Ɓalɔma 13 - Agɔmɔ ngia wʉ Ɨtakɨ-takɨ

Kukumo ɓangama

¹ Yɨkwanana mombi kʉ 'uɓomu ukumo ɓangama iɓa ɓanʉ ʉpanʉ ekoo ʉ ɓombi. Ʉpanʉ kʉ uɓomu ngua ngama anawɔ waaʉngwa ɔɔ Asʉɓɨɨ, jʉ tʉkʉ ɛyɔ aanapɨa ɓangama ngiɓa ɓanʉ ʉpanʉ.

² Kʉ ɓwanɨ, mombi ngia akʉɗɨa ʉpanʉ, akunzo 'ʉtʉ wɔɔ ɓʉmʉ akʉ ʉpanʉ wʉ Asʉɓɨɨ. Nʉ ɓombi ngiɓa ɓakunzo 'ʉtʉ wɔɔ ɓʉmʉ, 'ʉkɔmbɔ waɓio ekoo ʉndaɓʉ.

³ Jʉ ɓombi ngiɓa ɓaakyɨa moni kɔɔ muɗo, ɛɓɔ ɓambakakumo ɓangama. Ɨkyɛmɨngana, tʉkʉ ɓombi ngiɓa ɓaakyɨa moni kɔɔ ɓɨɓɨ ɓaakumo ɓangama. Ajʉ ɔwɛ wakʉkʉnda ɓɔ wɔɔɓiokɔmʉ kukumo mombi ngia aakyɨa nʉ ʉpanʉ ɓiɛ? Kʉ ɓwanɨ, kyɨa moni kɔɔ muɗo wambʉnyɨa nʉ ɨbɨba,

⁴ jʉ akʉkyananakɨa Asʉɓɨɨ aka ekoo iɗo yɨsɔɔ. Ɨkyɛmɨngana, ndʉ wakyɨa ɓʉɓɨɓɨ, kumo kumoo, jʉ ɛyɔ anʉ ʉpanʉ nɔwɛ kʉkyananaka. Ɛyɔ aakyananakɨa Asʉɓɨɨ kudyiso ɓombi ngiɓa ɓaakyɨa ɓʉɓɨɓɨ ɓʉka‑ɓʉkaɨ.

⁵ Kʉ ɓwanɨ, ya iɗo kukumo ɓangama, chʉkɔmʉ tʉkʉ aka ekoo kumo 'ʉnganga wʉ Asʉɓɨɨ, ɨkyɛmɨngana kyɨa moni ngikʉnanɨ tʉkʉ jʉ iyo yɨ mɨtʉma ngiindɛsʉ yanisu kutitio engo.

⁶ Ya aka ekoo moni ngikʉnanɨ iya naalipa‑ɔɔ manzanza, jʉ ɓangama ɓakʉkyɨa kuu ngiinanɨ Asʉɓɨɨ a꞉ɓunzo iɗo.

⁷ Nzeni mombi kʉ nangana nangana tʉkʉ ɨkyɛmɛ ngia yɨkwanana nayɔ kunzo. Lipeni manzanza kʉ ɔɔ gwa ngia aalipisa manzanza. Lipeni takɨsɨ kʉ ɔɔ gwa ngia aalipisa ɓatakɨsɨ. Kumeni mombi ngia nʉkwanana nayɔ kukumo. Nzeni mombi ngia ʉkwanana nʉ ɨbɨba kʉ ɨbɨba.

Ɓʉkʉnda ɓʉ ingono

⁸ Nɔɔɓiokɔmʉ nʉ mabɨngɨa wʉ mombi gʉkʉ mʉngana. Ɨkyɛmɨngana, ɓieni tʉkʉ nʉ ɓʉkʉnda ati ʉndɛnʉ, jʉ mombi ngia aakʉnda ɓangɛ akʉkyananakɨa ʉpanʉ kingono.

⁹ Jʉ ɓa꞉tɨndakɨa amati ʉ mapanʉ ɓɔ: « Wɔɔkyɨakɔmʉ ɨndambʉ, wɔɔwakɔmʉ mombi, wɔɔɓokɔmʉ ɨkyɛmɛ, wɔɔtananɨakɔmʉ ɨkyɛmɛ yɨ mombi ». Mapanʉ ngikakɛ nʉ kɔmɔ kʉ muɓomu kʉmʉmanɨa tʉkʉ amati ʉ ʉpanʉ mungono nguakɛ: « Kʉnda mangɛ kʉndʉ waakʉndana ɔwɛ makʉɔngɔ. »

¹⁰ Ɓʉkʉnda ɓambakakyɨa mombi nga kɔmɔ ɓʉɓɨɓɨ, jʉ ɓʉkʉnda ɓakupananiso ɓɔ mombi akʉkyananakɨa ʉpanʉ kingono.

Kuɓio ɓʉndanɛ akʉ tʉa ngia yɨ Klisito

¹¹ Ɓieni kʉmbɨa ɓɔ wati ngua ka amati ɔngɔ akɛ wa tanɨ. Ɨtakɨ‑takɨ ngiakɛ, ya tiga wati wɔɔ jʉkanɛ akʉ tɔɔ, jʉ wati wʉ ɓʉhɨa nguʉndɛsʉ wa tiga kʉ tinene kʉɓaa wati ngua ka꞉baya‑ɔɔ.

¹² Nuɓutu ʉpa tiga ɓʉ kpɔmʉ, ɓisi ɓaya kʉ ɨtakɨ‑takɨ. Kʉ ɓwanɨ, kʉsɨeni kuu yɨ Abɨa ngia yaakyɨanɨa akʉ umomo, kambuɓoto kumbo ʉ ɗite kʉmana nayɔ akʉ ɓisi ɓɔɔ ɓʉyɛ.

¹³ Kuɓieni nʉ ɨkyananakɨa yɛɛ iɗo ngbanga ndʉ aka yɨkwananaka‑ɔɔ akʉ ɓisi ɓɔɔ ɓʉyɛ. Kɔɔɓienikɔmʉ ɓombi ɓʉ 'ʉhʉmʉ, ɓʉ ɨdamʉ, ɓʉ ɨndambʉ, ɓʉ ɨfɛfɛɛ, ɓʉ mangoi nʉ imi yɛɛ ɓɨɓɨ.

¹⁴ Ɨkyɛmɨngana, Makʉʉndɛsʉ Yeso Klisito uɓio ndʉ kumbo ʉ ɗite ngia naa'ʉpɨnya. Nɔɔsɨanakɔmʉ kuɓio lɨdala lʉ taa yɛɛ ɓɨɓɨ yɨ ndʉtʉ ngiindɛnʉ ɓɔ naɓio tiga kʉkyananakɨa engo.