Filimɔnɔ 1 - Agɔmɔ ngia wʉ Ɨtakɨ-takɨ

Ɓukuo

¹ Ɛmɛ Pɔlɔ ngia ma ya akʉ boloko aka ekoo ʉ kyananakɨa Yeso Klisito, isu nʉ ayoo asɛmɛ Timɔtɛɔ kʉnatɨndakɨa ɔwɛ Filimɔnɔ ʉbalʉa nguakɛ. Ɔwɛ wa ayoo ʉndɛsʉ wʉ ɓʉkʉnda iya wakʉkyɨa kuu ɨzɔ nisu,

² nʉ Apia gwa ʉndɛsʉ ɔɔ moi, nʉ Alakipo mombi ʉ kuu ngia kanaɓɔ kʉmana agbanga wʉ baya, nʉ kanisa ngia aajunikio andɔɔ.

³ Asʉɓɨɨ Tidoo ʉndɛsʉ nʉ Makʉʉndɛsʉ Yeso Klisito ɓunitio 'ʉtʉma wʉ ɨjɨɔ nʉ majɨɔ.

⁴ Filimɔnɔ, ati kʉ uɓomu ndʉ maakyɨa kʉta Asʉɓɨɨ, maakyɨa nɔwɛ tʉkʉ kutunguo, nʉ matuisio Asʉɓɨɨ ngiasɛmɛ ɨbɨba,

⁵ jʉ maakyɨa tʉkʉ kʉkɔ ɨsaʉ yɨ baya ngiisɔɔ ekoo ʉ Makʉʉndɛsʉ Yeso Klisito, nʉ ɓʉkʉnda ngiɓa wanaɓɔ ekoo ʉ ɓombi ɓʉ baya kʉ ɓuɓomu.

⁶ Maata Asʉɓɨɨ ɓɔ baya ngiisɔɔ iya ya꞉tijubuniso ninu yɨ꞊nʉta masɔɔ maja. Pananiso ɓamoni ɓɔɔ manzanza kʉ ɓuɓomu ngiɓa kanaɓɔ amati ʉ jubunio ngiindɛsʉ ɨzɔ nʉ ɔɔ Klisito.

⁷ Ma꞉kwa pongo ɨgyagya nadɨndɨ aka ekoo ʉ ɓʉkʉnda ngiɓa wa꞉pananiso pongo, wambunawuliso 'ʉtʉma, jʉ wa꞉nzo pongo ɓombi ngiɓa ɓa꞉baya igue‑gue akʉ 'ʉtʉma.

Pɔlɔ akʉta Filimɔnɔ ɓɔ ʉkyɨa Onisimo iɗo

⁸ Abana ndʉ Klisito a꞉nanzo ʉpanʉ nɔwɛ kutitio ɨngbaa yɨ moni ngia wʉkwanana kʉkyɨa engo,

⁹ manɔwɛ kʉta moni mʉngana tʉkʉ aka ekoo ɓʉkʉnda. Mʉkwanana nɔwɛ tʉkʉ kukikilikio jʉ ɛmɛ Pɔlɔ ma tiga 'ʉdʉɓɛ, nʉ tiga ɓata ma kʉ akʉ boloko aka ekoo Yeso Klisito.

¹⁰ Manɔwɛ kʉta tʉkʉ ɨngbaa yɨ moni mɨngana aka ekoo ʉ Onisimo. Ɛyɔ a꞉nɨtanaka pongo mwana asɛmɛ akʉ baya ati ngia ma‑ɔɔ akʉ boloko.

¹¹ Pongo pɛɛ i꞉nye tʉkʉ 'ʉdada wɔngɔ ɨsʉkʉɓwanɨ, ɨkyɛmɨngana ɨtakɨ‑takɨ ngiakɛ a tiga nisu kʉsalɨa isu nɔwɛ kʉtaa.

¹² Manayɔ kutuiso kʉtɔ na andɔɔ, ɛyɔ ngia a ambamba ʉ 'ʉtʉma nguʉsɛmɛ.

¹³ Ma piɛ kʉkʉnda ɓɔ kutukuo nayɔ kʉ aka, ati ngia ma‑ɔɔ ya akʉ boloko, aka ekoo ʉ ɓɨakɨa Ɨsaʉ yɛɛ Iɗo, ambʉ uɓio‑zʉ nɛmɛ kʉsalɨa akʉ izi yɨsɔɔ.

¹⁴ Ɨkyɛmɨngana, mambʉkʉkpanga kyɨa moni mambʉnaɓukuenikɔmʉ, ambʉ wɔɔkyɨakɔmʉ ɓuɗo tʉkʉ jʉ ɓʉnakpakpa ɓʉ ndi, ɨkyɛmɨngana yɨɓʉa tʉkʉ akʉ 'ʉtʉma nguʉsɔɔ.

¹⁵ Yɛmɔ Onisimo a꞉nasɨa ɔwɛ akʉ wati ɗɛkɛkɛ ambʉ ʉtʉa tii andɔɔ kingono.

¹⁶ Jʉ ɨtakɨ‑takɨ ngiakɛ ambʉkʉ tii bayo ɨsʉkʉɓwanɨ, ɨkyɛmɨngana a tiga kʉ ayoo wʉndɛsʉ wʉ ɓʉkʉnda. Kʉ ɓwanɨ, ɛmɛ maamʉkʉnda kʉndaa, ɨkyɛmɨngana wʉkwanana nayɔ kʉkʉnda tiga nadɨndɨ, yiɓio akʉ ndʉtʉ kʉndʉ amati ʉ baya.

¹⁷ Ndʉ yaɓio ɓɔ waanachɨka ndʉ adii asɔɔ, mʉjananɨa kʉndʉ wʉnajanɨa ɛmɛ.

¹⁸ Ndʉ aɓio ʉnakyɨeni ɓɨɓɨ, yɛmɔ ɓɔ anʉ mabɨngɨa wʉsɔɔ napɨa ɔwɔ tii tʉkʉ aka ekoo asɛmɛ.

¹⁹ Kingono tʉkʉ ɛmɛ Pɔlɔ kʉ mʉ꞉natɨndakɨa ʉbalʉa nguakɛ, nʉ ma꞊natuisio mabɨngɨa nguangɔ tʉkʉ tuisioo. Chʉkɔmʉ wapaa tɔ ɓɔ wa kʉ nʉ mabɨngɨa nga wʉsɛmɛ uwa wa ʉɓɨɨ nguʉsɔɔ akʉ baya.

²⁰ Ayoo asɛmɛ, mʉ꞉nata ɓɔ na꞊kyɨa ɓaka moni kɔɔ muɗo ngikʉnanɨ amati ʉ Makʉʉɓɨɨ tʉkʉ kyɨaa, wambunijiso 'ʉtʉma nɨsɨ akʉ ekoo ʉ jubunio ngia kanayɔ amati ʉ Klisito.

²¹ Baya ngiisɛmɛ akʉ ma‑ɔɔ nɔwɛ kʉtɨndakɨa ʉbalʉa nguakɛ ya ɓɔ wa꞊kyɨa moni ngikʉnanɨ tʉkʉ kyɨaa, abana kʉɓaa ika manɔwɛ kʉta engo.

²² Nʉ natambanakɨa mʉa wʉ ɓʉkwaɨ, jʉ makʉnapɨa itungwio ɓɔ makʉsa ninu tʉkʉ kʉgbʉka aka ekoo nɨta ngia wanɛmɛ kʉtɨa.

Ɓukuo ngia yɨ upipio

²³ Adii asɛmɛ ngia ʉnʉ ɓɔ Epafala iya kanayɔ akʉ boloko aka ekoo Yeso Klisito, ʉnaɓukuo kʉ ɓukuoo.

²⁴ Abana ɓombi ngiɓa kaakyɨa kuu izi mɨngana naɓɔ ndʉ ɔɔ Malɨkɔ, Alɨsɨtalɨkɔ, Dɛma nʉ Luka, ɓunaɓukuo kʉ ɓukuoo.

²⁵ Ɨjɨɔ ngia yɨ Makʉʉndɛsʉ Yeso Klisito yiɓio ɨzɔ ninu.