Matayɔ 21 - Agɔmɔ ngia wʉ Ɨtakɨ-takɨ

Yeso ukumunio anʉ Yɛlʉsalɛma

¹ Iya ɓa꞉pa tiga tinene nʉ Yelusalɛma, kija ɓa꞉ɓʉya akʉ ɨkʉmbʉ yɨ Bɛtɛfagɛ, anambamba ʉ ɨkpangba yɨ Mijeituni, Yeso ambʉtʉma ɓakpataka ngiɓangɔ ɓapɨnɨ apɛɛ.

² Ambuɓusigio ɓɔ: « Seni akʉ ɨkʉmbʉ ngia ya apɛɛ ʉndɛnʉ akɛ. Nanɨ na꞊gbʉka punda nʉ mwana ɔngɔ ɓʉngɛ. Ɓuɓoneni nambʉnɨkyɨa naɓɔ.

³ Ndʉ mombi aniɓukuo moni ekoo ɔngɔ, musigieni ɓɔ: ‹ Makʉʉɓɨɨ anʉ taa yangɔ. › Tʉkʉ nɨma ngiinanɨ, a꞊ninzo ɛyɔ tʉkʉ nzoni. »

⁴ Moni ngikʉnanɨ ka꞉kyɨanɨa ɓwanɨ, kʉkpatanakɨa nʉ moni ngika ɨgbɛ Ɨsaya a꞉sigo jɛnɛ ɓɔ:

⁵ « Sigieni ɓombi ɓʉ gʉlʉ ʉ Siona ɓɔ: ‹ Kanganieni! Ngama ngiʉndɛnʉ akʉka andɛnʉ! A 'uhue nʉ 'ʉtʉma wʉ majɨɔ, nʉ akʉka ɓuwei ekoo ʉ punda, ekoo ʉ ɨgbɔndɔ yɨ punda, mwana ʉ punda. › »

⁶ Kija ɓakpataka ngiɓʉnanɨ ɓa꞉sa ɓambʉkyɨa ngbanga tʉkʉ ndʉ aka Yeso a꞉ɓusigio‑ɔɔ.

⁷ Ɓambʉka nʉ punda ɨzɔ nʉ mwana ɔngɔ kʉtaa. Ɓambʉnapioko lɨpʉkʉ ngilʉndaɓʉ ekoo angɔ, Yeso ambuwulo ekoo angɔ ɓʉ jika.

⁸ Ɓombi ɓaja ati ʉ ungbutu wʉ ɓombi nguʉnanɨ, ɓambufaniso naaka lɨpʉkʉ ngilʉndaɓʉ anɨngbaa. Ɓombi nga ɓɔmɔ ɓi꞉nye kʉtɨna mɨtapɨ yɨ matɨ, nʉ kʉnaaka engo anɨngbaa.

⁹ Ungbutu wʉ ɓombi ngiɓa ɓi꞉nye kʉkɨnda apɛɛ ʉ Yeso, kʉndʉ iɓa ɓi꞉nye nayɔ kʉkpata ambise ɓambufaniso nachokoo kusigo ɓɔ: « Ɨbɨba akʉ Mwana ʉ mwana ʉ Daudi! Asʉɓɨɨ umbuiso mombi ngia akʉka akʉ ino yɨ Makʉʉɓɨɨ! Ɨbɨba akʉ Asʉɓɨɨ akʉ mʉa ngua wa ekoo ɓisi nadɨndɨ! »

¹⁰ Iya Yeso a꞉ɓʉya anʉ Yelusalɛma, ɓombi kʉ ɓuɓomu ɓambʉmaa ɓʉ nzataa. Kija ɓa꞉faniso ɓukuono ɓɔ: « Mombi ngia a‑zʉ anɨ? »

¹¹ Ungbutu wʉ ɓombi ɓambumutisio ɓɔ: « Yeso iinanɨ, ɛyɔ a ɨgbɛ ngia a꞉ʉngwa anʉ Najalɛtɛ, amati ʉ gɨpa ʉ Galilaya. »

Yeso ukpinyo ɓombi ɓʉ magabʉ amati ʉ ɨkáa yɨ Asʉɓɨɨ

¹² Iya Yeso a꞉kumunio amati ʉ ɨkáa yɨ Asʉɓɨɨ, ambufaniso kpinyo ɓombi ngiɓa ɓi꞉nye kʉgabiso nʉ kʉa kumbo amati ʉ ɨkáa yɨ Asʉɓɨɨ. Ambugbukumoko ɓamɛza ɓʉ ɓombi ngiɓa ɓaaɓaliso falanga, nʉ muweikie kʉ ɓombi ngiɓa ɓi꞉nye kʉgaba ɓapizo.

¹³ Gʉ ɛyɔ naɓɔ ɓɔ: « Ɓa꞉tɨndakɨa ɓɔ: ‹ Ɨkáa ngiisɛmɛ ɓa꞊ɓuisoko ɓɔ ɨkáa yɨ nɨta Asʉɓɨɨ. › Ɨkyɛmɨngana, inu nʉ꞉ɨnɨtanakiso tiga izi yɛɛ junikie yɨ ɓombi ɓʉ ndiɓo! »

¹⁴ Ɓombi ɓɔɔ ɓuchwie mesu, nʉ ɓombi ɓɔɔ ɓʉjʉnganakɛ, ɓambʉka anambamba ʉ Yeso amati ʉ ɨkáa yɨ Asʉɓɨɨ, kija a꞉ɓuhiiso.

¹⁵ Kʉnɨna moni kɔɔ mʉmbangɛ ngika Yeso a꞉kyɨa, nʉ nachokoo ngia ɓana ɓi꞉nye kʉnachokoo akʉ ɨkáa yɨ Asʉɓɨɨ kusigo ɓɔ: « Ɨbɨba akʉ Mwana ʉ ngama Daudi! » Moni ngikʉnanɨ ka꞉ijo ɓangama ɓʉ ɓakumu‑kumu ɨzɔ nʉ ɓapananakɨa ɓʉ mapanʉ akʉ 'ʉtʉma ɓʉ gbe.

¹⁶ Kija ɓa꞉ɓukuo Yeso ɓɔ: « Ajʉ wakʉkɔ moni ngika ɓana ngiɓa ɓakusigo engo kʉtaa ɓiɛ? » Yeso ambuɓutisio ɓɔ: « Oo, makʉkɔ kʉtaa! Ajʉ inu nambupopokokɔmʉ sina Mubio ngika ɓɔ: ‹ Amati ʉ moni kʉ ɓana ngiɓa ɓɔɔ ɗɛ ɗɛ ɗɛ, nʉ ɓana ɓɔɔ kpala kpala ɔwɛ wa꞉ɓuiso ɨbɨba ngiisɔɔ. › »

¹⁷ Mbise ngiinanɨ, Yeso ambʉɓʉsɨa, ambʉɓʉa amati ʉ gʉlʉ, kija a꞉sa yangɔ kʉkwaa anʉ Betania.

Yeso ʉʉga ɓʉtɨ ngiɓa ɓambikinye nʉ lipumo

¹⁸ Kʉɓa ɔngɔ, iya Yeso i꞉nye tiga‑ɔɔ kʉtʉa anʉ Yɛlʉsalɛma, ambʉkɔnɔ taa.

¹⁹ Ambʉna ɓʉtɨ ngiɓa ɓaaɓusoko ɓɔ mutini anambamba ʉ ɨngbaa, kija a꞉sɨngana tinene naɓɔ. Ɨkyɛmɨngana, chʉkɔmʉ ambʉna ipumo ekoo ɔngɔ gʉkʉ mɨngana, tʉkʉ manɨ ekoo ɔngɔ ɓʉ juku juku. Gʉ ɛyɔ nʉ ɓʉtɨ ngiɓʉnanɨ ɓɔ: « Kʉʉngwa ɨtakɨ‑takɨ ngiakɛ sinani nʉ sinani, ipumo ya꞊mbʉkʉmɔ sina tii ɓata ekoo asɔɔ gʉkʉ ɗɛkɛkɛ. » Gbɛgbɛ tʉkʉ ananɨ, ɓʉtɨ ngiɓʉnanɨ ɓambʉmɔkɔkɔ tʉkʉ ɓʉ waka.

²⁰ Ati ngia ɓakpataka ngiɓa ɓʉ Yeso ɓa꞉na‑ɔɔ moni ngikʉnanɨ, yambʉɓʉmbangɨa nadɨndɨ. Ɓambumuɓukuo ɓɔ: « Ɓʉtɨ ngiɓa ɓʉmɔkɔkɔ ɨkyɨkyɨɓʉmʉ tanɨ ɓɔmʉ? »

²¹ Yeso ambuɓutisio ɓɔ: « Tʉkʉ kingono, maninu kusigio ɓɔ ndʉ naɓio nʉ baya nʉ chʉkɔmʉ nʉ jatuoko amati ɔngɔ, nakwanana kʉkyɨa moni kʉɓaa ika ɛmɛ mʉ꞉kyɨa ɓʉtɨ ngiɓa. Abana piɛ tʉkʉ ɨkpangba ngiakɛ nakwanana nayɔ kusigio ɓɔ: ‹ Ɗuunio, kija wabi kʉkwa amati ʉ ɗei ɔɔ ʉja ɓʉ kyɔɔ. › Yakyɨanɨa tʉkʉ ndʉ ananɨ.

²² Ɨkyɛmɛ kʉ iɓomu ngia na꞊ta nʉ baya 'upi akʉ nɨta Asʉɓɨɨ, na꞊nyɨa nayɔ nyɨaa. »

Angu ngia wʉ Yeso akʉʉngwa gbanɨ

²³ Yeso ambukumunio ɓata amati ʉ ɨkáa yɨ Asʉɓɨɨ. Tiga ati ngia i꞉nye‑ɔɔ kʉpanɨa ɓombi, ɓangama ɓʉ ɓakumu‑kumu, ɨzɔ nʉ ɓagʉgʉ ɓʉ Ɓayuda, ɓambʉka nayɔ kuɓukuo ɓɔ: « Moni kʉ mʉɓomu ngika wakʉkyɨa engo, wa nakɔ kʉkyɨa nʉ ʉpanʉ tɨmanɨ? Nʉ anɨ kʉ a꞉nanzo ɛwɔ? »

²⁴ Yeso ambuɓutisio ɓɔ: « Ɛmɛ, ma‑zʉ ninu kʉ kuɓukuo ɨngbaa yɨ moni. Ndʉ nanatisio, kija ɛmɛ ma꞊nɨɓɨa tiga ɓɔ ʉpanʉ ngua makʉkyɨa nawɔ moni ngikʉnanɨ wakʉʉngwa gbanɨ.

²⁵ Uɓatiso ngua Yʉanɨ i꞉nye ɓatiso wa꞉ʉngwa ekoo ʉ ɓisi gʉ ɓɔ wa꞉ʉngwa ɔɔ ɓombi? » Kija ɓa꞉faniso yakanaka ati ʉndaɓʉ kusigo ɓɔ: « Ndʉ kasigo ɓɔ wa꞉ʉngwa ekoo ʉ ɓisi, atiɓukuo ɓɔ: ‹ Akʉ moni kʉ ɨmanɨ tiga na꞉mʉbayakɔmʉ? ›

²⁶ Ndʉ kasigo ɓɔ wa꞉ʉngwa ɔɔ ɓombi, kʉpɨmɨeni ungbutu wʉ ɓombi ngiɓa pɨmɨaa. Jʉ ɛɓɔ kʉ ɓuɓomu ɓaachɨka Yʉanɨ ndʉ ɨgbɛ. »

²⁷ Kija ɓamutisio ɓɔ: « Isu kambʉkʉmbɨa. » Gʉ Yeso naɓɔ ɓɔ: « Abana gʉ ɛmɛ, mambʉkʉnɨɓɨa kʉ ɓwanɨ ɓɔ ʉpanʉ ngua makʉkyɨa nawɔ moni ngika wakʉʉngwa gbanɨ. »

Yeso unzo isisinio ekoo ʉ ɓana ɓapɨnɨ

²⁸ Yeso ambʉmatɨa ɓata kusigo ɓɔ: « Itungwio ngiindɛnʉ ya tanɨ ekoo ʉ isisinio ngiakɛ? Yi꞉nye nʉ gue mʉngana ngia i꞉nye nʉ ɓana ɓangɔ ɓɔɔ gue ɓapɨnɨ. Kija gue ngiinanɨ a꞉sigio mwana angɔ ngia pʉta ɔngɔ ɓɔ: ‹ Mwana asɛmɛ! Ɓʉɓʉnɨ makʉkʉnda ɓɔ wasaaka kyɨa kuu amati ʉ watɨnɨ wʉ mijabibo nguʉsɛmɛ. ›

²⁹ Kija a꞉tatɨa ɨsɛ ɓɔ: ‹ Mambʉkɔmʉ kʉsa! › Ɨkyɛmɨngana, mbise ɔngɔ, ambunicho itungwio ngiangɔ, ambʉsa kʉkyɨa kuu tʉkʉ sanɨ.

³⁰ Mbise ɔngɔ, ɛyɔ gue ngiinanɨ ambusigio mwana ngia wɔmɔ kʉ ɓwanɨ. Gʉ ɛyɔ gwa ngiinanɨ nayɔ ɓɔ: ‹ Oo, tidoo, mabi bii! › Ɨkyɛmɨngana, mbise ɔngɔ chʉkɔmʉ ambʉsa. »

³¹ « Ati ʉ ɓana ɓapɨnɨ ngiɓʉnanɨ, anɨ iya a꞉kyɨa ɓʉkʉnda ngiɓa ɓʉ ɨsɛ? » Ɓambumutisio ɓɔ: « Mwana ngia ʉ pɛɛ. » Kija Yeso a꞉ɓʉsigio ɓɔ: « Tʉkʉ kingono, maninu kusigio ɓɔ, ɓandɔmbɛ ɓɔɔ ɓulipise manzanza, ɨzɔ nʉ langaka, ɓa꞊nɨɓaa sina kukumunio amati ʉ Ɓʉngama ngiɓa ɓʉ Asʉɓɨɨ.

³² Jʉ ati ngia Yʉanɨ ngia i꞉nye ɓatiso ɓombi a꞉ka‑ɔɔ ninu kʉpanɨa moni kɔɔ ngbingbii apɛɛ ʉ Asʉɓɨɨ, inu na꞉mʉbayakɔmʉ. Ɨkyɛmɨngana, tiga ɓandɔmbɛ ɓɔɔ ɓulipise manzanza, ɨzɔ nʉ langaka, ɛɓɔ ɓa꞉mʉbaya tʉkʉ bayanɨ. Abana ndʉ inu na꞉na moni ngikʉnanɨ nʉ mesu kititi, na꞉nichokɔmʉ mɨtʉma ngiindɛnʉ, nʉ na꞉bayakɔmʉ kʉ ɓwanɨ. »

Yeso unzo isisinio ekoo ʉ ɓombi ɓʉ ɨhʉna ɓɔɔ ɓɨɓɨ

³³ Kija Yeso a꞉sigo ɓata ɓɔ: « Ʉkeni ɓata isisinio nga yɛmɔ. Yi꞉nye nʉ mombi ngia a꞉hʉna watɨnɨ wʉ mijabibo, ambuukunguo nʉ aga ɓʉ kuu. Ambʉmba ʉpɨa wɔɔ naminyoke lipumo lʉ mijabibo. Ambʉtɨa aga mʉngana ɔɔ ikongo ɓʉ tʉa, aka ekoo ʉ pɨmakɨa watɨnɨ. Mbise ɔngɔ, ambunzo watɨnɨ nguʉnanɨ akʉ lɨkɔndɔ lʉ ɓombi ɓʉ kuu, kija a꞉sa kɨnda.

³⁴ Iya wati wɔɔ bʉɛ masɔɔ wa꞉ndana nayɔ, ambʉtʉma ɓombi ɓʉ kuu ngiɓangɔ ɔɔ ɓombi ɓʉ ɨhʉna ngiɓʉnanɨ, kʉchɨka masɔɔ nga kangɔ.

³⁵ Ɨkyɛmɨngana, ɛɓɔ ɓombi ɓʉ ɨhʉna ngiɓʉnanɨ, ɓambʉfa ɓombi ɓʉ kuu ngiɓʉnanɨ. Mʉngana ʉndaɓʉ ɓambumutio nʉ ɓɛnda tʉkʉ ɓʉ sɛkɛ. Ɓambʉwa gwa ngia wɔmɔ. Iya wɔmɔ ɓata, ɓambʉmʉɓɛnda nʉ mukopi.

³⁶ Mbise ɔngɔ, ambʉtʉma ɓata ɓombi ɓʉ kuu nga ɓɔmɔ, tiga ɓaja kʉɓaa iɓa a꞉ɓʉtʉma pɛɛ. Ɨkyɛmɨngana, ɓambʉɓʉkyananaka ɓata kʉndʉ ɓa꞉kyɨa iɓa ɓʉ pɛɛ.

³⁷ Tiga akʉ 'upipio, ambʉtʉma tii tʉkʉ mwana ngiangɔ ɔɔ gue inyeni kusigo ɓɔ: ‹ Ya ndʉ ɓa꞊kumo pɛpɛ mwana ngiasɛmɛ kumoo. ›

³⁸ Ɨkyɛmɨngana, iya ɓombi ɓʉ kuu ngiɓʉnanɨ ɓa꞉mʉna nayɔ kʉka, ɓambufaniso yakanaka ati ʉndaɓʉ ɓɔ: ‹ Makʉʉ ʉ mʉa ngua iiya akʉka oki. Ikeni, kʉmʉweni, tiga isu kambʉdyɨa mʉa ngua. ›

³⁹ Kija ɓa꞉mʉfa, ɓambʉɓʉa nayɔ aɓei ʉ watɨnɨ wʉ mijabibo, ɓa꞉mbʉmʉwa. »

⁴⁰ Kija Yeso a꞉ɓukuo tiga ɓɔ: « Ati ngia makʉʉ ʉ watɨnɨ a꞊tʉa sina‑ɔɔ, a꞊kyɨa tiga ɓombi ɓʉ kuu ngiɓʉnanɨ tanɨ? »

⁴¹ Gʉ ɛɓɔ nʉ Yeso ɓɔ: « Ɓombi ɓɔɔ ɓɨɓɨ ngiɓʉnanɨ, a꞊ɓʉdʉka sina dʉkaa. Kija a꞊napɨa tiga ɓombi nga ɓɔmɔ amati ʉ watɨnɨ nguʉnanɨ, iɓa mbise ʉ bʉa masɔɔ, ɓakwanana nayɔ kʉ kunzo ʉkangɔ akʉ ɨjɨjɨ yɛngɔ. »

⁴² Kija Yeso a꞉ɓutisio ɓata ɓɔ: « Amati ʉ Mubio kɔɔ Tu, ajʉ nambupopokokɔmʉ sina ɓɔ: ‹ Ikopi ngia ɓabʉbʉma ɓɔɔ tɨɛ lɨkáa ɓa꞉igiso anambamba, ɛyɔ iya ya꞉ka tiga ikopi yɨ dada nadɨndɨ akʉ tungbu wʉ ɨkáa. Tʉkʉ ɛyɔ Makʉʉɓɨɨ iya a꞉kyɨa ɨkanzi yɨ moni ngikʉnanɨ. Akʉ isu, iinanɨ, ya moni kɔɔ mʉmbangɛ. ›

⁴³ Maninu kusigio tʉkʉ akʉ ɓʉmba ɓɔ: Ɓa꞊nɨhɨnɨa sina inu Ɓʉngama ngiɓa ɓʉ Asʉɓɨɨ, kija ɓa꞊nzo tiga lɨkáa lʉ ɓanza ngila la꞊kwanana kunzo masɔɔ. [

⁴⁴ Mombi kʉ uɓomu ngia a꞊kwɨa ikopi ngiinanɨ a꞊ɓunzoo ɓunzoo. Nʉ mombi ngia ya꞊mʉkwɨa ekoo, ya꞊mutio tʉkʉ ɓʉ sɛkɛ sɛkɛ.] »

⁴⁵ Iya ɓangama ɓʉ ɓakumu‑kumu ɨzɔ nʉ Ɓafalisayɔ ɓa꞉kɔ nayɔ moni ngikʉnanɨ Yeso a꞉sigo, kija ɓa꞉mbɨa tʉkʉ nɨma ngiinanɨ ɓɔ unzo lisisinio ngilʉnanɨ tʉkʉ ekoo ʉndaɓʉ.

⁴⁶ Kʉ ɓwanɨ, ɓambufaniso tii tʉkʉ hata ɨngbaa ngia ɓamʉfa nayɔ. Ɨkyɛmɨngana, ɓi꞉nye kukumo tiga ungbutu wʉ ɓombi, jʉ ɓombi ɓi꞉nye chɨka Yeso ndʉ ɨgbɛ.