Ɓalɔma 11 - Agɔmɔ ngia wʉ Ɨtakɨ-takɨ

Asʉɓɨɨ a꞉gisokɔmʉ Ɓaɨsalaɛlɛ

¹ Kʉ ɓwanɨ, makuɓukuo ɓɔ ajʉ Asʉɓɨɨ a꞉giso ɨkáa yɨ anza ngiangɔ gisoni ɓiɛ? Chʉkɔɔ! Jʉ ɛmɛ‑zʉ ma kʉ 'Ʉɨsalaɛlɛ, mʉngana ʉ ɓanɔnɔ ɓʉ Abalama akʉ ɨkáa yɨ anza ngia yɨ Benzamina.

² Asʉɓɨɨ a꞉gisokɔmʉ ɨkáa yɨ anza ngiangɔ, iya a꞉ɨchwa jɛnɛ kʉpɛɛ akʉ ɛyɔ makʉɔngɔ. Mubio ka‑zʉ kusigo tanɨ ekoo moni ngikʉnanɨ? Ɨgbɛ Ɛlɨa a꞉napɨa ɓana ɓʉ Ɨsalaɛlɛ nʉ 'ʉkɔmbɔ apɛɛ ʉ Asʉɓɨɨ kusigo ɓɔ:

³ « Makʉʉɓɨɨ, ɛɓɔ ɓa꞉wa lɨgbɛ ngilʉsɔɔ, ɓambʉpanza ɓagbɔgbɔ ɓɔɔ ɓʉyɛ 'ʉtʉmbɨa ngiɓʉsɔɔ. Tii tʉkʉ ɛmɛ kʉ nangana mutukuoo. Ɓa ɓata tiga kʉhata nɛmɛ kʉ kʉwa. »

⁴ Ɨkyɛmɨngana, na‑zʉ kʉ kʉmbɨa akʉ Asʉɓɨɨ a꞉mutisio‑ɔɔ ɓiɛ? « Manʉ ɓugue ɓʉsɛmɛ ɓɔmɔ ɛlɛfʉ ʉmalɨanɨka iɓa ɓambʉgbʉkʉmɨakɔmʉ muwuu apɛɛ ʉ mʉngʉ ngia ɓaamusoko ɓɔ Bala. »

⁵ Ya ngbanga kʉ ɓwanɨ akʉ wati ngua wʉ ɓʉɓʉnɨ nguakɛ. Yanʉ mikpekpe yɨ ɓombi ngiɓa ɓutukuoo, iɓa Asʉɓɨɨ a꞉ɓʉchwa akʉ ɨjɨɔ ngiangɔ.

⁶ Ɨkyɛmɨngana, ndʉ yaɓio ɓɔ a꞉ɓʉchwa akʉ 'ʉtʉma wʉ ɨjɨɔ, yambʉkɔmʉ kʉkpata ɨkyananakɨa ngiindaɓʉ. Ambʉ́ ndʉ yi꞉nye jɛnɛ ɓwanɨ, 'ʉtʉma wʉ ɨjɨɔ ngua wʉ Asʉɓɨɨ wambukuɓio tii ɓata 'ʉtʉma wʉ ɨjɨɔ.

⁷ Ya tiga kusigo tanɨ? Moni ngika ɓana ɓʉ Ɨsalaɛlɛ ɓi꞉nye hata, ɓa꞉nyɨakɔmʉ nakɔ. Tʉkʉ ɓombi ngana ngana ati ʉndaɓʉ iɓa Asʉɓɨɨ a꞉ɓʉchwa ɓa꞉nyɨa nakɔ. Ɨkyɛmɨngana, iɓa ɓɔmɔ ɓa꞉tukuo ɓambikinye tii ikanzi ngia ɓa꞉pimiso ɓata‑ɔɔ ɨkyɛmɛ.

⁸ Tʉkʉ ndʉ akʉ ɓa꞉tɨndakɨa‑ɔɔ amati ʉ Mubio kʉ Asʉɓɨɨ ɓɔ: « Asʉɓɨɨ a꞉ɓunzo 'ʉtʉma wɔɔ papanɨɛ, ambuɓukutoko mesu. Ambʉɓʉdʉɨa muchwei ngikʉndaɓʉ, ambʉ ɓɔɔɓiokɔmʉ kʉkɔ kʉɓʉya kʉndʉ ɓʉɓʉnɨ. »

⁹ Ngama Daudi ambusigo ɓata kʉ ɓɔ: « Ambʉ́ idyo yɨ mʉmbɔ ngikʉndaɓʉ yɨnɨtanaka gɔ ipindi yɨndaɓʉ, yɨnɨtanaka gɔ maiya uwa ɓafana‑ɔɔ. Ambʉ́ ɓʉgbʉsana gɔ ɓambʉkwa, ambʉ moni kɔɔ ɓʉkaɨ kʉɓʉɓɛnda.

¹⁰ Ambʉ́ mesu ngikʉndaɓʉ kuchwio gɔ, ambʉ ɓɔɔɓiokɔmʉ kʉna. Ambʉ́ wuɓuguɓoko ɔgɔ mɨkɔngɔ ngiindaɓʉ tii kingono. »

¹¹ Kʉ ɓwanɨ, makuɓukuo ɓɔ ajʉ Ɓayuda ɓa꞉gbʉsana ambʉ ɓʉ꞉kwa tii tʉkʉ kingono ɓiɛ? Chʉkɔɔ. Ɨkyɛmɨngana, ya aka ekoo ʉ ɨkyananakɨa yɛɛ ɓɨɓɨ ngiindaɓʉ iya ɓombi nga ɓɔmɔ, iɓa ɓambʉkɔmʉ Ɓayuda ɓa꞉nyɨa‑ɔɔ nʉ ɓʉhɨa, ambʉ Ɓayuda ɓuɓio tiga naɓɔ kʉkwɨa imi.

¹² Ʉna tɔ, ndʉ ɗɨa ʉpanʉ ngia yɨ Ɓayuda yaɓio yɨnyiiseni ɓombi ɓʉ ɨtaka nʉ ʉmbʉa ʉja, nʉ ijisiniso nɨsɨ ngiindaɓʉ yinzeni ɓombi ngiɓa ɓambʉkɔmʉ Ɓayuda ʉmbʉa ʉja, ʉmbʉa nga wʉndaɓʉ wa꞊ɓaana tiga nadɨndɨ ati ngia ɛɓɔ Ɓayuda ɓa꞊nyɨa‑ɔɔ nʉ ɓʉhɨa.

Ɓombi ngiɓa ɓambʉkɔmʉ Ɓayuda ɓʉnyɨa nʉ ɓʉhɨa

¹³ Ɨtakɨ‑takɨ ngiakɛ inu ɓombi ngiɓa nambʉkɔmʉ Ɓayuda maninu kusigio inu. Ɛmɛ manʉ ɨgyagya akʉ kuu ngiisɛmɛ, jʉ ma titima ngia Asʉɓɨɨ a꞉nachwa kʉɓɨakɨa ɓombi ngiɓa ɓambʉkɔmʉ Ɓayuda Ɨsaʉ ngiangɔ.

¹⁴ Iikwa mʉkwanana kʉsɨa ɓaandɛmɛ Ɓayuda ninu kʉkwɨa imi, aka ekoo ngia ɓɔ ɛmɛ muhiiso ɓombi ngana ngana ati ʉndaɓʉ.

¹⁵ Jʉ ati ngia Asʉɓɨɨ a꞉ɓugiso‑ɔɔ anambamba, a꞉napɨa tiga ɓayo ati ʉ ɓombi ɓʉ ɨtaka nʉ Asʉɓɨɨ. Kʉ ɓwanɨ, ati ngia a꞊jananɨa sina ɓata‑ɔɔ Ɓayuda kʉtɔ, yaɓio tiga ndʉ iya mombi aɓʉa‑ɔɔ akʉ ingyo nʉ nyɨa nʉ ʉɓɨɨ.

¹⁶ Ndʉ ɓanzo wagba wʉ mukati ngua wʉ pɛɛ akʉ Asʉɓɨɨ, ambʉ ikyikyii yɛngɔ kʉ iɓomu ya tii tʉkʉ yangɔ. Ndʉ ɓanzo Asʉɓɨɨ mii yɨ ɓʉtɨ, ambʉ mɨtapɨ yɛngɔ ya kʉ yangɔ.

¹⁷ Ɓombi ɓʉ Ɨsalaɛlɛ ɓa ndʉ ɓʉtɨ ɓʉ mijeituni ngiɓa ɓa꞉tɨna mɨtapɨ yɛngɔ yɛmɔ, akʉ izi yɛngɔ ɓambunaɗitiso tiga ɔwɛ ngia wambʉkɔmʉ 'Uyuda. Ɔwɛ wa tiga ndʉ 'ʉtapɨ wʉ ɓʉtɨ ɓʉ mijeituni ngua wʉ 'ututu uwa ɓa꞉uɗitiso akʉ izi ngia ɓa꞉tɨna‑ɔɔ mɨtapɨ ngiinanɨ. Ɨtakɨ‑takɨ ngiakɛ ɔwɛ wa tiga kʉmvɨmvɨa mepo kʉ itindi‑tindi yɨ ɓʉtɨ ɓʉ mijeituni.

¹⁸ Kʉ ɓwanɨ, wɔɔbʉlakɔmʉ mɨtapɨ ngia ɓa꞉ɨtɨna. Jʉtanɨ ɔwɛ wa tiga nʉ 'ʉtʉma wʉ ɨmbʉka? Jʉ chʉkɔmʉ ɔwɛ kʉ wakufuɓuo mii, ɨkyɛmɨngana mii kʉ yanɔwɛ kufuɓuo ɔwɛ.

¹⁹ Yɛmɔ wa꞊nasigio gʉ ɓɔ: « Ɓa꞉tɨna mɨtapɨ ngiinanɨ ambʉ ɓʉnakpakpaniso tiga ɛmɛ akʉ izi yɛngɔ. »

²⁰ Ya kingono ɓwanɨ! Ɓa꞉ɓʉtɨna jʉ ɛɓɔ ɓambikinye nʉ baya, ɨkyɛmɨngana ndʉ ɔwɛ wi꞉nye nʉ baya, iiya ɓa꞉nachɨka tiga‑ɔɔ akʉ izi ngiindaɓʉ. Kʉ ɓwanɨ, wɔɔɓiokɔmʉ nʉ ɨmbʉka, ɨkyɛmɨngana ɓio tʉkʉ nʉ ʉɓa wʉ Asʉɓɨɨ.

²¹ Jʉ ndʉ Asʉɓɨɨ atɨna mɨtapɨ yɨ ɓʉtɨ ngiɓa ɓɔɔ ɓʉhʉnɛ, a꞊nasɨa tiga ɔwɛ nɨngbaa tɨmanɨ?

²² Kanganɨa tiga ɓuɗo nʉ ɓʉkaɨ ngiɓa ɓʉ Asʉɓɨɨ akʉpananiso engo. Ɓʉkaɨ ɓa aka ekoo ɓombi ngiɓa ɓa꞉kwa, nʉ ɓuɗo ɓa aka ekoo asɔɔ. Yɨkwanana tiga ɓɔ ɓio tʉkʉ kʉkɨndaka amati ʉ ɓuɗo ngiɓʉnanɨ, jʉ chʉkɔmʉ ɓwanɨ, ɓa꞊natɨna ɓata ɔwɛ kʉtɨnaa.

²³ Abana gʉ ɛɓɔ Ɓayuda, ndʉ ɓasɨa ɨkyananakɨa ngia yakʉtata baya, ɓaɓuɗitiso kʉtɔ akʉ ɨngbɔngbɔɔ yɨ ɓʉtɨ ngiɓa ɓa꞉ɓʉtɨna‑ɔɔ. Jʉ Asʉɓɨɨ anʉ angu naɓɔ kʉkpakpaniso kʉ ananɨ kʉtɔ.

²⁴ Inu ɓombi ngiɓa nambʉkɔmʉ Ɓayuda, na ngbanga ndʉ mɨtapɨ yɨ ɓʉtɨ ngiɓa ɓaaɓusoko nʉ ɨbʉla ɓɔ mijeituni ngia yɨ 'ututu. Ɓa꞉nɨtɨna ɓambʉnɨkpakpaniso tiga ekoo ʉ mijeituni ngia ɓa꞉ɨhʉna yɛɛ hʉnɛ, iya yambakakyɨa ɓwanɨ. Ɓayuda ɓi꞉nye mijeituni ngiinanɨ ɓa꞉ɨhʉna, nʉ iinanɨ yambʉkɔmʉ ɨkyɛmɛ yɛɛ ɓʉkaɨ akʉ Asʉɓɨɨ kʉkpakpaniso kʉtɔ mɨtapɨ ngia ɓa꞉ɨtɨna kʉ ekoo ɓʉtɨ ngiɓʉnanɨ ɓa꞉naa ekoo ɔngɔ.

Ɓʉhɨa ngiɓa ɓʉ Ɨsalaɛlɛ

²⁵ Inu ɓayoo, makʉkʉnda ninu kutungwiso ɓɔ, nɔɔpaakɔmʉ moni kʉ ɓaɗi ngikʉnanɨ ambʉ nɔɔɓio kʉnana ndʉ ɓombi ɓɔɔ ɓʉmbɨmbanakɛ. Jʉ ɓombi ɗɛkɛkɛ ati ʉ Ɓaɨsalaɛlɛ ngiɓa ɓa amati ʉ tata baya ɓakʉsɨnganaka tʉkʉ amati ɔngɔ, kʉɓʉya tʉkʉ aka ɓombi ngiɓa ɓambʉkɔmʉ Ɓayuda ɓa꞊ka‑ɔɔ ɔɔ Asʉɓɨɨ.

²⁶ Kʉ ɓwanɨ, Ɓaɨsalaɛlɛ kʉ ɓuɓomu ɓa꞊nyɨa tiga nʉ ɓʉhɨa tʉkʉ ndʉ akʉ Mubio kʉ Asʉɓɨɨ ka‑ɔɔ kusigo ɓɔ « Muhiiso wa꞊ɓʉa akʉ ɨkáa yɨ anza ngia yɨ Siɔna. Ɛyɔ a꞊ungwiso ɓombi ngiɓa ɓa꞉tata Asʉɓɨɨ ati ʉ anza ʉ Yakɔbɔ.

²⁷ Moni ngikakɛ ka agɔmɔ ngia ma꞊kyɨa naɓɔ, ati ngia ma꞊pɨa‑ɔɔ ɓʉɓɨɓɨ ngiɓʉndaɓʉ. »

²⁸ Ɓayuda ɓa꞉nɨtanaka ɓakwa ɓʉ Asʉɓɨɨ aka ekoo tata Ɨsaʉ yɛɛ Iɗo, nʉ moni ngikʉnanɨ kanʉ dada akʉ inu ɓombi ngiɓa nambʉkɔmʉ Ɓayuda. Ɨkyɛmɨngana, ɛɓɔ ɓa ɓombi ngiɓa Asʉɓɨɨ a꞉ɓʉkʉnda ambʉɓʉchwa 'upi akʉ ɓɨsʉngʉɛ ɓʉndaɓʉ.

²⁹ Jʉ Asʉɓɨɨ ambakahɨnɨa ɨkyɛmɛ unzeni nzoni, nʉ ambakanicho itungwio ngiangɔ ekoo ʉ ɓombi ngiɓa a꞉ɓusoko.

³⁰ Jɛnɛ pɛɛ, inu na꞉ɗɨa ʉpanʉ wʉ Asʉɓɨɨ, ɨkyɛmɨngana ɨtakɨ‑takɨ ngiakɛ ɛyɔ aninu kʉnɨa ikoko jʉ Ɓayuda ɓa꞉ɗɨa ʉpanʉ.

³¹ Ngbanga kʉ ɓwanɨ, kʉndʉ ɓa꞉nɨnɨa inu ikoko, ɛɓɔ ɓa tiga kʉ kʉɗɨa ʉpanʉ, ambʉ Asʉɓɨɨ ʉɓʉnɨa tiga ɛɓɔ ikoko kʉ nɨaa.

³² Jʉ Asʉɓɨɨ a꞉fa ɓombi kʉ ɓuɓomu ndʉ ɓombi ɓʉ boloko jʉ ɓi꞉nye ɓʉɗɨeni ʉpanʉ, ambʉ ʉɓʉpananiso tiga ɛɓɔ kʉ ɓubomu 'ʉtʉma wʉ ikoko nguangɔ.

Ɨbɨba ngia yɨ Asʉɓɨɨ ya ɨja nadɨndɨ

³³ Huu, ɨjangɨa ngia yɨ Asʉɓɨɨ, 'ʉtʉma wɔɔ pimise moni, nʉ mbɨmbanaka nga yangɔ ya ɨja kʉɓaana tʉkʉ ɓʉ chɨla chɨla! Ɛyɔ aambɨa moni tʉkʉ kʉ muɓomu. Anɨ iya a ikanzi ngia apimiso itungwio ngiangɔ? Anɨ iya a ikanzi ngia ambɨa moni ngika aakwaisio?

³⁴ Kʉndʉ Mubio kʉ Asʉɓɨɨ kakusigo ɓɔ: Anɨ iya a ikanzi ngia apimiso itungwio ngia yɨ Makʉʉɓɨɨ? Anɨ iya a ikanzi ngia amunzo ʉpanʉ?

³⁵ Anɨ iya a꞉nzo Asʉɓɨɨ ɨkyɛmɛ pɛɛ, aka ekoo ngia ɓɔ umutuisio tiga ɛyɔ kʉtɔ?

³⁶ Jʉ moni ku muɓomu kaaʉngwa andɔngɔ, nʉ kʉ iɓomu ya akʉ angu ngiangɔ, nʉ aka ekoo angɔ. Ɨbɨba akʉ Asʉɓɨɨ akʉ mɨtʉ yɨ ɨpá nʉ mɨtʉ yɨ ɨpá! Ya ɓwanɨ.