1 Bb. 7 - Bible en langue Bulu

Melôñe me nda njô bôt

¹ Solômon a nga lôñe fe nda jé émien; a nga mane je tañe mimbu awôm a mila.

² A nga taté lôñe nda ba loone Afane Libañ: nté menyiʼi me mo ntet, ndam menyiʼi me mo mewôm metan, nkôñe yôp menyiʼi me mo mewôm mela. E nga lôñeban e minnoñ mi beta mekôn benyin, mboon a minkuʼu bilé bi Sédre, minsalan minkoʼo mi Sédre, mi too e mekône mete.

³ E mfaʼa ya yôp, ntaʼane bilé bi Sédre, ô bete betyengan ane mimbôñ, mmie beta mekôn be nga beʼe: betyengaʼane mimbôñ bete be mbe mewôm menyin a betan, nnoñ wua awôm a betan;

⁴ minnoñ bevundi mi mbe mila, vundi ase ya minnoñ mite mila a nga lôô vundi mbok.

⁵ Bevundi bete bese a biôme biabe bise, be mbe avale da mimfaʼa mise, vundi ase a lôô nyô mbok, minnoñ bevundi ke mila.

⁶ A nga bo aba beta mekôn: nté, binyiʼa bi mo mewôm metan, ndam menyiʼi me mo mewôm mela; ôsu, mbé si ô bili beta mekôn, ébes é too été mfaʼa yʼasu.

⁷ A nga bo aba mejô, vôm a nga bo a tyiʼi mejô, aba ntyiʼane mejô, be nga bômane de a Sédre, ataté si a kui yôp.

⁸ Wôna, mfaʼa ya nda ébien a nga too, é mbe vôme mfe a selaʼan a vôme ya éto njôan é né; vʼé mbe éyekaʼa avale da. A nga lôñe nda fe asu ngone Faraoñ a nga luk; nda éte é mbe ane ndaa éto njôan.

⁹ Menda mete mese me mbe nlôñan a mekok me ne mbaan, mebim yʼété me too ma ya mekoʼo me nʼanen, nsiʼan a so e mesu mese, été a atan. Me mbe ataté mimbôkaʼa a kui minkôngô ya yôp, ataté atan a kui e beta nseñ.

¹⁰ Asu mimbôkaʼa ya si. Mekoʼo me ne mbaan, e beta mekok me ne menyiʼi me mo awôm a menyiʼi me mo muam.

¹¹ E mimbôkaʼa ya si be nga futi mekoʼo me ne mbaan, mebime yʼété me too ma ya mekoʼo me nʼanen a bilé bi Sédre.

¹² Minnoñ mekoʼo me ne mbaan a nnoñe beta bilé bi Sédre bi ne nsalan mi nga bômane beta nseñ, avale te fe mfaʼa nseñ ô ne e nda Nti été a e mbé si wé.

Nluane biôm asu Nda Zambe

¹³ Ane njô bôte Solômon a nga lôm be ke nyoñe Iram e Tir.

¹⁴ A mbe mone nkuse minga yʼayoñe Néftali, ésaa a too mone Tirieñ, nlui mvot; a mbe njalan a atyeñe ya mo, a atyeñ ya nlô, ñyeman mfaʼa ya lui mvot. Ane a nga zu be njô bôte Solômon, a bo bisaé bite bise.

¹⁵ A nga bo mekône me mvote mebaé, akôn ese nté ya yôp, menyiʼi me mo awôm a muam, mbômaʼane menyiʼi me mo awôm a mebaé.

¹⁶ A nga bo fe mendoʼo me mvot é ne nyeman mebaé asu ya beté me e mekône yôp; andoʼo da e too nté ya yôp menyiʼi me mo metan, andoʼo avok e too fe nté ya yôp menyiʼi me mo metan.

¹⁷ Mendoʼo me nga too e mekône yôp me nga bili mevot ntiñane mese ane songo, a minsinga ntiñan a bone bengôkop; andoʼo da zamgbwa a andoʼo avok zamgbwa.

¹⁸ Nalé nye a nga bo mekône mete; minnoñ mibaé mi mbe mbômaʼan avote da yôp, asu ya buti mendoʼo me nga too e mekône yôp; nalé ate fe a nga bo andoʼo avok.

¹⁹ Mendoʼo me nga too yôp mfaʼa ya mbalaʼa si, me nga too mboon éfunan ane sam ayañ, nté menyiʼi me mo menyin.

²⁰ Mendoʼo me nga too fe mfaʼa ya yôp e mekône mebaé mete yôp bebé a abum e mbe fefel avot; bibuma bi grenade bi nga too mintete mibaé bi too minnoñe minnoñ, mbômaʼan a andoʼo avok.

²¹ A nga telé beta mekône mete bebé e mbalaʼa si ya Nda Zambe; a nga telé beta akône ya mbo nnôm a yôlé de jôé na Yakin, a nga telé fe di ya mbo ngal a yôlé de jôé na Bôaz.

²² Sôsoʼo mekôn é mbe ane sam ayañ; ésaé mekôn é nga mane mvoʼé .

²³ A nga bo beta élabaʼa, ndeme ya mañ a mvot é ne nyeman. Elabaʼa te é mbe njiñelete, ndam menyiʼi me mo awôm. Nté ya yôp ô mbe menyiʼi me mo metan. Nkôle wo bômane njiñelete yʼété ô mbe bo menyiʼi me mo mewôm mela.

²⁴ E nka si, biveʼela bikpwas bi nga bômane me mimfaʼa mise, nté ô too menyiʼi me mo awôm, bikpwase bite bi bômaʼane mañ mete mimfaʼa mise, bikpwase bite bi nga too minnoñe mibaé, be nga sôé baa be mañ asôé da.

²⁵ Mañ mete me nga bete e beyôm benyaʼa awôm a bebaé yôp; belaa be lôô mfaʼa yʼakôé, belaa mfaʼa jôp da dim, belaa mfaʼa ya nké a belaa mfaʼa jôp da tôô. Mañ me nga bete be yôp a memvus me lumu be mfaʼa ya été.

²⁶ Afibe dé e mbe ndam ane akule wo a nkôme ya nka ô mbe nkôman ane nkôm yʼélaé, avale fe ane sam ayañ: mendim me mbe jaé été tañe lita toyini mewôme muam.

²⁷ Ane a nga bo bitebaʼa bi mvot awôm; étebaʼa jia é too menyiʼi me mo menyin, ndame ki menyiʼi me mo menyin, nté ya yôp menyiʼi me mo mela.

²⁸ Mboone bitebaʼa ô mbe avale di: bi nga bili mintyiʼane ya mefefe bitune bitun; bitune bite bi too e zañe bibaʼa;

²⁹ Bitun bi nga too e zañe bibaʼa bite bi nga bili bikañga bengbwengbwem, beyôm benyak a Bekerubim; atin e nga too bibaʼa yôp; a mintiñane minsinga ya biôm bi tyele mi nga too e bengbwengbwem a beyôm benyaʼa si.

³⁰ Etebaʼa ése é nga bili minka mi mvote minyin, a mimbôñe minka mi mvot; mebo menyin yʼété me nga bili fe bisukaʼa; bisukaʼa bi ne nyemane bite bi nga too ésôbaʼa si, mintiñan minsinga mi tyele e fefel ésukaʼa ése.

³¹ Anyu yʼété mfaʼa ya andoʼété a mfaʼa ya yôp é mbe nté anyiʼi wo da: anyu te e nga too njiñelete aval ane mboone yʼatiñ, nté anyiʼi wo da a étun; anyu te e nga bili fe minkpwelan, a mintyiʼane ya mefefe bitune bitun mi mbe mekuʼu menyin, sa njiñelete.

³² Minka minyin mi nga too mintyiʼane bitune ya mefefele si, a mebii mimbôñe ya minka me nga beme étebaʼa: nka ôse ô nga too nté ya yôp, anyiʼi wo da a étun.

³³ Mboone minka ô mbe ane wu ya nka vagoñ bita; mebii mimbôñe ya minka, a memvus, a bibaé, a meteme yʼété, bise bi mbe nyeman.

³⁴ Bisukaʼa binyin bi nga too mebuʼu menyin yʼétebaʼa ése; bisukaʼa bite ba be étebaʼa ébien bi nga too jôme jia.

³⁵ E sôsoʼo étebaʼa ése, njiñelete a nga too été a too nkôñe yôp étun anyiʼi wo da, mebii me too mfaʼa ya yôp; mintyiʼane bitune ya mefefele yʼété, baa be je bi nga too fe jôme jia.

³⁶ Mfaʼa mefefele biyemetaʼa yʼété bite, a mfaʼa mintyiʼane bitune ya mefefele yʼété mite, a nga kpwelé bikanga Bekerubim a bengbwengbwem, mebua melen, abim e nga yiane jôm ése, mintiñan minsinga mi tyele fʼété mbômaʼane.

³⁷ Avale te nde a nga bo bitebaʼa bite awôm: bise bi nga sôéban asôé da, bi too abime da, a avale da.

³⁸ A nga bo bisôban bi mvot awôm; ésôban ése é too ngule ya nyoñe lita mendim toyini a mintete misaman; ésôbaʼa ése é mbe nté menyiʼi me mo menyin; bitebaʼa bite awôm, étebaʼa ése é nga bo é bekeʼe ésôbaʼa jia.

³⁹ Ane a nga telé bitebaʼa bite, bitan mfaʼa nda ya mbo nnôm, a bitan mfaʼa nda ya mbo ngal: a nga telé fe mañ mete mfaʼa nda ya mbo nnôm ô lôô mfaʼa jôp da tôô, mfaʼa ya nké.

⁴⁰ Iram a nga bo bisôban a biwôlô asup, a bisua. Nalé ate Iram a nga sondô ésaé jé ése a nga bo njô bôte Solômon e nda Nti été.

⁴¹ Mekône mebaé a bidoʼo bisua bibaé ya mendoʼo me nga too mekône yôp; a mevote mebaé me nga buti bidoʼo bisua bibaé ya mendoʼo me nga too mekône yôp;

⁴² a bibuma bi grenade mintete minyin mfaʼa ya mevote mebaé, avot ese minnoñe bibuma bi grenade mibaé, mi butiʼi bidoʼo bisua bibaé ya mendoʼo me nga too mekône yôp;

⁴³ a bitebaʼa awôm, a bisôban awôm, bi bete bitebaʼa yôp;

⁴⁴ beta fandé a too njiñelete wua, a beyôm benyak awôm a bebaé be beʼe beta fandé ate;

⁴⁵ biwôlô asup, a bisobelé, a bisua ba futi mendim ba miam, biôm bite bise mbie Iram a nga bo asu nda Zambe Nti, avale njô bôte Solômon a nga bendé: bi mbe mboon a mvot é ne nsilan.

⁴⁶ Njô bôt a nga kôme bie njeʼese Yordan, e zañe minlame ya Sukôt a Sartan.

⁴⁷ Ane Solômon a nga bo na be telé biôm bite e Nda Zambe Nti, bi mbe étua abui, môt teke nyoñe njuʼu ya yemelan adite ya abime mvot be nga belane je.

⁴⁸ Ane Solômon a nga beta bo biôm bivoʼo bise ya ndaa Nti; ataʼa metunaʼa or, tawôlô or ba beté belet é ne étyi awôm a ébaé.

⁴⁹ Bibii bifufup, mboon a or a dañe mfuban , bitane mbo nnôm a bitane mbo ngal ôsu ya vôm a dañ étyi, mesam belambe a mebas me or bi too été.

⁵⁰ Befandé, atyeñ, beta bilaé, bone bilaé a bisua bi nduan, mboon a or a ne mfuban; mengôñ me or asu mimbé ya nda été, anyiine ya vôm a dañ étyi, a asu mimbé ya nda anyiine ya Nda Zambe.

⁵¹ Nalé ésaé njô bôte Solômon a nga bo asu Ndaa Nti é nga man. Ane Solômon a nga soo biôme David ésaa wé a nga telé étyi: argent or a biôm bivok. A nga telé bie e ngab akume ya Ndaa Nti.