Ɓalɔma 5 - Agɔmɔ ngia wʉ Ɨtakɨ-takɨ

Klisito a꞉ka kunzo majɨɔ ati ʉ ɓombi nʉ Asʉɓɨɨ

¹ Kʉ ɓwanɨ, ka꞉ka ɓombi ɓɔɔ ngbingbii apɛɛ ʉ Asʉɓɨɨ 'upi akʉ baya ngiindɛsʉ, ya aka ekoo ɔngɔ iya ka‑ɔɔ nʉ majɨɔ nʉ Asʉɓɨɨ ɨngbaa akʉ Makʉʉndɛsʉ Yeso Klisito.

² Ya aka ekoo baya ngiinanɨ iya Yeso a꞉tinzo‑ɔɔ ɨngbaa yɛɛ kɛ tinene nʉ ɨjɨɔ ngia yɨ Asʉɓɨɨ, nʉ isu ka ɓʉmaɨ akʉ ɨjɨɔ ngiinanɨ ɓʉɓʉnɨ. Ya aka ekoo ngiinanɨ iya ka‑ɔɔ kʉkwa ɨgyagya ɓʉɓʉnɨ jʉ kakʉnapɨa itungwio kʉnyɨa nʉ izi amati ʉ ɨbɨba ngia yɨ Asʉɓɨɨ.

³ Nadɨndɨ yakusigo ɓɔ kanʉ ɨgyagya kʉ ekoo ɓʉka‑ɓʉkaɨ ngiɓa kakʉdya engo jʉ kakʉmbɨa ɓɔ ɓʉka‑ɓʉkaɨ ngiɓʉnanɨ ɓaanzo mombi 'ʉtʉma wɔɔ ʉta,

⁴ nʉ 'ʉtʉma wɔɔ 'ʉta waaikiso mombi kuɓio nʉ 'ʉtʉma wɔɔ pɨɛ ɓʉka‑ɓʉkaɨ, nʉ 'ʉtʉma wɔɔ pɨɛ ɓʉka‑ɓʉkaɨ waaikiso mombi kʉnapɨa itungwio ekoo ɨngbaa yɨ moni.

⁵ Nʉ napɨa itungwio yambʉkɔmʉ yɨ pɨtanaka, jʉ Asʉɓɨɨ a꞉nadaiso ɓʉkʉnda ngiɓangɔ ɓaja amati ʉ mɨtʉma ngiindɛsʉ 'upi akʉ 'Ʉtʉma wɔɔ Tu ngua a꞉tinzo.

⁶ Jʉ ati ngia kambikinye‑zʉ‑ɔɔ nʉ angu kʉ uɓomu, Klisito a꞉wo aka ekoo ɓʉɓɨɓɨ akʉ wati ngua Asʉɓɨɨ a꞉napɨa.

⁷ Ya ɓʉkaɨ akʉ mombi kʉbaya kuwo aka ekoo mombi ɔɔ ngbingbii. Yɛmɔ, mombi a꞊kwanana kʉbaya kuwo aka ekoo mombi ɔɔ uɗo.

⁸ Ɨkyɛmɨngana, Asʉɓɨɨ a꞉pana kingono ɓɔ a꞉tɨkʉnda kingono. Jʉ ati ngia ki꞉nye‑ɔɔ amati ʉ ɓʉɓɨɓɨ, Klisito a꞉wo aka ekoo ʉndɛsʉ.

⁹ Kʉ ɓwanɨ, ka tiga ngbingbii apɛɛ ʉ Asʉɓɨɨ ɨngbaa akʉ miniki ngika kʉ Yeso. Yakʉpananiso kingono ɓɔ a꞊tihiiso hiisoo, ambʉ 'ʉnganga wʉ Asʉɓɨɨ wɔɔɓiokɔmʉ ekoo ʉndɛsʉ.

¹⁰ Kʉ ɓwanɨ, isu jɛnɛ pɛɛ ki꞉nye ɓakwa ɓʉ Asʉɓɨɨ, ɨkyɛmɨngana ɨtakɨ‑takɨ ngiakɛ ka tiga nʉ ɓayo nayɔ 'upi akʉ ingyo ngia yɨ Mwana angɔ. Iinanɨ yakʉpananiso kingono ɓɔ ndʉ kaɓio nʉ ɓayo nʉ ɔɔ Asʉɓɨɨ, kanyɨa nʉ ɓʉhɨa 'upi akʉ ʉɓɨɨ ngua wʉ Mwana angɔ.

¹¹ Nʉ ɓata, kakʉkwa ɨgyagya apɛɛ ʉ Asʉɓɨɨ ɨngbaa akʉ Makʉʉndɛsʉ Yeso Klisito iya a꞉tɨnapɨa ɓɔ kuɓio nʉ ɓayo nʉ ɔɔ Asʉɓɨɨ.

Ɔɔ Adamʉ nʉ Klisito

¹² Ɓʉɓɨɓɨ ɓa꞉ka akʉ ɨtaka 'upi tʉkʉ ekoo ʉ mombi mʉngana, kija ɓʉɓɨɓɨ ɓa꞉tito tiga mombi akʉ ingyo. Nɨngbaa ngiinanɨ iiya ingyo ya꞉ka‑ɔɔ ekoo mombi, jʉ ɓombi kʉ ɓuɓomu ɓa꞉kyɨa ɓʉɓɨɓɨ.

¹³ Pɛɛ ngia Asʉɓɨɨ i꞉nye ambʉnzenikɔmʉ‑ɔɔ Mʉsa mapanʉ, ɓʉɓɨɓɨ ɓi꞉nye akʉ ɨtaka tʉkʉ kuɓio, ɨkyɛmɨngana Asʉɓɨɨ a꞉napɨakɔmʉ‑ɛɛ iso, jʉ mapanʉ kambikinye‑zʉ ati ngiinanɨ.

¹⁴ Ɨkyɛmɨngana, ingyo ya꞉nadaa kʉʉngwa akʉ wati wʉ Adamʉ kʉɓʉya akʉ wati wʉ Mʉsa, abana kʉ ekoo ɓombi ngiɓa ɓa꞉kyɨakɔmʉ ɓʉɓɨɓɨ ndʉ iya Adamʉ a꞉kyɨa ambʉɗɨa ʉpanʉ wʉ Asʉɓɨɨ. Ɛyɔ Adamʉ ngiinanɨ a isisinio yɨ mombi ngia Asʉɓɨɨ a꞉panaka ɓɔ a꞉kwanana jɛnɛ kʉka.

¹⁵ Tɔ, apɛpɛ ngia wʉ Asʉɓɨɨ ambʉkɔmʉ ngbanga nʉ ɓʉɓɨɓɨ ngiɓa ɓʉ Adamʉ. Jʉ tʉkʉ aka ekoo ɓʉɓɨɓɨ ɓʉ mombi mʉngana, ɓombi ɓaja ɓa꞉wo. Ɨkyɛmɨngana, Asʉɓɨɨ apananiso ɨjɨɔ ngiangɔ, 'upi akʉ apɛpɛ wʉ dada ɔɔ ʉja nadɨndɨ, ngia a꞉nzo ɓombi ɓaja ɨsʉkʉɓwanɨ ɨngbaa akʉ mombi mʉngana iya ʉnʉ ɓɔ Yeso Klisito.

¹⁶ Nʉ apɛpɛ ngiinanɨ wʉ Asʉɓɨɨ a kʉ di nʉ ɓʉɓɨɓɨ ngiɓa ɓʉ mombi mʉngana. Jʉ ɓʉɓɨɓɨ ɓʉ mombi mʉngana ngiinanɨ ɛɓɔ iɓa ɓadʉaniso 'ʉkɔmbɔ ngua wʉ Asʉɓɨɨ, ɨkyɛmɨngana apɛpɛ ɔɔ ɨsʉkʉɓwanɨ ngia Asʉɓɨɨ aanzo ɓombi mbise ʉ kyɨa ɓʉɓɨɓɨ ɓaja, aanɨtanakiso ɓombi kʉka ngbingbii apɛɛ angɔ.

¹⁷ Ya kingono kusigo ɓɔ ingyo ya꞉pananiso angu ngiangɔ akʉ ɨtaka kʉ iɓomu, 'upi akʉ ɓʉɓɨɓɨ ɓʉ mombi mʉngana. Ɨkyɛmɨngana, aka ekoo ʉ ɨjɨɔ ngiangɔ yɛɛ ɨja, ɓombi ngiɓa Asʉɓɨɨ anaɓɔ kʉnɨtanakiso kʉka ngbingbii apɛɛ angɔ, ɓa꞊dya ɓʉngama nʉ nyɨa nʉ ʉɓɨɨ tʉkʉ ɨngbaa akʉ Yeso Klisito kʉ nangana.

¹⁸ Jʉ ngbanga kʉ ndʉ ɓombi kʉ ɓuɓomu ɓa꞉ɗaa 'ʉkɔmbɔ aka ekoo ʉ ɓʉɓɨɓɨ ɓʉ mombi mʉngana, ngbanga kʉ ɓwanɨ kuu yɛɛ iɗo yɨ mombi mʉngana yaanziso yaanitankiso ɓombi kʉka ngbingbii apɛɛ ʉ Asʉɓɨɨ nʉ kʉnyɨa nʉ ʉɓɨɨ.

¹⁹ Aka ekoo ʉ ɗɨa ʉpanʉ yɨ mombi mʉngana, ɓombi ɓaja ɓa꞉kumunio amati ʉ ɓʉɓɨɓɨ. Ngbanga kʉ ɓwanɨ, aka ekoo mombi mʉngana ngia a꞉kɔ Asʉɓɨɨ, ɓombi ɓaja ɓa꞉ka tiga ngbingbii apɛɛ angɔ.

²⁰ Ʉna tɔ, ndʉ mapanʉ ka꞉ka, ɓʉɓɨɓɨ ɓambʉsɨngana tiga nʉpɛɛ nadɨndɨ, ɨkyɛmɨngana akʉ izi ngia ɓʉɓɨɓɨ ɓa꞉sɨngana‑ɔɔ nadɨndɨ, ɨjɨɔ yɨ Asʉɓɨɨ yambʉka ɓata tiga kʉ ɨja nadɨndɨ.

²¹ Kʉ ɓwanɨ, kʉndʉ ɓʉɓɨɓɨ ɓa꞉pananiso angu wʉ ingyo, ɨjɨɔ yɨ Asʉɓɨɨ ya꞉pananiso angu ninu kʉikiso ngbingbii nʉ ninu kʉkɨndakiso akʉ ɨngbaa yɛɛ nyɨɛ nʉ ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá 'upi akʉ Makʉʉndɛsʉ Yeso Klisito.