Malɨkɔ 11 - Agɔmɔ ngia wʉ Ɨtakɨ-takɨ

Yeso ukumunio anʉ Yelusalɛma

¹ Iya ɓa꞉pa tiga tinene nʉ Yelusalɛma, akʉ ɨkʉmbʉ yɨ Bɛtɛfagɛ nʉ Betania, anambamba ʉ ɨkpangba yɨ Mijeituni, Yeso ambʉtʉma ɓakpataka ɓangɔ ɓapɨnɨ apɛɛ.

² Ambuɓusigio ɓɔ: « Seni akʉ ɨkʉmbʉ ngia ya apɛɛ ʉndɛnʉ akɛ. Ati ngia na꞊kumunio‑ɔɔ nani, na꞊gbʉka punda mʉngana 'ʉngɛ iya mombi ambuɗitokɔmʉ ekoo ɔngɔ. Muɓoneni nambʉnɨkyɨa nayɔ.

³ Ndʉ mombi aniɓukuo ɓɔ: ‹ Jʉtanɨ nakʉkyɨa ɓwanɨ? ›, musigieni ɓɔ: ‹ Makʉʉɓɨɨ akʉkʉnda ɓʉmʉsɨa nayɔ. Ɨkyɛmɨngana, a꞊mutuiso tuiso mbise ɗɛkɛkɛ. › »

⁴ Kija ɓa꞉sa tʉkʉ ɓwanɨ, ɓambʉgbʉka mwana ʉ punda 'ʉngɛ aɓei, anambamba ʉ ɨngbaa, anʉ umongu mungono ɓɔ. Ɓambumuɓono.

⁵ Ɓombi ngana ngana ngiɓa ɓi꞉nye nanɨ, ɓambuɓuɓukuo ɓɔ: « Nakʉkyɨa ɨmanɨ ananɨ? Jʉtanɨ nakuɓono mwana ʉ punda ngiinanɨ? »

⁶ Kija ɛɓɔ ɓa꞉ɓutisio ngbanga kʉndʉ aka Yeso a꞉ɓusigio‑ɔɔ, ɓambʉɓʉsɨa kʉsa nayɔ.

⁷ Ɓambʉɨkyɨa Yeso nʉ mwana ʉ punda ngiinanɨ, ɓambʉnaa lɨpʉkʉ ekoo angɔ, gʉ ɛyɔ ɓuwule ekoo ɔngɔ ɓʉ jika.

⁸ Ɛyɔ tii tʉkʉ kʉsa, ɓombi ɓaja ɓambufaniso naa lɨpʉku akɛsɨ, ɓɔmɔ kʉnaa mɨtapɨ yɨ matɨ ngia ɓi꞉nye kʉtɨna akʉ ɓanzɛnzɛ.

⁹ Ɓombi ngiɓa ɓi꞉nye kʉsa apɛɛ, kʉndʉ iɓa ɓi꞉nye naɓɔ kʉkpata ambise, ɓambufaniso tʉɓɨa ɓɔ: « Asʉɓɨɨ ʉchɨka ɨbɨba, Umbuiso mombi ngia akʉka akʉ ino yɨ Makʉʉɓɨɨ Asʉɓɨɨ!

¹⁰ Asʉɓɨɨ umbuiso ɓʉngama ngiɓa ɓakʉka, ɓʉngama ngiɓa ɓʉ tidoo ngiʉndɛsʉ Daudi! Asʉɓɨɨ ʉchɨka ɨbɨba akʉ mʉa ngua wa ekoo ʉ ɓisi nadɨndɨ! »

¹¹ Kija Yeso a꞉ɓʉya anʉ Yelusalɛma, ambukumunio amati ʉ ɨkáa yɨ Asʉɓɨɨ. Iya a꞉pipo nayɔ kʉnaka mʉa, ambʉsa tiga mesu anʉ Betania ɨzɔ nʉ ɓakpataka ngiɓangɔ kumi nʉ ɓapɨnɨ, jʉ yi꞉nye tiga nɨpasɨ.

Yeso ʉʉga ɓʉtɨ ngiɓa ɓambikinye mɔ lipumo

¹² Kʉɓa ɔngɔ, iya Yeso i꞉nye tiga kʉʉngwa anʉ Betania, ambʉkɔnɔ taa.

¹³ Ɛyɔ zʉ kʉ danga ɓɔ, ambʉna ɓʉtɨ mʉngana nʉ manɨ ɓu juku juku. Ambʉsa ɛsɨ ɔngɔ ɓɔ ʉna gɔ ipumo yɛɛ ɨdyɛ. Ɨkyɛmɨngana, iya a꞉sa kʉ tinene naɓɔ, a꞉gbʉka tʉkʉ manɨ ekoo ɔngɔ ɓʉ juku juku, jʉ yambikinye ɨjɔ yɨ lipumo.

¹⁴ Kʉ ɓwanɨ, ambʉʉga ɓʉtɨ ngiɓʉnanɨ kusigo ɓɔ: « Sinani nʉ sinani, mombi ambʉkʉdya sina ɓata ipumo yɨsɔɔ! » Ɓakpataka ngiɓangɔ ɓambʉkɔ moni ngikʉnanɨ tʉkʉ kɔnɨ.

Yeso ukpinyo ɓombi ɓʉ magabʉ akʉ ɓʉmba ɓʉ ɨkáa yɨ Asʉɓɨɨ

¹⁵ Iya Yeso a꞉ɓʉya anʉ Yelusalɛma, ambukumunio amati ʉ ɨkáa yɨ Asʉɓɨɨ. Ambufaniso kpinyo ɓombi ngiɓa ɓi꞉nye kʉgabiso nʉ kʉa kumbo amati ʉ ɨkáa yɨ Asʉɓɨɨ. Ambugbukumoko ɓamɛza ɓʉ ɓombi ngiɓa ɓaaɓaliso falanga, nʉ muweikie kʉ ɓombi ngiɓa ɓi꞉nye kʉgaba ɓapizo.

¹⁶ Chʉkɔmʉ ambʉsɨa mombi gʉkʉ mʉngana kʉɓaa nʉ ɨkyɛmɛ ɨndandɛ na akʉ ɓʉmba ɓʉ ɨkáa yɨ Asʉɓɨɨ.

¹⁷ Ambufaniso kunzo mapanʉ kusigo ɓɔ: « Asʉɓɨɨ a꞉sigo amati ʉ Mubio ɓɔ: ‹ Ɨkáa ngiisɛmɛ ɓa꞊ɓuisoko ɓɔ ɨkáa yɨ nɨta yɨ mababa kʉ ɓombi kʉ muɓomu. › Ɨkyɛmɨngana, inu nʉɨnɨtanakiso tiga izi yɛɛ junikie yɨ ɓombi ɓʉ ndiɓo. »

¹⁸ Iya ɓangama ɓʉ ɓakumu‑kumu nʉ ɓapananakɨa ɓʉ mapanʉ ɓa꞉mʉkɔ kʉyaka ɓwanɨ, ɓambufaniso hata ɓɔ ɓamʉwa nɨngbaa tɨmanɨ. Ʉna tɔ, ɓi꞉nye ɓata nayɔ kʉ kukumo jʉ ʉpanʉ nguangɔ wa꞉ɓoto mɨtʉma yɨ ɓombi ɓaja.

¹⁹ Iya ɨpasɨ ya꞉dʉa nayɔ, ɔɔ Yeso nʉ ɓakpataka ngiɓangɔ ɓambʉɓʉa aɓei ʉ gʉlʉ.

Angu ngia wʉ baya nʉ nɨta Asʉɓɨɨ

²⁰ Tiga kʉɓa ɔngɔ, iya ɓi꞉nye tiga kʉɓaa anɨngbaa, ɓakpataka ɓambʉna ɓʉtɨ ngiɓa ɓaaɓusoko ɓɔ mutini, iɓa Yeso a꞉ɓʉʉga ɓʉmɔkɔkeni kʉɓʉya tʉkʉ akʉ mii yɛngɔ ɓʉ ke ke ke.

²¹ Pɛtɛlɔ ambutunguo moni ngika Yeso a꞉yaka. Ambusigio Yeso ɓɔ: « Mʉpananakɨa! Ʉna ɓʉtɨ ngiɓa ɓaaɓusoko ɓɔ mutini ngiɓa wa꞉ɓʉʉga bɛ akʉ ɓʉmɔkɔkɔ‑ɛɛ! »

²² Yeso ambuɓusigio ɓɔ: « Ɓieni tʉkʉ nʉ baya akʉ Asʉɓɨɨ!

²³ Mombi usigieni ɨkpangba ngia ɓɔ: ‹ Ɗuunio aka, wambʉsa kʉkwa amati ʉ ɗei ɔɔ 'ʉja ›, chʉkɔmʉ ambuɓio nʉ ɓatanga akʉ 'ʉtʉma, ambʉbaya tʉkʉ ɓɔ moni ngika ʉ꞉yaka ka꞊kyɨanɨa kyɨanɨanɨ. Tʉkʉ kingono, maninu kusigio ɓɔ ka꞊kyɨanɨa tʉkʉ ndʉ ananɨ.

²⁴ Iiya maninu kusigio ɓɔ, ɨkyɛmɛ kʉ iɓomu ngia na꞊ta 'upi akʉ nɨta Asʉɓɨɨ, ɓieni nʉ baya ɓɔ nʉnyɨa nayɔ nyɨanɨ, nʉ ɓɔ a꞊ninzo ɛyɔ nzoni.

²⁵ Ati ngia naɓio‑ɔɔ ɓʉmaɨ kʉta, ndʉ naɓio nʉ moni kʉ mombi akʉ 'ʉtʉma, pɨeni mombi ɔngɔ tʉkʉ pɨaa, ambʉ Tidoo ngiʉndɛnʉ a ekoo ʉ ɓisi ʉnɨpɨa inu ɓʉɓɨɓɨ ngiɓʉndɛnʉ kʉ pɨaa. [

²⁶ Ɨkyɛmɨngana, ndʉ nambʉkʉɓʉpɨa ɛɓɔ, Atɔ ʉndɛnʉ ngia ekoo ʉ ɓisi, ambʉkʉnɨpɨa inu ɓʉɓɨɓɨ ngiɓʉndɛnʉ kʉ ɓwanɨ.] »

Ʉpanʉ ngua Yeso aakyɨa nawɔ ɓamoni waaʉngwa gbanɨ?

²⁷ Kija ɔɔ Yeso nʉ ɓakpataka ngiɓangɔ ɓa꞉tʉa kumbise anʉ Yelusalɛma. Ati ngia Yeso i꞉nye tiga‑ɔɔ kʉkɨndaka amati ʉ ɨkáa yɨ Asʉɓɨɨ, ɓangama ɓʉ ɓakumu‑kumu nʉ ɓapananakɨa ɓʉ mapanʉ, nʉ ɓagʉgʉ, ɓambʉka anambamba angɔ.

²⁸ Ɓambumuɓukuo ɓɔ: « Moni ngika wakʉkyɨa engo akɛ ka kʉʉngwanakɨa nʉ ʉpanʉ wʉ anɨ? Anɨ kʉ a nɔwɛ kutitio kʉkyɨa engo? »

²⁹ Yeso ambuɓutisio ɓɔ: « Ɛmɛ ma‑zʉ ninu kʉ kuɓukuo ɨngbaa yɨ moni. Ndʉ nanatisio, kija ɛmɛ ma꞊nɨɓɨa tiga ɓɔ ʉpanʉ ngua maakyɨa nawɔ moni ngikʉnanɨ waaʉngwa gbanɨ.

³⁰ Naɓɨeni‑zʉ ɓɔ ʉpanʉ ngua Yʉanɨ i꞉nye ɓatiso nawɔ ɓombi, ajʉ wa꞉ʉngwa ɔɔ Asʉɓɨɨ, gʉ ɓɔ wa꞉ʉngwa ɔɔ ɓombi? »

³¹ Kija ɓa꞉faniso yakanaka ati ʉndaɓʉ ɓɔ: « Ndʉ kamutisio ɓɔ wa꞉ʉngwa ɔɔ Asʉɓɨɨ, a꞊tiɓukuo ɓɔ: ‹ Akʉ moni kʉ ɨmanɨ tiga na꞉mʉbayakɔmʉ? ›

³² Ndʉ katisio tɔ ɓɔ wa꞉ʉngwa ɔɔ ɓombi, ɓuɗo ɓambukuɓio! » Kingono, ɛɓɔ ɓi꞉nye kukumo ɓombi, jʉ ɓombi kʉ ɓuɓomu ɓi꞉nye chɨka Yʉanɨ ndʉ ɨgbɛ yɨ Asʉɓɨɨ.

³³ Kija ɓa꞉tisio Yeso ɓɔ: « Isu kambʉkʉmbɨa. » Yeso ambuɓutisio ɓɔ: « Abana gʉ ɛmɛ, mambʉkʉnɨɓɨa kʉ ɓwanɨ ɓɔ ʉpanʉ ngua makʉkyɨa nawɔ moni ngika wakʉʉngwa gbanɨ. »