Malɨkɔ 10 - Agɔmɔ ngia wʉ Ɨtakɨ-takɨYeso u꞉nzo ʉpanʉ ekoo ʉ tuiso moi ( Mat 19:1-12 ; Luk 16:18 ) 1 Iya Yeso a꞉ʉngwa nanɨ, ambʉsa akʉ gɨpa ʉ Yudɛa, amondu ʉ ɗei ʉ Yɔlɔdanɨ. Mbise ɔngɔ, ungbutu wʉ ɓombi wambʉmʉmanakɨa anambamba angɔ. Kʉndʉ i꞉nye kyɨa kʉ gomu, ambufaniso ɓata naɓɔ kʉ kunzo mapanʉ. 2 Ɓafalisayɔ ɓambʉka nayɔ kupindikio lipindi, nayɔ kuɓukuo ɓɔ: « Ajʉ mapanʉ ngikʉndɛsʉ kaabaya ɓɔ gue utuiso moi angɔ tuisoni ɓiɛ, gʉ ɓɔ chʉkɔmʉ? » 3 Ambuɓuɓukuo ɓata ɛɓɔ kʉ ɓɔ: « Ʉpanʉ tɨmanɨ ʉwa Mʉsa a꞉ninzo jɛnɛ? » 4 Ɓambumutisio ɓɔ: « Mʉsa a꞉titio ɓɔ, gue unzo moi ʉbalʉa wʉ sɨana ambumutuiso. » 5 Yeso ambuɓusigio ɓɔ: « Nadɨndɨ ya tʉkʉ aka ekoo 'ʉtʉ wɔɔ ɓʉmʉ nguʉndɛnʉ iya Mʉsa a꞉tɨndakɨa‑ɔɔ ʉpanʉ nguʉnanɨ. 6 Ɨkyɛmɨngana, akʉ ʉkpanganɨa, ati ngia Asʉɓɨɨ a꞉kyɨa‑ɔɔ kumbo kʉ ʉɓomu, a꞉kyɨa ɔɔ gue nʉ moi. 7 Aka ekoo moni ngikʉnanɨ, gue a꞊ʉngwa ɔɔ ɨsɛ nʉ inye, ɓambujunukio nʉ moi angɔ, 8 kija ɛɓɔ ɓapɨnɨ ɓambukuɓio tii ɓata ɓombi ɓapɨnɨ, ɨkyɛmɨngana ɓa tii tʉkʉ ndʉtʉ mɨngana. 9 Kʉ ɓwanɨ, ɓombi ngiɓa Asʉɓɨɨ uɓuɗitinisoo, mombi ɔɔɓʉɗʉkwanisokɔmʉ! » 10 Iya ɓa꞉tʉa tiga andei, ɓakpataka ɓambufaniso ɓata ɓokoko Yeso masaʉ ekoo ʉ moni ngika i꞉nye usigeni. 11 Ambuɓusigio ɓɔ: « Ndʉ mombi atuiso moi angɔ, ambʉchɨka wɔmɔ, ambʉ ʉ꞉kyɨa ɨndambʉ akʉ moi ngia wʉ pɛɛ. 12 Kʉndʉ moi ungweni akʉ ɨɓaa, ambʉchɨka gue ɔmɔ, moi ngiinanɨ ʉkyɨa kʉ ɨndambʉ akʉ swaɨ ngia wʉ pɛɛ. » Yeso umbuiso ɓana ɓɔɔ ɗɛ ɗɛ ɗɛ ( Mat 19:13-15 ; Luk 18:15-17 ) 13 Ɓombi ɓi꞉nye kʉka nʉ ɓana apɛɛ ʉ Yeso ɓɔ ʉɓʉnapɨa lɨkɔndɔ ekoo ʉndaɓʉ, ɨkyɛmɨngana ɓakpataka ngiɓangɔ ɓambufaniso naɓɔ ngbaakɨa. 14 Iya Yeso a꞉na nayɔ moni ngikʉnanɨ, yambʉmʉkyɨa ɓɨɓɨ, ambuɓusigio ɓɔ: « Sɨeni ɓana ɓɔɔ ɗɛ ɗɛ ɗɛ kʉka ya andɛmɛ, nɔɔɓunangyokɔmʉ, jʉ Ɓʉngama ɓʉ Asʉɓɨɨ ɓa aka ekoo ʉ ɓombi ngiɓa ɓa ngbanga ndʉ ɛɓɔ. 15 Maninu kusigio tʉkʉ kingono ɓɔ, mombi ngia ambʉkʉjananɨa Ɓʉngama ɓʉ Asʉɓɨɨ ngbanga ndʉ mwana ɔɔ ɗɛkɛkɛ, ambukukumunio sina amati ɔngɔ gʉkʉ ɗɛkɛkɛ. » 16 Mbise ɔngɔ, Yeso ambunaputo ɓana, ambʉnapɨa lɨkɔndɔ ekoo ʉndaɓʉ ambuɓumbuiso. Yeso ʉyakanaka nʉ mombi ʉ lɨkyɛmɛ ( Mat 19:16-30 ; Luk 18:18-30 ) 17 Iya Yeso i꞉nye tiga‑ɔɔ kʉʉngwɨa kɨnda, gue mʉngana ambʉka bangʉ, ambʉkwa nʉ muwuu apɛɛ angɔ ɓʉ kpruu. Ambumuɓukuo ɓɔ: « Mʉpananakɨa wɔɔ uɗo! Mʉkwanana kʉkyɨa tanɨ kʉnyɨa nʉ ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá? » 18 Yeso ambumutisio ɓɔ: « Jʉtanɨ wʉ꞉nasoko ɓɔ, ‹ Mʉpananakɨa wɔɔ 'uɗo? › Mombi ɔɔ 'uɗo ambʉkɔmʉ gʉkʉ mʉngana, tʉkʉ Asʉɓɨɨ kʉ nangana a 'uɗo. 19 Ɔwɛ wakʉmbɨa mapanʉ ngika muɗo: ‹ Wɔɔwakɔmʉ mombi, wɔɔkyɨakɔmʉ ɨndambʉ, wɔɔɓokɔmʉ, wɔɔɓʉakɔmʉ ɓʉtɛmʉ ɓʉ yakanaka, wɔɔkyɨakɔmʉ mombi ɓʉɓɨɓɨ, kumo ɔɔ atɔ nʉ anʉ. › » 20 Kija a꞉sigio Yeso ɓɔ: « Mʉpananakɨa ma꞉faniso kyananakɨa mapanʉ ngikʉnanɨ kʉ muɓomu kʉʉngwa tʉkʉ ɨɓwana ngiisɛmɛ. » 21 Yeso ambʉmʉtɨna nʉ waja, ambʉmʉpananiso ɓʉkʉnda, ambumusigio ɓɔ: « Yinatukio ɨngbaa yɨ moni tʉkʉ mɨngana. Sa kʉgaba kumbo ngiasɔɔ kʉ 'uɓomu, falanga ɔngɔ, wambʉɨpakɨa ɓombi ɓʉ ɓanangyɨa. Kʉ ɓwanɨ, wa꞊nyɨa tiga nʉ ɨjangɨa yɛɛ ɨja ekoo ʉ ɓisi. Mbise ɔngɔ, wambʉnakpata! » 22 Iya gue ngiinanɨ a꞉kɔ ɓwanɨ, ambʉfa mesu, ambʉsa tii tʉkʉ nʉ ikoko ɨja akʉ 'ʉtʉma, jʉ i꞉nye nʉ lɨkyɛmɛ chʉkɔmʉ nʉ imbi. Yeso ʉpana ɓɔ ya ɓʉkaɨ kukumunio akʉ Ɓʉngama ɓʉ Asʉɓɨɨ 23 Yeso ambʉkanga ɓakpataka ngiɓangɔ na akʉ ɓi꞉nye ɓumukungueni‑ɔɔ, ambuɓusigio ɓɔ: « Ya ɓʉkaɨ ɓombi ɓʉ lɨkyɛmɛ kukumunio akʉ Ɓʉngama ɓʉ Asʉɓɨɨ! » 24 Moni ngikʉnanɨ kambʉmbangɨa ɓakpataka tʉkʉ nadɨndɨ. Yeso ambusigo ɓata ɓɔ: « Inu ɓana ɓʉsɛmɛ, ya ɓʉkaɨ kukumunio akʉ Ɓʉngama ɓʉ Asʉɓɨɨ! 25 Kʉndʉ ya ɓʉkaɨ nama ɔɔ 'ʉja ngia ɓaamusoko ɓɔ ngamia kukumunio akʉ ihoo yɨ ɗipio, ya ɓata kʉ ɓʉkaɨ akʉ mombi ʉ lɨkyɛmɛ kukumunio akʉ Ɓʉngama ɓʉ Asʉɓɨɨ. » 26 Moni ngikʉnanɨ, kambʉmbangɨa ɓakpataka tʉkʉ nadɨndɨ. Ɓambufaniso yakanaka ati ʉndaɓʉ kusigo ɓɔ: « Ndʉ yaɓio tɔ ɓwanɨ, anɨ tiga a꞊nyɨa nʉ ɓʉhɨa? » 27 Yeso ambʉɓʉtɨna nʉ waja, ambuɓusigio ɓɔ: « Ya ɓʉkaɨ akʉ ɓombi ɓʉ ɨtaka, ɨkyɛmɨngana akʉ Asʉɓɨɨ yambʉkɔmʉ ɓʉkaɨ. Jʉ yambʉkɔmʉ nɨngbaa yɨ moni gʉkʉ mɨngana ngia yaakyaka Asʉɓɨɨ. » 28 Pɛtɛlɔ ambumusigio ɓɔ: « Andʉ tiga isu ɓombi ngiɓa ka꞉sɨa moni kʉ muɓomu nɔwɛ kʉkpata ɔwɛ! » 29 Yeso ambuɓutisio ɓɔ: « Maninu kusigio tʉkʉ kingono ɓɔ, mombi kʉ 'uɓomu ngia a꞉sɨa lɨkáa, yɛmɔ ɓamanye ɓɔɔ gue nʉ iɓa ɓɔɔ ɓoi, yɛmɔ inye nʉ ɨsɛ, yɛmɔ ɓana, yɛmɔ matɨnɨ, aka ekoo asɛmɛ nʉ aka ekoo ʉ Ɨsaʉ yɛɛ Iɗo, 30 a꞉nyɨa nʉ kumbo tiga nɨsɨ mɨa mʉngana, zʉ tʉkʉ akʉ ɨtaka aka. A꞊nyɨa nʉ lɨkáa, ɓamanye ɓɔɔ gue nʉ ɓɔɔ ɓoi, nʉ ɓinye, nʉ ɓana, nʉ matɨnɨ, ɨzɔ kʉ nʉ ɓʉka‑ɓʉkaɨ. Nʉ akʉ wati ngua wakʉka, a꞊nyɨa nʉ ʉɓɨɨ wʉ mɨtʉ yɨ ɨpá nʉ mɨtʉ yɨ ɨpá. 31 Ɓombi ɓaja ngiɓa ɓa apɛɛ, ɓaɓio sina tiga ambise, nʉ ɓiga ngiɓa ɓa ambise, ɓaɓio sina tiga apɛɛ. » Yeso a ɓata kʉɓɨakɨa ɨsaʉ yɨ ingyo ngiangɔ nʉ jʉkana akʉ ingyo ( Mat 20:17-19 ; Luk 18:31-34 ) 32 Ati ngia ɓi꞉nye tiga‑ɔɔ kʉsa anʉ Yelusalɛma, Yeso i꞉nye kʉkɨndaka apɛɛ ʉ ɓakpataka ngiɓangɔ kumi nʉ ɓapɨnɨ. Ɛɓɔ ɓi꞉nye nʉ ʉɓa akʉ 'ʉtʉma, ɓombi ngiɓa ɓi꞉nye ɨzɔ naɓɔ ɓi꞉nye tiga kʉ nʉ ʉɓa. Ambusoko ɓata ɓakpataka anambamba, ambufaniso naɓɔ ngakɨa moni kʉ muɓomu ngika ki꞉nye kʉsa nayɔ kʉgbʉka. 33 Ambuɓusigio ɓɔ: « Ukeni iɗo, isu iɓa kakʉsa anʉ Yelusalɛma akɛ. Nani, ɓa꞊gaba ɓisi Mwana ngia ʉ Mombi akʉ lɨkɔndɔ lʉ ɓangama ɓʉ ɓakumu‑kumu, nʉ akʉ lɨkɔndɔ lʉ ɓapananakɨa ɓʉ mapanʉ. Ɛɓɔ ɓa꞊tɨna 'ʉkɔmbɔ ɓɔ ɓʉmʉwa tʉkʉ waa, ɓambʉmʉgaba akʉ lɨkɔndɔ lʉ ɓombi ngiɓa ɓambʉkɔmʉ Ɓayuda. 34 Ɓa꞊mʉnʉa nʉaa, ɓambumutokoko nʉ mukoi, ɓambʉmʉɓɨnda fimbo, kija ɓa꞊mʉwa. Ɨkyɛmɨngana, mbise ʉ makwaa kaatʉ, kija a꞊jʉkana akʉ ingyo. » Ɔɔ Yakɔbɔ nʉ Yʉanɨ ɓʉta lizi lʉ ɨbɨba ( Mat 20:20-28 ) 35 Mbise ngiinanɨ, ɓana ɓʉ Jɛbɛdayɔ, ɔɔ Yakɔbɔ nʉ Yʉanɨ, ɓa꞉ka anambamba ʉ Yeso, ɓambumusigio ɓɔ: « Mʉpananakɨa, kakʉkʉnda ɓɔ tɨkyɨa ɓaka moni ngika kanɔwɛ kʉta akɛ. » 36 Yeso ambuɓuɓukuo ɓɔ: « Na‑zʉ kʉkʉnda ɓɔ mʉnɨkyɨa ɨmanɨ? » 37 Ɓambumutisio ɓɔ: « Ati ngia waɓio ɓisi‑ɔɔ akʉ ɨbɨba ngiisɔɔ, tiwuliso ɓaka tʉkʉ anambamba asɔɔ. Mombi mʉngana akʉ ɨkɔndɔ ngiisɔɔ yɨ guɔngɔ, iya wɔmɔ akʉ ɨkɔndɔ ngiisɔɔ yɨ moiɔngɔ. » 38 Ɨkyɛmɨngana, Yeso ambuɓusigio ɓɔ: « Moni ngika nakʉtananɨa engo akɛ, nambʉkɔmʉ kʉmbɨa engo. Ʉpata wʉ ɓʉka‑ɓʉkaɨ ngua ɛmɛ makʉsa kʉmwa engo, ajʉ inu na kʉ ikanzi ngia na꞊ʉmwa kʉ mwanɨ ɓiɛ? Gʉ ɓɔ kʉkwa uɓatiso ngua ɛmɛ makʉsa kʉkwa engo? » 39 Ɓambumutisio ɓɔ: « Oo, ka꞊ʉmwa mwanɨ. » Yeso ambuɓusigio ɓɔ: « Pɛpɛ tʉkʉ ʉpata wʉ ɓʉka‑ɓʉkaɨ ngua makʉsa kʉmwa engo, inu na꞊ʉmwa mwanɨ, nʉ uɓatiso ngua makʉsa kʉkwa engo, inu na꞊ʉkwa kʉ kwanɨ. 40 Ɨkyɛmɨngana, moni ngika kɔɔ wulise ɓombi akʉ ɨkɔndɔ ngiisɛmɛ yɨ guɔngɔ, gʉ ɓɔ akʉ ɨkɔndɔ ngiisɛmɛ yɨ moiɔngɔ, chʉkɔmʉ ɛmɛ kʉ matɨna moni kɔngɔ. Lizi ngilʉnanɨ la tʉkʉ akʉ ɓombi ngiɓa Asʉɓɨɨ a꞉lɨtambanaka aka ekoo ʉndaɓʉ. » 41 Iya ɓakpataka kumi ngiɓa ɓɔmɔ ɓa꞉kɔ nayɔ moni ngikʉnanɨ, ɓambʉnɨa ɔɔ Yakɔbɔ nʉ Yʉanɨ 'ʉtʉma wɔɔ ɓɨɓɨ. 42 Kija Yeso a꞉ɓusoko, ambuɓusigio ɓɔ: « Nakʉmbɨa iɗo ɓɔ ɓombi ngiɓa ɓaanyɨa ndʉ ɓangama ɓʉ mababa kʉ ɓombi, ɓaapananiso ɓʉngama ngiɓʉndaɓʉ pananisoo. Nʉ ɓombi ɓɔɔ ɓʉkpɔkpɔ ɓaakyɨa tʉkʉ kʉkɨnganakiso ɓombi ngiɓʉndaɓʉ. 43 Ɨkyɛmɨngana, ati ʉndɛnʉ, nʉkwananakɔmʉ kʉkyananaka ɓwanɨ. Ndʉ mombi mʉngana ati ʉndɛnʉ akʉnda kuɓio mombi ɔɔ ʉja, uɓio mombi ngia aakyananakɨa ɓangɛ kʉ ɓuɓomu. 44 Nʉ mombi kʉ 'uɓomu ngia akʉkʉnda kuɓio mombi ʉ pɛɛ ati ʉndɛnʉ, ʉkwanana kuɓio bayo ʉ ɓombi kʉ ɓuɓomu. 45 Jʉ Mwana ngia ʉ Mombi a꞉kakɔmʉ ɓɔ ɓombi ɓuɓio nayɔ kʉkyananakɨa, ɨkyɛmɨngana a꞉ka kʉkyananakɨa ɓombi, nʉ kunzo ʉɓɨɨ nguangɔ ndʉ apɛpɛ kuhiiso ɓombi ɓaja. » Yeso uhiiso Balatimayɔ ngia ambikinye na ( Mat 20:29-34 ; Luk 18:35-43 ) 46 Tiga nanɨ, ɔɔ Yeso nʉ ɓakpataka ngiɓangɔ ɓambʉɓʉya akʉ gʉlʉ ʉ Yeliko. Ati ngia ɓi꞉nye tiga‑ɔɔ kʉɓʉa aɓei ʉ gʉlʉ ngiinanɨ, ungbutu wʉ ɓombi wɔɔ ʉja wi꞉nye nanɨ. Mombi mʉngana nanɨ i꞉nye ino ɓɔ Balatimayɔ mwana ʉ Timayɔ. Ɛyɔ ambikinye na, nʉ i꞉nye kʉ mombi ɔɔ chochonoke, nʉ i꞉nye tiga ɓuwei anambamba ʉ ɨngbaa. 47 Iya a꞉kɔ nayɔ ɓɔ Yeso ngia wʉ Najalɛtɛ akʉɓaa 'upi kʉ ananɨ, ambufaniso tʉɓɨa nʉ iyo yɛɛ ɓʉmʉ ɓɔ: « Yeso, Mwana ʉ mwana ʉ Daudi, nanɨa ɓaka ikoko! » 48 Ɓombi ɓaja ɓambʉmʉngbaakɨa ɓɔ ʉkata. Ɨkyɛmɨngana, ambʉtʉɓɨa tiga ɓʉmʉ nadɨndɨ ɓɔ: « Mwana ʉ mwana ʉ Daudi, nanɨa ɓaka ikoko! » 49 Kija Yeso a꞉maa, ambusigo ɓɔ: « Musokeni‑zʉ! » Kija ɓa꞉musoko, ɓambumusigio ɓɔ: « Chɨka igue‑gue akʉ 'ʉtʉma, wambʉʉngwa ɨkʉʉ, jʉ Yeso anɔwɛ kusoko! » 50 Kija Balatimayɔ a꞉giso kɔtɨ ngiangɔ akɛsɨ, ambʉndalio ɓʉ kpita, ambʉsa aka Yeso i꞉nye‑ɔɔ. 51 Yeso ambumuɓukuo ɓɔ: « Wakʉkʉnda ɓɔ mʉnakyɨa ɨmanɨ? » Ambutisio ɓɔ: « Mʉpananakɨa, mufaniso ɓaka kʉna! » 52 Kija Yeso a꞉musigio ɓɔ: « Sa, baya ngiisɔɔ yi꞉nahiiso hiisoo! » Tʉkʉ nɨma ngiinanɨ, mesu kambʉmʉgananɨa, ambufaniso tii tʉkʉ kpata Yeso nɨngbaa ɓʉ ngula. |
© 2021, Wycliffe Bible Translators, Inc.
Wycliffe Bible Translators, Inc.