Matayɔ 28 - Agɔmɔ ngia wʉ Ɨtakɨ-takɨ

Yeso ʉjʉkana akʉ ingyo

¹ Tiga mbise ʉ ɓisi ɓʉ humuo ngiɓa ɓʉ Ɓayuda, ɓisi ɓʉ kuu mʉngana akʉ ʉkpanganɨa wʉ bɛlɛsɛ, ɔɔ Malɨa Magadala ɛɓɔ nʉ Malɨa ngia wɔmɔ, ɓambʉsa kʉɓa ɓʉ cha kʉkanga ɓʉnzaʉ.

² Tʉkʉ nɨma ngiinanɨ, ajigijo ɔɔ ʉja ambʉɓaa. Malaika wʉ Makʉʉɓɨɨ wambijo kʉʉngwa ekoo ʉ ɓisi, wambʉka kʉbɨkaniso ikopi akʉ moni kʉ ɓʉnzaʉ, wambuwulo ekoo ɔngɔ ɓʉ jomu.

³ Malaika nguʉnanɨ wi꞉nye kʉjɨa nadɨndɨ ndʉ iya ʉgbaa waangɨnana‑ɔɔ. Lɨpʉkʉ ngilangɔ li꞉nye tu nadɨndɨ ɓʉ pɛ pɛ pɛ.

⁴ Iya ɓasʉda ngiɓa ɓi꞉nye kʉpɨmakɨa ɓʉnzaʉ ɓa꞉na ɓwanɨ, ɓambʉkwa ʉɓa, kija ɓa꞉faniso gʉgʉma ɓambʉka ngbanga ndʉ mɨnda.

⁵ Ɨkyɛmɨngana, malaika wʉ Asʉɓɨɨ wambusigio ɓoi ngiɓʉnanɨ ɓɔ: « Nɔɔkumokɔmʉ! Makʉmbɨa ɓɔ nʉ꞉ka kʉhata Yeso iya ɓa꞉mʉɓakaka bɛ ekoo ʉ mʉsalaba.

⁶ Ambʉkɔmʉ tii ɓata aka! Ʉ꞉jʉkana akʉ ingyo jʉkananɨ, ngbanga kʉndʉ aka a꞉sigo jɛnɛ‑ɔɔ. Ikeni kʉna izi ngia ɓa꞉mʉkwaiso bɛ‑ɔɔ.

⁷ Seni gagaa akʉ ɓakpataka ngiɓangɔ ɓa‑ɛɛ, nambuɓusigio ɓɔ ʉ꞉jʉkana akʉ ingyo jʉkananɨ ati ʉ mɨnda. Ɨtakɨ‑takɨ ngiakɛ, akʉsa apɛɛ ninu kusiɓo anʉ Galilaya, nabi nayɔ kʉna tiga nani. Ɨsaʉ ngia mi꞉nye kʉkʉnda ninu kʉɓɨa iinanɨ. »

⁸ Ɓoi ɓa꞉ʉngwa ananɨ akʉ ɓʉnzaʉ tii tʉkʉ gagaa ɛɓɔ tiga nʉ ʉɓa, ɨkyɛmɨngana ɨgyagya naɓɔ ihue akʉ 'ʉtʉma ɓʉ kpɨ. Ɓambʉsa bangʉ kʉngakɨa ɓakpataka ngiɓa ɓʉ Yeso ɨsaʉ ngiinanɨ.

⁹ Chʉkɔmʉ nʉ igbalakisie, Yeso ambʉɓwanɨa apɛɛ ɓoi ngiɓʉnanɨ ɓʉ fata, kija aɓuɓukuo ɓɔ: « Majɨkanatanɨ! » Ɓambʉka tinene nayɔ, ɓambʉgbʉkʉmɨa nʉ muwuu nayɔ kuɓoto mɨtɨndɨ.

¹⁰ Yeso ambuɓusigio ɓɔ: « Nɔɔkumokɔmʉ! Seni kʉɓɨakɨa ɓayoo ɓʉsɛmɛ ɓɔ ɓʉ́sa anʉ Galilaya. Ɓa꞊bi nɛmɛ kʉna tiga nani. »

Ɓasʉda ngiɓa ɓi꞉nye pɨmakɨa ɓʉnzaʉ ngiɓa ɓʉ Yeso

¹¹ Ati ngia ɓoi ngiɓʉnanɨ ɓi꞉nye‑ɔɔ kʉsɨnganaka nʉ kɨnda, ɓapɨmakɨa ngana ngana iɓa ɓi꞉nye kʉpɨmakɨa ɓʉnzaʉ ngiɓa ɓʉ Yeso ɓambʉsa anʉ Yɛlʉsalɛma kʉngakɨa ɓangama ɓʉ ɓakumu‑kumu moni kʉ muɓomu ngika ka꞉kyɨanɨa.

¹² Ɛɓɔ ɓangama ɓʉ ɓakumu‑kumu ɨzɔ nʉ ɓagʉgʉ ɓambʉmʉmanakɨa kuwulio ubua. Mbise ɔngɔ, ɓambʉkɔnɔ ɓɔ ɓunzo ɓasʉda falanga ʉja nadɨndɨ.

¹³ Gʉ ɛɓɔ naɓɔ ɓɔ: « Inu, sigeni tʉkʉ ɓɔ: ‹ Ɓakpataka ngiɓangɔ ɓʉ꞉ka nayɔ kuɓo nuɓutu ati ngia ki꞉nye‑ɔɔ akʉ tɔɔ. ›

¹⁴ Ngama ʉ gɨpa ukeni ɨsaʉ ngiinanɨ, isu ka꞊yakanaka tiga naɓɔ nayɔ kijiso 'ʉtʉma ambʉ inu nɔɔɗaakɔmʉ moni. »

¹⁵ Kija ɓasʉda ɓa꞉chɨka falanga, ɓambʉkyɨa ngbanga kʉndʉ aka ɓa꞉ɓusigio‑ɔɔ. Ɨsaʉ ngiinanɨ ya꞉nanzana ati ʉ Ɓayuda tii tʉkʉ ɓwanɨ, kʉɓʉya kʉndʉ ɓʉɓʉnɨ.

Yeso ʉɓwanɨa ɓakpataka ngiɓangɔ

¹⁶ Kija ɓakpataka kumi nʉ mʉngana ɓa꞉sa anʉ Galilaya akʉ ɨkpangba ngia Yeso a꞉ɓusigio ɓɔ ɓabijunikio‑ɛɛ naɓɔ.

¹⁷ Iya ɓa꞉mʉna nayɔ, ɓambʉgbʉkʉmɨa nʉ muwuu apɛɛ angɔ. Ɨkyɛmɨngana, ɓombi nga ɓɔmɔ ati ʉndaɓʉ ɓi꞉nye tʉkʉ kujatuoko.

¹⁸ Yeso ambʉka tinene naɓɔ, gʉ ɛyɔ naɓɔ ɓɔ: « Ʉpanʉ wʉ moni kʉ muɓomu ngika ka ekoo ʉ ɓisi nʉ ika ka akʉ ɨtaka, Tidoo ngiasɛmɛ a꞉nanzo ʉwɔ nzoni.

¹⁹ Kʉ ɓwanɨ, seni amati ʉ mababa kʉ ɓombi kʉ ɓuɓomu, nambuɓunicho kʉka ɓakpataka ngiɓʉsɛmɛ. Nambuɓuɓatiso akʉ ino yɨ Tidoo, Mwana, nʉ 'Ʉtʉma wɔɔ Tu.

²⁰ Ɓʉpanɨeni kʉkyananakɨa mapanʉ kʉ muɓomu ngika ma꞉ninzo. Nʉ pimiseni ɓɔ ɛmɛ ma ɨzɔ ninu makwaa kʉ muɓomu kʉɓʉya tʉkʉ akʉ 'upipio wʉ ʉɓɨɨ. »