Matayɔ 27 - Agɔmɔ ngia wʉ Ɨtakɨ-takɨ

Ɓʉsa nʉ Yeso apɛɛ ʉ Pilato

¹ Tiga kʉɓa ɔngɔ ɓʉ kpi, ɓangama ɓʉ ɓakumu‑kumu kʉ ɓuɓomu ɨzɔ nʉ ɓagʉgʉ ngiɓa ɓʉ Ɓayuda, ɓambuwulio ubua kʉtɨna 'ʉkɔmbɔ ngua wɔɔ wɛ Yeso.

² Iya ɓa꞉mʉsanga, ɓambʉsa nayɔ ɔɔ Pilato ngia i꞉nye ngama ʉ gɨpa ʉ Ɓalɔma

Ingyo ngia yɨ Yuda

³ Ati ngia Yuda ngia a꞉mʉgaba a꞉na‑ɔɔ ɓɔ ɓʉ꞉tɨna tiga 'ʉkɔmbɔ tɨnanɨ ɓɔ ɓʉwa Yeso wanɨ, ambufaniso nɨdya ikoko nadɨndɨ akʉ 'ʉtʉma. Ambʉchɨka falanga makumi kaatʉ ngiinanɨ, kija a꞉sa nayɔ kutuisio ɓakumu‑kumu nʉ ɓagʉgʉ ngiɓa ɓʉ Ɓayuda.

⁴ Ambuɓusigio ɓɔ: « Ma꞉kyɨa bɛ ɓʉɓɨɓɨ ɛmɛ kʉgaba mombi ngia ʉ꞉kyɨakɔmʉ ɨkyɛmɛ. » Ɨkyɛmɨngana, ɛɓɔ ɓambumutisio ɓɔ: « Iinanɨ yambʉkɔmʉ ɓata moni kʉndɛsʉ. Yɨnakanga tii tʉkʉ ɔwɛ! »

⁵ Kija Yuda a꞉kinyiso falanga ngiinanɨ na amati ʉ ɨkáa yɨ Asʉɓɨɨ, kija a꞉sa kʉngana ekoo.

⁶ Ɓakumu‑kumu, ɓambugwikio falanga ngiinanɨ ɓambusigo ɓɔ: « Mapanʉ ngikʉndɛsʉ kaatɨgbʉmɨa kʉnapɨa ikanzi yɨ falanga ngiakɛ amati ʉ ikpoko yɨ ɨkáa yɨ Asʉɓɨɨ. Jʉ ya falanga ngia ʉnyɨa 'upi akʉ nzɨlakiso miniki. »

⁷ Kija ɓa꞉wulio ubua, ɓambʉkʉa mʉwa wɔɔ hʉnɛ ɓɛɛka nʉ falanga ngiinanɨ. Mʉa nguʉnanɨ wi꞉nye mʉa wʉ mombi mʉngana ngia i꞉nye mio lɨkɔchɔ.

⁸ Iiya ɓaasoko‑ɔɔ mʉa nguʉnanɨ ɓɔ « Mʉa wʉ Miniki », kʉɓʉya kʉndʉ ɓʉɓʉnɨ.

⁹ Moni ngikʉnanɨ ka꞉kyananakɨa kʉkpatanakɨa nʉ moni ngika ɨgbɛ Yelemia a꞉sigo jɛnɛ ɓɔ: « Ɓa꞉chɨka mikpekpe yɨ falanga makumi kaatʉ. Ya ɨgabʉ ngia ɓaɨsalaɛlɛ ɓa꞉mʉgaba nayɔ.

¹⁰ Ɓambʉkʉa nayɔ mʉa wʉ mombi mʉngana ngia i꞉nye mio lɨkɔchɔ, ngbanga ndʉ aka Makʉʉɓɨɨ a꞉natitio jɛnɛ‑ɔɔ. »

Ɓʉtɨna 'ʉkɔmbɔ wʉ Yeso ɓɔ ɓʉmʉɓakaka ekoo ʉ mʉsalaba

¹¹ Kija ɓa꞉sa nʉ Yeso apɛɛ ʉ ngama ʉ gɨpa ngia ɓi꞉nye musoko ɓɔ Pilato. Ɛyɔ ngama ambumuɓukuo ɓɔ: « Ajʉ ɔwɛ kʉ wa ngama ʉ Ɓayuda ɓiɛ? » Yeso ambumutisio ɓɔ: « Wusigo sigoo! »

¹² Tiga ananɨ, ɓangama ɓʉ ɓakumu‑kumu nʉ ɓagʉgʉ ngiɓa ɓʉ Ɓayuda ɓambufaniso napɨa Yeso nʉ 'ʉkɔmbɔ. Ɨkyɛmɨngana, chʉkɔmʉ ambuɓutisio ɨngbaa yɨ moni gʉkʉ mɨngana.

¹³ Gʉ Pilato nayɔ ɓɔ: « Ajʉ ɔwɛ wambʉkɔmʉ‑zʉ kʉkɔ mɨkɔmbɔ ngia ɓanɔwɛ kʉnapɨa nayɔ ɨja akɛ? »

¹⁴ Ɨkyɛmɨngana, chʉkɔmʉ Yeso ambumutisio ɨngbaa yɨ moni gʉkʉ mɨngana. Yambʉmʉkyaka ɓata Ɛyɔ ngama Pilato tiga kʉ nadɨndɨ.

Ɓʉnapɨa Yeso nʉ 'ʉkɔmbɔ ɓɔ uwo tʉkʉ woni

¹⁵ Akʉ ɓisi ɓʉ ʉmbɔ wʉ Pasɨka kʉ uɓomu, ngama ʉ gɨpa i꞉nye ɓuɓunio mombi ʉ boloko mʉngana kʉ gomu, iya ungbutu wʉ ɓombi wi꞉nye baya ɓɔ ɓumuɓono.

¹⁶ Kija ati ngiinanɨ, yi꞉nye nʉ mombi ʉ boloko mʉngana ino ɓɔ Balaba iya i꞉nye mbɨanɨa nadɨndɨ.

¹⁷ Pilato ambuɓukuo ɓombi ngiɓa ɓa꞉mʉmanɨa nanɨ ɓɔ: « Nakʉkʉnda muniɓunio anɨ ati ʉ ɓombi ngiɓaɓɛ? Gʉ Balaba, gʉ Yeso ngia ɓaamusoko ɓɔ Klisito? »

¹⁸ Jʉ i꞉nye kʉmbɨa iɗo ɓɔ ɓʉ꞉ka nʉ Yeso andɔngɔ tʉkʉ aka ekoo ʉ imi.

¹⁹ Ati ngia Pilato i꞉nye‑ɔɔ ɓuwei akʉ ɓuwei ngiɓangɔ ɓɔɔ ɓʉtɨnɛ mɨkɔmbɔ, moi angɔ ambʉmʉtʉmɨa iyo ɓɔ: « Wɔɔkumuniokɔmʉ ɔwɛ amati ʉ moni kʉ mombi ɔɔ ngbingbii ngiinanɨ, jʉ nuɓutu, mʉ꞉kwaakɔmʉ tɔɔ muɗo, mʉ꞉kwaa nayɔ tʉkʉ ʉtakanaka! »

²⁰ Ɓangama ɓʉ ɓakumu‑kumu ngiɓʉnanɨ, nʉ ɓagʉgʉ ɓʉ Ɓayuda ɓi꞉nye kʉpʉpɨa ungbutu wʉ ɓombi moni ɓɔ ɓʉbaya tʉkʉ ɓɔ ɓuɓuɓunio Balaba, ɓambʉwa Yeso.

²¹ Ngama ʉ gɨpa ambuɓukuo ɓata ɓɔ: « Ati ʉ ɓombi ɓapɨnɨ ngiɓa, anɨ iya nakʉkʉnda ɓɔ muniɓunio ɛyɔ? » Ɓambumutisio ɓɔ: « Balaba! »

²² Pilato ambuɓuɓukuo ɓata ɓɔ: « Andʉ Yeso ngia ɓaamusoko ɓɔ Klisito, mʉmʉkyɨa tanɨ? » Ɛɓɔ kʉ ɓuɓomu ɓambumutisio ɓɔ: « Ɓʉmʉɓakaka ekoo ʉ mʉsalaba! »

²³ Pilato ambuɓukuo ɓata ɓɔ: « Ɓʉɓɨɓɨ tɨmanɨ iɓa ʉ꞉kyɨa wʉ? » Ɨkyɛmɨngana, ɓambʉkpakpa kʉtʉɓɨa tiga ɓʉmʉ ɓɔ: « Ɓʉmʉɓakaka ekoo ʉ mʉsalaba! »

²⁴ Ndʉ Pilato a꞉na ɓɔ ambʉkɔmʉ tii ɓata aka akyɨa‑ɔɔ ɨkyɛmɛ, nʉ ɓɔ ɓombi ɓakʉchakanaka tiga nadɨndɨ, ambʉchɨka mepo, ambʉjaɓana lɨkɔndɔ na apɛɛ ʉ ungbutu wʉ ɓombi. Gʉ ɛyɔ ɓɔ: « Miniki kʉ mombi ngiakɛ, 'ʉkɔmbɔ wɔngɔ wambʉkɔmʉ tii ɓata ekoo asɛmɛ. Wʉnɨkanga tii tʉkʉ inu! »

²⁵ Ɓombi kʉ ɓuɓomu ɓambutisio ɓɔ: « Yakyɨa tɨmanɨ, 'ʉkɔmbɔ wʉ miniki ngikangɔ wuɓio ekoo ʉndɛsʉ nʉ ɓana ɓʉndɛsʉ kʉtaa! »

²⁶ Kija Pilato a꞉ɓuɓunio Balaba, ambuɓindiso Yeso tʉkʉ fimbo. Ambuɓunzo ɛyɔ ɓɔ ɓʉmʉɓakaka ekoo ʉ mʉsalaba.

Ɓasʉda ɓʉbʉla Yeso

²⁷ Ɓasʉda ngiɓa ɓʉ Pilato ɓambʉsa tiga nʉ Yeso amati ʉ basa ngia wʉ ngama ʉ gɨpa. Kija ɛɓɔ kʉ ɓuɓomu ɓa꞉mukunguo ɓʉ kuu.

²⁸ Ɓambumuɗuo lɨpʉkʉ, ɓambumupinyiso tiga kanzʉ ɔɔ ngbo.

²⁹ Kija ɓa꞉guɓo ɨgaɨ yɨ ɓʉngama yɨ maɓʉ, ɓambʉmʉbanga akʉ 'ʉtʉ. Kija ɓa꞉muɓutiso ʉmbamba akʉ ɨkɔndɔ yɨ guɔngɔ. Ɓambufaniso kʉka kʉgbʉkʉmɨa apɛɛ angɔ ɓinyeni nayɔ kʉbʉla ɓɔ: « Majɨkanatanɨ! Ngama ʉ Ɓayuda! »

³⁰ Kija ɓi꞉nye tiga nayɔ kutokoko nʉ mukoi, ɓambʉchɨka ʉmbamba nguʉnanɨ, ɓi꞉nyeni tiga nayɔ kʉɓɛnda nawɔ akʉ 'ʉtʉ ɓʉ mba, mba.

³¹ Iya ɓa꞉pipo nayɔ kʉbʉla ɓʉ gba, ɓambumuɗuo kanzʉ ngiinanɨ, kija ɓa꞉mutuisio lɨpʉkʉ ngilangɔ, ɓambʉsa nayɔ kʉɓakaka ekoo ʉ mʉsalaba.

Ɓʉɓakaka Yeso ekoo ʉ mʉsalaba

³² Ati ngia ɛɓɔ ɓasʉda ɓa꞉ɓʉa tiga‑ɔɔ nani, ɓambujunukio nʉ ɔɔ Simoni, mombi mʉngana wʉ ɨkʉmbʉ yɨ Kulɛnɛ. Ɓambumufuɓiso mʉsalaba ngua wʉ Yeso akʉ angu.

³³ Mbise ɔngɔ, ɓambʉɓʉya tiga akʉ izi ngia ɓaasoko ɓɔ Gɔlɔgɔta, inyi yɛngɔ ɓɔ « Izi yɨ Ikpoko‑kpoko yɨ 'ʉtʉ. »

³⁴ Tiga nanɨ, ɓambunzo Yeso vinyo ngia ɓa꞉ujobo nʉ ɨkyɛmɛ yɛɛ kɔɨ. Ɨkyɛmɨngana, ati ngia a꞉ʉkana‑ɔɔ, chʉkɔmʉ ambʉkʉnda nayɔ kʉmwa.

³⁵ Mbise ɔngɔ, ɓambʉɓakaka Yeso ekoo ʉ mʉsalaba. Kija ɓa꞉ɨpakana lɨpʉkʉ ngilangɔ, 'upi nalɔ kʉya akʉ gbanda.

³⁶ Kija ɓa꞉wuloko tʉkʉ ananɨ nayɔ kʉpɨmakɨa.

³⁷ Ɓa꞉tɨndakɨa moni ngika ɓa꞉mʉɓakakɨa‑ɔɔ ekoo ʉ mʉsalaba ɓambʉkʉnapɨa nɨkʉʉ yɨ 'ʉtʉ nguangɔ, kusigo ɓɔ: « Yeso ngama ʉ Ɓayuda iya. »

³⁸ Ba꞉ɓakaka ɓombi ɓʉ ndiɓo ɓapɨnɨ ekoo mɨsalaba kʉ na anambamba ʉ Yeso. Mʉngana i꞉nye nʉ ɨkɔndɔ ngiangɔ yɨ guɔngɔ, iya wɔmɔ nʉ ɨkɔndɔ ngiangɔ yɨ moiɔngɔ.

³⁹ Ɓombi ngiɓa ɓi꞉nye kʉɓaa nanɨ, ɓi꞉nye nayɔ kʉzɨaka, nʉ kwaka mɨtʉ,

⁴⁰ ɓi꞉nye musigieni sa ɓɔ: « Ɛɛ! Ɔwɛ wa꞉sigo pongo ɓɔ wapanza ɨkáa yɨ Asʉɓɨɨ wambʉɨtɨa ɓata kʉtɔ amati ʉ makwaa kaatʉ. Hɨana‑zʉ kʉ ɔwɛ makʉɔngɔ, ndʉ waɓio Mwana ʉ Asʉɓɨɨ, wambijo akʉ mʉsalaba! »

⁴¹ Kʉndʉ ɓangama ɓʉ ɓakumu‑kumu, nʉ ɓapananakɨa ɓʉ mapanʉ nʉ ɓagʉgʉ ngiɓa ɓʉ Ɓayuda, ɓambʉmʉbʉla kʉ bʉlaa ɓi꞉nyeni kusigo ɓɔ:

⁴² « I꞉nye hiiso pongo ɓangɛ, jʉtanɨ ambʉkɔmʉ kʉhɨana ɛyɔ makʉɔngɔ! Ɛyɔ ngama ʉ ɓaɨsalaɛlɛ, iijo‑zʉ ekoo ʉ mʉsalaba, ambʉ isu kʉmʉbaya tiga kʉ bayanɨ!

⁴³ Jʉ aaɓaya Asʉɓɨɨ, nʉ a꞉sigo kʉ ɓɔ a Mwana angɔ. Ndʉ yaɓio ɓɔ Asʉɓɨɨ aamʉkʉnda kingono ʉka‑zʉ nayɔ kʉɓwanakiso kʉ ɨtakɨ‑takɨ ngia! »

⁴⁴ Ɓombi ɓʉ ndiɓo ngiɓa ɓa꞉ɓʉɓaka ekoo ʉ mʉsalaba anambamba ʉ Yeso, ɓambʉmʉzɨaka kʉ zɨakaa.

Ingyo ngia yɨ Yeso

⁴⁵ Tiga nusoti, umomo wambukuto amati ʉ ɨkʉmbʉ kʉ iɓomu tʉkʉ ɓʉ ɗipa, kʉɓʉya tʉkʉ saa wʉ nʉɓɔkwɔngɔ mbise ʉ 'usoti.

⁴⁶ Ati ngia yi꞉nye tiga‑ɔɔ ndʉ saa wʉ nʉɓɔkwɔngɔ, Yeso ambʉnatɨa nʉ iyo yɛɛ ɓʉmʉ ɓɔ: « Eli! Eli! Lama sabakatani? », inyi yɛngɔ ɓɔ: « Asʉɓɨɨ ngiasɛmɛ! Asʉɓɨɨ ngiasɛmɛ! Jʉtanɨ wʉ꞉nasɨa ɓwanɨ? »

⁴⁷ Iya ɓombi ngana ngana ngiɓa ɓi꞉nye ananɨ, ɓa꞉kɔ moni ngikʉnanɨ, kija ɓa꞉sigo ɓɔ: « Ʉkeni akʉ a‑ɛɛ kusoko Ɛlɨa. »

⁴⁸ Tʉkʉ nɨma ngiinanɨ, mombi mʉngana ati ʉndaɓʉ ambʉsa bangʉ kuno ɨkyɛmɛ yɛɛ mvʉɓʉ mvʉɓʉ amati ʉ vinyo ɔɔ ngangʉ. Ambʉɨbangana akʉ 'ʉtʉ wʉ ʉmbamba ambutitio Yeso ɓɔ ʉmwa.

⁴⁹ Ɨkyɛmɨngana, ɓangɛ ɓambusigo ɓɔ: « Mʉsɨa, kʉ́na‑zʉ aka Ɛlɨa aka‑ɔɔ nayɔ kuhiiso! »

⁵⁰ Kija Yeso a꞉natɨa ɓata nʉ iyo yɛɛ ɓʉmʉ, ambʉtɨnɨa 'ʉtʉma.

⁵¹ Tʉkʉ nɨma ngiinanɨ, wagba wʉ ɨpʉkʉ wɔɔ bamu ngua wi꞉nye unzinze akʉ mʉa wɔɔ tu nadɨndɨ amati ʉ ɨkáa yɨ Asʉɓɨɨ wambʉnatʉanɨa magba kapɨnɨ ɓʉ huwa, kʉʉngwa ekoo kʉɓʉya tʉkʉ ɛsɨ. Ɨtaka yambʉgʉgʉma, mukopi kɔɔ mʉkpɔkpɔ kambʉnatʉanɨa.

⁵² Manzaʉ kambʉgananakɨa, mɨnda yɨ ɓombi ɓɔɔ tu ɓʉ Asʉɓɨɨ ɨja yambʉjʉkana.

⁵³ Kija ɓa꞉ɓʉa akʉ manzaʉ mbise ʉ Yeso kʉjʉkana akʉ ingyo, ɓambukumunio anʉ Yelusalɛma gʉlʉ ɔɔ tu. Nanɨ, ɓombi ɓaja ɓambʉɓʉna.

⁵⁴ Ngama ʉ ɓasʉda wʉ Ɓalɔma, ɨzɔ nʉ ɓasʉda ngiɓa ɓi꞉nye naɓɔ kʉpɨmakɨa Yeso ɓambʉkwa ʉɓá nadɨndɨ ati ngia ɓa꞉na tiga‑ɔɔ ajigijo kʉɓaa, nʉ moni kʉ muɓomu ngika ka꞉kyananakɨa. Kija ɓa꞉sigo ɓɔ: « Mombi ngiakɛ, i꞉nye bɛ tʉkʉ Mwana ʉ Asʉɓɨɨ kingono! »

⁵⁵ Nanɨ, ɓoi ɓaja ɓi꞉nye ɓʉmaɨ ɓʉ kɛlɛ, kʉna moni ngika ki꞉nye kʉkyananakɨa. Kija ɓoi ngiɓʉnanɨ ɓa꞉faniso kpataka Yeso nʉ nayɔ kʉkyananakɨa kʉʉngwa tʉkʉ anʉ Galilaya.

⁵⁶ Ati ʉ ɓoi ngiɓʉnanɨ, yi꞉nye Malɨa ʉ Magadala, Malɨa ngia inye ʉ Yakɔbɔ nʉ Yɨjɛfʉ, nʉ inye ʉ ɓana ɓʉ Zɛbɛdayɔ.

Ɓʉnapɨa ndʉtʉ yɨ Yeso amati ʉ ɓʉnzaʉ

⁵⁷ Tiga nɨpasɨ, mombi ʉ lɨkyɛmɛ mʉngana amati ʉ ɨkʉmbʉ yɨ Alɨmatɛa ino ɓɔ Yɨjɛfʉ ambʉka. Ɛyɔ i꞉nye kʉ mʉngana ʉ ɓakpataka ɓʉ Yeso.

⁵⁸ Yɨjɛfʉ ambʉsa ɔɔ Pilato ngia i꞉nye ngama ʉ gɨpa kʉta ndʉtʉ yɨ Yeso. Kija Pilato a꞉titio ɓɔ ɓumunzo ɛyɔ nzoni.

⁵⁹ Kija Yɨjɛfʉ a꞉chɨka ndʉtʉ yɨ Yeso, ambʉipokoɓo nʉ malikana wʉ ɨtakɨ‑takɨ.

⁶⁰ Ambuikwaiso amati ʉ ɓʉnzaʉ ngiɓangɔ ɓʉ ɨtakɨ‑takɨ ngiɓa a꞉ɓʉchwa amati ʉ ikopi. Ambututuo ikopi yɛɛ ɨja anʉ umongu wɔngɔ yambukutunio ɓʉ gbu, mbise ɔngɔ ambʉsa yangɔ.

⁶¹ Malɨa ʉ Magadala nʉ Malɨa ngia wɔmɔ ɓi꞉nye ɓuwuloke tii tʉkʉ ananɨ apɛɛ ʉ ɓʉnzaʉ.

Ɓʉnapɨa ɓasʉda kʉpɨmakɨa ɓʉnzaʉ ɓʉ Yeso

⁶² Tiga ɓisi ngiɓa ɓa꞉ya kʉɓa, mbise ʉ ɓisi ɓɔɔ ɓʉkyananakɨɛ ɓisi ɓʉ humuo, ɓakumu‑kumu nʉ Ɓafalisayɔ ɓambʉsa ɨzɔ ɔɔ Pilato.

⁶³ Ɓambumusigio ɓɔ: « Makʉʉɓɨɨ! Ku꞉tunguo moni ngika mombi ʉ yakanaka ngia a꞉sigo, ɛyɔ‑zʉ tʉkʉ kʉkʉʉ ɓɔ: Mbise ʉ makwaa kaatʉ, a꞊jʉkana akʉ ingyo jʉkanaa.

⁶⁴ Kʉ ɓwanɨ, nzo ʉpanʉ ɓɔ ɓuɓio tʉkʉ kʉpɨmakɨa ɓʉnzaʉ kʉɓʉya tʉkʉ aka makwaa kaatʉ ngikʉnanɨ kaɓaa‑ɔɔ. Jʉ chʉkɔmʉ ɓwanɨ, ɓakpataka ngiɓangɔ ɓa꞊ka nayɔ kuɓo, ɓambʉsa kʉ꞊ɓɨakɨa ɓombi ɓɔ: ‹ Ʉ꞉jʉkana akʉ ingyo jʉkanaa ati ʉ mɨnda. › Ikanzi yɨ yakanaka ngiinanɨ, ya꞊ɓaa tiga iya yɨ pɛɛ nʉ ɓʉɓɨɓɨ tii tʉkʉ ɓʉ chɨla chɨla. »

⁶⁵ Pilato ambutisio ɓɔ: « Mɛɛ‑zʉ nanʉ ɓasʉda, seni kʉpɨmakɨa ɓʉnzaʉ ndʉ aka yɨkwananaka‑ɔɔ. »

⁶⁶ Kʉ ɓwanɨ, ɓambʉsa kʉdɨkpa ikopi akʉ umongu wʉ ɓʉnzaʉ, ɓambʉsɨa ɓasʉda nanɨ naɓɔ kʉpɨmakɨa.