Malɨkɔ 14 - Agɔmɔ ngia wʉ Ɨtakɨ-takɨƁangama ɓuwulio Yeso ididi ɓɔ ɓʉmʉwa waa ( Mat 26:1-5 ; Luk 22:1-2 ; Yʉa 11:45-53 ) 1 Makwaa ki꞉nye kutukueni tii tʉkʉ kapɨnɨ kʉɓʉya akʉ ʉmbɔ wʉ Pasɨka, uwa ɓi꞉nye dya‑ɔɔ mikati ngia ɓambakaɨkyɨa nʉ ɓʉtɨ ɓɔɔ ɓufukise. Ɓangama ɓʉ ɓakumu‑kumu nʉ ɓapananakɨa ɓʉ mapanʉ ɓi꞉nye kʉhata ɨngbaa ngia ɓafa‑ɔɔ nayɔ Yeso, nayɔ kʉwa akʉ ɓaɗi. 2 Nʉ ɓi꞉nye kusigo ɓɔ, ɓɔɔmʉfakɔmʉ pɛpɛ tʉkʉ akʉ wati wʉ ʉmbɔ, kukumo ɓɔ ɓombi ɓɔɔchakanakakɔmʉ. Moi uto Yeso nʉ malazi akʉ 'ʉtʉ ( Mat 26:6-13 ; Yʉa 12:1-8 ) 3 Ɓisi mʉngana, Yeso i꞉nye anʉ Betania ɔɔ gue mʉngana ino ɓɔ Simoni, iya i꞉nye nʉ keɓu‑keɓu. Iya ɓi꞉nye tiga‑ɔɔ kʉdyakaka, moi mʉngana ambʉɓwanɨa nanɨ akʉ i꞉nye‑ɔɔ. Moi ngiinanɨ i꞉nye nʉ uchupa wʉ malazi wɔɔ uɗo wʉ ɨgabʉ ɓʉmʉ uwa ɓa꞉ʉtambanaka nʉ mɨsanga yɛɛ mve tɨpɨ yɨ ɨwʉa mɨngana ɓɔ. Ambuɓundo moni kʉ uchupa nguʉnanɨ, ambuchicho Yeso akʉ 'ʉtʉ. 4 Moni ngikʉnanɨ kambʉkyɨa ɓombi ngana ngana tʉkʉ ɓɨɓɨ akʉ 'ʉtʉma. Ɓambuɓokono ati ʉndaɓʉ ɓɔ: « Ʉtambiso‑zʉ malazi nguʉnanɨ jʉtanɨ? 5 Ambʉ́ ɓʉ꞉ʉgaba gɔ piɛ ɨgabʉ ɓʉmʉ nadɨndɨ, ambʉ́ ɓambunzikio falanga ɔngɔ ɓombi ɓʉ ɓanangyɨa. » Ɓambʉkwɨa moi ngiinanɨ ʉnganga kingono. 6 Ɨkyɛmɨngana, Yeso ambuɓusigio ɓɔ: « Sɨeni‑zʉ moi ngia. Jʉtanɨ nanayɔ kundukuniso? Ɛyɔ ʉ꞉nakyɨa ɛmɛ moni kɔɔ muɗo. 7 Inu naakyɨa ɨzɔ nʉ ɓombi ɓʉ ɓanangyɨa makwaa kʉ muɓomu, nʉ naakyɨa tʉkʉ ikanzi ngia naɓʉsalɨa wati tʉkʉ kʉ 'uɓomu ngua nakʉnda‑ɔɔ. Ɨkyɛmɨngana, ɛmɛ pɛpɛ, kambukuɓio ɨzɔ ninu makwaa kʉ muɓomu. 8 Ɛyɔ ʉ꞉kyɨa tʉkʉ moni ngika ʉ꞉kwanana piɛ anakyɨa ɛmɛ. Ʉ꞉natioko malazi kʉtambanaka ndʉtʉ ngiisɛmɛ pɛɛ ngia ɓa꞊nahʉna ɓisi‑ɔɔ. 9 Maninu kusigio tʉkʉ kingono ɓɔ, akʉ ɨtaka kʉ iɓomu, akʉ ɓa꞊ɓʉkyɨa sina‑ɛɛ kʉɓɨakɨa Ɨsaʉ yɛɛ Iɗo, ɓaɓʉkyɨa tʉkʉ kʉchwa uduɓa wʉ moni ngika moi ngia ʉkyɨa akɛ nayɔ kutunguo. » Yuda ʉkwaisio kʉgaba Yeso ( Mat 26:14-16 ; Luk 22:3-6 ) 10 Yuda Ɨsɨkalɨɔta ngia i꞉nye mʉngana ʉ ɓatitima kumi nʉ ɓapɨnɨ ngiɓa ɓʉ Yeso a꞉sa tiga kʉgbʉka ɓangama ɓʉ ɓakumu‑kumu aka ekoo ngia ɓɔ ʉɓʉgabɨa Yeso. 11 Iya ɓa꞉kɔ nayɔ moni ngika a꞉ka naɓɔ kʉngakɨa, ɓambʉkwa ɨgyagya nadɨndɨ, ɓambʉmʉpanaka ɓɔ ɓa꞊munzo falanga. Yuda ambufaniso hata wati wɔɔ uɗo ngua a꞊kwanana‑ɔɔ nawɔ kʉgaba Yeso. Ɔɔ Yeso ɓʉtambanaka idyo yɨ ʉmbɔ ( Mat 26:17-25 ; Luk 22:7-14 , 21-23 ; Yʉa 13:21-30 ) 12 Ɓisi ɓʉ 'ʉkpanganɨa wʉ Ʉmbɔ wʉ mikati ngia ɓambikinye ɨkyɨa nʉ ɓʉtɨ ɓɔɔ ɓufukise. Isiinanɨ, ɓi꞉nye wa mwana ʉ kɔndɔlɔ aka ekoo ʉ ʉmbɔ wʉ Pasɨka. Ɓakpataka ɓambʉka kuɓukuo Yeso ɓɔ: « Wakʉkʉnda ɓɔ kʉsa nɔwɛ kʉtambanakɨa ʉmbɔ wʉ Pasɨka gbanɨ? » 13 Kija a꞉tʉma ɓakpataka ɓapɨnɨ ati ʉ iɓa ɓangɔ ɓɔmɔ, ambuɓusigio ɓɔ: « Seni amati ʉ gʉlʉ, nʉ nani na꞊jono nʉ ɔɔ gue mʉngana ufuɓueni izikio yɨ mepo. Mʉkpateni tʉkʉ ɛyɔ! 14 Aka a꞊kumunio‑ɛɛ, sigieni makʉʉ ɨkáa ngiinanɨ ɓɔ: ‹ Mʉpananakɨa akuɓukuo ɓɔ: Mbɛnɨ ngia ma꞊dya‑ɔɔ idyo yɨ Pasɨka ɨzɔ nʉ ɓakpataka ngiɓʉsɛmɛ a gbanɨ? › 15 Ɛyɔ a꞊nɨpanaka mbɛnɨ mʉngana ɔɔ 'ʉja na ekoo. Mbɛnɨ ngiinanɨ aɓio 'ʉtambanakɛ uɗo nʉ moni kʉ muɓomu tʉkʉ mʉndanɛ. Na꞊tɨtambanakɨa idyo yɨ ʉmbɔ nani. » 16 Iya ɓakpataka ɓa꞉ʉngwɨa nayɔ kɨnda, ɓambʉɓʉya amati ʉ gʉlʉ. Kija ɓa꞉gbʉka moni kʉ muɓomu mʉtambanakɛ tʉkʉ ndʉ aka Yeso a꞉ɓusigio‑ɔɔ. Ɓambufaniso tii tʉkʉ kʉtambanaka idyo yɨ Pasɨka. Yeso ʉɓɨa kʉpɛɛ ɓɔ ɓakʉsa nayɔ kʉgaba 17 Tiga nɨpasɨ, Yeso ɨzɔ nʉ ɓakpataka ngiɓangɔ kumi nʉ ɓapɨnɨ ɓambʉɓʉya tiga. 18 Iya ɓa꞉wulo nayɔ akʉ izi ngia ɓi꞉nye‑ɔɔ kʉdyakaka akʉ mɛza, Yeso ambusigo ɓɔ: « Tʉkʉ kingono, maninu kusigio ɓɔ, mombi mʉngana ati ʉndɛnʉ aka iya kakʉdyakaka ɨzɔ nayɔ, a ɓisi nɛmɛ kʉgaba. » 19 Kija ɓa꞉dya ikoko nadɨndɨ, mombi kʉ nangana nangana ati ʉndaɓʉ ambufaniso nayɔ ɓukuo ɓɔ: « Ajʉ ɛmɛ ɓiɛ? » 20 Gʉ Yeso naɓɔ ɓɔ: « Ya tʉkʉ mʉngana ati ʉndɛnʉ ɓombi kumi nʉ ɓapɨnɨ aka. Mombi ɔngɔ iiya akugiso ɨkɔndɔ ɨzɔ nɛmɛ amati ʉ zanɨ. 21 Ɛmɛ Mwana ngia ʉ Mombi makʉsa kuwo tʉkʉ ndʉ aka ɓa꞉tɨndakɨa‑ɔɔ ekoo asɛmɛ amati ʉ Mubio. Tɔ, ikoko nʉ mombi ngia akʉsa nɛmɛ kʉgaba! Ambʉ́ mombi ngiinanɨ a꞉nʉtanɨakɔmʉ jɛnɛ ɔgɔ. » Yeso ufaniso kʉdya idyo yɨ ʉmbɔ ɨzɔ nʉ ɓakpataka ( Mat 26:26-30 ; Luk 22:14-20 ; 1Ɓak 11:23-25 ) 22 Ati ngia ɓi꞉nye tiga‑ɔɔ kʉdyakaka, Yeso ambʉchɨka mukati, ambutuisio Asʉɓɨɨ ɨbɨba, ambuuɓunzoko, kija a꞉ɨpakɨa ɓakpataka. Ambuɓusigio ɓɔ: « Chɨkeni, ndʉtʉ ngiisɛmɛ iyakɛ! » 23 Mbise ɔngɔ, ambʉchɨka tiga ʉpata, ambutuisio ɓata Asʉɓɨɨ ɨbɨba, ambuɓunzo, ɓambʉmwa ɛɓɔ kʉ ɓuɓomu. 24 Kija Yeso a꞉ɓusigio ɓɔ: « Miniki ngikʉsɛmɛ ikakɛ, ɨkɔ ka agɔmɔ [ngia wʉ ɨtakɨ‑takɨ], ika ka꞊chichio aka ekoo ʉ ɓombi ɓaja. 25 Maninu kusigio tʉkʉ kingono ɓɔ ma꞊mbʉkʉmwa ɓata vinyo, kʉɓʉya tʉkʉ isiya ma꞊mwa sina ɓata‑ɔɔ vinyo ngia wʉ ɨtakɨ‑takɨ amati ʉ Ɓʉngama ngiɓa ɓʉ Asʉɓɨɨ. » Yeso ʉɓɨa kʉpɛɛ ɓɔ Pɛtɛlɔ a꞊mʉtata tataa ( Mat 26:31-35 ; Luk 22:31-34 ; Yʉa 13:36-38 ) 26 Kija ɓa꞉sʉa ʉmbɔ wɔɔ bibise Asʉɓɨɨ. Mbise ɔngɔ, ɓambʉɓʉa, ɓambʉsa akʉ ɨkpangba yɨ Mijeituni. 27 Iya ɓi꞉nye kʉsa, Yeso ambʉɓʉɓɨa ɓɔ: « Inu kʉ ɓuɓomu na ɓisi kʉnanzana, nambʉnasɨa ɛmɛ. Jʉ ɓa꞉tɨndakɨa, ɓɔ: ‹ Ma꞊wa mʉpɨmakɨa wʉ ɓakɔndɔlɔ. Kija imbi yɨ ɓakɔndɔlɔ ya꞊nanzana. › 28 Ɨkyɛmɨngana, mbise ʉ jʉkana ngiisɛmɛ akʉ ingyo, mabi apɛɛ ninu kusiɓo anʉ Galilaya. » 29 Pɛtɛlɔ ambumusigio ɓɔ: « Abana ɓombi nga ɓɔmɔ kʉ ɓuɓomu ɓʉ꞊nasɨeni, ɛmɛ pɛpɛ mambʉkʉnasɨa gʉkʉ ɗɛkɛkɛ. » 30 Yeso ambumutisio ɓɔ: « Manɔwɛ kusigio tʉkʉ kingono ɓɔ, nuɓutu ngia wʉ ɓʉɓʉnɨ, pɛɛ ngia gue ʉ kɔɓɔ a꞊natɨa‑ɔɔ nɨsɨ kapɨnɨ, waɓio wʉpanatateni nɨsɨ kaatʉ. » 31 Pɛtɛlɔ ambʉɓakana tʉkʉ ɓʉ ko ɓɔ: « Abana ndʉ yɨka tʉkʉ ɓɔ isu kuwo ɨzɔ nɔwɛ, mambʉkʉkwanana nɔwɛ kʉtata gʉkʉ ɗɛkɛkɛ. » Ɓakpataka nga ɓɔmɔ kʉ ɓuɓomu ɓambusigo kʉ ɓwanɨ. Yeso akʉta Asʉɓɨɨ anʉ Gɛtɛsɛmanɛ ( Mat 26:36-46 ; Luk 22:39-46 ) 32 Ɓambuchoo tiga akʉ mʉa ngua ɓausoko ɓɔ Gɛtɛsɛmanɛ. Gʉ Yeso nʉ ɓakpataka ɓɔ: « Ɓieni ɓuwei tʉkʉ aka ati ngia maɓio‑ɔɔ kʉta Asʉɓɨɨ. » 33 Ɨkyɛmɨngana, a꞉chɨka tʉkʉ ɔɔ Pɛtɛlɔ nʉ Yakɔbɔ nʉ Yʉanɨ, kija a꞉faniso tiga kwa ʉɓa nʉ mbambania. 34 Gʉ ɛyɔ naɓɔ ɓɔ: « 'Ʉtʉma nguʉsɛmɛ wakʉdya ikoko ikanzi ngia ɓɔ mawu tʉkʉ woni. Tukueni tʉkʉ aka, nɔɔkwaenikɔmʉ tɔɔ. » 35 Mbise ngiinanɨ, ɛyɔ kʉsɨngana tʉkʉ nʉpɛɛ ɓʉ ɗɛkɛkɛɛ, ambʉkwa akɛsɨ ɓʉ kpruu, kija a꞉faniso ta ɓɔ: « Yinyeni piɛ ikanzi ngia yakwananaka‑ɔɔ, ambʉ́ wati wʉ ɓʉka‑ɓʉkaɨ ngua wʉʉngwa gʉtʉ tʉkʉ ʉngwanɨ! » 36 Gʉ ɛyɔ aka ɓɔ: « Aba, iya yakusigo ɓɔ Tidoo, akʉ ɔwɛ, moni kɔɔ ɓʉkaɨ kambʉkɔmʉ. Nungwisio ɓaka ʉpata wʉ ɓʉka‑ɓʉkaɨ ngua ungwisioo. Tɔ, yeeɓiokɔmʉ akʉ ɓʉkʉnda ɓʉsɛmɛ, ɨkyɛmɨngana yiɓio tʉkʉ akʉ ɓʉkʉnda ɓʉsɔɔ. » 37 Iya a꞉tʉa nayɔ akʉ ɓakpataka ɓaatʉ ngiɓʉnanɨ ɓi꞉nye‑ɔɔ, a꞉ɓʉgbʉka ɓʉfeni tɔɔ. Gʉ ɛyɔ nʉ Pɛtɛlɔ ɓɔ: « Hu! Simoni, ajʉ wa tʉkʉ akʉ tɔɔ ɓiɛ? Wambakakyɨa tii ɓata ikanzi ngia wapɨa‑ɔɔ tɔɔ abana tʉkʉ amati ʉ saa mʉngana ɓiɛ? 38 Nɔɔkwaenikɔmʉ tɔɔ, faniseni ta Asʉɓɨɨ ambʉ nɔɔkumuniokɔmʉ amati ʉ kanyo. 'Ʉtʉma wa ɨwɔ tʉkʉ nʉ angu, ɨkyɛmɨngana ndʉtʉ pɛpɛ ya tʉkʉ nʉ ɓayadʉɓa. » 39 Ambʉɓʉkɨla ɓata ɓʉ kɛlɛ, kija a꞉ta ɓata kʉ nɨta mɨngana ngiinanɨ. 40 Ambʉtʉa ɓata kʉ akʉ ɓakpataka ɓi꞉nye‑ɛɛ, ambʉɓʉgbʉka ɓata tʉkʉ akʉ tɔɔ ɓʉ kpɛ, jʉ mesu ki꞉nye naɓɔ ɓʉ jɛngɛ nʉ tɔɔ. Chʉkɔmʉ ɓambʉmbɨa ɓɔ ɓa꞉musigio tanɨ. 41 Ambʉka ɓata kɨnda ngia yɨ kaatʉ, gʉ ɛyɔ naɓɔ ɓɔ: « Na ɓata tʉkʉ akʉ tɔɔ, nʉ humuo ɓiɛ! Huu! Wati wʉka kanɨ! Mwana ngia ʉ Mombi iinanɨ ɓa tiga kʉsa nayɔ kunzo akʉ lɨkɔndɔ lʉ ɓombi ɓʉ ɓʉɓɨɓɨ! 42 Ʉngweni ɨkʉʉ, kuseni! Kangeni‑zʉ mombi ngia ʉ꞉nagaba, iiya a tiga kʉ tinene akɛ! » Ɓʉka kʉfa Yeso ( Mat 26:47-56 ; Luk 22:47-53 ; Yʉa 18:3-12 ) 43 Tʉkʉ nɨma ngiinanɨ, Yeso ambupipenikɔmʉ moni ngika i꞉nye kusigo, Yuda, mʉngana ʉ ɓakpataka kumi nʉ ɓapɨnɨ ngiɓangɔ, ambʉɓwanɨa. I꞉nye tiga ɨzɔ nʉ ungbutu wʉ ɓombi nʉ ɓabakanza, nʉ lingba akʉ lɨkɔndɔ. Ɓangama ɓʉ ɓakumu‑kumu nʉ ɓapananakɨa ɓʉ mapanʉ, ɨzɔ nʉ ɓagʉgʉ ɓʉ Ɓayuda, ɛɓɔ kʉ ɓi꞉nye ɓʉtʉmeni ɓombi ngiɓʉnanɨ. 44 Yuda ngia i꞉nye ʉmʉgabeni, a꞉ɓʉpanɨa kɛɛ tɨmanɨ ɓa꞊mʉmbɨa nayɔ ɓɔ: « Tʉkʉ mombi ngia makʉsa nayɔ kʉnaputo, ɛyɔ iinanɨ, mʉfeni fanɨ, nambʉsa nayɔ. » 45 Iya a꞉ɓʉya nayɔ, ambʉsɨngana tinene nʉ Yeso, ambumusigio ɓɔ: « Mʉpananakɨa! » Ambumunaputo ɓʉ putu. 46 Kija ɓombi ngiɓʉnanɨ ɓa꞉kwa Yeso ɓakpɛngbɛ, ɓambʉmʉfa. 47 Mombi mʉngana ati ʉ ɓombi ngiɓa ɓi꞉nye nanɨ ambiso bakanza ɓʉ fwa, ambubuso nayɔ mombi ʉ kuu wʉ kumu‑kumu ngia ɔɔ 'ʉja, ambʉmʉtɨna 'uchwei ɓʉ cha. 48 Yeso ambuɓusigio ɓɔ: « Ya tanɨ iya nʉ꞉nɨkyɨa‑ɔɔ nʉ ɓabakanza nʉ lingba ndʉgʉ mʉnɨtanaka mombi ʉ ndiɓo! 49 Mi꞉nye kyɨa pongo makwaa kʉ muɓomu tʉkʉ ati ʉndɛnʉ nʉ kʉpanɨa amati ʉ ɨkáa yɨ Asʉɓɨɨ, chʉkɔmʉ nambʉnafa gʉkʉ ɓisi mʉngana. Ɨkyɛmɨngana, ya tʉkʉ jʉ moni ngika ɓa꞉tɨndakɨa amati ʉ Mubio kʉkwanana kʉkyananakɨa. » 50 Kija ɓakpataka kʉ ɓuɓomu ɓa꞉nanzana nʉ bangʉ ɓʉ waa, ɓambʉmʉsɨa. 51 Mwana ʉ ɓandambʉ mʉngana iya i꞉nye ʉpɨnyeni malikana ambʉɓʉkpata, kija mbise ɓambʉmʉfa. 52 Ɨkyɛmɨngana, ambʉɓʉɓwanakɨa nʉ naɓɔ kʉsɨa nʉ malikana nguʉnanɨ ɓu vu, gʉ ɛyɔ bangʉ kʉ unduu ɓɔ kɛɓɛɓɛ. Ɓʉtɨna 'ʉkɔmbɔ ngua wʉ Yeso ( Mat 26:57-68 ; Luk 22:54-55 , 63-71 ; Yʉa 18:13-14 , 19-24 ) 53 Kija ɓa꞉ɓʉya nʉ Yeso ɔɔ kumu‑kumu ngia ɔɔ 'uja. Ɓangama ɓʉ ɓakumu‑kumu kʉ ɓuɓomu, ɨzɔ nʉ ɓagʉgʉ ɓʉ Ɓayuda nʉ ɓapananakɨa ɓʉ mapanʉ kʉ ɓuɓomu ɓi꞉nye ɓʉmʉmanakɨeni nani. 54 Pɛtɛlɔ i꞉nye naɓɔ kʉkpataka tʉkʉ ambise danga ɓʉ kɛlɛ. Iya a꞉ɓʉya nayɔ akʉ ɨmbaa ngia yɨ kumu‑kumu ngia ɔɔ 'ʉja, Pɛtɛlɔ ambʉsa kuwulo kʉtɨa dyaa ɨzɔ nʉ ɓombi ɓʉ kuu. 55 Ɓangama ɓʉ ɓakumu‑kumu ɨzɔ nʉ Ubua wɔɔ Ʉja wʉ ɓakumu‑kumu ɓi꞉nye kʉhata ɓatɛmʉ, aka ekoo ngia ɓɔ ɓʉnyɨa nɨngbaa ngia ɓawisiso‑ɔɔ nayɔ Yeso. Chʉkɔmʉ ɓambʉnyɨa nɨngbaa yɛngɔ gʉkʉ mɨngana. 56 Jʉ ɓombi ɓaja ɓi꞉nye muchwio nʉ yakanaka. Ɨkyɛmɨngana, ɓambikinye kʉyaka ɨngbaa yɨ moni mɨngana ati ʉndaɓʉ. 57 Ɓombi ngana ngana ɓi꞉nye maa ɓʉ gba kuchwio Yeso nʉ moni kʉ yakanaka kusigo ɓɔ: 58 « Ka꞉kɔ bongo inyeni kusigo ɓɔ: ‹ Ɛmɛ ma꞊panza ɓisi ɨkáa yɨ Asʉɓɨɨ ngiakɛ, iya ɓa꞉ɨtɨa nʉ lɨkɔndɔ. Mbise ʉ makwaa kaatʉ, ma꞊tɨa yɛmɔ chʉkɔmʉ ɓata iya ɓa꞉ɨtɨa nʉ lɨkɔndɔ. › » 59 Abana ɓwanɨ kititi, yakanaka ngiindaɓʉ yi꞉nye tʉkʉ kʉ di di di. 60 Mbise ɔngɔ, Kumu‑kumu ngia ɔɔ 'uja ambʉmaa ɓʉ gba na ati ʉ ungbutu wʉ ɓombi, ambufaniso ɓokoko Yeso moni ɓɔ: « Ajʉ wambʉkɔmʉ nɨngbaa yɨ moni yɛɛ tisie ɓiɛ aka ekoo mɨkɔmbɔ ngia ɓanɔwɛ kʉnapiikio engo akɛ? » 61 Yeso ambʉkata tʉkʉ ɓʉ nyɛ, chʉkɔmʉ ambumutisio ɨngbaa yɨ moni gʉkʉ mɨngana. Ɨkyɛmɨngana, Kumu‑kumu ngia ɔɔ 'ʉja a꞉muɓukuo ɓata ɓɔ: « Ajʉ wa Klisito ngia a mwana ʉ Asʉɓɨɨ ngia wʉ ɨbɨba ɓiɛ? » 62 Kija Yeso a꞉mutisio ɓɔ: « Ya ɓwanɨ, Na꞊na sina Mwana ngia ʉ Mombi ɓuwei akʉ ɨkɔndɔ yɨ guɔngɔ ngia yɨ Asʉɓɨɨ ngia wʉ angu, nʉ kʉka akʉ lɨkʉɓa lʉ ɓisi. » 63 Kija ngama ʉ ɓakumu‑kumu a꞉natʉa lɨpʉkʉ ngilangɔ ɓʉ hua hua, gʉ ɛyɔ ɓɔ: « Ajʉ ka꞉ɓio‑zʉ ɓata tʉkʉ kʉhata ɓatɛmʉ ɓiɛ? 64 Mɛɛ nʉkɔ akʉ ʉ꞉zɨaka‑ɛɛ Asʉɓɨɨ kʉtaa tɛ. Inu nʉna tanɨ? » Kija ɓombi kʉ ɓuɓomu ɓa꞉tɨna 'ʉkɔmbɔ wangɔ ɓɔ: « Ʉkwanana tʉkʉ nʉ ingyo! » 65 Ɓombi nga ɓɔmɔ ati ʉndaɓʉ ɓambufaniso nayɔ tokoko nʉ mukoi gbɛgbɛ tʉkʉ ananɨ. Ɓambʉmʉsanga mesu nʉ wagba wʉ ɨpʉkʉ, ɓambufaniso nayɔ ɓɛnda makɔfɨ, ɓi꞉nye nayɔ kuɓukuo ɓɔ: « Kwa ɨgbɛ, chwa mombi ngia ʉnaɓɛnda! » Kija ɓombi ɓʉ kuu ɓʉ Ubua ngua wɔɔ Ʉja wʉ Ɓayuda ɓambʉchɨka Yeso, ɓa꞉mʉɓɛnda lɨkɔndɔ lʉ mesu ɓʉ hua hua. Pɛtɛlɔ ʉtata Yeso ( Mat 26:69-75 ; Luk 22:56-62 ; Yʉa 18:15-18 , 25-27 ) 66 Ati ngia Pɛtɛlɔ i꞉nye zʉ‑ɔɔ tʉkʉ na akʉ ɨmbaa, moi mʉngana, mombi ʉ kuu wʉ kumu‑kumu ngia ɔɔ ʉja, ambʉka. 67 Ambʉna Pɛtɛlɔ na akʉ i꞉nye‑ɔɔ kʉtɨa dyaa, ambʉmʉkanga ɓʉ gbɔɔ, gʉ ɛyɔ nayɔ ɓɔ: « Abana ɔwɛ, ni꞉nye bɛ tʉkʉ ɨzɔ nʉ ɔɔ Yeso ʉ Najalɛtɛ. » 68 Pɛtɛlɔ ambʉtata ɓɔ: « Mambʉkɔmʉ kʉmbɨa ɓɔ wakʉkʉnda kusigo tanɨ. » Mbise ɔngɔ, ambʉsa anambamba ʉ umongu ngua wɔɔ ʉja. Kija gue ʉ kɔɓɔ a꞉natɨa. 69 Tʉkʉ moi mʉngana ngiinanɨ, ambʉmʉna ɓata tʉkʉ ananɨ, gʉ ɛyɔ nʉ ɓombi ngiɓa ɓi꞉nye nanɨ ɓɔ: « Gue ngia, a tʉkʉ mʉngana ʉ ɓombi ngiɓʉnanɨ. » 70 Pɛtɛlɔ ambʉtata ɓata tʉkʉ ɓʉ ngbɔmʉ. Kʉgbalanɨa ɓʉ ɗɛkɛkɛɛ, ɓombi ngiɓa ɓi꞉nye ananɨ, ɓambumusigio ɓata ɓɔ: « Ya tʉkʉ kingono ɓɔ, ɔwɛ wa tʉkʉ mʉngana ʉ ɓombi ngiɓʉnanɨ, jʉ ɔwɛ wa kʉ 'Ugalilaya. » 71 Kija Pɛtɛlɔ tɨna silika ɓɔ: « Asʉɓɨɨ ʉnaɓɛnda ndʉ maɓio kʉyaka yakanaka, ɛmɛ mambʉkɔmʉ kʉmbɨa gue ngiinanɨ. » 72 Chʉkɔmʉ nʉ ɨgbalakisie, gue ʉ kɔɓɔ ambʉnatɨa ɓata akʉ nɨsɨ kapɨnɨ ɔngɔ. Kija Pɛtɛlɔ a꞉tunguo moni ngika Yeso i꞉nye umusigieni ɓɔ: « Pɛɛ ngia gue ʉ kɔɓɔ anatɨa‑ɔɔ nɨsɨ kapɨnɨ, waɓio wʉpanatateni nɨsɨ kaatʉ. » Kʉ ɓwanɨ, ambʉɓʉa aɓei gagaa, ambufaniso tii tʉkʉ ndɨa. |
© 2021, Wycliffe Bible Translators, Inc.
Wycliffe Bible Translators, Inc.