Matayɔ 20 - Agɔmɔ ngia wʉ Ɨtakɨ-takɨ

Yeso unzo isisinio yɨ ɓombi ɓʉ kuu

¹ Kija Yeso a꞉nzo ɓata isisinio ngia: « Ɓʉngama ngiɓa ɓa ekoo ʉ ɓisi ɓa ngbanga ndʉ gue mʉngana ngia a꞉ɓʉa kʉɓa ɓʉ cha, kʉhata ɓombi ngiɓa ɓa꞊kyɨa kuu amati ʉ watɨnɨ wʉ mijabibo nguangɔ.

² Ɓambʉkɔnɔ nʉ ɓombi ɓʉ kuu ɓɔ a꞊nzikio mombi kʉ nangana ngana 'ukpekpe wʉ ʉfalanga mungono akʉ ɓisi mʉngana. Mbise ɔngɔ ambʉɓʉtʉma akʉ kuu amati ʉ watɨnɨ wʉ mijabibo nguangɔ.

³ Tiga nʉ saa wʉ ɓeetu ngia wʉ kʉɓa ambʉɓʉa, ambʉna ɓata ɓombi nga ɓɔmɔ ɓʉmaɨ akʉ ɨmbaa tʉkʉ ɨsʉkʉɓwanɨ.

⁴ Gʉ ɛyɔ naɓɔ ɓɔ: ‹ Inu seni kʉkyɨa kuu kʉ na amati ʉ watɨnɨ wʉ mijabibo nguʉsɛmɛ. Ma꞊ninzo ʉkʉa tʉkʉ ndʉ aka yɨkwananaka‑ɔɔ. ›

⁵ Kija ɓa꞉sa. Makʉʉ ʉ watɨnɨ wʉ mijabibo ambʉɓʉa ɓata nusoti, mbise ngiinanɨ nʉ saa ngia wʉ nʉɓɔkʉɔngɔ mbise ʉ 'usoti, ambʉkyɨa ngbanga kʉndʉ iya a꞉kyɨa pɛɛ.

⁶ Tiga tine tine ndʉ saa wʉ kumi nʉ mʉngana, ambʉɓʉa ɓata. Ambʉna ɓata ɓombi nga ɓɔmɔ kʉ ɓʉmaɨ. Ambuɓuɓukuo ɓɔ: ‹ Nʉsaaka‑zʉ ɨsʉkʉɓwanɨ chʉkɔmʉ nʉkyɨa ɨkyɛmɛ jʉtanɨ? ›

⁷ Gʉ ɛɓɔ nayɔ ɓɔ: ‹ Kʉnyɨakɔmʉ nʉ mombi gʉkʉ mʉngana ngia atinzo kuu. › Kija a꞉ɓusigio ɓɔ: ‹ Seni‑tɔ kʉ kʉkyɨa kuu na amati ʉ watɨnɨ wʉ mijabibo nguʉsɛmɛ. ›

⁸ Tii tʉkʉ nɨpasɨ ɓʉ dʉʉ, gʉ makʉʉ ʉ watɨnɨ wʉ mijabibo nʉ kapita ngiangɔ ɓɔ: ‹ Soko ɓombi ɓʉ kuu, kija wa꞊nzikio mombi kʉ nangana nangana ʉkʉa nguangɔ. Wafaniso nʉ ɓombi ngiɓa mʉ꞉ɓʉchɨka mbise, wambupipio nʉ iɓa mʉ꞉ɓʉchɨka piɛ pɛɛ. ›

⁹ Ɓombi ngiɓa ɓa꞉faniso kuu nʉ saa ngia wʉ kumi nʉ mʉngana ɓambʉka, kija ɓa꞉nzo mombi kʉ nangana nangana 'ukpekpe wʉ ʉfalanga mungono.

¹⁰ Iya ɓombi ngiɓa ɓa꞉faniso kuu kʉɓa ɓa꞉ka nayɔ, ɓi꞉nye kuyo ɓɔ ɓa꞊ɓunzo ʉkʉa tiga ʉja nadɨndɨ kʉɓaa ɓangɛ. Ɨkyɛmɨngana, ɓambuɓunzo ɛɓɔ mikpekpe yɨ falanga kʉ ngana ngana.

¹¹ Iya ɓa꞉chɨka nayɔ falanga ngiinanɨ ɓʉ gba, ɓambufaniso gʉa makʉʉ ʉ watɨnɨ ɓɔ:

¹² ‹ Wunzo‑zʉ ɓombi ngiɓa ɓʉka akʉ kuu mbise falanga ngbanga nisu jʉtanɨ, ati ngia ɓʉ꞉kyɨa‑ɔɔ kuu tʉkʉ saa mʉngana. Ʉna tɔ, tiga isu ngiɓa kʉsaaka kyɨa kuu tʉkʉ ɓʉ tɛ tɛ tɛ, ɨpá yambʉtɨsa nʉ ndʉtʉ! ›

¹³ Ɨkyɛmɨngana, makʉʉ ʉ watɨnɨ ambutisio mombi mʉngana ati ʉndaɓʉ ɓɔ: ‹ Huu, adii, ɓʉɓɨɓɨ tɨmanɨ mʉ꞉nakyɨa‑ʉ? Ajʉ kʉkɔnɔkɔmʉ piɛ‑zʉ ɓɔ mananzo tʉkʉ 'ukpekpe wʉ ʉfalanga mungono ɓiɛ?

¹⁴ Chɨka 'ukpekpe wʉ ʉfalanga nguʉsɔɔ, wambʉsa! Ɛmɛ mʉkʉnda kunzo mombi ngia mʉmʉchɨka piɛ mbise ʉkʉa ngbanga kʉndʉ uwa wʉsɔɔ.

¹⁵ Ɨmanɨ iya wʉ꞉na yɛɛ ɓɨɓɨ ndʉ ma꞉kyɨa nʉ falanga ngiasɛmɛ ndʉ aka 'ʉtʉma nguʉsɛmɛ wa‑ɔɔ kʉkʉnda? Ajʉ wanɛmɛ kʉnɨa imi jʉ ma mombi ɔɔ iɗo ɓiɛ? › »

¹⁶ Yeso ambumusigio ɓata ɓɔ: « Ya ɓwanɨ, ɓombi ngiɓa ɓa ambise, ɓaɓio sina tiga apɛɛ. Nʉ ɓiga ngiɓa ɓa apɛɛ, ɓaɓio sina tiga ambise. »

Yeso ʉɓɨanɨa ingyo nʉ jʉkana akʉ ingyo akʉ nɨsɨ kaatʉ ɔngɔ

¹⁷ Ati ngia Yeso i꞉nye‑ɔɔ kʉsa anʉ Yelusalɛma, ambusoko ɓakpataka ngiɓangɔ kumi nʉ ɓapɨnɨ anambamba, ambufaniso naɓɔ sigio nʉ kɨnda ɓɔ:

¹⁸ « Ʉkeni! Ɨtakɨ‑takɨ ngiakɛ kakʉsa anʉ Yelusalɛma. Nani, ɓa꞊gaba Mwana ngia ʉ Mombi akʉ lɨkɔndɔ lʉ ɓangama ɓʉ ɓakumu‑kumu, nʉ ɓapananakɨa ɓʉ mapanʉ. Ɛɓɔ ɓa꞊tɨna 'ʉkɔmbɔ ɓɔ ɓʉmʉwa tʉkʉ wanɨ.

¹⁹ Mbise ɔngɔ, ɓa꞊munzo akʉ lɨkɔndɔ lʉ ɓombi ngiɓa ɓambʉkɔmʉ Ɓayuda. Kija ɛɓɔ ɓombi ngiɓʉnanɨ ɓa꞊mʉnʉa, ɓambʉmʉɓɨnda fimbo, ɓambʉmʉɓakaka ekoo ʉ mʉsalaba. Ɨkyɛmɨngana, akʉ ɓisi ɓʉ kaatʉ, a꞊jʉkana akʉ ingyo jʉkananɨ. »

Inye wʉ ɔɔ Yʉanɨ nʉ Yakɔbɔ ʉɓʉtɨa lizi amati Ɓʉngama ngiɓa ɓʉ Yeso

²⁰ Mbise ngiinanɨ, ɓana ɓʉ Zɛbɛdayɔ ɓapɨnɨ nʉ ɔɔ inye ʉndaɓʉ, ɓambʉka anambamba ʉ Yeso. Inye ʉndaɓʉ ambʉgbʉkʉmɨa nʉ muwuu apɛɛ angɔ, nayɔ kʉta ɨkyɛmɛ.

²¹ Gʉ Yeso nayɔ ɓɔ: « Wakʉkʉnda tanɨ? » Ambumutisio ɓɔ: « Tidoo‑ee, ambʉ wunzo‑zʉ ɓaka ʉpanʉ ɓɔ, ati ngia wa꞊ɓio‑ɔɔ akʉ Ɓʉngama ngiɓʉsɔɔ, ɓana ngiɓʉsɛmɛ ɓa ɓapɨnɨ aɓɛ mʉngana uwulo akʉ ɨkɔndɔ ngiisɔɔ yɨ guɔngɔ, iya wɔmɔ akʉ ɨkɔndɔ ngiisɔɔ yɨ moiɔngɔ. »

²² Yeso ambumutisio ɓɔ: « Ɨkyɛmɛ ngia nakʉta engo nambʉkɔmʉ nayɔ kʉmbɨa. Ʉpata wʉ ɓʉka‑ɓʉkaɨ ngua ɛmɛ makʉsa kʉmwa engo, ajʉ inu na kʉ ikanzi ngia na꞊ʉmwa kʉ mwanɨ ɓiɛ? » Ɓambumutisio ɓɔ: « Oo, ka꞊ʉmwa mwanɨ. »

²³ Kija Yeso a꞉ɓutisio ɓɔ: « Ndʉ yaɓio kʉmwa ʉpata wʉ ɓʉka‑ɓʉkaɨ, inu na꞊ʉmwa mwanɨ! Ɨkyɛmɨngana, moni ngika kɔɔ wulise ɓombi akʉ ɨkɔndɔ ngiisɛmɛ yɨ guɔngɔ, gʉ ɓɔ iya yɨ moiɔngɔ, chʉkɔmʉ ɛmɛ kʉ matɨna moni kɔngɔ. Lizi ngilʉnanɨ la tʉkʉ akʉ ɓombi ngiɓa Asʉɓɨɨ Tidoo a꞉lɨtambanaka aka ekoo ʉndaɓʉ. »

²⁴ Ati ngia ɓatitima ngiɓɔmɔ kumi ɓa꞉kɔ‑ɔɔ moni ngikʉnanɨ ɔɔ Yʉanɨ nʉ manye Yakɔbɔ ɓa꞉ta, yambʉɓʉkyɨa ɓɨɓɨ akʉ 'ʉtʉma.

²⁵ Kija Yeso a꞉ɓusoko, ambuɓusigio ɓɔ: « Nakʉmbɨa iɗo ɓɔ ɓangama ɓʉ mababa kʉ ɓombi ɓʉ ɨtaka ngia ɓaakyananaka ɓombi ɓʉmbʉmʉ. Nʉ ɓombi ɓɔɔ ɓʉkpɔkpɔ ɓʉ ɨtaka ngia ɓaakʉnda tʉkʉ kʉkʉmɨa ɓombi.

²⁶ Ɨkyɛmɨngana, akʉ inu yɨkwananakɔmʉ kuɓio ɓwanɨ. Mombi ngia akʉnda kuɓio ngama ati ʉndɛnʉ, ʉkwanana kuɓio mombi ʉ kuu ʉndɛnʉ.

²⁷ Nʉ mombi kʉ uɓomu ngia akʉkʉnda kuɓio mombi ʉ pɛɛ ati ʉndɛnʉ, ʉkwanana kuɓio bayo ʉ ɓombi kʉ ɓuɓomu.

²⁸ Kʉ ɓwanɨ, Mwana ngia ʉ Mombi a꞉kakɔmʉ ɓɔ ɓombi ɓuɓio nayɔ kʉkyananakɨa, ɨkyɛmɨngana a꞉ka kʉkyananakɨa ɓombi, nʉ kunzo ʉɓɨɨ nguangɔ ndʉ apɛpɛ kuhiiso ɓombi ɓaja. »

Yeso uhiiso ɓombi ɓɔɔ ɓuchwie mesu ɓapɨnɨ

²⁹ Iya ɔɔ Yeso ɓa꞉ʉngwa nanɨ anʉ Yeliko, ungbutu wʉ ɓombi wɔɔ ʉja wambufaniso nayɔ kpata mbise ɓʉ hoo.

³⁰ Ɓombi ɓɔɔ ɓuchwie mesu ɓapɨnɨ ɓi꞉nye ɓuwuloke anambamba ʉ ɨngbaa. Iya ɓa꞉kɔ ɓɔ Yeso akʉɓaa, ɓambʉnatɨa nʉ iyo yɛɛ ɓʉmʉ ɓɔ: « Huu Makʉʉɓɨɨ, Mwana ʉ mwana ʉ Daudi! Tɨnɨa ɓaka tʉkʉ ikoko! »

³¹ Ati ngia ɓombi ɓa꞉kɔ‑ɔɔ ɓwanɨ, ɓambʉɓʉngbaakɨa ɓɔ ɓʉkata. Ɨkyɛmɨngana, ɓambututuo tʉkʉ natɨa tiga nʉpɛɛ ɓɔ: « Huu Makʉʉɓɨɨ, Mwana ʉ mwana ʉ Daudi! Tɨnɨa ɓaka ikoko! »

³² Kija Yeso a꞉maa, ambuɓusoko ambuɓuɓukuo ɓɔ: « Nakʉkʉnda ɓɔ mʉnɨkyɨa ɨmanɨ? »

³³ Ɓambumutisio ɓɔ: « Makʉʉɓɨɨ! Kakʉkʉnda ɓɔ mesu ngikʉndɛsʉ kʉgananɨa ɓaka. »

³⁴ Yeso ambʉɓʉnɨa ikoko, kija a꞉ɓoto mesu ngikʉndaɓʉ. Tʉkʉ nɨma ngiinanɨ, mesu kambʉɓʉgananɨa. Kija ɓa꞉faniso kpata Yeso.