Tito 3 - Agɔmɔ ngia wʉ Ɨtakɨ-takɨ

Ʉɓɨɨ wʉ ɨtakɨ‑takɨ ngua wʉ ɓaklisito

¹ Tungwiso ɓombi ɓʉ baya ɓɔ ɓʉkwanana kukumo ɓangama nʉ kʉkɔ ɓombi ngiɓa ɓaaɓʉkanga. Ɓuɓio naɓɔ kʉkɔ nʉ kuɓio ɓʉndanɛ kʉkyɨa moni kɔɔ muɗo kʉ muɓomu.

² Ɓɔɔyakɨakɔmʉ mombi moni kɔɔ ɓɨɓɨ, nʉ ɓuɓio nʉ ɨjɨɔ nʉ ɓʉkʉnda nʉ ɓangɛ. Ɓuɓio 'ʉtʉma uɗo nʉ ɓombi kʉ ɓuɓomu.

³ Jʉ abana isu jɛnɛ pɛɛ ki꞉nye kʉ amati ʉ ɓʉjangi‑jangi. Kambikinye ɓombi ɓɔɔ ɓʉkɛ Asʉɓɨɨ, ki꞉nye ɓʉyangaɛ, nʉ ki꞉nye kʉ ɓabayo ɓɔɔ ɓʉkpatɛ ɓʉtɨpɨ ɓʉ ɨtaka. Ki꞉nye ɓabayo ɓʉ mɨgbʉ yɨ taa yɨ ndʉtʉ kʉ iɓomu, nʉ ɓʉtɨpɨ ɓʉ ɨtaka. Ki꞉nye amati ʉ ɓʉɓɨɓɨ nʉ ki꞉nye nʉ imi yɛɛ ɓɨɓɨ. Ɓombi ɓi꞉nye kyɨa nisu kʉyaa, nʉ isu kambuɓio kʉ kʉyaana ati ʉndɛsʉ.

⁴ Ɨkyɛmɨngana, ati ngia Asʉɓɨɨ Muhiiso wʉndɛsʉ a꞉pananiso‑ɔɔ iɗo ngiangɔ, nʉ ɓʉkʉnda ngiɓangɔ ekoo ɓombi,

⁵ Asʉɓɨɨ ambutihiiso akʉ ɓʉɓɨɓɨ aka ekoo ʉ 'ʉtʉma wʉ ikoko nguangɔ, chʉkɔmʉ jʉ ki꞉nye ngbingbii. A꞉tihiiso nisu kʉjaɓaka nʉ mepo kʉ nʉtanɨa yɨ ɨtakɨ‑takɨ, nʉ nisu kunzo ʉɓɨɨ wʉ ɨtakɨ‑takɨ ɨngbaa akʉ 'Ʉtʉma wɔɔ Tu.

⁶ Asʉɓɨɨ a꞉titio 'Ʉtʉma wɔɔ Tu ʉja, ɨngbaa akʉ Yeso Klisito Muhiiso wʉndɛsʉ.

⁷ A꞉kyɨa ɓwanɨ aka ekoo ngia ɓɔ kʉka ngbingbii, akʉ ɨjɨɔ ngiangɔ, kambʉnyɨa nʉ ʉɓɨɨ wʉ mɨtʉ yɨ ɨpá nʉ mɨtʉ yi ɨpá ngua ka‑ɔɔ kʉnapɨa itungwio ekoo ɔngɔ.

⁸ Moni ngikakɛ ka kingono, ika yɨkwanana kʉbaya engo. Makʉkʉnda ɓɔ wakʉpanɨa tʉkʉ nʉ kɛkɛɛ, ambʉ ɓombi ngiɓa ɓa꞉baya Asʉɓɨɨ ɓʉsɨnganaka nʉ kyɨa ɓuɗo nʉ kɛkɛɛ. Mapanʉ ngikʉnanɨ ka mapanʉ kɔɔ muɗo nʉ kanʉ ɨjangɨa akʉ ɓombi kʉ ɓuɓomu.

⁹ Ɔɔkumunikiokɔmʉ wai ekoo ʉ moni kʉ ɓʉdada, nʉ ekoo ʉ lɨɓwanakɨa lʉ ɓanza, gʉ ɓɔ ekoo nangana, nʉ wai ekoo mapanʉ kʉ Mʉsa, jʉ moni ngikʉnanɨ kambʉkɔmʉ nʉ ɨjangɨa nʉ ka tʉkʉ ɨsʉkʉɓwanɨ.

¹⁰ Yinyeni nʉ mombi ngia akʉkʉnda singo ɗʉkana ati ʉ ɓaklisito, wʉkwanana nayɔ kʉɓɨa ɓɔ ʉsɨa kʉkyananaka ɓwanɨ. Ʉnakenikɔmʉ, akʉ nisi kapɨnɨ ɔngɔ, nɔɔɓio tii ɓata nayɔ akʉ ɓayo.

¹¹ Mbɨa iɗo ɓɔ mombi ikanzi ngiinanɨ a꞉yangaa yangaa. Kuu yangɔ ya tʉkʉ kʉkyɨa ɓʉɓɨɓɨ nʉ akʉnapɨana 'ʉkɔmbɔ kʉ ɛyɔ makʉɔngɔ.

Mapanʉ ngika kʉ 'upipio

¹² Ma꞊natʉmɨa Alatema gʉ yɛmɔ Tikiko. Ati ngia a꞊ɓʉya‑ɔɔ, kyɨa angu kʉka ambʉ kujunikio nɔwɛ anʉ Nekopoli jʉ ma꞉kwaisio bɛ ɓɔ, wati ngua vɛvʉ yaɓio ɓʉkaɨ, mabi kuɓaiso engo nani.

¹³ Kyananakɨa ɔɔ Zɨnasɨ ngia a bʉbʉma ʉ mapanʉ, ɛɓɔ nʉ Apɔlɔ kɨnda iɗo, ambʉ ɓɔɔɓiokɔmʉ nʉ nangyɨa yɨ ɨkyɛmɛ gʉkʉ mɨngana.

¹⁴ Ɓombi ngiɓa ɓa꞉baya Yeso kʉndʉ isu ɓʉsɨnganaka kyɨa iɗo tʉkʉ nʉpɛɛ, ambʉ ɓuɓio kʉ kunzikinikio ɓangɛ ngiɓa ɓanangyɨa ɓʉ꞉ɓʉɓaa angu. Ndʉ ɓa꞊kyɨa ɓwanɨ ʉɓɨɨ nguʉndaɓʉ waɓio nʉ ɨjangɨa.

¹⁵ Ɓombi kʉ ɓuɓomu ngiɓa ka ɨzɔ naɓɔ, ɓu꞉naɓukuo kʉ ɓukuoo. Wa꞊naɓukio ɓombi ngiɓa ɓaatɨkʉnda iɓa ɓanʉ baya mɨngana kʉndʉ isu kʉ ɓukioo. Ɨjɨɔ yɨ Asʉɓɨɨ yɨɓio ɨzɔ ninu kʉ ɓuɓomu.