Tito 2 - Agɔmɔ ngia wʉ Ɨtakɨ-takɨ

Ʉpanʉ ngua wɔɔ ngbingbii

¹ Ɨkyɛmɨngana, Tito ɔwɛ pɛpɛ, ɓio tʉkʉ kʉpanɨa ɓombi moni kɔɔ ngbingbii aka ekoo ʉ baya ngia yɨ ɓaklisito.

² Ɓɨa ɓugue ngiɓa ɓa ɓʉkʉʉ ɓɔngɔ ɓɔ ɓuɓio ɓombi ɓɔɔ ɓʉtayanɨɛ, ɓombi ɓɔɔ ɓunzisinise ɨbɨba, ɓombi ɓɔɔ ɓʉkanganakɨɛ moni muɗo, ɓombi ɓʉ baya yɛɛ ɓʉmʉ, nʉ ɓuɓio nʉ ɓʉkʉnda nʉ ɓangɛ, nʉ kʉpɨa ɓʉka‑ɓʉkaɨ kʉkpata Yeso.

³ Ngbanga kʉ ɓwanɨ, wa꞊ɓɨa ɓoi ngiɓa ɓa ɓʉkʉʉ ɓɔngɔ ɓɔ ɓʉkwanana kuɓio nʉ ɨkyananakɨa yɛɛ jaɓanakɨɛ ngia yɨ ɓombi ɓɔɔ tu ɓʉ Asʉɓɨɨ. Ɓʉɓɨa ɓɔ ɓʉkwananakɔmʉ kʉyakanakɨa ɓangɛ, nʉ ɓɔɔɓiokɔmʉ lɨdangala lʉ vinyo, ɨkyɛmɨngana ɓuɓio ɓombi ɓɔɔ ɓunze ɓangɛ mapanʉ kɔɔ muɗo.

⁴ Kʉ ɓwanɨ, ɓʉkwanana kʉpanɨa ɓana ɓɔɔ ɓoi ngiɓa ɓaɓio ɓʉchɨkaneni kʉ ɨtakɨ‑takɨ ɨkyananakɨa yɛɛ iɗo, nʉ kʉkʉnda ɓugue ɓʉndaɓʉ nʉ ɓana ɓʉndaɓʉ kʉtaa.

⁵ Ɓuɓio ɓoi ɓɔɔ ɓʉkanganɨɛ moni muɗo, nʉ ɓʉ ɨkyananakɨa yɛɛ iɗo, nʉ ɓɔɔ ɓʉkyananakɛ manzanza amati lɨkáa ngilʉndaɓʉ, ɓoi ɓɔɔ ɓʉkʉndɛ ɓangɛ, nʉ ɓɔɔ ɓʉkɛ ɓugue ɓʉndaɓʉ. Ɓʉkwanana kuɓio ɓwanɨ aka ekoo ngia ɓɔ mombi ɔɔzɨakakɔmʉ Ɨsaʉ yɨ Asʉɓɨɨ.

⁶ Nʉ ɓata, panɨa ɓandambʉ ɓɔ ɓuɓio ɓombi ɓɔɔ ɓʉkanganakɨɛ moni muɗo akʉ lɨngbaa lʉ moni kʉ liɓomu.

⁷ Kʉ ɓwanɨ, wʉkwanana kuɓio ɔwɛ makʉɔngɔ isisinio yɛɛ iɗo akʉ ɨkyananakɨa ngiisɔɔ, ambʉ ɓandambʉ ɓuɓio kʉkyananaka kʉ ɓwanɨ akʉ lɨngbaa lʉ moni kʉ liɓomu. Ati ngia waɓio‑ɔɔ kʉpanɨa, wʉkwanana kuɓio nʉ ingono, nʉ panɨa tʉkʉ moni ikanzi ngia ɓombi ɓakwanana‑ɔɔ nɔwɛ kʉkɔ.

⁸ Panɨa tʉkʉ moni ngika kɔɔ ngbingbii aka mombi ambukuningunio‑ɔɔ. Abana kʉndʉ ɓakwa ɓʉndɛsʉ ɓa꞊kwa tiga kʉ soni jʉ ɓambʉkʉnyɨa nʉ ɨngbaa yɨ moni yɛɛ ɓɨɓɨ ngia ɓa꞊tɨchwa nayɔ.

⁹ Panɨa ɓabayo ɓɔ ɓʉkɔ ɓakʉɓʉndaɓʉ amati ʉ lɨngbaa lʉ moni kʉ liɓomu, nʉ kʉkyɨa moni ngika kaɓʉkʉndaniso. Chʉkɔmʉ ɓaɓio kuɗuiso ɓakʉɓʉndaɓʉ moni,

¹⁰ gʉ ɓɔ ɓaɓio naɓɔ kuɓio kumbo ʉndaɓʉ. Ɨkyɛmɨngana, ɓuɓio makwaa kʉ muɓomu kupananiso tʉkʉ ɓɔ ɓa ngbingbii apɛɛ ʉ ɓakʉɓʉndaɓʉ. Ambʉ ɓuɓio tʉkʉ kunziso Ɨsaʉ yɛɛ Iɗo ngia yɨ Asʉɓɨɨ Muhiiso wʉndɛsʉ ɨbɨba akʉ lɨngbaa lʉ moni kʉ liɓomu.

Siɓo tʉa ngia yɨ Yeso

¹¹ Jʉ Asʉɓɨɨ a꞉pananiso ɨjɨɔ ngiangɔ kʉka akʉ ɨtaka kuhiiso ɓombi kʉ ɓuɓomu.

¹² Iɗo ngiinanɨ yanisu kʉpanɨa kʉsɨa ʉɓɨɨ ngua wʉ ɓombi ngiɓa ɓambʉkɔmʉ Ɓayuda, nʉ kʉsɨa taa yɨ ɨtaka, nʉ kuɓio nʉ tayanɨa, nʉ kʉkyɨa moni ngika ka ngbingbii nʉ ika ka kʉndaniso Asʉɓɨɨ, kʉ ati ngia ka zʉ‑ɔɔ kʉ ya akʉ ɨtaka ngiakɛ.

¹³ Kuɓieni kʉkyɨa ɓwanɨ, ati ngia ka‑ɔɔ kusiɓo nʉ taa yengo ɓisi ɓɔɔ ɓuɗo ngiɓa kakʉnapɨa itungwio ekoo ɔngɔ. Ɓisi ngiɓʉnanɨ ɛɓɔ iɓa ɨbɨba ngia yɨ Asʉɓɨɨ ngiʉndɛsʉ ɔɔ Ʉja nʉ Muhiiso wʉndɛsʉ Yeso Klisito ya꞊ɓwanɨa‑ɔɔ.

¹⁴ Ɛyɔ a꞉nzo ʉɓɨɨ nguangɔ kuwo aka ekoo ʉndɛsʉ, nisu kʉɓwanakiso amati ʉ ɓʉɓɨɓɨ ambʉ kʉka ɓombi ɓɔɔ ɓʉjaɓanakɨɛ apɛɛ angɔ. Kambuɓio tʉkʉ ɓombi ɓangɔ ɓʉ kpɛ ɓɔɔ ɓʉkyɨɛ moni ngika kaamʉkʉndaniso wati kʉ uɓomu tʉkʉ nʉ kɛkɛɛ.

¹⁵ Panɨa ɓombi moni ngika mʉ꞉natɨndakɨa akɛ. Ɓunzo angu akʉ 'ʉtʉma nʉ ɓʉgʉmʉa aka ekoo wʉ ɓʉɓɨɓɨ nʉ ʉpanʉ kingono. Wɔɔsɨakɔmʉ mombi nɔwɛ kʉbʉla.