Malɨkɔ 3 - Agɔmɔ ngia wʉ Ɨtakɨ-takɨYeso uhiiso mombi akʉ ɓisi ɓʉ humuo ( Mat 12:9-14 ; Luk 6:6-11 ) 1 Mbise ngiinanɨ, Yeso ambukumunio ɓata kʉ amati ʉ ɨkáa yɨ nɨta ngia yɨ Ɓayuda. Na amati, yi꞉nye nʉ mombi mʉngana iya i꞉nye ɨkɔndɔ iwe ɓʉ kpɔjɔ. 2 Ɓombi ngiɓa ɓi꞉nye nanɨ ɓambufaniso kanga Yeso ɓʉ gbɔɔ, ɓɔ ɓʉna‑zʉ aka a꞊hiiso‑ɔɔ mombi akʉ ɓisi ɓʉ humuo, jʉ ɛɓɔ ɓi꞉nye kʉhata ɨngbaa tɨmanɨ iya ɓa꞊mʉnapɨa‑ɔɔ nʉ 'ʉkɔmbɔ. 3 Yeso ambusigio mombi ngiinanɨ i꞉nye ɨkɔndɔ iwe ɓɔ: « Maa na ati ʉ ɓombi kʉ ɓuɓomu. » 4 Kija a꞉ɓuɓukuo ɓɔ: « Mapanʉ ngikʉndɛsʉ kaabaya moni tɨmanɨ? Ajʉ kaabaya kʉkyɨa ɓuɗo, gʉ ɓɔ kʉkyɨa ɓʉɓɨɓɨ akʉ ɓisi ɓʉ humuo bayanɨ ɓiɛ? Ajʉ kaabaya kuhiiso mombi, gʉ ɓɔ nayɔ kʉwa ɓiɛ? » Ɓombi ɓambʉkata tʉkʉ ɓʉ nyɛ. 5 Yeso ambʉɓʉkanga ɓʉ ngba ngba ngba, ambʉdya ikoko nadɨndɨ akʉ 'ʉtʉma, jʉ ɓambikinye kʉbaya moni ngikʉnanɨ amati ʉ mɨtʉma ngiindaɓʉ. Yeso ambusigio mombi ngiinanɨ ɓɔ: « Yumo ɨkɔndɔ. » Ambuyumo ɨkɔndɔ, yambʉhɨa. 6 Tʉkʉ nɨma ngiinanɨ, Ɓafalisayɔ ɓambʉɓʉa amati ʉ ɨkáa yɨ nɨta, ɓambʉsa kujunikio nʉ ɓombi ɓʉ ɨtanda ngia yɨ ngama Ɛlɔdɛ kuwulio Yeso ididi ɓɔ ɓʉmʉwa tʉkʉ waa. Ungbutu wʉ ɓombi wʉka apɛɛ ʉ Yeso 7 Ɔɔ Yeso ɨzɔ nʉ ɓakpataka ngiɓangɔ ɓambʉʉngwa kʉsa mesu akʉ yapuu ngia yɛɛ ɨja. Ungbutu wʉ ɓombi wɔɔ ʉja wi꞉nye naɓɔ kʉkpata ambise ɓʉ hoo, kʉʉngwa akʉ ɓagɨpa kʉ di di di ndʉ anʉ Galilaya, nʉ Yudɛa. 8 Ɓombi nga ɓɔmɔ ɓaja ɓa꞉ʉngwa anʉ Yelusalɛma, nʉ anʉ Idumea, nʉ ɓagɨpa ngiɓa ɓa amondu wʉ ɗei ʉ Yɔlɔdanɨ, nʉ anambamba ʉ ɓagʉlʉ ɓʉ Tilo nʉ Sɨdɔna. Ungbutu wʉ ɓombi nguʉnanɨ ɓi꞉nye ɓʉkeni uduɓa wʉ moni kʉ muɓomu ngika Yeso i꞉nye kʉkyɨa engo. Ɓambʉka kʉ ɓuɓomu apɛɛ angɔ. 9 Kija Yeso a꞉titio ɓakpataka ngiɓangɔ ɓɔ ɓʉmʉtambanakɨa mwanʉ ɨngbɔɔ, kukumo ɓɔ ungbutu wʉ ɓombi nguʉnanɨ wɔɔmutitokɔmʉ. 10 Jʉ ndʉ i꞉nye hiiso ɓombi ɓaja, ɓombi ɓʉ ɓakwisikiso kʉ ɓuɓomu ɓi꞉nye kʉhata tii nʉ angu ɓɔ ɓumuɓoto gɔ tʉkʉ ɓotoo. 11 Iya ɓombi ɓʉ mɨtʉma yɨ ɓabɨa ɓa꞉mʉna nayɔ, ɓambʉgbʉkʉmɨa nʉ muwuu apɛɛ angɔ, ɓambufaniso nachokoo kusigo ɓɔ: « Ɔwɛ wa Mwana ʉ Asʉɓɨɨ! » 12 Ɨkyɛmɨngana, Yeso ambʉɓʉgbʉma nʉ kɛkɛɛ ɓɔ ɓɔɔɓɨakɔmʉ mombi ɓɔ ɛyɔ a anɨ. Yeso ʉchwa ɓatitima kumi nʉ ɓapɨnɨ ( Mat 10:1-4 ; Luk 6:12-16 ) 13 Kija Yeso a꞉ɗito ekoo ʉ ɨkpangba, ambusoko ɓombi ngiɓa i꞉nye nʉ taa yɨndaɓʉ. Ɓombi ngiɓʉnanɨ ɓambʉka anambamba angɔ. 14 Kija a꞉chwa ɓombi kumi nʉ ɓapɨnɨ ati ʉndaɓʉ ɓɔ ɓuɓio ɓatitima ɓangɔ, ɓambuɓio ati kʉ 'uɓomu tii tʉkʉ ɨzɔ nayɔ. Aka ekoo ngia ɓɔ ʉɓʉtʉma kʉsa kʉɓɨakɨa ɓombi Ɨsaʉ yɛɛ Iɗo, 15 ambuɓunzo angu kiso mɨtʉma yɨ ɓabɨa. 16 Muno kʉ ɓatitima kumi nʉ ɓapɨnɨ ngiɓa a꞉ɓʉchwa ki꞉nye ɓɔ: Simoni iya Yeso a꞉mʉsʉa ino ɓɔ Pɛtɛlɔ. 17 Nʉ ɔɔ Yakɔbɔ nʉ manye Yʉanɨ, ɓana ɓʉ Jɛbɛdayɔ, iɓa Yeso a꞉ɓʉsʉa ino ɓɔ: « Bɔanɛlɛgɛ » nʉ igiliki inyi yɛngɔ ɓɔ ɓana ɓʉ 'ungito wʉ ʉgbaa. 18 Nʉ Andelea, Filipo, Balatʉmayɔ, Matayɔ, Tʉma, Yakɔbɔ, mwana ʉ Alʉfayɔ, Tadayɔ, nʉ Simoni ngia i꞉nye hata ɨndɨpandasɨ akʉ gɨpa ngiangɔ, 19 tiga nʉ Yuda Ɛsɨkalɨɔta ngia a꞉gaba Yeso. Ɓamanye ɓʉ Yeso ɓakʉhata nayɔ kʉchɨka ( Mat 12:22-32 ; Luk 11:14-23 ; 12:10 ) 20 Mbise ngiinanɨ, Yeso ambʉtʉa andei. Ungbutu wʉ ɓombi wambumʉmanakɨa ɓata kʉ ananɨ. Wati ikanzi ngia ɔɔ Yeso nʉ ɓakpataka ngiɓangɔ ɓakwanana‑ɔɔ kʉdyakaka wambikinye tii ɓata. 21 Iya ɓaandɔngɔ ɓa꞉kɔ nayɔ moni ngikʉnanɨ, ɓa꞉ʉngwɨa tʉkʉ kɨnda kʉsa nayɔ kʉchɨka, nʉ nayɔ kutuiso andei. Ɓi꞉nye kusigo ɓɔ ʉ꞉kwa ɓaumu. Ɓusigo ɓɔ Yeso anʉ angu ʉ Belejebuli 22 Ɓapananakɨa ɓʉ mapanʉ ngiɓa ɓa꞉ʉngwa anʉ Yelusalɛma ɓi꞉nye kusigio Yeso ɓɔ: « Akiso mɨtʉma yɨ ɓabɨa tʉkʉ nʉ angu ʉ Belejebuli ngia a ngama ʉ ɓabɨa! » 23 Kʉ ɓwanɨ, Yeso ambuɓusoko, ambufaniso naɓɔ kutisio moni ngikʉnanɨ 'upi akʉ isisinio kusigo ɓɔ: « Nʉ꞉paana‑zʉ gbanɨ Sɨtanɨ kiso abangɔ Sɨtanɨ amati ʉ mombi? 24 Ɓaangama ɓufaniseni dyokono ati ʉndaɓʉ, ambʉ ɓʉngama ngiɓʉndaɓʉ ɓʉ꞉kwa tʉkʉ kwaa. 25 Nʉ ɓaanza mʉngana ɓufaniseni dyokono ati ʉndaɓʉ, ambʉ anza ngiʉndaɓʉ ʉ꞉panzana panzanaa. 26 Nʉ Sɨtanɨ ufaniseni ɓɨndana kʉ nʉ ɛyɔ makʉɔngɔ, ambʉ ɓʉngama ngiɓangɔ ɓu꞉dyokono tiga kʉ dyokonoo. Ambʉ moni nga kangɔ ku꞉sio tiga kʉ sioo. 27 Mombi gʉkʉ mʉngana ambukukumunio amati ʉ ɨkáa yɨ ginda nayɔ kʉhɨnɨa kumbo ngiangɔ. Yiɓio tʉkʉ ɓɔ ambʉ ʉkpanga‑zʉ nayɔ tʉkʉ sanga ɓʉ ndu, mbise ɔngɔ ambʉtʉpa tiga kumbo amati ʉ ɨkáa ngiangɔ. 28 Maninu kusigio tʉkʉ kingono ɓɔ, Asʉɓɨɨ a꞊pɨa sina ɓombi ɓʉɓɨɓɨ tʉkʉ kʉ ɓuɓomu, abana tʉkʉ lɨpɨ lʉ zɨa ngila ɓa꞉munapioko nalɔ. 29 Ɨkyɛmɨngana, mombi ngia azɨaka 'Ʉtʉma wɔɔ Tu, ɓambʉkʉkwanana nayɔ kʉpɨa sina gʉkʉ ɗɛkɛkɛ, nʉ a꞊nyɨa sina nʉ ʉkʉa wʉ ɓʉɓɨɓɨ nguangɔ amati ʉ mɨtʉ yɨ ɨpá nʉ mɨtʉ yɨ ɨpá. » 30 Yeso a꞉ɓusigio ɓwanɨ jʉ kʉ ɛɓɔ ɓa꞉faniso nayɔ kusigio ɓɔ anʉ 'ʉtʉma wʉ abɨa. Anɨ iya a inye nʉ ɓamanye ɓʉ Yeso ( Mat 12:46-50 ; Luk 8:19-21 ) 31 Ɔɔ inye nʉ ɓamanye ɓʉ Yeso ɓambʉɓʉya kʉ ananɨ, ɓambʉmaa tʉkʉ aɓei. Ɓambʉtʉma mombi nayɔ kusoko. 32 Ungbutu wʉ ɓombi wɔɔ 'ʉja wi꞉nye ɓuwei anambamba angɔ ɓumukungueni ɓʉ kuu. Ɓambumusigio ɓɔ: « Ɔɔ anʉ nʉ ɓamananʉ ɓa ɓʉmaɨ aɓei eki, ɓa nɔwɛ kʉhata. » 33 Yeso ambuɓutisio ɓɔ: « Inoo‑zʉ anɨ? Nʉ ɓana ɓʉ inoo‑zʉ ɓaneni? » 34 Kija Yeso a꞉ɓaɓakiso waja ekoo ʉ ɓombi ngiɓa ɓi꞉nye ɓumukungueni, ambuɓusigio ɓɔ: « Inoo nʉ ɓana ɓʉ inoo, ya tʉkʉ inu aka na‑ɔɔ aka. 35 Jʉ inoo nʉ mwana ʉ inoo ɔɔ gue, nʉ ɔɔ moi ya tʉkʉ ɓombi ngiɓa ɓakʉkyɨa ɓʉkʉnda ngiɓa ɓʉ Asʉɓɨɨ. » |
© 2021, Wycliffe Bible Translators, Inc.
Wycliffe Bible Translators, Inc.