Malɨkɔ 16 - Agɔmɔ ngia wʉ Ɨtakɨ-takɨ

Yeso ʉjʉkana akʉ ingyo

¹ Iya ɓisi ɓʉ humuo ngiɓa ɓʉ Ɓayuda ɓa꞉ɓaa nayɔ, ɔɔ Malɨa Magadala, nʉ Salɔmɛ nʉ Malɨa inye ʉ Yakɔbɔ, ɓambʉkʉa malazi ɓɔ ɓatioko nawɔ ndʉtʉ yɨ Yeso.

² Tʉkʉ kʉɓa ɓʉ kpi akʉ ɓisi ɓʉ bɛlɛsɛ, aka ɨpá yaakyɨa‑ɔɔ kʉɓʉa, ɓoi ngiɓʉnanɨ ɓambʉsa akʉ ɓʉnzaʉ.

³ Ɓi꞉nye kʉndɨana ati ʉndaɓʉ ɓɔ: « Anɨ tɔ atitutio ikopi ngia ya akʉ umongu wʉ ɓʉnzaʉ nambamba? »

⁴ Ɨkyɛmɨngana, iya ɓa꞉tɨna waja, ɓambʉna ikopi yɛɛ ɨja ngiinanɨ tiga itutue anambamba.

⁵ Iya ɓa꞉kumunio nayɔ amati ʉ ɓʉnzaʉ, ɓambʉna mwana ʉ ɓandambʉ mʉngana ɓuwei akʉ ɨkɔndɔ yɨ guɔngɔ, ʉpɨnyeni kanzʉ ɔɔ tu. Ɓambʉkwa ʉɓa.

⁶ Ambuɓusigio ɓɔ: « Nɔɔkwakɔmʉ ʉɓa. Na tʉkʉ kʉhata Yeso ʉ Najalɛtɛ iya ɓa꞉mʉɓakaka bɛ ekoo ʉ mʉsalaba. Ʉ꞉jʉkana akʉ ingyo jʉkananɨ, ambʉkɔmʉ tii ɓata aka. Ʉneni‑zʉ izi ngia ɓa꞉mʉnapɨa pongo‑ɔɔ.

⁷ Ɨkyɛmɨngana, seni kʉɓɨa ɓakpataka ngiɓangɔ nʉ Pɛtɛlɔ ɓɔ, ɛyɔ akʉsa apɛɛ ninu kusiɓo anʉ Galilaya. Nabi nayɔ kʉna tiga nani kʉndʉ aka a꞉nisigio jɛnɛ‑ɔɔ. »

⁸ Kija ɓa꞉ɓʉa bangʉ na akʉ ɓʉnzaʉ, ndʉtʉ yi꞉nye naɓɔ kʉnda ɓʉ kya kya kya, jʉ moni ngikʉnanɨ ki꞉nye naɓɔ kʉmbangɨa tʉkʉ ɨsʉkʉɓwanɨ. Ɓa꞉ɓɨakɔmʉ mombi gʉkʉ mʉngana ɨsaʉ ngiinanɨ jʉ ɓi꞉nye ɓuhueni nʉ ʉɓa. [

Yeso ʉɓwanɨa Malɨa ʉ Magadala

⁹ Iya Yeso a꞉jʉkana nayɔ akʉ ingyo akʉ ɓisi ɓʉ bɛlɛsɛ, ambʉɓwanɨa Malɨa ʉ Magadala ngia i꞉nye umiseni mɨtʉma yɨ ɓabɨa ʉmalɨanɨka.

¹⁰ Ɛyɔ ambʉsa tiga kʉɓɨakɨa ɓombi ngiɓa ɓi꞉nye kyɨa nʉ ɔɔ Yeso ɨsaʉ ngiinanɨ. Ʉna tɔ, ɛɓɔ ɓombi ngiɓʉnanɨ ɓi꞉nye tʉkʉ amati ʉ didima nʉ ndɨa.

¹¹ Ati ngia ɓa꞉kɔ‑ɔɔ ɓɔ Yeso a kʉkʉʉ, nʉ ɓɔ ɛyɔ ʉ꞉mʉna nʉ mesu, chʉkɔmʉ ɓambʉbaya moni ngikʉnanɨ gʉkʉ ɗɛkɛkɛ.

Yeso ʉɓwanɨa ɓakpataka ɓapɨnɨ

¹² Mbise ɔngɔ, Yeso ambʉɓwanɨa tiga ɓakpataka ɓapɨnɨ nɨngbaa yɛɛ sɛ akʉ ɨkʉmbʉ yɨ ndei. Ɛyɔ i꞉nye tiga kʉnyɨa ndʉ mombi nga nanɨ kʉ di.

¹³ Ɛɓɔ ɓakpataka ngiɓʉnanɨ, ɓambʉka ɓata kʉ kʉɓɨa ɓangɛ ɨsaʉ ngiinanɨ. Ɨkyɛmɨngana, chʉkɔmʉ ɓambʉɓʉbaya kʉ ɓwanɨ.

Yeso ʉɓwanɨa ɓakpataka kumi nʉ mʉngana

¹⁴ Ambʉsa kʉɓwanɨa tiga ɓakpataka kumi nʉ mʉngana ɓinyeni kʉdyakaka. Ambʉɓʉgʉmʉa ɓɔ jʉtanɨ ɓʉya baya, nʉ jʉtanɨ ɓa tʉkʉ nʉ 'ʉtʉ wɔɔ ɓʉmʉ nguʉndaɓʉ. Jʉ ɓa꞉bayakɔmʉ moni kʉ ɓombi ngiɓa ɓa꞉mʉna nʉ mesu mbise ʉ jʉkana akʉ ingyo.

¹⁵ Ambuɓusigio tiga ɓɔ: « Seni akʉ ɨtaka kʉ iɓomu, nambʉɓɨakɨa ɓombi kʉ ɓuɓomu Ɨsaʉ yɛɛ Iɗo.

¹⁶ Mombi ngia a꞊baya, ɓambumuɓatiso, a꞊nyɨa nʉ ɓʉhɨa. Ɨkyɛmɨngana, mombi ngia ambʉkʉbaya a꞊kumunio akʉ 'ʉkɔmbɔ.

¹⁷ Mombi ngia a꞊nabaya ɛmɛ, a꞊mbɨanɨa 'upi akʉ ɓakɔkɔ kʉ di di di ngiɓa aɓio kʉkyɨa engo akʉ ino ngiɨsɛmɛ. A꞊iso mɨtʉma yɨ ɓabɨa, a꞊yaka maɗaɗa nga kɔmɔ kʉ ɨtakɨ‑takɨ.

¹⁸ Abana uɓoteni zɨɨ nʉ ɨkɔndɔ, yɛmɔ ɓɔ ʉmwa sʉmʉ, iinanɨ kʉ iɓomu ya꞊mbʉkʉmʉkyɨa ɨkyɛmɛ gʉkʉ ɗɛkɛkɛ. Ʉ꞊napɨeni lɨkɔndɔ ekoo ʉ ɓombi ɓʉ ɓakwisikiso, ɓa꞊hɨa tʉkʉ hɨaa. »

Yeso uzununio kʉsa ekoo ʉ ɓisi

¹⁹ Iya Makʉʉɓɨɨ Yeso a꞉pipo naɓɔ kusigio moni ngikʉnanɨ, ambuzununio ekoo ʉ ɓisi, ambʉsa kuwulo akʉ ɨkɔndɔ yɨ guɔngɔ ngia yɨ Asʉɓɨɨ.

²⁰ Ɓakpataka ɓambʉsa kʉɓɨakɨa Ɨsaʉ yɛɛ Iɗo ngiinanɨ mʉa kʉ 'uɓomu. Makʉʉɓɨɨ ambʉɓʉsalɨa amati ʉ kuu ngiindaɓʉ, ambunzo mapanʉ ngikʉndaɓʉ angu ɨngbaa kʉkyɨa ɓakɔkɔ kʉ di di di.]