2 Bb. 17 - Bible en langue Bulu

Ozé, njô bôt a suʼulan Israél, Samari a nyoñeban

¹ Mbu awôm a baa Akaz, njô bôte ya Yuda a nga jôô, ñwô Ozé, e mon Ela a nga tebe njô bôte ya Israél e Samari. A nga jôô mimbu ébu.

² A nga bo mam me nʼabé e mise me Nti, ve saake ane bejô bôte ya Israél be nga too nye ôsu be nga bo.

³ Salmanazar, njô bôte ya Asiri a nga bet a wosane nye, ane Ozé a nga ke éjôé jé si a yaʼane nye toya .

⁴ Ve njô bôte ya Asiri a nga kulane feʼe Ozé a nga bôndé na, a wôé nye, amu a nga lôme minlôman e be Sô, njô bôte ya Ejipte, a telé fe nlômane ya lôme toya mbu ôse e be njô bôte ya Asiri. Nde njô bôte ya Asiri a nga bo na be kaʼa nye a bengôkop a fete fe nye e nda mimbôk.

⁵ Wôna njô bôt a nga wulu e si ése ya Israél a bete na a wosane Samari, ve bômane nye bita tañe melu mela.

⁶ Mbu ébulu Ozé ñwô njô bôte ya Asiri, a nga nyoñe Samari, a kee Israél minkôm e Asiri. A nga tooé be Ala a Abor yôp, ôsôé ya Gôzan, nalé fe e bitisone Beméde.

⁷ Nalé a nga boban amu bone bʼIsraél be nga bo Nti, e Zambe wob abé , Nyô a nga soo be si yʼEjipte, be kôlôʼô éjôé Faraoñ, njô bôte yʼEjipte si, a amu be nga ko bezambe befe woñ.

⁸ Be nga tôñe miñyeʼelane ya meyoñe Nti a nga wôlé biôm ôsu bone bʼIsraél; nalé nye bejô bôte ya Israél be nga bo.

⁹ Bone bʼIsraél be nga bo Nti, e Zambe wob, e mam me nji yian asoé: be nga lôñe bito ya bikôndôʼô yôp e bitisone biabe bise été, e Azomezome menda benonô bitison, avale fe ane e bitison bi bili alem.

¹⁰ Be nga telé mekôn me ne mbaan a mekône mʼAkéra e minkôle mise mi ne mbetane yôb, a e bilé bise bi ne nyumi si.

¹¹ A valé, nye be nga diʼi beôlobinda e bito bise ya bikôndôʼô yôp, avalʼane meyoñ a nga wôlé biôm ôsu viap. Be nga bo mbia be mam me nga bo Nti na, a wôʼô ôlun.

¹² Be nga kañe bengunemelan, mbe Nti a nga kobô be na: Mia ye bo te bo jame te.

¹³ Nti a nga ve Israél a Yuda ayemé ne ngeññ, anyu be bekulu mejô bé bese, a di beyene mam bese a jô be na: Bulaʼane mvus mbia mezene menan, a baʼale mebendé mam a memvinda mam, mi tôñôk atiñe dam ese me nga bendé bʼésoo benan a nde me nga lôm a anyu bebo bisaé bam be ne bekulu mejô.

¹⁴ Be nji ke vôʼôlô, ve bo ntib avale bʼésaa bap be nga bo, mbe be nji ke buni Nti e Zambe wop.

¹⁵ Be nga ben memvinda mé, élat a nga bo a bʼésaa bab a miñyiane mi mam a nga baʼalane be na be yem. Be nga lat a zezé biôm a bo bebien bemomo. Be nga lat a meyoñ me nga bômane be a mme Nti a nga kamane be na be bo te vu.

¹⁶ Be nga liʼi mebendé me Nti e Zambe wob mese, be nga bo bebiene bone benyaʼa bebaé a nyeman étyé, be nga ba mekône mʼakéra, be nga kañ ateté ya yôb a kañe fe baal .

¹⁷ Be nga diʼi bobefam a bobebinga bab e nduan, be nga bo mviʼi a majik, a kuane bebien asu ya bo mam me nʼabé e mise me Nti, a bo nye na a wôʼô ôlun.

¹⁸ Ajô te Nti a nga dañe wôʼô Israél ôlun, a telé be e fefele ya asu dé. Ayoñe Yuda étam nde e nga liʼi;

¹⁹ ve toʼo Yuda, nye fe a nji ke baʼale mebendé me Nti, e Zambe wé! Be nga wulu, be tôñe fe, ve bibôʼa mebo me Israél.

²⁰ Nti a nga bene mvoñe bôt Israél ése; a nga liti be ôsame, a nga kalane be e mo besa biôm, a a nga suʼulane titane be be kôlô nye mis a ke nye ôyap.

²¹ Eyoñ a nga wôlé Israél e nda David, be nga telé Yérôbôam e mone Nébat njô bôt, a Yérôbôam a nga vaa be e be Nti a tindi nye na a bo abé e nʼanen

²² bone be Israél be nga bo aval abé ese Yérôbôam a nga bo; be nji ke saʼale de.

²³ Akekui Nti a nga telé Israél ôyab e mise mé, avale a nga kate de anyu be bebo bisaé bé bese be ne bekulu mejô. Israél a nga ke minkôm ôyab a si jé, Asiri, vôm a nga tabe a zu kui môse wu.

Besamariteñ

²⁴ Ane njô bôte ya Asiri a nga soo bôte ya Babilôn, ba ya Kuta, Ava, Amat a ba ya Sefarvayim. A nga tooé be e bitisone ya Samari, éjiane bone be Israél. Ane be nga nyoñe Samari, a tabe e bitisone bié.

²⁵ Eyoñ be nga taté na ba tabe été, be nji ke ko Nti woñ, ajô te Nti a nga lôme be bengbwengbwem be wôé be.

²⁶ Nde be nga kate njô bôte ya Asiri na meyoñ ô nga kee me mekaban a tooé me e bitisone ya Samari me nji ke yeme mbunane zambe ya si éte; zambe ate a lômeya be bengbwengbwem ba wôé be, amu be ne te yeme mbunane zambe ya si éte.

²⁷ Njô bôte ya Asiri a nga lôm abendé na: Lômane wua ya betuni mi nga kee be minkôm wé, a tabeʼe wé a yeʼele be mbunane zambe ya si éte.

²⁸ Ane wua ya betuni be nga ke minkôme be soʼo Samari, a nga zu tabe Bétél a yeʼele be avale ba yiane ko Nti woñ.

²⁹ Ve meyoñ me nga bo ayoñ ese bezambe bap. Be nga telé be e menda me mbe e bito ya bikôndôʼô yôp, mbe bôte ya Samari be nga lôñe bitison, e vôm ayoñ ese ya meyoñ mete e nga too.

³⁰ Bôte ya Babilôn be nga bo zambe , jôé na Sukôt-Benôt, ba ya Kut be nga bo nyô a mbe jôé na: Nergal, bôte ya Amat be ki be nga bo zambe jôé na Akima,

³¹ Ba ya Ava be nga bo émbap môé na: Nibaz a Tartag; ba ya Safarvayim be nga diʼi bone babe nduan asu duma bezambe môé na: Adramélék a Anamélék bezambe ya Sefarvayim.

³² Be nga ko fe Nti woñ, a be nga telé betuni ya bito ya bikôndôʼô yôp mbe be nge nyoñe vôm asu bezambe bete; betuni bete be nga bo bisaé asu bezambe bete e menda bito ya bikôndôʼô yôp.

³³ Nalé ate be nga ko Nti woñ, ve be kañe fe bezambe bap, avalʼéyeme meyoñe ya mevôm be nga so a zu mekaban é né.

³⁴ Be ngenan be boʼok mimboone miabe ya atataʼa a zu kui môse wu. Be nji ko Nti woñ, teke bo memvinda a biyeme biap, nge metiñ a mebendé Nti a nga ve bone be Yakob, nyô a nga yôlé na Israél.

³⁵ Nti a nga bo Elat a be, a bendé be na: Mia ye bo te ko bezambe befe woñ; mia ye bo te kute meboñe si ôsu viap a mia ye bo te kañe be nge ve be mimvean.

³⁶ Ve mia ye ko Nti woñ, nyô a nga soo mia si yʼEjipte a beta ngu a wo ô ne nsaman; ôsu vié ñwô mia ye kute meboñe si a e nye mia ye ve mimvean.

³⁷ Mia ye baʼale a bo memvinda, minjôan, metiñ a mebendé a nga tili mia éyoñ ése a mia ye bo te ko bezambe befe woñ.

³⁸ Mia ye bo te vuan élat me nga bo a mia, a mia ye bo te ko bezambe befe woñ.

³⁹ Ve mia ye ko Nti e Zambe wônane woñ, a a ye kôté mia e mo besiñe benan bese.

⁴⁰ Be nji bo mewôk a ba bo e fulu jabe ya atataʼa.

⁴¹ Meyoñ mete me nga ko Nti woñ ve be nga kañe fe bengunemelane bap. Bone bap a bendaé bap ba bo ane bʼésaa bap be nga bo a zu kui môse wu.