Ɓalɔma 2 - Agɔmɔ ngia wʉ Ɨtakɨ-takɨ

Asʉɓɨɨ a꞊tɨna ʉkɔmbɔ wʉ ɓombi

¹ Ɔwɛ gwa ngia wakʉtɨna 'ʉkɔmbɔ wʉ ɓombi nga ɓɔmɔ, ɓambʉkʉkwanana nɔwɛ kʉpɨa gʉkʉ ɗɛkɛkɛ, abana ndʉ waɓio anɨ. Jʉ ati ngia wa‑ɔɔ kʉtɨna 'ʉkɔmbɔ nga wʉ ɓangɛ, yakusigo ɓɔ wakʉtɨnana 'ʉkɔmbɔ kʉ ɔwɛ makʉɔngɔ, jʉ ɔwɛ waakyɨa moni kɔɔ ɓɨɓɨ kʉndʉ ɛɓɔ.

² Kaambɨa kusigo ɓɔ Asʉɓɨɨ aatɨna 'ʉkɔmbɔ wʉ ɓombi ngiɓa ɓaakyananaka ɓwanɨ tʉkʉ akʉ ɓingono.

³ Kʉ ɓwanɨ, ɔwɛ waatɨna 'ʉkɔmbɔ wʉ ɓombi ngiɓa ɓaakyɨa ikanzi yɨ moni ngikʉnanɨ, ʉna tɔ, ɔwɛ makʉɔngɔ wa nakɔ kʉ kʉkyɨa. Ajʉ ɔwɛ wakuyo ɓɔ wa꞊ɓwanaka akʉ 'ʉkɔmbɔ ngua wʉ Asʉɓɨɨ ɓwanakanɨ ɓiɛ?

⁴ Ajʉ wakʉna iɗo yɛɛ ɨja ngia yɨ Asʉɓɨɨ, 'ʉtʉma wʉ majɨɔ, nʉ 'ʉtʉma wɔɔ ʉta nguangɔ tʉkʉ ɨsʉkʉɓwanɨ ɓiɛ? Ajʉ wambʉkɔmʉ kʉmbɨa ɓɔ iɗo ngiangɔ ya꞊kwanana nɔwɛ kʉkɨndakiso kʉɓʉya kunicho 'ʉtʉma kʉsɨa ɓʉɓɨɓɨ ɓiɛ?

⁵ Ɨkyɛmɨngana, ɔwɛ wa ɨkyɨkyɨɓʉmʉ nʉ wa 'ʉtʉma ɓʉmʉ. Iiya ɓɔ wakʉnapɨana 'ʉkɔmbɔ wɔɔ ʉja isiya 'ʉnganga ngua wʉ Asʉɓɨɨ wa꞊pananɨa‑ɔɔ, nʉ aka a꞊tɨna sina‑ɔɔ 'ʉkɔmbɔ nguangɔ wɔɔ ngbingbii.

⁶ Jʉ Asʉɓɨɨ a꞊nzo sina mombi kʉ nangana nangana 'ʉkʉa nguangɔ kʉkpatanakɨa tʉkʉ nʉ ɨkyananakɨa ngiangɔ.

⁷ Ɓiga ngiɓa ɓakʉkyɨa lɨngbaa lʉ moni lɔɔ manzanza chʉkɔmʉ nʉ ndokono, nʉ kʉhata imbangumba nʉ ɨbɨba nʉ ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá, Asʉɓɨɨ a꞊munzo ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá nzoo.

⁸ Ɨkyɛmɨngana, ɓombi ngiɓa ɓaaɓundo mapanʉ kʉ Asʉɓɨɨ nʉ ɓaayaa moni ngika kingono, iɓa ɓaakpata yɨndaɓʉ tʉkʉ moni kɔɔ ɓɨɓɨ, 'ʉnganga wʉ Asʉɓɨɨ wa꞊ka ekoo ʉndaɓʉ.

⁹ Ɓombi kʉ ɓuɓomu ngiɓa ɓaakyɨa ɓʉɓɨɓɨ, ɓa꞊dya ikoko nʉ ɓʉka‑ɓʉkaɨ, kufaniso nʉ Ɓayuda, mbise ɔngɔ tiga ɓombi ngiɓa ɓambʉkɔmʉ Ɓayuda.

¹⁰ Ɨkyɛmɨngana, ɓombi kʉ ɓuɓomu ngiɓa ɓaakyɨa moni kɔɔ muɗo, Asʉɓɨɨ akwanana naɓɔ kunzo imbangumba, ɨbɨba, nʉ majɨɔ kufaniso nʉ Ɓayuda mbise ɔngɔ tiga ɓombi ngiɓa ɓambʉkɔmʉ Ɓayuda.

¹¹ Jʉ Asʉɓɨɨ ambʉkɔmʉ nʉ 'ʉtʉma wɔɔ mbomboke ɓombi.

¹² Ɓombi ngiɓa ɓaakyɨa ɓʉɓɨɓɨ ɓambikinye kupimiso mapanʉ kʉ Mʉsa, ɓa꞊dʉka sina ɓʉtɨnenikɔmʉ 'ʉkɔmbɔ nguʉndaɓʉ kʉkpatanakɨa nʉ mapanʉ ngikʉnanɨ. Ɨkyɛmɨngana, ɓiga ngiɓa ɓakʉkyɨa ɓʉɓɨɓɨ ɓinyeni kupimiso mapanʉ kʉ Mʉsa, 'ʉkɔmbɔ nga wʉndaɓʉ ɓa꞊ʉtɨna kʉkpatanakɨa tʉkʉ nʉ mapanʉ ngikʉnanɨ.

¹³ Yambʉkɔmʉ kusigo ɓɔ ɓombi ngiɓa ɓaakyɨa ndʉ ɓakʉkɔ mapanʉ ɓa ngbingbii apɛɛ ʉ Asʉɓɨɨ, ɨkyɛmɨngana ɓombi ngiɓa ɓa ngbingbii apɛɛ ʉ Asʉɓɨɨ ya tʉkʉ ɓiga ngiɓa ɓaakyananakɨa mapanʉ.

¹⁴ Ɓombi ngiɓa ɓambʉkɔmʉ Ɓayuda ɓambʉkɔmʉ nʉ mapanʉ kʉ Mʉsa. Ɨkyɛmɨngana, ndʉ ɓombi ngana ngana ati ʉ ɓombi ngiɓʉnanɨ ɓaɓio kʉkyananakɨa mapanʉ tʉkʉ ndʉ aka yɨkwanana‑ɔɔ chʉkɔmʉ ɛɓɔ kupimiso engo, iinanɨ yakusigo ɓɔ ɓanʉ mapanʉ akʉ mɨtʉma ngiindaɓʉ ɓakʉɓɔngɔ.

¹⁵ Kʉ ɓwanɨ, ɓakʉpananiso ɓɔ moni ngika ka amati ʉ mapanʉ ɓa꞉kʉtɨndakɨa amati ʉ mɨtʉma ngiindaɓʉ. Iyo yɨ mɨtʉma ngiindaɓʉ ya naɓɔ kʉ kʉnapɨa nʉ 'ʉkɔmbɔ, nʉ itungwio ngiindaɓʉ yanaɓɔ kʉ kʉchʉngɨa, nʉ yanaɓɔ kʉ kʉɓʉya isingo.

¹⁶ Moni ngikʉnanɨ ɨkɔ ika ka꞊kyananakɨa sina ati ngia Asʉɓɨɨ a꞊tɨna sina‑ɔɔ 'ʉkɔmbɔ wʉ moni kʉ ɓaɗi kʉ ɓombi ɨngbaa akʉ Yeso Klisito, kʉndʉ aka Ɨsaʉ yɛɛ Iɗo ngia makʉpanɨa engo ya‑ɔɔ kusigo.

Ɓayuda ɓu꞉ɓundo mapanʉ

¹⁷ Ɨkyɛmɨngana, ɔwɛ ngia wakusukunio ɓɔ wa 'Uyuda, wa 'ʉmaɨ ekoo mapanʉ nʉ wakʉɨngyɨa Asʉɓɨɨ ngiasɔɔ,

¹⁸ waambɨa ɓʉkʉnda ngiɓangɔ kingono, nʉ mapanʉ ka꞉napanɨa kʉkyɨa moni kɔɔ muɗo,

¹⁹ ɔwɛ waana ndʉgʉ kʉ ɔwɛ waakɨndakiso ɓombi ngiɓa ɓambakana, nʉ ɓɔ wa wanga wʉ ɓombi ngiɓa ɓa amati ʉ umomo,

²⁰ waasigo kʉ ɓɔ wa mʉpananakɨa wʉ ɓombi ngiɓa ɓambʉkɔmʉ nʉ mbɨmbanaka nʉ ɓɔ wa mʉpananakɨa wʉ ɓana, jʉ wanʉ mbɨmbanaka ɨja kingono ekoo mapanʉ.

²¹ Kʉ ɓwanɨ, ɔwɛ ngia waapanɨa ɓombi nga ɓɔmɔ, jʉtanɨ‑zʉ wambʉkʉpananɨa kʉ ɔwɛ makʉɔngɔ? Ɔwɛ ngia waapanɨa ɓɔ yambʉkɔmʉ iɗo kuɓo, jʉtanɨ wa ɓata kʉ kuɓo?

²² Ɔwɛ ngia waasigo ɓɔ yambʉkɔmʉ iɗo kʉkyɨa ɨndambʉ, jʉtanɨ wa ɓata kʉ kʉkyɨa ɨndambʉ? Ɔwɛ ngia waayaa ɓamʉngʉ ɓʉ yakanaka, jʉtanɨ wa ɓata kuɓo kumbo ngia a amati ɨkáa ngiindaɓʉ?

²³ Waabɨbana ɓɔ waambɨa mapanʉ, ɨkyɛmɨngana wakʉna Asʉɓɨɨ tʉkʉ ɨsʉkʉɓwanɨ 'upi akʉ ɓundo mapanʉ ngikʉnanɨ!

²⁴ Jʉ kʉndʉ ɓa꞉tɨndakɨa amati ʉ Mubio kʉ Asʉɓɨɨ ɓɔ: « Ya aka ekoo ʉndɛnʉ iya ɓa‑ɔɔ kʉzɨaka ino ngia yɨ Asʉɓɨɨ ati ʉ ɓombi ngiɓa ɓambʉkɔmʉ Ɓayuda. »

²⁵ Ya kingono kusigo ɓɔ kutiniso ganza yanʉ dada tʉkʉ ambʉ wakʉkpata mapanʉ. Ɨkyɛmɨngana, wʉkpatenikɔmʉ mapanʉ, ɓa꞊nachɨka tʉkʉ ndʉ mombi ngia ambutinisokɔmʉ ganza.

²⁶ Nʉ ndʉ mombi ngia ambutinisokɔmʉ ganza aɓio kʉkpata moni ngika mapanʉ kakutitio engo, ajʉ Asʉɓɨɨ ambʉkɔmʉ amʉchɨka ndʉ mombi ngia a꞉tiniso ganza ɓiɛ?

²⁷ Mombi ngia a꞉tinisokɔmʉ ganza akʉ ndʉtʉ, ɨkyɛmɨngana ambuɓio kʉkpata mapanʉ, a꞊kwanana nɔwɛ kʉnapɨa nʉ 'ʉkɔmbɔ ɔwɛ ngia wakuɓundo mapanʉ, abana ndʉ waɓio ɓɔ waambɨa kupopoko mubio kʉ mapanʉ muɗo nʉ kʉndʉ waɓio wʉ꞉tiniseni ganza.

²⁸ Jʉ yambʉkɔmʉ kusigo ɓɔ ɓaambɨa mombi ɓɔ a 'Uyuda gbagba tʉkʉ nayɔ kʉna ndʉtʉ ya aɓei, gʉ yɛmɔ ɓɔ jʉ a꞉tiniso ganza akʉ ndʉtʉ ngiangɔ.

²⁹ Ɨkyɛmɨngana, 'Uyuda gbagba ya tʉkʉ gwa ngia a 'Uyuda amati ngiangɔ, iya a꞉tiniso ganza amati ʉ 'ʉtʉma nguangɔ, nʉ ganza ngia aɓio utiniseni, ya ganza ngia akʉʉngwanakɨa nʉ 'Ʉtʉma wʉ Asʉɓɨɨ chʉkɔmʉ nʉ mapanʉ ngika ɓa꞉kʉtɨndakɨa amati ʉ mapanʉ kʉ Mʉsa. Ɨbɨba yɨ ɓombi ikanzi ngiɓaɓɛ yambakaʉngwa ɔɔ ɓombi, ɨkyɛmɨngana yaaʉngwa tʉkʉ ɔɔ Asʉɓɨɨ.