2 Bb. 19 - Bible en langue Bulu

Yérusalém a nyiiban, nsamba bita Senakérib wo bôlé

¹ Eyoñe njô bôt Ezékias a nga wôʼô jame te, a nga nyabe mengômesane mé, ve jaé nkuta a ke e nda Nti,

² Ane a nga lôme bôte bana e be nkulu mejô Ezayi e mone Amôs: Eliakim, mbaʼale akume ya nda njô bôt, Sebna, ñyeme bekalate, a betuni be dañeya tabe ayap ésaé betuni été, bese be beʼe minkuta.

³ Nde be nga jô nye na: Avale di Ezékias a jô na: Môse wu ô ne môs ôlun, wu meleb a ôsame; amu bon be ntoo bebé ya kui e mebume benyia, ve nguleya ya biaé é ne momo.

⁴ Ndôʼôtô Nti, e Zambe wôé, a ye ke ôsu a vôʼôlô mejô me Rabsaké nye njô bôte ya Asiri, e masa wé, a te lôme na, a ta vevea Zambe, a ndôʼôtô na, a ye ve melebe mé amu mejô Nti, e Zambe wôé a te wôk. Boʼo ñhe meyeʼelan asu mebukaʼa me ngenane me vee.

⁵ Ane bebo bisaé be njô bôt Ezékias be nga ke be Ezayi.

⁶ Ezayi a nga jô be na: Avale di nde mia ye jô masa wônan: avale di nde Nti a jô na: Te ko mejô wo te wôʼô woñ ane bisoé bebo bisaé be njô bôte ya Asiri ba te kobô ma ébiasé.

⁷ Avale nsisime di nde ma ye futi be nye na, e foé a ye nyoñ ja ye bo nye na a bulan e si jé; a ma ye bo na a wu a nkpwaté mekôn e si jé.

⁸ Ane Rabsaké a nga bulan a koone njô bôte ya Asiri a wosaʼane Libna, amu a nga wôʼô na, a kôlôya Lakis.

⁹ Ane njô bôte ya Asiri a nga nyoñe foé ajô Tirhaka, njô bôte ya Etiôpi; be nga jô nye na: Tame yen, a te wulu dulu ya wosane wo.

¹⁰ Nde a nga beta lôme minlôman e be Ezékias a jôʼô na: Mia ye kobô Ezékias njô bôte ya Yuda na: E Zambe wôé, Nyô ô too nye ndi, a boʼo te duʼu wo a jôʼô na: Yérusalém a ye bo te ku e mo me njô bôte ya Asiri.

¹¹ Womien ô nga wôʼôtan, e jame bejô bôte ya Asiri be nga bo mesi mese, be nga mane jiane me; ye wo ô nga ye kôtéban?

¹² Bezambe ya meyoñ bʼésaa bam be nga tyam, ye be nga nyii me, Gôzan, Aran, Reséf a bone bʼEden be ne e Telasar?

¹³ Bejô bôte ya Amat, Arpad, tisone ya Sefarvayim, nyô ya Ena a Eva be ne vé?

¹⁴ Ane Ezékias a nga nyoñe kalate e mo minlôman, a lañe nye a bet e nda Nti. Nde Ezékias a nga liti nye e mise me Nti.

¹⁵ Ezékias a nga yeʼelan e mise me Nti, a jô na: A Nti, Zambe Israél, Nyô a too e Bekerubime yôp! Wo étam ô ne Zambe, asu bijôé bise ya si nyô, wo ô nga té yôb a si,

¹⁶ A Nti! Keʼe alo a vôʼôlô! A Nti, kuʼi mis a fombô! Vôʼôlôʼô nkobô Sénakérib a te lôme Rabsaké na a ta vevea Zambe.

¹⁷ A Nti! E ne bebela na bejô bôte ya Asiri be maneya jiane meyoñ a mesi map.

¹⁸ Be nga wua bezambe bap e nduan, ve balé be nji bo bezambe, ve mimboone ya mo me bôt, bilé a mekok , a be nga bo be momo jôm.

¹⁹ Eyoñe ji a Nti, e Zambe wongan, nyiʼi ñhe bia e mo me Sénakérib, nalé meyoñe mese ya si ma ye yeme na wo Nti étam ô ne Zambe.

²⁰ Eyoñe te Ezayi e mone Amôs a nga lôme bôt be kate Ezékias na: Avale di nde Nti, Zambe ya Israél a jô na: Me wôʼôya meyeʼelan wo te yeʼelane ma, ajô Sénakérib, njô bôte ya Asiri.

²¹ Nkobô Nti a kobôya a too nye ngame yat ñwô wu: a biasé wo, a woé wo, éndune ngon, ngone ya Siôn; a Siʼisi nlô e mvuse jôé ngone ya Yérusalém.

²² Za nye ô nga ta a biasé? Ô nga bete tyiñ a tebe nye ngame yat? Ô nga bete mise môé yôp, A fombô Nyô ya Israél a nʼétyi!

²³ Ô nga ta Nti anyu minlôman O nga jô na: Me nga bet abôbône minkô a ézuʼu bevagoñe jam. E temeteme Libañ été, ma tyiʼi besédre bé ba dañ ôyabe yôp, besipré bé ba dañ abeñ, ma ye ke a kui e susuʼa vôme wé a bômbô, a kui Afane dé da funane afube bilé bia wum bibuma.

²⁴ Me nga fak a nyu avale mendim afe. Ma ye vele ôsôé yʼEjipte a abo si ya mekule mebo mam.

²⁵ Ye ô nji wôʼô na, me boya mam mete aso ayabe mvus, na aso melu mvus, me nga bo me? Eyoñe ji ma zu soo me, a bitison bi bili alem bia ye bo ve mevise me mbuan.

²⁶ Bôt be too été be ne ngule momo. Ma ko woñ, ba wôʼô ôson. Be ne ane biloʼo ya mefup, a nteʼane biloʼo ya mefan, ane mbéane biloʼo ya mendi, ane menyeñ me fôn éyoñ é ngenan te bi metin.

²⁷ Ve ma yem éyoñe wo tabe si, éyoñe wo kui atan, a éyoñe wo nyiin e nda été. Jaʼan éyoñe wo wôʼô me abé .

²⁸ Amu wo wôʼô me abé . Nkobô ébiasé wôé ô beteya a kui e melo mam. Ma ye futi ôdôʼô wom e mimbile mi môé miôé, A kandé ékabela jam e biyaé biôé, a ma ye bo na ô bulan e zen ô nga so.

²⁹ E jame di é boʼo wo ndem: mbu ôte ba ye di ébuma ya fé é nga ku si, a mbu wo tôñe valé, ébuma ya fes ja faa ébien. Ve mbu lale, béane bidi a kôane bie Béane mindiʼi mi woon, a di bibuma yʼété.

³⁰ Befam awu ya nda Yuda, ba ye liʼi. Ba ye beta kui minkañ e mfaʼa ya si, a beʼe bibuma mfaʼa ya yôp.

³¹ Amu mebukaʼa ma ye so Yérusalém, a befam awu ba ye so nkôle Sioñ. E jam ayôñe mboone mame Nti ya minsamba mewosan da ye bo, e nde le.

³² Ajô te Nti a kobô ajô njô bôte ya Asiri na: A ye bo teke nyiin e tisone nyô. A ye bo teke wua akoñ élaé été, A ye bo te tebe je e ngame yat, Nge lôñe je bikôndôk e ngame yat. Nalé Nti a jô.

³³ E zen a nga tyii, a ye je beta tyii a ye bo te nyiin e tisone nyôna été, nalé Nti a jô.

³⁴ Ma ye kamane tison éte na me nyii je, Amu mamien, a amu David mbo ésaé wom.

³⁵ A nga bo na, alu te ebien, éngele Nti a nga kui atan a wôé, e minkane Beasirieñ, bôte toyini ntet a mewôme muam a étan, a éyoñe bôt be nga kôlô si mametyé, a koé na bese be ntoo ve mimbim.

³⁶ Ane Sénakérib, njô bôte ya Asiri, a nga ke a bulane ke tabe Ninive.

³⁷ A nga bo na, meboñ me kute nye si e nda Nisrôk e zambe wé, bone bé Adramélék a Sarétsér, be nga wôé nye a nkpwaté mekôn a tup e si ya Arara. Ane mone wé Esaradoñ a nga jôô éjiane jé.