Matayɔ 3 - Agɔmɔ ngia wʉ Ɨtakɨ-takɨ

Yʉanɨ ngia i꞉nye ɓatiso ɓombi unzo mapanʉ

¹ Ati ngiinanɨ, Yʉanɨ ngia i꞉nye ɓatiso ɓombi ambʉɓwanɨa akʉ 'ukengu, amati ʉ gɨpa ʉ Yudɛa. I꞉nye kʉɓɨakɨa ɨsaʉ yɨ Asʉɓɨɨ ɓɔ:

² « Nicheni mɨtʉma ngiindɛnʉ, jʉ Ɓʉngama ngiɓa ɓa ekoo ʉ ɓisi ɓa tiga kʉ tinene! »

³ Tʉkʉ Yʉanɨ mʉngana ngiinanɨ, iya ɨgbɛ Ɨsaya a꞉sigo jɛnɛ moni ekoo angɔ ɓɔ: « Mombi akʉtʉɓɨa akʉ 'ukengu ɓɔ: ‹ Tambanakeni lɨngbaa ngila lʉ Makʉʉɓɨɨ! Liyumokeni ɓʉ gɔ, gɔ, gɔ! › »

⁴ Yʉanɨ i꞉nye pɨnya ɨpʉkʉ ngia ɓa꞉ɨkyɨa nʉ mata kʉ nama ngia ɓaamusoko ɓɔ ngamia, nʉ i꞉nye sanga 'ʉkaɓa wʉ ʉmba wʉ nama akʉ ɨɓʉnɨ. I꞉nye dya ɓanimene nʉ ɨɓɔkɔ.

⁵ Ɓombi ɓʉ gʉlʉ ʉ Yelusalɛma, ɓombi kʉ ɓuɓomu ɓʉ gɨpa ʉ Yudɛa, nʉ ɓagɨpa ngiɓa ɓʉ ɨtɛtɛtɛ yɨ ɗei ngia ɓaamusoko ɓɔ Yɔlɔdanɨ, ɓi꞉nye sa akʉ i꞉nye‑ɛɛ.

⁶ Iya ɓi꞉nye panzaka ɓʉɓɨɓɨ ngiɓʉndaɓʉ, kija Yʉanɨ i꞉nye ɓuɓatiso tiga amati ʉ ɗei ʉ Yɔlɔdanɨ.

⁷ Iya a꞉na Ɓafalisayɔ nʉ Ɓasadukayɔ ɓaja, kʉka ɓɔ ɓʉɓʉɓatiso, gʉ ɛyɔ naɓɔ ɓɔ: « Inu ɓazɨɨ ngiɓa, anɨ ʉnɨpanɨa kʉchwɨa 'ʉnganga ngua wʉ Asʉɓɨɨ bangʉ, uwa wa kʉka?

⁸ Pananiseni tɔ ɨkyananakɨa ngia yambiiso kingono ɓɔ na꞉nicho mɨtʉma ngiindɛnʉ nichoo.

⁹ Nɔɔɓiokɔmʉ kutunguo amati ʉ mɨtʉma ngiindɛnʉ ɓɔ: ‹ Isu ka yɨndɛsʉ ɓanɔnɔ ɓʉ Abalama! › Jʉ maninu kʉɓɨa kingono ɓɔ, Asʉɓɨɨ a tʉkʉ ikanzi ngia akwanana kʉnɨtanakiso mukopi ngikakɛ kʉka ɓanɔnɔ ɓʉ Abalama.

¹⁰ Angbaka a tiga 'ʉnapɨɛ akʉ litindi‑tindi lʉ matɨ. Kʉ ɓwanɨ, ɓʉtɨ ngiɓa ɓambʉkʉmɔ lipumo lɔɔ manzanza ɓa꞊ɓʉkwaka kwakaa, ɓambuɓugiso akʉ dyaa.

¹¹ Ɛmɛ maninu kuɓatiso amati ʉ mepo, kupananiso ɓɔ na꞉nicho mɨtʉma ngiindɛnʉ nichoo. Ɨkyɛmɨngana, mombi ngia akʉka mbise asɛmɛ, anʉ angu nɛmɛ kʉɓaa tʉkʉ ɓʉ chɨla chɨla. Nʉ ɛmɛ mambʉkɔmʉ 'ʉkwananakɛ gʉkʉ ɗɛkɛkɛ kuɓono miki yɨ lɨkpakʉ ngilangɔ. Ɛyɔ a꞊niɓatiso ɓisi nʉ 'Ʉtʉma wɔɔ Tu nʉ dyaa.

¹² Ɛyɔ anʉ lunga akʉ lɨkɔndɔ ngilangɔ kʉpɨka nganʉ. A꞊mʉma nganʉ amati ʉ ɨkáa yɨ masɔɔ ngiangɔ, kija a꞊ya lɨpapɨ lɔngɔ akʉ dyaa ngia yambakaimunio. »

Yʉanɨ uɓatiso Yeso

¹³ Ɓisi mʉngana, Yeso a꞉ʉngwa akʉ gɨpa ʉ Galilaya, ambʉɓʉya anambamba ʉ ɗei ʉ Yɔlɔdanɨ, Yʉanɨ ambumuɓatiso.

¹⁴ Ɨkyɛmɨngana, Yʉanɨ a꞉yaa‑zʉ tʉkʉ yaa, gʉ ɛyɔ ɓɔ: « Gʉ kʉ ɗɛkɛkɛ! Ɔwɛ kʉ wʉkwanana nɛmɛ kuɓatiso ɛmɛ. Jʉtanɨ wʉka tiga ya andɛmɛ? »

¹⁵ Gʉ Yeso nayɔ aka ɓɔ: « Baya‑zʉ tʉkʉ bayaa. Jʉ nɨngbaa ngiinanɨ iiya kakwanana‑ɔɔ kʉkyananakɨa moni ngika Asʉɓɨɨ akʉkʉnda ɓɔ kʉkyɨa. » Kija Yʉanɨ a꞉baya tiga aka.

¹⁶ Iya Yeso a꞉kwa nayɔ uɓatiso, tʉkʉ nɨma ngiinanɨ, ambʉɓʉa anizini. Kija ɓisi ekoo ɓa꞉gananɨa, ambʉna 'Ʉtʉma wʉ Asʉɓɨɨ kijo ndʉ ɨvaka‑vaka, wambuwulo ekoo angɔ.

¹⁷ Kija iyo mɨngana ya꞉kɔnɨɔ ekoo ʉ ɓisi kusigo ɓɔ: « Mwana ngiasɛmɛ wʉ ɓʉkʉnda iyakɛ. Maakwa ɨgyagya ekoo angɔ! »