui be nye na:

⁵ Bulaʼane ke jô Ezékias, nliti zene ya bôte bame na: Avale di nde Nti, e Zambe David, ésoo a jô na: Me wôʼôya meyeʼelane môé, me yeneya miliʼi môé. Tame yen ma ye bo wo mvoʼé; e môse lale, wo ye bet e nda Nti.

⁶ Ma ye beté mimbu awôm a mitan e melu môé été. Ma ye kôté wo a tisone nyô e mo me njô bôte ya Asiri; ma ye kamane tisone nyô amu mamien, a amu David mbo ésaé wom.

⁷ Ane Ezayi a nga jô na: Nyoñane mbome befig. Nde be nga nyoñe wô a babe wô e vôm étyel é mbe, nde Ezékias a nga bo mvoʼé .

⁸ Ezékias a nga jô Ezayi na: Ndeme fé ma ye yeme je na Nti a ye bo ma mvoʼé , a na, ma ye bete nda Nti e môse lale?

⁹ Ezayi na: E jame di da ye bo wo ndem, e soʼo be Nti na, Nti a ye tôé nkobô wé: ye nsisiñ wo yiane yaé tañe medaa mebo awôm, ye bulane mvus tañe medaa mebo awôm?

¹⁰ Ezékias a nga yalane na: E ne tyiʼibi ya dutu nsisiñ tañe medaa mebo awôm. Ajô te ô jibiʼi bulane mvus tañe medaa mebo awôm!

¹¹ Ane nkulu mejô, Ezayi a nga yeʼelane Nti, Nye ve bulane nsisiñe mvus tañe medaa mebo awôme ya medaa mebo Akaz, mfaʼa nsisiñe te ô nga lumbu.

Minlômane ya Babilôn mia zu be Ezékias

¹² Melu mete, Berôdak-Baladan, e mone Baladan, njô bôte ya Babilôn, a nga lôme kalate a das e be Ezékias, amu a nga wôʼôtan ajô ôkon Ezékias.

¹³ Ane Ezékias a nga nyoñe minlôman mite a liti mie e vôme biôme bié bi ne beta tañ bi né: argent, or, bityitaʼa, a mbon ô nʼédima, mengômesane bityé mé, a biôm bise bi mbe akume dé été; teke jôm Ezékias a nga bo te liti be e nda jé a e bitabaʼa bié bise.

¹⁴ Ane nkulu mejô Ezayi a nga zu e be Ezékias, a jô nye na: Bôte bete ba te jô aya, ba so ke vé a zu be wo? Ezékias na: Ba te so si é nʼôyap, e Babilôn.

¹⁵ Ezayi a nga beta jô na: Jé ba te yen e nda jôé? Ezékias na: Ba te yene jôm ése é ne e nda jam. Teke jôm éziñe ya akume dam me nji liti be na be yen.

¹⁶ Eyoñe te Ezayi a nga jô Ezékias na: Vôʼôlôʼô nkobô Nti!

¹⁷ Tame yen, melu ma zu, ba ye kee jôm ése é ne nda jôé e Babilôn a biôm bise bʼésoo be nga kôan a kui môse wu; teke jôm ja ye liʼi, nalé Nti a jô.

¹⁸ Ba ye nyoñe bone bôé, ba ba so e be womien, e mbiane wôé. Ba ye bo bemiak e nda njô bôte ya Babilôn.

¹⁹ Nde Ezékias a nga yalan Ezayi na: Ajô Nti wo te tot e ne mvoʼé . A nga beta jô na: Ke mvoʼé a évôvoé bia ye bo nté ôse ya ényiñe jame nga?

²⁰ Mimboone mivoʼo mi Ezékias, éwôlô jé, étame mendim a nga bo, a zene mendim a nga bo na mendim me kui tison, me ne ntilan e kalate minkañete bejô bôte ya Yuda.

²¹ Ezékias a nga bômbô ba bʼésaa vôme wua, e mone wé Manasé a nga jôô éjiane jé.