Malɨkɔ 5 - Agɔmɔ ngia wʉ Ɨtakɨ-takɨYeso iso mombi mɨtʉma yɨ ɓabɨa ( Mat 8:28-34 ; Luk 8:26-39 ) 1 Kija ɔɔ Yeso nʉ ɓakpataka ngiɓangɔ ɓa꞉tapʉa amondu ʉ yapuu ngia ɓaisoko ɓɔ Galilaya akʉ gɨpa ʉ Ɓagɨlasɛ. 2 Iya Yeso a꞉ɓʉa nayɔ akʉ ɨngbɔɔ, kʉ nɨma ngiinanɨ, mombi mʉngana ngia i꞉nye ʉʉngweni akʉ manzaʉ iya i꞉nye kʉ nʉ mɨtʉma yɨ ɓabɨa a꞉ka kujunikio nayɔ. 3 Mombi ngiinanɨ i꞉nye kyɨa yangɔ tʉkʉ akʉ manzaʉ. Yambikinye nʉ mombi gʉkʉ mʉngana iya i꞉nye ikanzi ngia a꞉kwanana nayɔ kʉsanga, abana tʉkʉ nʉ ɓaselegeni. 4 Jʉ nɨsɨ maja ndʉ ɓi꞉nye mʉsanga mɨtɨndɨ nʉ likpenze nʉ lɨkɔndɔ nʉ ɓaselegeni, i꞉nye ɓʉkyɨkya tʉkʉ ɓʉ tu tu tu. Mombi ʉ angu ikanzi ngia amʉfa ambikinye. 5 Wati kʉ 'uɓomu, nuɓutu kʉndʉ nusoti, i꞉nye kyɨa kʉyɨnganaka nʉ nachokoo tʉkʉ akʉ manzaʉ nʉ ekoo lɨkpangba, ambuɓio kʉkyɨkyana lɨpɨ nʉ mukopi. 6 Iya a꞉na nayɔ Yeso zʉ kʉ danga, ambʉsa bangʉ kʉsa kʉgbʉkʉmɨa nʉ muwuu apɛɛ angɔ. 7 Ambusigio Yeso nʉ iyo yɛɛ ɓʉmʉ ɓɔ: « Yeso Mwana ʉ Asʉɓɨɨ ngia a ekoo ɓisi, iya yɨndɛsʉ nɔwɛ yɨkwa tanɨ? Manɔwɛ kʉta akʉ ino yɨ Asʉɓɨɨ ɓɔ wɔɔnakyananaka ɓaka. » 8 Yeso i꞉nye umusigieni ɓɔ: « Ɔwɛ, 'ʉtʉma wʉ abɨa, ɓʉa amati ʉ mombi ngia! » 9 Yeso ambumuɓukuo ɓɔ: « Wʉnʉ‑zʉ tanɨ? » Ambumutisio ɓɔ: « Mʉnʉ ɓɔ Ndiba, jʉ ka ɓaja. » 10 Ambukikilikio Yeso nadɨndɨ ɓɔ ɔɔɓukpinyo ɓaka amati ʉ gɨpa ngiinanɨ. 11 Ʉna tɔ, tinene nʉ ɨkpangba mwana ɔngɔ danga, imbi yɨ ɓanɛmbʉ yɛɛ ɨja yi꞉nye kʉdyakanaka kʉ ananɨ. 12 Mɨtʉma yɨ ɓabɨa ngiinanɨ, yambukikilikio Yeso ɓɔ: « Tɨtʉma ɓaka amati ʉ ɓanɛmbʉ ngiɓa oki, kukumunio amati ʉndaɓʉ. » 13 Yeso ambutitio mɨtʉma yɨ ɓabɨa ngiinanɨ ɓɔ yɨɓʉa nʉ yɨsa kukumunio amati ʉ ɓanɛmbʉ ngiɓʉnanɨ. Imbi yɨ ɓanama ngiɓʉnanɨ yi꞉nye tine tine ndʉ ɛlɛfʉ ɓepini. Kija ɓanɛmbʉ ngiɓʉnanɨ ɓa꞉ʉngwa ekoo ɨkpangba kʉsa bangʉ akʉ 'ʉdʉdʉʉ, ɓambʉsa kukwikwio amati ʉ yapuu yɛɛ ɨja, ɓambindio amati ɔngɔ ɓʉ ɗu. 14 Iya ɓapɨmakɨa ɓʉ ɓanɛmbʉ ɓa꞉na nayɔ moni ngikʉnanɨ, ɓambʉsa bangʉ kʉɓɨakɨa ɨsaʉ amati ʉ gʉlʉ, nʉ aɓandei. Ɓombi ɓambʉka kʉna moni ngikʉnanɨ ka꞉kyɨanɨa. 15 Kija ɓombi ɓa꞉sa akʉ Yeso i꞉nye‑ɔɔ, ɓambʉgbʉka mombi ngiinanɨ iya i꞉nye nʉ mɨtʉma yɨ ɓabɨa ɨja amati angɔ 'uwei, 'ʉkatanɛ tii tʉkʉ ɓʉ dɨɨ, 'upinyonoke tiga kʉ iɗo. Moni ngikʉnanɨ kambukiso ɓombi kʉ ʉɓa. 16 Ɓombi ngiɓa ɓa꞉na moni ngikʉnanɨ ka꞉kyɨanɨa, ɓa꞉faniso tiga ngakɨa ɓangɛ moni ngika ka꞉ɓaa ekoo ɓanɛmbʉ, nʉ ekoo mombi ngiinanɨ i꞉nye nʉ mɨtʉma yɨ ɓabɨa. 17 Kija ɓa꞉kikilikio Yeso ɓɔ ʉʉngwa na andaɓʉ tʉkʉ ɓʉ kya. 18 Iya Yeso i꞉nye tiga kuɗito ekoo ʉ ɨngbɔɔ, mombi ngia ɓa꞉miso mɨtʉma yɨ ɓabɨa, ambukikilikio Yeso ɓɔ ambʉ ɓuɓio gɔ tii tʉkʉ ɛɓɔ nayɔ. 19 Chʉkɔmʉ Yeso ambʉbaya, ɨkyɛmɨngana a꞉musigio tʉkʉ ɓɔ: « Chʉkɔɔ, chɨka kɨnda tʉa‑zʉ tʉkʉ andɔɔ akʉ ɓaandɔɔ ɓa‑ɛɛ, wambʉɓʉchwɨa uduɓa wʉ moni kʉ muɓomu ngika Makʉʉɓɨɨ ʉ꞉nakyɨaa, aka ʉ꞉nanɨa‑ɔɔ ikoko nʉ aka ʉ꞉pananiso‑ɔɔ 'ʉtʉma wʉ ikoko nguangɔ ekoo asɔɔ. » 20 Gue ngiinanɨ ambʉsa yangɔ nʉ kufaniso ɓɨakɨa moni ngika Yeso a꞉mʉkyɨa kʉ muɓomu amati ʉ gɨpa ʉ Dekapoli. Moni ngikʉnanɨ kambʉmbangɨa ɓombi kʉ ɓuɓomu. Yeso uhiiso mwana ʉ Yailo nʉ moi ngia aɓoto ɨpʉkʉ ngiangɔ ( Mat 9:18-26 ; Luk 8:40-56 ) 21 Yeso ambʉtʉa ɓata nʉ ɨngbɔɔ kʉ amondu ʉ yapuu ngiinanɨ. Iya a꞉ɓʉa amati ʉ ɨngbɔɔ, ungbutu wʉ ɓombi wɔɔ ʉja wambuhuo ɓata tʉkʉ ɓʉ ngu anambamba angɔ ati ngia i꞉nye zʉ‑ɔɔ kʉ anambamba ʉ yapuu. 22 Ngama ʉ ɨkáa yɨ nɨta ngia yɨ Ɓayuda ino ɓɔ Yailo, ambʉɓwanɨa. Iya a꞉na nayɔ Yeso, ambʉkwa akʉ mɨtɨndɨ ngiangɔ ɓʉ kpruu. 23 Ambʉmʉndɨanɨa ɓɔ: « Mwana ngiasɛmɛ ɔɔ moi a tinene kʉtɨnɨa 'ʉtʉma! Ambʉ́ wʉka ɓaka‑zʉ nayɔ kʉnapɨa lɨkɔndɔ ɓɔ ʉhɨa ambuɓio‑zʉ kʉkʉʉ. » 24 Ɓambʉsa nʉ ɔɔ Yeso ɨgbata mɨngana, ungbutu wʉ ɓombi wɔɔ ʉja ambise angɔ ɓʉmʉndʉndɨeni magba kʉ mabɔbɔ. 25 Ʉna tɔ, ati ʉ ungbutu wʉ ɓombi nguʉnanɨ, moi mʉngana i꞉nye nʉ kweso yɛɛ ɓʉɛ miniki amati ʉ mugo kumi nʉ kapɨnɨ. 26 Moi ngiinanɨ a꞉ɓaa amati ʉ ɓʉka‑ɓʉkaɨ nadɨndɨ akʉ lɨkɔndɔ lʉ ɓamʉnganga ɓaja ngiɓa ɓi꞉nye kyɨa nayɔ kʉtʉka. Ambʉgaba kumbo ngiangɔ tʉkʉ 'uɓomu ɓʉ gba, chʉkɔmʉ ambʉhɨa kʉ ɓwanɨ. Ɨkyɛmɨngana, kweso yi꞉nye kʉsɨnganaka tʉkʉ nʉpɛɛ nadɨndɨ. 27 Iya moi ngiinanɨ a꞉kɔ nayɛ uduɓa wʉ Yeso, ambukumunio amati ʉ ungbutu wʉ ɓombi, ambumuɓoto ɨpʉkʉ 'upi ambise. 28 Jʉ i꞉nye kʉyakanaka akʉ 'ʉtʉma ɓɔ: « Muɓoteni gʉtʉ tʉkʉ ɨpʉkʉ ngiangɔ, ma꞊hɨa tʉkʉ hɨaa! » 29 Tʉkʉ nɨma ngiinanɨ, miniki kambʉmʉtɨnɨa, ndʉtʉ yambʉmʉɓʉa ɓʉ zia, ambʉkɔnɔ ndʉtʉ tʉkʉ kingono ɓɔ ʉ꞉ɓʉnganakɨa ɓʉnganakɨaa. 30 Kʉ wati mungono nguʉnanɨ, Yeso ambʉkɔnɔ ɓɔ angu ʉ꞉mʉɓʉa ɓʉaa. Ambʉnɨtana na amati ʉ ungbutu wʉ ɓombi, ambuɓukuo ɓɔ: « Anɨ iya u꞉naɓoto ɨpʉkʉ? » 31 Ɓakpataka ngiɓangɔ ɓambumusigio ɓɔ: « Waɓukuo ti‑zʉ ɓɔ anɨ kʉ u꞉naɓoto, ajʉ wambʉkɔmʉ‑zʉ kʉna akʉ mwana ʉ mombi ʉ꞉nandʉndɨa‑ɛɛ ɓiɛ? » 32 Ɨkyɛmɨngana, Yeso ambufaniso kʉnɨtananaka nʉ kanga ɓɔ ʉmbɨa gɔ‑zʉ mombi ngia u꞉muɓotoo. 33 Iya moi ngiinanɨ a꞉mbɨa moni ngika ka꞉kyɨanɨa amati angɔ, ambufaniso gʉgʉma nʉ ʉɓa. Ambʉkwa akʉ mɨtɨndɨ yɨ Yeso, ambʉpanzaka ʉɓɨɨ nguangɔ kʉ 'uɓomu. 34 Ɨkyɛmɨngana, Yeso ambumusigio ɓɔ: « Mwana asɛmɛ, baya ngiisɔɔ yi꞉nahiiso hiisoo. Sa nʉ majɨɔ, kweso ngiisɔɔ yi꞉sio sioo. » 35 Kʉ ati ngia Yeso i꞉nye‑ɔɔ kʉyaka, ɓombi ɓambʉka kʉʉngwa ɔɔ ngama ʉ ɨkáa yɨ nɨta ngia yɨ Ɓayuda, ɓambumusigio ɓɔ: « Mwana ngiasɔɔ ɔɔ moi u꞉wu woni. Wa ɓata‑zʉ kundukuniso mʉpananakɨa akʉ moni kʉ ɨmanɨ? » 36 Ɨkyɛmɨngana, Yeso ambikinye iso akʉ moni ngikʉnanɨ ɓi꞉nye kʉngaka gʉkʉ ɗɛkɛkɛ. Kija a꞉sigio ngama ʉ ɨkáa yɨ nɨta ngia yɨ Ɓayuda ɓɔ: « Wɔɔkwakɔmʉ ʉɓa, ɓio tʉkʉ nʉ baya. » 37 Yeso ambikinye kʉkʉnda ɓɔ mombi ʉmʉkpata, kisukuo tʉkʉ ɔɔ Pɛtɛlɔ, nʉ Yakɔbɔ, nʉ Yʉanɨ manye ʉ Yakɔbɔ. 38 Iya ɓa꞉ɓʉya ɔɔ ngama ngiinanɨ, Yeso ambʉkanga ɓombi nʉ ikoko, ɓuɗo ɓambikinye tii ɓata, gbongbo ʉ ndɨa nʉ muɓuu ɓʉ hɔɔ. 39 Ambukumunio ambɛnɨ, gʉ ɛyɔ naɓɔ ɓɔ: « Yɨ꞉kwa‑zʉ tanɨ iya nagbʉnda‑ɔɔ ɨpʉmbʉ nʉ ndɨa ɓʉkaɨ ɓɔmʉ? Mwana ngiakɛ ambuwokɔmʉ, ʉkwaa tʉkʉ tɔɔ. » 40 Ɓambufaniso nayɔ nʉa. Ɨkyɛmɨngana, Yeso ambuɓiso kʉ ɓuɓomu aɓei, ambʉchɨka tʉkʉ ɔɔ ɨsɛ ʉ mwana nʉ inye, nʉ ɓakpataka ɓaatʉ ngiɓa ɓa꞉kɨndaka ɨzɔ naɓɔ, ɓambukumunio akʉ mwana i꞉nye‑ɛɛ. 41 Yeso ambuɓoto mwana ngiinanɨ ɨkɔndɔ, ambumusigio ɓɔ: « Talita kʉmʉ! » Inyi yɛngɔ ɓɔ: « Mwana ɔɔ moi, mʉ꞉nasigio ɓɔ jʉkana! » 42 Tʉkʉ nɨma ngiinanɨ, mwana ʉ ɓasaɓakyɛ ambʉʉngwa ɨkʉʉ, ambufaniso kɨndaka. I꞉nye nʉ mugo kumi nʉ kapɨnɨ. Moni ngikʉnanɨ ka꞉mbangɨa ɓombi nadɨndɨ. 43 Yeso ambʉɓʉgbʉma nʉ angu ɓɔ ɓɔɔngakɨakɔmʉ mombi gʉkʉ mʉngana moni ngikʉnanɨ, ambutitio ɓɔ ɓu꞊nzo mwana ngiinanɨ ɨkyɛmɛ yɛɛ dyɛ. |
© 2021, Wycliffe Bible Translators, Inc.
Wycliffe Bible Translators, Inc.