Malɨkɔ 6 - Agɔmɔ ngia wʉ Ɨtakɨ-takɨ

Ɓombi ɓʉ Najalɛtɛ ɓʉyaa Yeso

¹ Yeso ambʉʉgwa na akʉ i꞉nye‑ɔɔ, ambʉtʉa anʉ Najalɛtɛ akʉ a꞉yokoko‑ɛɛ, ɓakpataka ngiɓangɔ ɓambʉmʉkpata kʉ nani.

² Tiga akʉ ɓisi ɓʉ humuo ngiɓa ɓʉ Ɓayuda, ambufaniso panɨa amati ʉ ɨkáa yɨ nɨta ngia yɨ Ɓayuda. Mapanʉ ngikʉnanɨ ka꞉mbangɨa ɓombi ɓaja ngiɓa ɓa꞉kʉkɔ tʉkʉ nadɨndɨ. Ɓi꞉nye kuɓokono ɓɔ: « A꞉nyɨa nʉ mbɨmbanaka yɛɛ ɨja ngia gbanɨ? Anɨ iya a꞉munzo 'ʉtʉma wɔɔ pimise moni nguakɛ? Anɨ kʉ a꞉munzo angu ɔɔ kyɨɛ moni kɔɔ mʉmbangɛ maja ɓɔmʉ?

³ Ajʉ chʉkɔmʉ‑zʉ ɛyɔ iya aakyɨa kuu yɨ maɓaʉ ɓiɛ? » Ambʉkɔmʉ‑zʉ mwana ʉ Malɨa ɓiɛ? Manye ʉ Yakɔbɔ nʉ Yɔsɛ, nʉ Yuda nʉ Simoni ɓiɛ? Ajʉ ɓamanye ɓɔɔ ɓoi ɓambʉkɔmʉ‑zʉ tʉkʉ ati ʉndɛsʉ aka ɓɔmʉ ɓiɛ? Moni ngikʉnanɨ ɨkɔ ika ka꞉ɓunangyo ɓɔ ɓɔɔmʉbayakɔmʉ.

⁴ Kʉ ɓwanɨ, Yeso ambuɓusigio ɓɔ: « Ɨgbɛ yɨ Asʉɓɨɨ yaakyɨa nʉ ɨbɨba mʉa kʉ 'uɓomu. Ɨkyɛmɨngana, andaɓʉ amati ʉ anza ngiangɔ, nʉ akʉ 'ufini nguangɔ ɓʉ kpɛ ɓaamʉna tʉkʉ ɨsʉkʉɓwanɨ. »

⁵ Yeso a꞉kwananakɔmʉ tii ɓata kʉkyɨa moni kɔɔ mʉmbangɛ gʉkʉ mʉngana akʉ ɨkʉmbʉ ngiinanɨ. Ɨkyɛmɨngana, a꞉napɨa tii tʉkʉ lɨkɔndɔ ekoo ɓombi ɓʉ ɓakwisikiso ngana ngana, ambuɓuhiiso.

⁶ Nɨya baya ngiindaɓʉ ya꞉mʉmbangɨa tʉkʉ nadɨndɨ. Yeso ambʉɓaɓaka amati ʉ lɨkʉmbʉ ngila lɔɔ tine tine nanɨ, ɛyɔ tʉkʉ kʉpanɨa ɓombi.

Yeso ʉtʉma ɓatitima kumi nʉ ɓapɨnɨ

⁷ Iya a꞉soko ɓatitima ngiɓangɔ kumi nʉ ɓapɨnɨ, ambufaniso naɓɔ kʉtʉma ɓapɨ ɓapɨɨ. Ati ngia i꞉nye‑ɔɔ naɓɔ kʉtʉma, ambuɓunzo angu ɔɔ ise ɓombi mɨtʉma yɨ ɓabɨa.

⁸ Ambuɓunzo ʉpanʉ ɓɔ: « Nɔɔchɨka ɨkyɛmɛ gʉkʉ mɨngana akʉ kɨnda ngiinanɨ, ɓotoneni tʉkʉ nʉ 'utupe. Nɔɔɓotonokɔmʉ nʉ idyo, gʉkʉ mbakaya, gʉkʉ falanga akʉ mifuku ngiindɛnʉ. »

⁹ Ambʉmatɨa ɓata kusigo ɓɔ: « Lɨkpakʉ pɛpɛ, lɨpɨnyeni pɨnyanɨ, nɔɔpɨnyakɔmʉ tʉkʉ lɨpʉkʉ lʉ vɛvʉ dyepini. »

¹⁰ Gʉ ɛyɔ ɓata naɓɔ ɓɔ: « Ndʉ naɓʉya akʉ mʉa mungono ɓɔ, akʉ ɨkáa ngia ɓa꞊nɨjananɨa‑ɛɛ iɗo amati ɔngɔ, ɓieni tʉkʉ ananɨ kʉɓʉya tʉkʉ aka na꞊ʉngwa‑ɔɔ akʉ mʉa nguʉnanɨ.

¹¹ Akʉ izi ngia ɓambʉkʉnɨjananɨɛ iɗo, nʉ akʉ ɓambʉkʉnɨkɔ‑ɛɛ, pɛɛ ngia na꞊ɓʉa‑ɔɔ akʉ izi ngiinanɨ, ɓɨndakeni aɓungu ʉ mɨtɨndɨ ngiindɛnʉ, kʉpananiso ɓɔ nugiso ɓombi ngiɓʉnanɨ gisoo. »

¹² Ɓakpataka ɓambʉsa kʉɓɨakɨa Ɨsaʉ yɨ Asʉɓɨɨ ɓɔ ɓombi ɓunicho mɨtʉma!

¹³ Ɓi꞉nye kiso ɓombi mɨtʉma yɨ ɓabɨa ɨja, ɓambʉɗɨa ɓombi ɓʉ ɓakwisikiso umbundo naɓɔ kuhiiso.

Ingyo yɨ Yʉanɨ ngia i꞉nye ɓatiso ɓombi

¹⁴ Uduɓa wʉ Yeso wambʉsanaka tii tʉkʉ nʉpɛɛ, ɨsaʉ yɛngɔ yambʉɓʉya kʉ akʉ muchwei kʉ ngama Ɛlɔdɛ. Ɓombi ɓɔmɔ ɓi꞉nye sigo ɓɔ Yʉanɨ ngia aaɓatiso ɓombi iinanɨ a꞉jʉkana bɛ akʉ ingyo. Iikwa a‑ɔɔ nʉ angu kʉkyɨa ɓamoni ɓɔɔ ɓʉmbangɛ.

¹⁵ Ɓombi nga ɓɔmɔ ɓi꞉nye sigo gʉ a ɨgbɛ Ɛlɨa, ɓɔmɔ gʉ a ɨgbɛ kʉndʉ lɨgbɛ nga lɔmɔ.

¹⁶ Ɨkyɛmɨngana, iya Ɛlɔdɛ a꞉kɔ nayɔ moni ngikʉnanɨ, ambusigo ɓɔ: « Tʉkʉ Yʉanɨ ngia ɛmɛ ma꞉titio pongo ɓɔ ɓʉmʉtɨna 'ʉtʉ iinanɨ a꞉jʉkana bɛ akʉ ingyo. »

¹⁷ Tɔgɔ, Ɛlɔdɛ ngiinanɨ iya i꞉nye u꞉titieni ɓɔ ɓʉfa Yʉanɨ, ɓambumugiso akʉ boloko. Moni ngikʉnanɨ ka꞉kwa aka ekoo moi ngia i꞉nye ino ɓɔ Elodia moi ʉ Filipo. Ʉna tɔ, ɔɔ Filipo ɓa꞉ɓʉa kʉ nʉ Ɛlɔdɛ. Ɛlɔdɛ a꞉sa kʉchɨka tiga ɓata kʉ moi ʉ manye ngiinanɨ.

¹⁸ Jʉ Yʉanɨ a꞉ɓɨa Ɛlɔdɛ akʉ ɓʉmba ɓɔ: « Yɨkwananakɔmʉ piɛ ɓɔ ɔwɛ wachɨka moi ʉ mwana ʉ anʉ! »

¹⁹ Kʉ ɓwanɨ, Elodia ambuhuo nʉ 'ʉnganga tʉkʉ ɓʉ fɔ nʉ Yʉanɨ. Ambuɓio kʉhata ɓɔ amuwisiso nɨngbaa tɨmanɨ. Ɨkyɛmɨngana, chʉkɔmʉ ambʉnyɨa nɨngbaa yɛngɔ kʉ ɓwanɨ.

²⁰ Ʉna tɔ, Ɛlɔdɛ i꞉nye kumo Yʉanɨ ɓʉkaɨ jʉ i꞉nye mbɨa ɓɔ a mombi ɔɔ ngbingbii nʉ ɔɔ tu, nʉ i꞉nye kyɨa nayɔ tʉkʉ kʉpɨmakɨa. Iya i꞉nye kɔ Yʉanɨ kʉyaka, ambʉkwa ʉɓa. Ʉna tɔ, ati ngia Yʉanɨ i꞉nye kyɨa‑ɔɔ kʉyaka, yambuɓio ɓata nayɔ kʉ kʉkataa.

²¹ Tiga ɓisi mʉngana, Ɛlɔdɛ a꞉tiniso ʉmbɔ kutunguo nʉtanɨa ngiangɔ. Ambusoko ɓaandɔngɔ, nʉ ɓangama ɓʉ ɓasʉda, ɨzɔ nʉ ɓangama ɓʉ ɨkʉmbʉ ɓʉ Galilaya.

²² Mwana ʉ Elodia ɔɔ moi ambʉɓwanɨa akʉ ɨmbaa. Ambuɓuno ʉmbɔ kingono, yambʉkataa ngama Ɛlɔdɛ nʉ mubika kʉtaa. Ambusigio mwana ʉ ɓasaɓakyɛ ngiinanɨ ɓɔ: « Wakʉkʉnda ɓɔ mʉnakwa nʉ ɨmanɨ mwana asɛmɛ? Ɨkyɛmɛ kʉ iɓomu ngia wa꞊nata, ma꞊nanzo ɛyɔ tʉkʉ nzoni. »

²³ Ɛlɔdɛ ambʉtɨna silika apɛɛ ʉ mwana angɔ ngiinanɨ ɔɔ moi ɓɔ: « Musimio tʉkʉ ɓatidoo, ma꞊nanzo ɨkyɛmɛ kʉ iɓomu ngia wa꞊nata, abana tʉkʉ kʉnahʉa ɓʉngama ngiɓʉsɛmɛ akati. »

²⁴ Mwana ʉ ɓasaɓakyɛ ngiinanɨ ambʉɓʉa, ambʉsa kʉgbʉka inye, ambumuɓukuo ɓɔ: « Inoo, ɨmanɨ iya mʉkwanana kʉta engo? » Inye ambumutisio ɓɔ: « Ta tʉkʉ 'ʉtʉ wʉ Yʉanɨ ngia aaɓatiso ɓombi. »

²⁵ Kʉ ɓwanɨ, mwana ʉ ɓasaɓakyɛ ambʉtʉa kʉ nɨma ngiinanɨ ɔɔ ngama Ɛlɔdɛ, ambumusigio ɓɔ: « Tʉkʉ ɨtakɨ‑takɨ ngiakɛ, nanzo 'ʉtʉ wʉ Yʉanɨ ngia aaɓatiso ɓombi, amati ʉ zanɨ wʉ ɨpapɨ. »

²⁶ Moni ngikʉnanɨ kambudyiso ngama ikoko nadɨndɨ akʉ 'ʉtʉma. Ndʉ i꞉nye ʉtɨneni silika apɛɛ ʉ mubika kʉ ʉmbɔ tɨnanɨ, yambikinye tii ɓata aka atata‑ɔɔ.

²⁷ Kʉ nɨma ngiinanɨ, ngama ambutitio sʉda mʉngana ɓɔ ʉka nʉ 'ʉtʉ wʉ Yʉanɨ. Kija sʉda a꞉sa akʉ ɨkáa yɨ boloko ambʉtɨna Yʉanɨ 'ʉtʉ ɓʉ gbo.

²⁸ Ambʉka nawɔ amati ʉ zanɨ wʉ ɨpapɨ, ambunzo mwana ʉ ɓasaɓakyɛ ngiinanɨ, kija a꞉unzo inye.

²⁹ Iya ɓakpataka ngiɓa ɓʉ Yʉanɨ ɓa꞉kɔ nayɔ ɨsaʉ ngiinanɨ, ɓambʉsa kʉchɨka ndʉtʉ yangɔ, kʉsa kʉhʉna engo.

Yeso ʉdyakakiso ɓombi ɛlɛfʉ ɓɔkɔ

³⁰ Iya ɓatitima ɓa꞉tʉa nayɔ akʉ Yeso a꞉ɓʉtʉma‑ɛɛ, ɓambukungunio anambamba angɔ ɓʉ kuu, ɓambʉmʉngakɨa masaʉ kʉ moni kʉ muɓomu ngika ɓa꞉kyɨa, nʉ moni kʉ muɓomu ngika ɓa꞉kʉpanɨa.

³¹ Ɓombi ɓaja ɓi꞉nye tiga kʉka ɔɔ Yeso nʉ tʉa. Chʉkɔmʉ ɔɔ Yeso nʉ ɓatitima ɓambuɓio kʉnyɨa nʉ wati ikanzi ngia ɓakwanana‑ɔɔ kʉdyakaka. Yeso ambusigio ɓatitima ɓɔ: « Kuseni‑zʉ tʉkʉ isu akʉ mʉa ngua ɓombi ɓambʉkɔmʉ‑ɛɛ, kambʉkanyeni tiga‑zʉ humuo ɗɛkɛkɛ. »

³² Kʉ ɓwanɨ, ɓambuɗito akʉ ɨngbɔɔ yɛɛ ɨja kʉsa akʉ mʉa ngua ɓombi ɓambikinye‑ɛɛ.

³³ Iya ɓi꞉nye nayɔ kʉʉngwɨa kɨnda, ɓombi ɓaja ɓambʉɓʉna, ɓambʉmbɨa. Kʉ ɓwanɨ, ɓombi ɓambufaniso bangʉ nʉ mɨtɨndɨ, kʉʉngwa akʉ ɓagʉlʉ kʉ ɓuɓomu, ɓambʉɓʉtɨnganɨa nʉ ɓʉya pɛɛ ʉndaɓʉ, ɔɔ Yeso nʉ ɓatitima ɓambʉɓʉyenikɔmʉ.

³⁴ Ati ngia i꞉nye tiga‑ɔɔ kʉɓʉa akʉ ɨngbɔɔ, ambʉna ɓata ungbutu wʉ ɓombi nguʉnanɨ uhue tʉkʉ ɓʉ ngu. Kija a꞉ɓʉdyɨa ikoko kʉnɨna ɓɔ ɓombi ngiɓʉnanɨ ɓi꞉nye ngbanga ndʉ iya ɓakɔndɔlɔ ɓaakyɨa‑ɔɔ chʉkɔmʉ nʉ mʉpɨmakɨa. Ambufaniso naɓɔ kunzo mapanʉ maja.

³⁵ Ndʉ wati wi꞉nye tiga wʉɓaeni kʉ ɓaanɨ, ɓakpataka ngiɓangɔ ɓambʉka nayɔ kusigio ɓɔ: « Wati wʉ꞉ɓaa ɓaanɨ, nʉ mʉa nguakɛ wa anambamba.

³⁶ Nanzaniso ɓombi ngiɓa, ɓʉ꞊sa kʉkʉa ɨkyɛmɛ yɛɛ ɨdyɛ aɓandei nʉ akʉ lɨkʉmbʉ ngila la tine tine aka. »

³⁷ Ɨkyɛmɨngana, Yeso ambuɓutisio ɓɔ: « Inu ɓakʉɓɔngɔ ɓunzeni ɨkyɛmɛ yɛɛ ɨdyɛ! » Ɛɓɔ ɓambuɓukuo Yeso ɓɔ: « Ajʉ kʉ́sa naɓɔ kʉkʉya mikati nʉ falanga mɨa ɓepini iya kaɓʉdyakakiso nayɔ ɓiɛ? »

³⁸ Ambuɓutisio ɓɔ: « Na‑zʉ nʉ mikati ɨpɨtanɨ? Seni, kʉkangeni‑zʉ. » Iya ɓa꞉ɓukuono ati ʉndaɓʉ, ɓambumutisio ɓɔ: « Mikati ya ɓɔkɔ, nʉ sipe tʉkʉ ɓepini. »

³⁹ Kʉ ɓwanɨ, Yeso ambuɓutitio ɓɔ ɓuwulukiso ɓombi kʉ ɓuɓomu nanɨ akʉ lanza, akʉ limbi kʉ di di di.

⁴⁰ Kʉ ɓwanɨ, ɓambukungunikio akʉ limbi, ɓombi ɓɔmɔ mɨa mʉngana, ɓɔmɔ makumi ɓɔkɔ.

⁴¹ Yeso ambʉchɨka mikati ɓɔkɔ nʉ sipe ɓepini ngiinanɨ, ambʉkanga mesu ekoo ʉ ɓisi, ambutuisio Asʉɓɨɨ ɨbɨba. Mbise ɔngɔ, ambuɓokoko mikati ngiinanɨ, ambunzikio ɓakpataka ngiɓangɔ, ɓambʉɨpakɨa ɓombi kʉ ɓuɓomu. Ambʉkyɨa akʉ sipe ɓepini ngiinanɨ kʉ ɓwanɨ.

⁴² Kija ɓombi kʉ ɓuɓomu ɓa꞉dyakaka, ɓambumotoko.

⁴³ Ɓambʉmʉma tiga ligbiti lʉ mikati nʉ lʉ sipe ngila la꞉tukoko, lambʉkwa ɓajaɨ kumi nʉ ɓapɨnɨ ɓuhuoke ɓʉ kyɛɛ kyɛɛ.

⁴⁴ Ʉna tɔ, zʉ tʉkʉ ɓugue kʉ ɓuɓomu ngiɓa ɓa꞉dya idyo ngiinanɨ, ɓi꞉nye ɛlɛfʉ ɓɔkɔ.

Yeso ʉkɨndaka ekoo ʉ mepo

⁴⁵ Tʉkʉ nɨma ngiinanɨ, Yeso ambunzo ɓakpataka ngiɓangɔ ʉpanʉ ɓɔ ɓuɗito akʉ ɨngbɔɔ nʉ tapʉa amondu ʉ yapuu, mesu akʉ gʉlʉ ʉ Betesaida, ati ngia ɛyɔ a꞉tukuo‑ɔɔ kunzo ungbutu wʉ ɓombi kɨnda.

⁴⁶ Iya a꞉ɓunzo nayɔ kɨnda, ambʉsa tiga kʉta ekoo ʉ ɨkpangba.

⁴⁷ Ɨpasɨ ya꞉gbʉka ɓɔ ɓakpataka ɓi꞉nyeni nʉ ɨngbɔɔ tii tʉkʉ ati ʉ yapuu yɛɛ ɨja ngiinanɨ. Yeso i꞉nye utukueni tii tʉkʉ kʉ nangana amʉba.

⁴⁸ Tiga nanɨ, Yeso ambʉna ɓɔ mahuo wi꞉nye kʉtʉa numbise, ambʉmbɨa ɓɔ ɨngbɔɔ yambukuɓio nʉ ɓakpataka zia zia kupuo engo. Ambufaniso naɓɔ kpata. Kʉka tiga tine tine aka ɓakɔɓɔ ɓaanatɨa‑ɔɔ, ɛyɔ i꞉nye tii kʉkɨndaka tʉkʉ ekoo ʉ mepo ɓʉ paa paa. Ambʉɓʉfa, ambʉhata naɓɔ kʉɓaa.

⁴⁹ Iya ɓa꞉mʉna nayɔ kʉkɨndaka ekoo mepo ɓwanɨ, ɓi꞉nye kuyo ɓɔ ɓʉ꞉na mabɨa, ɓambufaniso huɓoko!

⁵⁰ Ndʉ ɛɓɔ kʉ ɓuɓomu ɓa꞉mʉna tʉkʉ nanɨ, ɓambʉkwa ʉɓa nadɨndɨ. Tʉkʉ nɨma ngiinanɨ, ambuɓusigio ɓɔ: « Nɔɔkwakɔmʉ ʉɓa, chɨkeni tʉkʉ igue‑gue. Tʉkʉ ɛmɛ iinanɨ! »

⁵¹ Mbise ɔngɔ, ambuɗito kʉ akʉ ɨngbɔɔ ɨzɔ naɓɔ, ɨbʉbʉ yambʉkatana. Moni ngikʉnanɨ kambʉɓʉmbangɨa nadɨndɨ.

⁵² Jʉ ɛɓɔ ɓi꞉nye ɓambupimisenikɔmʉ moni kɔɔ mʉmbangɛ ngika Yeso a꞉kyɨa ekoo ʉ mikati, iikwa mɨtʉma ngiindaɓʉ yi꞉nye tʉkʉ ɓʉmʉ kupimiso ɨngbaa yɨ moni.

Yeso uhiiso ɓombi anʉ Gɛnɛjalɛtɨ

⁵³ Iya ɔɔ Yeso nʉ ɓakpataka ngiɓangɔ ɓa꞉tapʉa nayɔ amondu, ɓambʉfʉma ɨngbɔɔ, ɓambʉɓʉya akʉ gɨpa ʉ Gɛnɛjalɛtɨ.

⁵⁴ Iya ɓi꞉nye kijo akʉ ɨngbɔɔ, ɓombi ɓambʉmbɨa Yeso tʉkʉ nɨma ngiinanɨ.

⁵⁵ Kʉ ɓwanɨ, ɓombi ɓambʉnanzana akʉ ɓatungbu ɓʉ gɨpa tʉkʉ kʉ ɓuɓomu. Kija ɓa꞉faniso kʉka nʉ ɓombi ɓʉ ɓakwisikiso ekoo ʉ mukwei, akʉ ɓi꞉nye kɔ‑ɔɔ ɓɔ Yeso a eki.

⁵⁶ Akʉ mʉa kʉ 'uɓomu ngua Yeso i꞉nye ɓaa‑ɛɛ, yiɓio amati ʉ lɨkʉmbʉ, kʉndʉ akʉ ɓagʉlʉ, aɓandei, ɓi꞉nye kwaiso ɓombi ɓʉ ɓakwisikiso akʉ ɓamʉa ngiɓa ɓombi ɓi꞉nye kyɨa‑ɔɔ ɓaja. Ɓombi ɓi꞉nye kyɨa kʉndɨanɨa Yeso ɓɔ ɓumuɓoto ɓaka gɔ tʉkʉ 'ʉtʉ wʉ ɨpʉkʉ nguangɔ. Ɓombi kʉ ɓuɓomu ngiɓa ɓi꞉nye muɓoto, ɓi꞉nye hɨa tʉkʉ hɨaa.